رايونىمىزداعى وسى قاتاردان ورىن العان تۇڭعىش مەملەكەت مەنشىگىندەگى كاسىپورىنعا اينالدى
7 - ايدىڭ 21 - كۇنى، شينجياڭ كورلا جۇڭتاي مۇناي حيميا شەكتى جاۋاپكەرشىلىك سەرىكتەستىگىنىڭ قىزمەتكەرلەرى مەڭگەرۋ ورتالىعىندا قىزمەت ىستەۋدە. وسى سەرىكتەستىك شينجياڭنىڭ توقىماشىلىق، كيىم - كەشەك كاسىپ سالاسى تىزبەگىن ۇزارتۋ، تولىقتاۋ، كۇشەيتۋدى ءتۇيىندى ارقاۋ ەتىپ، شينجياڭنىڭ ”قورىتۋ - حيميا - توقىماشىلىق“ ءبىر تۇلعالانعان كاسىپ سالاسىنىڭ دامۋىن ىلگەرىلەتتى.
□ سۋرەتتى جاڭ چىڭدۇڭ تۇسىرگەن
انار بۇلت \ شينجياڭ گازەتىنىڭ ءتىلشىسى شى شين 8 - ايدىڭ 3 - كۇنى ۇرىمجىدەن حابارلايدى: 8 - ايدىڭ 3 - كۇنى 2022 - جىلعى «بايلىق» جۋرنالى دۇنيە جۇزىندەگى 500 قۋاتتى كاسىپورىننىڭ قاتارىن جاريالادى، شينجياڭ جۇڭتاي (توبى) شەكتى جاۋاپكەرشىلىك سەرىكتەستىگى 434 - ورىندى يەلەپ، رايونىمىزدان قاتارعا ەنگەن تۇڭعىش مەملەكەت مەنشىگىندەگى كاسىپورىنعا اينالدى.
”دۇنيە جۇزىندەگى 500 قۋاتتى كاسىپورىننىڭ قاتارىنان ورىن الۋ ايگىلى ماركا مەن ناقتى قۋاتتىڭ مويىندالعاندىعىن كورسەتىپ قانا قويماي، ونان دا ماڭىزدىسى، جاڭا ساحنادا اناعۇرلىم زور جاۋاپكەرشىلىك پەن مىندەتتى ۇستىنە الاتىندىعىن كورسەتتى“، - دەدى جۇڭتاي توبى پارتكومىنىڭ شۋجيى، باسالقاسى ۋاڭ حۇڭشين.
”مەكتەپ قۇرعان زاۆودتان دامىپ جارناسى بازارعا سالىنعان سەرىكتەستىك بولىپ، ودان زورايىپ دۇنيە جۇزىندەگى 500 قۋاتتى كاسىپورىنعا اينالدى. مەملەكەت مەنشىگىندەگى مال - مۇلىك، مەملەكەت مەنشىگىندەگى كاسىپورىنداردىڭ شينجياڭدا بولاشاعى نۇرلى“. اۆتونوميالى رايوندىق مەملەكەت مەنشىگىندەگى مال - مۇلىكتى باقىلاۋ - باسقارۋ كوميتەتىنىڭ ورىنباسار مەڭگەرۋشىسى جاڭ جينپيڭ مىنالاردى ءبىلدىردى: جۇڭتاي توبىنىڭ دۇنيە جۇزىندەگى 500 قۋاتتى كاسىپورىننىڭ قاتارىنان ورىن الۋى شينجياڭنىڭ دۇنيە جۇزىندەگى بىرەگەي كاسىپورىن قۇرۋ جاعىندا ناقتى ناتيجەگە قول جەتكىزگەندىگىن كورسەتتى، ول − مەملەكەت مەنشىگىندەگى كاسىپورىنداردىڭ شينجياڭ سىندى ىرىستى مەكەندى تياناق ەتىپ، جاڭا دامۋ ۇستانىمىن دايەكتىلەندىرىپ، جوعارى ساپالى دامۋدى العا ىلگەرىلەتكەندىگىنىڭ ناقتى دالەلى.
جۇڭتاي توبىنىڭ توركىنى بۇرىنعى شينجياڭ 1 - تامىز اۋىل شارۋاشىلىق شۋەيۋانى 1958 - جىلى قۇرعان اۋىل شارۋاشىلىق دارىلەرى زاۆودى بولاتىن، 1962 - جىلى اتى شينجياڭ كۇيدىرگىش ءسىلتى زاۆودى دەپ وزگەرتىلدى.
بىرتىندەپ دامۋعا ساي، كۇيدىرگىش ءسىلتى زاۆودىنىڭ اتى حلورلى ءسىلتى زاۆودى بولىپ وزگەردى. 21 - عاسىرعا قادام تاستاعاننان كەيىن، حلورلى ءسىلتى زاۆودى جارنالىق ءتۇزىمدى كاسىپورىنعا وزگەرىپ، جۇڭتاي حيمياسى دۇنيەگە كەلدى. 10 جىلدان كەيىن اۆتونوميالى رايوندىق حالىق ۇكىمەتى جۇڭتاي حيمياسى نەگىزىندە جۇڭتاي توبىن قۇردى. بىلتىر جۇڭتاي توبى مەملەكەت مەنشىگىندەگى كاپيتالمەن قارجىلاندىراتىن سەرىكتەستىك بولىپ وزگەرىپ قۇرىلىپ، حيميا ونەركاسىبى، اۋىل شارۋاشىلىعى، زات اينالىمى سىندى ”3 ۇلكەن نەگىزگى كاسىپتى“ قالىپتاستىردى.
”جۇڭتاي توبى تۇڭعىش رەت دۇنيە جۇزىندەگى 500 قۋاتتى كاسىپورىن قاتارىنان ورىن الىپ، شينجياڭداعى مەملەكەت مەنشىگىندەگى كاسىپورىنداردىڭ رەفورمانى جاپپاي تەرەڭدەتۋ، كاسىپورىنداردىڭ ومىرشەڭدىك كۇشى مەن دامۋ قوزعاۋشى كۇشىن قاۋلاتۋ، وزەكتى باسەكەلىك قۋاتىن جوعارىلاتۋ، كاسىپورىننىڭ ونىمدىلىگىن كەڭەيتۋ سياقتى جاقتاردا تىڭ ساتىعا كوتەرىلگەندىگىن ايگىلەدى“، - دەدى شينجياڭ قوعامدىق عىلىمدار اكادەمياسى ەكونوميكا زەرتتەۋ ورنىنىڭ ورىنباسار باستىعى ۋاڭ حۇڭلي.
قازىر جۇڭتاي توبى ”3 ۇلكەن نەگىزگى كاسىپكە“ قىزمەت وتەيتىن حيميا ونەركاسىبى، اۋىل شارۋاشىلىعى، زات اينالىمى ساۋداسى، توقىماشىلىق، كيىم - كەشەك، فينانس، جاڭا ەنەرگيا، وقۋ - اعارتۋ، عىلمي زەرتتەۋ سىندى 7 ۇلكەن كاسىپ سالاسىن بەلسەنە تۇلعالاۋدا. 2021 - جىلى ساتىلىم كىرىسى 212 ميلليارد 100 ميلليون يۋانعا جەتتى.
ۋاڭ حۇڭلي مىنالاردى ءبىلدىردى: جۇڭتاي توبىنىڭ جوعارى ساپالى دامۋ جولى شينجياڭداعى مەملەكەت مەنشىگىندەگى كاسىپورىنداردىڭ باسىمدىقتى ساۋلەلەندىرۋ، قۇرىلىمدى ساپالىلاندىرۋ، كاسىپ سالاسىن ورنالاستىرۋ، ونىمدىلىكتى جوعارىلاتۋ، جەرگىلىكتى ورىننىڭ ەكونوميكاسىن گۇلدەندىرۋىندەگى تابىستى امالياتى، شينجياڭداعى مەملەكەت مەنشىگىندەگى كاسىپورىنداردىڭ رەفورماسى مەن دامۋىندا جوعارى ونىمدىلىكپەن بىرلەسە قيمىلدايتىن، حالىق تۇرمىسىنا تىعىز جاناسا وتىرىپ جوعارى ساپالى دامۋدى ىلگەرىلەتەتىن، بىرگە قۇرىپ، بىرگە يگىلىكتەنىپ، جۇرت تىلەگىن ۇيىستىرۋدى ايگىلەۋدىڭ تابىستى امالياتى.
بيىل شينجياڭنان 3 كاسىپورىن دۇنيە جۇزىندەگى 500 قۋاتتى كاسىپورىن قاتارىنان ورىن الدى، قالعان 2 كاسىپورىن جەكە - جەكە 150 - ورىندى يەلەگەن تايپيڭياڭ قۇرىلىسى جانە 453 - ورىنداعى گۋاڭحۇي توبى.
