شينحۋا اگەنتتىگىنىڭ 8 - ايدىڭ 9 - كۇنى بەيجيڭنەن بەرگەن حابارى. جۋىقتا مەملەكەت ءتوراعاسى شي جينپيڭ مالتا سەنت - مارگارەت ورتا مەكتەبىندەگى ”جۇڭگو بۇرىشىنىڭ“ وقىتۋشى - وقۋشىلارىنا جاۋاپ حات قايتارىپ، اناعۇرلىم كوپ مالتا جاستارى مەن ورەندەرىن جۇڭگو − مالتا گۋمانيتارلىق اۋىس - كۇيىسىنە بەلسەنە ات سالىسۋعا ىنتالاندىردى.
شي جينپيڭ بىلاي دەپ اتاپ كورسەتتى: جۇڭگو مەن مالتا ەكى جاقتىڭ بىرگە قۇلشىنىۋىندا سەنت - مارگارەت ورتا مەكتەبىندەگى ”جۇڭگو بۇرىشى“ مالتاداعى جاستار مەن ورەندەردىڭ جۇڭگو تۋرالى تۇسىنىگىن تەرەڭدەتۋدە، جۇڭگو مەن مالتانىڭ دوستىعىن جەبەۋدە بەلسەندى رول اتقاردى. ”جۇڭگو بۇرىشىنىڭ“ اناعۇرلىم تابىستى جۇرگىزىلۋىن ءۇمىت ەتەمىن، وقىتۋشى - وقۋشىلاردىڭ جۇڭگوعا كەلىپ اۋىس - كۇيىس جاساپ، ۇيرەنۋدە بولۋىن قارسى الامىن.
شي جينپيڭ بىلاي دەپ اتاپ كورسەتتى: الەمنىڭ ۇلى بىرلىگى، بارلىق ەلدىڭ بەرەكەسى − جۇڭحۋا ۇلتىنىڭ ادامزات قوعامى تۋرالى ەجەلدەن بەرگى تاماشا ارمانى، سونداي - اق، ادامزاتتىڭ تاعدىرلاس ورتاق تۇلعاسى ۇستانىمىن ورناتۋدا قامتىلعان مادەنيەت قاينارى سانالادى.ءبىز ءومىر ءسۇرىپ جاتقان دۇنيە جۇزىندە تاريح پەن رەالدىق ءوزارا توعىسىپ، ءۇمىت پەن سىن - سايىس قاتار ءومىر ءسۇرۋدە، ادامزاتتىڭ تاعدىرى بەينەت پەن زەينەتتى بىرگە وتكەرۋدە، تەك ءوزارا قارايلاسىپ، سەلبەسىپ، تەڭ يگىلىككە كەنەلگەندە عانا ادامزاتتى دامۋ جەتىستىكتەرىنىڭ يگىلىگىنە كەنەلدىرۋگە بولادى. الەمنىڭ دامۋىنداعى قيىن تاقىرىپتاردى شەشىپ، حالىقارالىق حاۋىپسىزدىككە قاتىستى سايىستارعا توتەپ بەرۋ ءۇشىن، جۇڭگو ىلگەرىندى - كەيىندى ”ءبىر بەلدەۋ، ءبىر جول“ باستاماسىن، الەمدىك دامۋ باستاماسىن، الەمدىك حاۋىپسىزدىك باستاماسىن العا قويىپ، كەڭ كولەمدە ورتاق تانىم ۇيىستىرىپ، كۇش توپتاپ، ءىس جۇزىندىك ارەكەتى ارقىلى ادامزاتتىڭ تاعدىرلاس ورتاق تۇلعاسى ۇستانىمىن امالياتتا ايگىلەدى.
شي جينپيڭ بىلاي دەپ باسا دارىپتەدى: بيىل − جۇڭگو مەن مالتانىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعى، ەكى ەلدىڭ قارىم - قاتىناسى تۇرلىشە تاريحقا، تۇرلىشە مادەنيەتكە يە ەلدەردىڭ دوستىق قارىم - قاتىناس جاساۋىنىڭ ۇلگىسىنە اينالدى. اناعۇرلىم كوپ مالتالىق وقىتۋشى - وقۋشىلاردىڭ جانە جاستار مەن ورەندەردىڭ جۇڭگو مەن مالتانىڭ گۋمانيتارلىق اۋىس - كۇيىسىنە بەلسەنە ات سالىسىپ، وركەنيەتتەردىڭ ءوزارا ۇلگى الۋىن جەبەۋشىلەردەن جانە حالىقتار دوستىعىن جالعاستىرۋشىلاردان بولۋىن ءۇمىت ەتەمىن.
سەنت - مارگارەت ورتا مەكتەبى مالتاداعى ۋنيۆەرسال ۇكىمەتتىك مەكتەپ، 2010 - جىلى جۇڭگو جاقتىڭ قولداۋىندا ”جۇڭگو بۇرىشىن“ اشقان بولاتىن. جۋىقتا، وسى مەكتەپتەگى ”جۇڭگو بۇرىشىنىڭ“ وقىتۋشى - وقۋشىلارى ءتوراعا شي جينپيڭگە حات جازىپ، جۇڭگو مادەنيەتىنە دەگەن اۋەس، ىنتالارىن ءبىلدىرىپ، «ادەپناماداعى» ”دانىشپاندار اسپان استىن ءبىر شاڭىراق دەپ بىلەدى“ دەگەندى دايەك ءسوز ەتىپ، ادامزاتتىڭ تاعدىرلاس ورتاق تۇلعاسى ۇستانىمى مەن ”ءبىر بەلدەۋ، ءبىر جول“باستاماسىنا بەلسەندى باعا بەرىپ، مالتا مەن جۇڭگونىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعىنا ىزگى تىلەك ايتىپ، مالتا مەن جۇڭگونىڭ گۋمانيتارلىق اۋىس - كۇيىسى ءۇشىن كوبىرەك ۇلەس قوسۋدى قالايتىندىقتارىن بىلدىرگەن بولاتىن.
