جارىسقا قاتىناسقان كاسىپورىن ۋاكىلى نىساننىڭ جارنامالىق تانىستىرۋىن كورسەتۋدە.
7 – ايدىڭ 25 - كۇنى ٴۇرىمجى قالاسىنىڭ 8 ـ كەزەكتى جاڭالىق اشۋ، شارۋاشىلىق قۇرۋ جارىسىنىڭ كاسىپ سالالىق جارىسى رەسمي باستالدى، 2 كۇندىك جارىس بارىسىندا، توپتان وزىپ شىققان 47 كاسىپورىن 5 كاسىپ سالا تۇرىنە ٴبولىنىپ، ناق مايداندا جارنامالىق تانىستىرۋ جاسايدى، باعالاۋ كوميتەتى سول مايداندا ٴنومىر قويادى. وسى رەتكى كاسىپ سالالىق جارىستا بەينەسى ۇزدىك كاسىپورىندار ساياساتتىق قولداۋعا يە بولىپ، جارىستىڭ سەلبەسكەن بانكەسى كاسىپورىن قارىز اقشاسىنان الدىمەن قولداۋ كورسەتەدى. سوڭعى مەزگىلدە اۆتونوميالى رايوندىق جارىستىڭ ٴبولىپ بەرگەن سانىنا ساي ۇزدىك نىساندار جارىسىنا قاتىناسۋعا كورسەتىلەدى.
7 – ايدىڭ 25 – كۇنى تۇستەن بۇرىن قىسقا عانا باستالۋ سالتىنان كەيىن، ٴۇرىمجى قالاسىنىڭ 8 – كەزەكتى جاڭالىق اشۋ، شارۋاشىلىق قۇرۋ جارىسىنىڭ كاسىپ سالالىق جارىسى قاۋىرت باستالدى. جارىسقا قاتىناسقان ٴاربىر كاسىپورىنعا 8 مينۋتتىق نىساندى جارنامالاۋ ۋاقىتى بەرىلدى، باسقارۋ، فينانس، سونداي ـ اق جوعارى تەحنيكا سالاسىنان كەلگەن 5 باعالاۋشى ناق مايداندا سۇراۋ قويدى ٴارى باستىسى نىساننىڭ عىلىم ـ تەحنيكادا جاڭالىق اشۋ سيپاتى مەن بازار بولاشاعىنا باعالاۋ جۇرگىزىپ، سول مايداندا ٴنومىر قويدى.
”ماماندار ٴبىزدىڭ بۇل نىسانىمىزعا اسا رازى بولدى، سونىمەن بىرگە ورىندى پىكىرلەرىن ورتاعا قويدى، اسا تابىستى بولعانداي سەزىندىم“. جارىسقا قاتىناسقان كاسىپورىن، شينجياڭ حىڭتاي جۋيۋان جاڭاشا قۇرىلىس ماتەريالدارى شەكتى سەرىكتەستىگىنىڭ باس ديرەكتورى ۋاڭ لي بىلاي دەدى: قۇرىلىس ماتەريالدارى كاسىپورنى رەتىندە، سوڭعى جىلدارى كاسىپورىنىمىز زەرتتەۋ ـ اشۋعا ۇسىنىلىمدى ۇزدىكسىز ارتتىرىپ، ورنىقتى زەرتتەۋ ـ اشۋ قوسىنىن قالىپتاستىردى. وسى رەت ٴبىزدىڭ جارىسقا قاتىناستىرعان نىسانىمىز قالانىڭ قۇرىلىس قوقىر ـ قوقسىقتارىن قايتا پايدالانۋدى ماقسات ەتكەن، بۇل كاسىپورىننىڭ دامۋىنا جاڭا جول اشتى ٴارى ەكولوگيالىق ورتانى قورعاۋداعى قيىن ماسەلەلەردى ويداعىداي شەشتى.
شينجياڭ ليباڭ عىلىم ـ تەحنيكا شەكتى جاۋاپكەرشىلىك سەرىكتەستىگى وسى رەت ەڭ جاڭا زەرتتەپ اشقان ٴونىمى ناسوستىڭ الدىنداعى قالقىمالى سۋ كۇشىمەن قوزعالاتىن ٴوزى تازارتاتىن سۇزگىشتى الا كەلدى، بۇل باستىسى، اۋىل شارۋاشىلىعىندا سۋارۋعا ىستەتىلەتىن سۋدىڭ تازا ٴسۇزىلۋىن شەشىپ، قۇبىر جولىنىڭ بىتەلۋىن جەڭىلدەتىپ، ەگىس اتىزدارىنىڭ ۇزدىكسىز، ورنىقتى سۋارىلۋىنا كەپىلدىك ەتەدى.
سەرىكتەستىك جاۋاپتىسى تۋ شيڭجى بىلاي دەدى: سوڭعى جىلدارى عىلمي زەرتتەۋ ۇسىنىلىمىن ارتتىرۋ ارقىلى كاسىپورىن بازار قاجەتىنە قاراي ٴونىم جابدىقتارىن ۇزدىكسىز جاقسارتتى ٴارى بىلتىر ءساتتى تۇردە جوعارى، جاڭا تەحنيكالىق كاسىپورىن بولىپ تۇراقتاندىرىلدى، وسى رەت جاڭالىق اشۋ، شارۋاشىلىق قۇرۋ جارىسىنا قاتىناسىپ، ٴتىپتى دە كوپ كاسىپتەستەرمەن تانىسىپ، كوپشىلىكتىڭ ارتىقشىلىقتى قابىلداپ، ولقىلىقتى تولىقتاپ، شينجياڭ اۋىل شارۋاشىلىعىنىڭ جوعارى ساپالى دامۋىن بىرگە ىلگەرىلەتۋىن ٴۇمىت ەتەمىن.
ۇعىسۋعا قاراعاندا، ٴۇرىمجى قالاسىنىڭ 8 ـ كەزەكتى جاڭالىق اشۋ، شارۋاشىلىق قۇرۋ جارىسى باستالعاننان كەيىن، العاشىندا جيىنى 140 كاسىپورىن جارىسقا قاتىناسۋعا تىزىمدەلىپ، 78 كاسىپورىن جارىسقا قاتىناسۋ تولىمدىلىعىنا يە بولعان، جەلىدە تاڭداۋ ارقىلى ەڭ سوڭىندا 47 كاسىپورىن كاسىپ سالالىق جارىسىنا قاتىناسۋعا ەنىپ، جاڭا ۇرپاق ينفورماتسيا تەحنيكاسى، بيولوگيالىق ٴدارى ـ دارمەك، ەنەرگيا ۇنەمدەپ قورشاعان ورتانى قورعاۋ، جاڭا ماتەريال جانە جوعارى دەڭگەيلى جابدىق جاساۋ سياقتى 5 كاسىپ سالالىق ءتۇر بويىنشا جارىسقا قاتىناسقان.
”بيىل ۇرىمجىدەگى تىزىمدەلگەن جانە جارىسقا قاتىناسقان كاسىپورىنداردىڭ سانى بىلتىرعىدان كوپ، كاسىپورىندار جاڭالىق اشۋعا، زەرتتەۋگە اناعۇرلىم ٴمان بەرىپ، نىساندار دا بازارمەن بولعان بايلانىسىن اناعۇرلىم قويۋلاتتى“. اۆتونوميالى رايوندىق جوعارى، جاڭا تەحنيكا كاسىپورىندارىن دامىتۋدى جەبەۋ قوعامىنىڭ باس حاتشىسى ۋاڭ فۋجۋان بىلاي دەپ تانىستىردى: وسى رەت سارالانعان نىسانداردىڭ بۇكىل شينجياڭ جارىسىندا جاقسى ناتيجەگە قول جەتكىزىپ، اناعۇرلىم كوپ قارجى مەن ساياساتتىق قولداۋعا قول جەتكىزەتىندىگىنە سەنەمىن.
ٴۇرىمجى قالالىق عىلىم ـ تەحنيكا مەكەمەسى پارتيا باسشىلىق گرۋپپاسىنىڭ ورىنباسار شۋجيى، مەكەمە باستىعى لو جيانگۋاڭ بىلاي دەپ تانىستىردى: ٴۇرىمجى جاڭالىق اشۋ، شارۋاشىلىق قۇرۋ جارىسى 7 كەزەك ٴساتتى وتكىزىلدى، جارىستىڭ ۇزدىكسىز وتكىزىلۋى ارقىلى قىرۋار جاڭالىق اشۋ دارىندىلارى، تەحنيكا جەتىستىكتەرى، شارۋاشىلىق قۇرۋ كاپيتالى سياقتى وزەكتى فاكتورلار شوعىرلانىپ، عىلىم ـ تەحنيكا جەتىستىكتەرىن كادەگە جاراتۋدى جانە ورتا، شاعىن، ۇساق كاسىپورىنداردىڭ جەتىلۋىن، العا باسۋىن جەبەپ، ٴۇرىمجىنىڭ جاڭالىق اشۋ ارقىلى دامۋعا دەم بەرۋ ستراتەگياسىن ىشكەرىلەي دايەكتىلەندىرىپ، تياناقتاندىرىپ، الەۋمەتتىڭ شارۋاشىلىق قۇرۋىن، بارشا جۇرتتىڭ جاڭالىق اشۋىن ىلگەرىلەتىپ، جاڭا قوزعاۋشى قۋاتتى، جاڭا ەكونوميكانى، جاڭا كاسىپ كۇيىن جەتىلدىرۋدەگى جانە دامىتۋداعى ماڭىزدى شاراعا اينالىپ، ٴۇرىمجىنىڭ ناقتى ەكونوميكاسىنىڭ دامۋىن ىلگەرىلەتۋگە پارمەندى تىرەك ازىرلەدى. (ماقالاسىن جازىپ، سۋرەتىن تۇسىرگەن ٴتىلشى لياڭ لى)
اۋدارعان: قادىر ماقان
