شينحۋا اگەنتتىگىنىڭ 8 - ايدىڭ 4 - كۇنى نانجيڭنەن بەرگەن حابارى (تىلشىلەر لي بيڭشۋان، حان شۋەياڭ). جۇڭگو حالىق ازاتتىق ارمياسى شىعىس بولىك سوعىس رايونى 8 - ايدىڭ 4 - كۇنى اسكەر كۇشىن ۇيىمداستىرىپ، تايۋان ارالىنىڭ ماڭايىنداعى تەڭىز ايدىنىندا، اۋە كەڭىستىگىندە بۇرىن بولماعان كولەمدە ناقتى سوعىستىق بىرلەسكەن مانەۆر وتكىزىپ، بەلگىلەنگەن تەڭىز ايدىنىندا الىس ارالىقتى وت كۇشىندىك شىن وقپەن نىسانا اتۋدى ءساتتى ورىندادى.
8 - ايدىڭ 4 - كۇنى ساعات 13 مولشەرىندە شىعىس بولىك سوعىس رايونى قۇرلىق ارمياسىنىڭ بىرنەشە جاڭا تۇرپاتتى الىس ارالىقتى ساندىقشا راكەتا ارتيللەريياسى تايۋان بۇعازىندا الىس ارالىقتى وت كۇشىندىك شىن وقپەن نىسانا اتۋ جاتتىعۋىن ورىنداپ، تايۋان بۇعازىنىڭ شىعىس بولىگىندەگى ارنايى بەلگىلەنگەن ءوڭىردى ءدال سوققىلادى. جاڭا تۇرپاتتى الىس ارالىقتى ساندىقشا راكەتا ارتيللەريياسىنىڭ اتۋ ارالىعى اناعۇرلىم الىس، دالدىك دەڭگەيى اناعۇرلىم جوعارى، ساندىقشا وق - ءدارى تولىقتاۋ ءتاسىلى سوعىس دايىندىعى ۋاقىتىن زور مولشەردە قىسقارتادى. ءتىلشى ناق سول جەردە مىنالاردى كوردى: راكەتا وعى جالىن بۋداقتاتا گۇرىلدەپ اتىلىپ، قويۋ وت كۇشى تورىن قالىپتاستىرىپ، نىساناداعى تەڭىز ايدىنىن تىكە اتقىلادى. ۇشقىش اپپاراتتار سوققىلاعان كورىنىستەردى ناق ۋاقىتىندا جەتكىزدى: راكەتا وعى نىساناعا ءدال ءتيدى. شىن وقپەن اتقىلاۋ مەجەدەگى ونىمدىلىككە قول جەتكىزدى.
8 - ايدىڭ 4 - كۇنى تۇستەن كەيىن شىعىس بولىك سوعىس رايونى راكەتا اسكەري ءبولىمى تايۋان ارالىنىڭ شىعىس بولىك سىرتقى تەڭىزىندەگى بەلگىلەنگەن تەڭىز ايدىنىنا كوپ ءوڭىرلى، كوپ تۇرپاتتى داعدىلى باسقارىلمالى وت كۇشىمەن توسىن شابۋىل جاسادى. ءتىلشى اتۋ ورنىندا باسقارىلمالى بومبىنىڭ اتىلعانداعى ايبىندى كورىنىسىن كوردى. اتۋ بۇيرىعىن تاپسىرىپ العاننان كەيىن، قولباسشى بايىپپەن بۇيرىق بەردى، باسقارۋشى دەرەۋ دالمە - ءدال مەڭگەرىپ، ساندى مالىمەتتەردى، پارامەترلەردى جيناقتاپ، باسقارىلمالى بومبىنى تىك تۇرعىزىپ، ىسىلعان اسكەري ساپا مەن اسقاق جاۋىنگەرلىك رۋحتى ايگىلەدى. بۇيرىق بەرىلىسىمەن بىرنەشە باسقارىلمالى بومبى بىرىنەن كەيىن ءبىرى اۋەگە كوتەرىلىپ، كوككە تىك شانشىلدى. باسقارىلمالى بومبى تۇگەلدەي نىسانالى وڭىرگە ءدال ءتيىپ، مانەۆرگە قاتىناسقان اسكەري ءبولىمنىڭ دالمە - ءدال سوققى بەرۋىن جانە وڭىرلىك تەجەۋ قۋاتىن سىننان وتكىزدى.
شىعىس بولىك سوعىس رايونىنىڭ اۋە ارمياسىنىڭ، تەڭىز ارمياسىنىڭ اۆياتسيا اسكەرلەرى جويعىش ۇشاق، بومبىلاۋشى ۇشاق، دابىلداۋىش ۇشاق، ماي قۇيعىش ۇشاق سياقتى كوپ ءتۇرلى، كوپ تۇرپاتتى سوعىس ۇشاعىن 100 دەن استام رەت اتتاندىرىپ، بەلگىلەنگەن تەڭىز ايدىنىندا، اۋە كەڭىستىگىندە كۇندىز - ءتۇنى بىرلەسكەن بارلاۋ، اۋە كەڭىستىگىندە ماي قۇيۋ، اۋە كەڭىستىگىن مەڭگەرىپ سوعىس جۇرگىزۋ، جەر بەتىندە توسىن شابۋىل جاساۋ، كومەكتەسۋ، قورعاۋ قاتارلى ناقتى سوعىستىق جاتتىعۋ ورىستەتىپ، اسكەري ءبولىم ءىرى ۇشاق شوعىرىنىڭ ۇلاسپالى اتتانۋ، كوپ اسكەري كۇشپەن مەڭگەرۋ، سايكەستىرۋ، ۇزاق ۋاقىت توقتاۋسىز اۋە كەڭىستىگىن مەڭگەرۋ، جوعارى كۇشەمەلىلىكتە دالمە - ءدال سوققى بەرۋ سياقتى سوعىس جۇرگىزۋ قۋاتىن شىڭدادى.
شىعىس بولىك سوعىس رايونى تەڭىز ارمياسىنىڭ ون نەشە قۋعىنشى، قورعاۋشى كەمەلەرى جالعاستى تۇردە تايۋان ارالىنىڭ ماڭىنداعى تەڭىز ايدىنىندا بىرلەسىپ قۇرساۋلاۋ ارەكەتىن اتقارىپ، وت كۇشىمەن سىناق رەتىندە اتۋ وڭىرىنە تەڭىزدى شارلاۋ قورعانىسىن جۇرگىزىپ، كورشىلەس اسكەري كۇشتەرمەن سايكەسە بارلاۋ، جەتەكشىلىك ەتۋ جۇرگىزدى. وفيتسەر - اسكەرلەر تۇتاس بارىستا جوعارى دارەجەلى ساقتىقتا تۇرىپ، كوپ رەت اتتانىسقا كەلىپ، تەڭىزگە قاراتا سوققى بەرۋ، اۋە شابۋىلىنا قارسى باسقارىلمالى بومبى اتۋ، سۇڭگۋىر كەمەگە بىرلەسىپ توتەپ بەرۋ قاتارلى جاتتىعۋلاردى جۇرگىزىپ، تۋىلۋى مۇمكىن بولعان توسىن جاعدايلارعا قاي - قاشان دا توتەپ بەرۋگە دايىن تۇردى.
شىعىس بولىك سوعىس رايونى بىرلەسكەن شتابى بەلگىلى مەكەمەسىنىڭ ورىنباسار باستىعى ليۋ دۇڭكۇن مىنالاردى ءبىلدىردى: بۇل رەتكى ناقتى سوعىستىق بىرلەسكەن مانەۆرى جۇيەنىڭ سۇيەنىش بولۋ جاعدايىنداعى سوعىستىق رايوننىڭ كوپ ارميا تۇرلەرى قوسىنىنىڭ بىرلەسىپ ءتۇيسىنۋ، بىرلەسىپ قولباسشىلىق ەتۋ، مەڭگەرۋ، بىرلەسىپ جويۋ، بىرلەسىپ ارەكەتتەنۋ، بىرلەسىپ قامتاماسىز ەتۋ قۋاتىن سىننان وتكىزدى. سوعىستىق رايوننىڭ اسكەري بولىمدەرى بۇيرىققا ساي ارەكەتتەنىپ، سوعىسۋعا باتىلدىق ەتىپ، ءسوزسىز، جەڭىسكە جەتىپ، پارتيا مەن حالىق جۇكتەگەن ءتۇرلى مىندەتتەردى باتىلدىقپەن ورىنداپ، مەملەكەتتىڭ يەلىك ۇقىعى مەن تەرريتوريا تۇتاستىعىن باتىل قورعايدى!
