□ انار بۇلت \ شينجياڭ گازەتىنىڭ ءتىلشىسى شى شين، ەرىكتى ءتىلشى جاڭ جينمەي
8 - ايدىڭ 10 - كۇنى ساعات 8دەن باستاپ، ءۇرىمجى قالاسىنىڭ ءتۇيىندى قالا رايونىندا ۋاقىتشا تىنىش كۇيدە باسقارۋ شاراسى اتقارىلدى. ءارقايسى ءتۇيىندى ءوندىرىس كاسىپورىندارى ىندەتتەن ساقتانۋ - تىزگىندەۋ قىزمەتىن ويداعىداي ىستەۋ العى شارتىندا تۇيىق باسقارۋ جۇرگىزىپ، قالىپتى ءوندىرىس اينالىمىن بار كۇشپەن قامتاماسىز ەتتى.
8 - ايدىڭ 10 - كۇنى تاڭعى ساعات 4تە شينجياڭ تيانشان ءجۇن توقىما جارنا شەكتى سەرىكتەستىگى قىزمەتكەرلەردى جۇمىس ورنىنا قايتىپ كەلۋگە بەلسەندىلىكپەن ۇيىمداستىردى، 400دەن استام كادر، جۇمىسشى - قىزمەتكەر دەرەۋ زاۆود اۋماعىنا قايتىپ كەلدى. ساعات 8دە تيانشان توقىما باس ءبولىمى، سونداي - اق ءارقايسى بولىمشە سەرىكتەستىكتەر شۇعىل جيىن اشىپ، سەرىكتەستىكتىڭ ىندەتتەن ساقتانۋ - تىزگىندەۋى جانە ءوندىرىس - تيجاراتىن جۇرگىزۋى جونىندە ورنالاستىرۋ جاسادى.
ساعات 9دا ءۇرىمجى جوعارى، جاڭا تەحنيكالىق كاسىپتەردى اشۋ رايونى (جاڭا قالا رايونى) سولتۇستىك رايونى ونەركاسىپ باقشاسىنداعى تيانشان توقىما ونەركاسىپ باقشا اۋماعىندا، ءتۇبىت جۋۋ، تاراۋ، بوياۋ، ءجىپ توقۋ، بىزبەن توقۋ سياقتى ءارقايسى جۇمىس بارىستارى تارتىپپەن جۇرگىزىلىپ، توقىما كيىم - كەشەك ونىمدەرىن بار كۇشپەن ءوندىرىپ، تاپسىرىستىق بۇيىمداردى ۋاعىندا تاپسىرۋعا شىنايى كەپىلدىك ەتتى.
تيانشان توقىماشىلىعى قاراستىلىعىنداعى شينجياڭ جينتيانشان مەديتسينالىق جابدىق شەكتى سەرىكتەستىگى اۆتونوميالى رايونداعى ەڭ ۇلكەن ماسكا وندىرۋمەن قامتاماسىز ەتەتىن كاسىپورىن، قازىر بۇل سەرىكتەستىك بازاردىڭ سۇرانىسىنا ساي ءونىم قۇرىلىمىن رەتتەپ، كۇش - قايراتتى شوعىرلاندىرىپ مەديتسينالىق ماسكا جانە ساقتانۋ - قورعانۋ كيىمىن وندىرۋگە كىرىستى. سەرىكتەستىكتە قازىر 11 ميلليون مەديتسينالىق ماسكا، 8000 پار ساقتانۋ - قورعانۋ كيىمى زاپاسى بار.
شينجياڭ يىندولان ءدارى كاسىبى جارنا شەكتى سەرىكتەستىگى ونەركاسىپ جانە ينفورماتسيالاندىرۋ مينيسترلىگى مەن اۆتونوميالى رايون تۇراقتاندىرعان ساقتانۋ - تىزگىندەۋ، ىندەتتەن ساقتانۋ زاتتىق ماتەريالدارىن وندىرەتىن ءتۇيىندى كاسىپورىن، اۆتونوميالى رايوننىڭ ءتۇيىندى كاسىپ سالاسى تىزبەگى، قامداۋ تىزبەگى كاسىپورىندارىنىڭ ”اق تىزىمدىگىنە“ كىرگىزىلگەن. 8 - ايدىڭ 10 - كۇنى تاڭعى ساعات 4تە، يىندولان ءدارى كاسىبى قىزمەتكەرلەردى جۇمىس ورنىنا قايتىپ كەلۋگە بەلسەندىلىكپەن ۇيىمداستىردى، ساعات 8گە جەتپەي جاتىپ، ءتۇيىندى ءوندىرىس قامتاماسىزدىق جۇمىس ورىندارىنداعى قىزمەتكەرلەر جۇمىس ورنىنا ％100 قايتىپ ورالدى.
”ءسوز جوق، ىندەتتەن ساقتانۋ ءدارى - دارمەك ءوندىرىسى قامداۋىمەن قامتاماسىز ەتىپ، پارتيا مەن ۇكىمەتتىڭ ىندەتتەن ساقتانۋ - تىزگىندەۋ قىزمەتىن ويداعىداي ىستەۋىنە بار كۇشپەن سايكەسىپ، كاسىپورنىمىزدىڭ جاۋاپكەرشىلىگىن ارقالاۋىمىز كەرەك“! يىندولان ءدارى كاسىبى القا باستىعى لي جۇننىڭ شابىتتاندىرۋىمەن، زاۆودتا تۇرعان بارلىق قىزمەتكەرلەر ءوندىرىستى دابىرالى جۇرگىزدى، يجىحاۋ سىعىندىسى ءدارى جاساۋ سەحىنا تولاسسىز جەتكىزىلىپ، تۇيىرشىك ءوندىرىس جەلىسىندە اۆتوماتتى جاسالىپ، قوراپتالىپ، جاشىككە سالىنىپ، جاشىك - جاشىك كۇردەلى رەتسەپتىك يجىحاۋ تۇيىرشىگى قامباعا كىرگىزىلىپ، بۇكىل ەلدىڭ جەر - جەرىنە جونەلتىلدى.
شينجياڭ جينشۋەچى عىلىم - تەحنيكا جارنا شەكتى سەرىكتەستىگى اۆتونوميالى رايونداعى ءبىرىنشى توپتا مەملەكەت دارەجەلى ءتۇيىندى ”ارنايىلانعان، كەمەلدەنگەن، ەرەكشە، جاڭا“ كىشى دوكەيلەر قاتارىنا تاڭدالعان مايلاعىش ماي كاسىپورنى. 8 - ايدىڭ 10 - كۇنى، سەرىكتەستىكتىڭ ءوندىرىس سەحىندا 4 ءوندىرىس جەلىسى بار كۇشپەن جۇمىس ىستەدى، قازىر ولاردىڭ كۇندىك ءوندىرىس قۋاتى 100 تونناعا جەتەدى.
”ۇقتىرۋدى تاپسىرىپ العاننان كەيىن، سەرىكتەستىكتىڭ قىزمەتكەرلەرى جۇمىس ورنىنا جەدەل قايتىپ كەلدى. ءبىز جوعارعى باسقارۋ تاراۋلارىمەن بەلسەندىلىكپەن تىلدەسىپ، كاسىپ سالاسى تىزبەگىنىڭ، قامداۋ تىزبەگىنىڭ ورنىقتىلىعىن، ىركىلىسسىزدىگىن قامتاماسىز ەتتىك. ەندى ءبىر مەزگىل ۋاقىتتان كەيىن شينجياڭدا ماقتا جيناۋ ماۋسىمى باستالادى، قازىر سەرىكتەستىك ماقتا جيناۋ ماشيناسىنىڭ تەرۋ ۇرشىعىن مايلاۋ مايى مەن تازارتقىش سۇيىقتىعىن جەدەل ءوندىرىپ، ماقتا جيناۋدى ويداعىداي ىستەۋگە دايىندالۋدا. سونىمەن بىرگە، اۆتوكولىككە پايدالانىلاتىن مايلاعىش ماي مەن ونەركاسىپتىك مايلاعىش ماي ونىمدەرىن بەلسەندىلىكپەن ءوندىرىپ، ىندەتكە قارسى اتتانۋ قامداۋىنا كەپىلدىك ەتۋ قىزمەتىن ويداعىداي ىستەدى“، - دەدى شينجياڭ جينشۋەچى عىلىم - تەحنيكا جارنا شەكتى سەرىكتەستىگى ساتۋ ورىنباسار باس باقىلاۋشىسى دۇڭ جۇنكۇي تانىستىرىپ.
ءۇرىمجى قالاسىنداعى، سونداي - اق شينجياڭنىڭ ءىشى - سىرتىنداعى بازارلاردى ءسۇت ونىمدەرىمەن قامداۋدى بار كۇشپەن قامتاماسىز ەتۋ ءۇشىن، شينجياڭ شييۇيچۇن ءسۇت شارۋاشىلىعى شەكتى سەرىكتەستىگىنىڭ 500 نەشە قىزمەتكەرى زاۆودتا تۇرىپ تۇيىق باسقارىلدى، قازىر سەرىكتەستىك كۇنىنە 350 نەشە توننا ءتۇرلى ءسۇت ونىمدەرىن وندىرەدى.
8 - ايدىڭ 10 - كۇنى ساعات 7دە، شۋاڭچيان توبى (شينجياڭ) كۇنلۇن بالون شەكتى سەرىكتەستىگىنىڭ 1280 قىزمەتكەرى تۇگەلدەي زاۆودقا كەلدى. ساعات 9دا، كۇنلۇن بالون زەردەلى ءوندىرىس سەحىندا، بيىكتە نەشە ونداعان ترۇس روبوت زىمىراپ، جەردە ماسكا تاققان جۇمىسشىلار رازىنكە جاساۋ، جاپسىرۋ سياقتى قىزمەتتەردى تارتىپپەن ورىستەتە باستادى.
”تەلەفون بەرىلگەندە، قىزمەتكەرلەر ءارى - ءسارى بولماستان، قالانىڭ ءار جەرىنەن تۇندەلەتىپ زاۆودقا كەلدى“. كۇنلۇن بالون جالپىلىق ءبولىمىنىڭ باستىعى جاڭ ي بىلاي دەدى: قازىر ساتۋدىڭ قاۋىرت مەزگىلى، كۇنلۇن بالونىنىڭ ساتىلۋ مولشەرى بىلتىرعى سول تۇستاعىدان ％6 ارتتى، مۇنىڭ ىشىندە كەن اۆتوموبيلى بالونىنىڭ ساتىلۋ مولشەرى سايكەس مەزگىلدەگىدەن ％34 ارتتى. ”قازىر ساتىلۋ مولشەرى ءوندىرۋ مولشەرىنەن جوعارى، قامبادا ساقتالۋ مولشەرى تاريحتاعى ەڭ تومەنگى دەڭگەيدە، ءبىز بار كۇشپەن ءوندىرىس جۇرگىزگەندە عانا بازارداعى قامداۋعا كەپىلدىك ەتە الامىز“.
كاسىپورىننىڭ ءوندىرىسىن جەدەلدەتۋدە، ۇكىمەت الدا ءجۇرىپ قىزمەت وتەۋى كەرەك. جاڭ ي بىلاي دەپ تانىستىردى: 8 - ايدىڭ 10 - كۇنى، كاسىپورىن تۇرعان جەردەگى اۋماقتى باسقارۋ كوميتەتى، ونەركاسىپ باقشا رايونى بىزبەن دەر كەزىندە بايلانىس جاساپ، كاسىپورىننىڭ قازىر وندىرىستە قيىنشىلىققا ءدوپ كەلگەن - كەلمەگەندىگىن سۇرادى، سونداي - اق ماسەلە بايقالسا شەشۋگە كومەكتەسەتىندىكتەرىن ايتتى، بۇل كاسىپورىننىڭ ءوندىرىس جۇرگىزۋ سەنىمدىلىگىن ءتىپتى دە نىعايتتى.
