شينحۋا اگەنتتىگىنىڭ 8 - ايدىڭ 4 - كۇنى پنومپەننەن بەرگەن حابارى. جەرگىلىكتى ۋاقىت 2022 - جىلى 8 - ايدىڭ 4 - كۇنى مەملەكەتتىك كەڭەستىڭ مۇشەسى، قوسىمشا سىرتقى ىستەر مينيسترى ۋاڭ ي پنومپەندە شىعىس ازيا سەلبەستىگى جەلىلەس سىرتقى ىستەر مينيسترلەرى ماجىلىسىنە قاتىناسقان كەزدە امەريكا جاقتىڭ جۇڭگونىڭ يەلىك ۇقىعىنا سۇعاناقتىق جاساعان ارانداتۋشىلىق ارەكەتى جونىندە جۇڭگو جاقتىڭ تۇرعىسىن اناعۇرلىم ەگجەي - تەگجەيلى باياندادى.
ۋاڭ ي مىنالاردى ءبىلدىردى: امەريكا جاق حالىقارالىق زاڭدى اياققا تاپتاپ، ەكى جاقتى ۋادەگە قايشى كەلىپ، تايۋان بۇعازىنىڭ بەيبىتشىلىگىن ءبۇلدىرىپ، بولشەكتەۋشىلىكتى قولداپ، توپتار قارسىلاسۋىنا جەلىكتىردى، بۇل جۇڭگو حالقىنا جانە بەيبىتشىلىكتى سۇيەتىن وڭىرلەردەگى ءار ەل حالقىنا دەگەن كوپە - كورنەۋ ارانداتۋشىلىق، مۇنىڭ ناشار ىقپال تۋدىراتىن ءبىر رەتكى ساياسي قۇمار ويىنى ەكەندىگى داۋسىز.
ۋاڭ ي بىلاي دەدى: پەلوسيدىڭ سايقال ويىنى امەريكانىڭ ساياسيىن، امەريكانىڭ ديپلوماتياسىن جانە امەريكانىڭ بەدەلىن تاعى ءبىر رەت تاس - تالقان ەتتى، بۇل امەريكانىڭ − تايۋان بۇعازى بەيبىتشىلىگىنىڭ ەڭ ۇلكەن ءبۇلدىرۋشىسى، ءوڭىر ورنىقتىلىعىندا ەڭ ۇلكەن اۋرە تۋدىرۋشى ەكەندىگىن دالەلدەدى. امەريكانىڭ ”يندى مۇحيت، تىنىق مۇحيت ستراتەگياسىنىڭ“ توتەنشە قارسىلىق سيپاتقا جانە قاتەرلى سيپاتقا يە ەكەندىگىن دالەلدەدى، امەريكانىڭ حالىقارالىق قاعيدا جونىندەگى كولگىرلىگى مەن قوس ولشەمىن دالەلدەدى. ەگەر جۇڭگو جاق امەريكا جاقتىڭ مۇنداي جەلىكپە، جاۋاپكەرسىز، ەرەكشە ۇستامسىز قىلىعىن باتىل تەجەمەسە يەلىك ۇقىعىنا جانە تەرريتوريا تۇتاستىعىنا قۇرمەت ەتەتىن حالىقارالىق قارىم - قاتىناس پرينسيبى ءبىر جاپىراق قۇر قاعازعا اينالىپ قالاتىن بولادى، ءتۇرلى بولشەكتەۋشى ەلەمەنتتەر مەن ۇشقارى كۇشتەر ءتىپتى دە ورشەلەنەتىن بولادى، وسى ءوڭىردىڭ وڭاي - وسپاق قولعا كەلمەگەن بەيبىت، ورنىقتى جاعدايى اۋىر زيانعا ۇشىرايتىن بولادى.
ۋاڭ ي بىلاي دەپ باسا دارىپتەدى: وسى رەتكى وقيعانى امەريكا جاق ءوز قولىمەن جوسپارلادى جانە تۋدىردى، سەبەپ - سالدارى، سوڭعى زاردابى نە بولاتىندىعى بەسەنەدەن بەلگىلى، دۇرىس - بۇرىستىعى ايدان انىق. جۇڭگوعا زورلاپ تاڭىلعان وسى داعدارىستان ساقتانۋ ءۇشىن، جۇڭگو جاق ەڭ جوعارى شەكتە ديپلوماتيالىق قۇلشىنىس جاسادى، الايدا سونىمەن بىرگە ءبىز جۇڭگونىڭ وزەكتى مۇددەسى مەن ۇلتتىڭ گۇلدەنۋ ۇردىسىنە زيان جەتكىزۋىنە استە جول بەرمەيمىز، امەريكانىڭ ”تايۋان كوزىرىن“ ۇستاپ، ەل ءىشى ساياسيىنا جانە ساياسي الاياقتاردىڭ قارا باسىنىڭ نيەتىنە قىزمەت ەتۋىنە استە قاراپ وتىرا المايمىز، وسى وڭىردە شيەلەنىستى جاعداي تۋدىرۋىن، قارسىلىققا ايتاقتاتۋىن جانە بولشەكتەۋشىلىك جوسپارلاپ تۋدىرۋىن استە ىرقىنا جىبەرمەيمىز. جۇڭگو جاقتىڭ كەزەكتە جانە الدا قولداناتىن جالپىلىق شاراسى قاجەتتى، دەر كەزىندە بولعان قورعانۋ، قارسى شاراسى بولىپ تابىلادى، بۇل بايىپتىلىقپەن ويلانۋدان جانە مۇقيات باعالاۋدان وتكەن، ماقساتى مەملەكەتتىڭ يەلىك ۇقىعى مەن حاۋىپسىزدىگىن قورعاۋ، ول حالىقارالىق زاڭ مەن ەل ءىشى زاڭىنا ۇيلەسەدى، ارانداتۋشىلارعا قاراتىلعان ەسكەرتۋ ءارى ءوڭىردىڭ ورنىقتىلىعى مەن تايۋان بۇعازىنىڭ بەيبىتشىلىگىن قورعاۋ. تاراپتار كەزەكتەگى داعدارىستىڭ تۋىلۋ سەبەبى مەن ناقتى ءمانىن جىعا تانىپ، امەريكا جاقتىڭ اپەرباقاندىق ىستەۋى مەن ارانداتۋشىلىعىنا بىرگە قارسى تۇرىپ، جۇڭگو جاقتىڭ ورىندى تۇرعىسى مەن شاراسىن ۇزدىكسىز قولداپ، ءوڭىردىڭ جانە تايۋان بۇعازىنىڭ بەيبىتشىلىگىن بىرگە قورعاۋ كەرەك.
