انار بۇلت \ شينجياڭ گازەتىنىڭ ءتىلشىسى سۋ لۋپيڭ
فاڭساڭ شيپاحاناسىندا، ولار اۋرۋ بەلگىسى جوق جۇعىمدالۋشىلاردىڭ مەيىرىمدى ”اق حالاتتىلارى“ بولدى؛ بەلگىلەنگەن قۇتقارۋ - ەمدەۋ شيپاحاناسىندا، ولار ناۋقاستاردىڭ ”جۇباتۋشىسى“ بولدى؛ شۇعىل قۇتقارۋ بولمەسىندە، ولار بار كۇشتەرىن ايامادى؛ وپەراتسيا توسەگىندە، ولار حال ۇستىندە جاتقانداردى اجالدان اراشالاپ قالدى...
8 - ايدىڭ 19 - كۇنى، 5 - رەتكى جۇڭگو شيپاگەرلەر مەرەكەسى. بيىل، رايونىمىزداعى ءار دارەجەلى ەمدەۋ، دەنساۋلىق ساقتاۋ قۇرىلىمدارىنداعى ەمدەۋ - كۇتىمدەۋ قىزمەتكەرلەرى ادىلەت جولىندا ەشتەڭەدەن تايىنباستان ۆيرۋسپەن قويان - قولتىق سايىسقان الدىڭعى شەپكە اتتانىپ، ۋاقىتپەن جارىسىپ، اۋرۋمەن ايقاسىپ، تىرشىلىكتى قورعادى، ولار تىرشىلىكتىڭ شايقاس مايدانىندا بار كۇشتەرىن سالدى.
قيىن - قىستاۋ ساتتەگى تىرەك
8 - ايدىڭ 18 - كۇنى تۇستەن بۇرىن، قۇلجا قالاسى دەنە تاربيە سارايى فاڭساڭ شيپاحاناسىندا تاڭەرتەڭگى اسىن ءىشىپ، تەمپەراتۋراسىن ولشەتىپ بولعان جاڭ حۋا (وزگەرتىلگەن اتى) ناۋقاستارمەن بىرگە مۋزيكاعا ىلەسە الاڭ بيىنە باستى. فاڭساڭ شيپاحاناسىنا ەندى كىرگەن سول بىرنەشە كۇنگە قاراعاندا، ولاردىڭ كوڭىل كۇيى اجەپتاۋىر ورنىعىپ قالعان ەدى.
ىلە قازاق اۆتونوميالى وبلىسىندا وسى رەت تۋىلعان ىندەتتىڭ تارالعىشتىعى كۇشتى، تارالۋ قارقىنى تەز، تارالۋ بارىسى جاسىرىن، ساقتانۋ - تىزگىندەۋ قيىندىعى زور، رايونىمىز ىلگەرىندى - كەيىندى توتەنشە جاعدايعا توتەپ بەرۋ ەمدەۋ اترەتىن ىلە وبلىسىنا بارىپ قىزمەت ورىستەتۋگە جىبەرىپ، بەلگىلەنگەن قۇتقارۋ - ەمدەۋ شيپاحانالاردىڭ ناۋقاستار اۋماعى مەن فاڭساڭ شيپاحانالارىنا قۇرامالانعان تۇتاس قۇرىلىم بويىنشا وتكىزىپ الۋدى جولعا قويىپ، بارلىق جۇعىمدالۋشىلاردىڭ قابىلدانۋعا تيىستىلەرىن تۇگەل قابىلداۋعا شىنايى كەپىلدىك ەتتى.
شينجياڭ مەديتسيا داشۋەسىنە قاراستى 5 - شيپاحانا جىبەرگەن توتەنشە جاعدايعا توتەپ بەرۋ ەمدەۋ اترەتى قۇلجا قالاسى دەنە تاربيە سارايى فاڭساڭ شيپاحاناسىن تۇتاس قۇرىلىم بويىنشا وتكىزىپ الىپ، اۋماققا، دارەجەگە ءبولىپ باسقارۋ جۇرگىزدى.
”ءبىزدىڭ فاڭساڭ شيپاحانامىز 525 ناۋقاستى قابىلداپ - ەمدەي الادى، قازىر قۇلجا قالاسىنداعى جانە توڭىرەگىندەگى وڭىرلەردەگى اۋرۋ بەلگىسى جوق جۇعىمدالۋشىلاردى تارتىپپەن قابىلداپ، ءىشىنارا جەڭىل ناۋقاستاردى قۇتقارىپ - ەمدەپ جاتىر“. ورتالىق كوميتەت ۇيىمداستىرۋ ءبولىمى، جاستار وداعى ورتالىق كوميتەتى دوكتورلار قىزمەت وتەۋ ۇيىرمەسىنىڭ 22 - توپتا شينجياڭعا كومەككە كەلگەن كادرى، شينجياڭ مەديتسينا داشۋەسىنە قاراستى 5 - شيپاحانا پارتكومىنىڭ مۇشەسى، ورىنباسار باستىعى، قۇلجا قالاسى دەنە تاربيە سارايى فاڭساڭ شيپاحاناسىنىڭ باستىعى ۋاڭ حۇڭگۋاڭ بىلاي دەدى: ”ءبىزدىڭ جاڭا تيپتى ايدارشا ۆيرۋس وكپە قابىنۋ ىندەتىنە شالدىققان ناۋقاستاردى قۇتقارۋ - ەمدەۋ قىزمەتىن ويداعىداي ىستەۋگە بەكىمىمىز، سەنىمىمىز بار“.
ىندەت تۋىلعاننان كەيىن، قۇمىل قالاسى مەديتسينالىق قۇتقارۋ - ەمدەۋ قىزمەتىن جۇيەلى تۇردە ويداعىداي ىستەدى. بەلگىلەنگەن قۇتقارۋ - ەمدەۋ شيپاحاناسى ماماندار گرۋپپاسىنىڭ بىرلەسىپ دياگنوز قويىپ ەمدەۋى ارقىلى ەمدەۋ جوباسىن ۇزدىكسىز وڭتايلاندىرىپ، قىزمەت وتەۋ مەن قامتاماسىزداندىرۋدى 24 ساعات بويى ويداعىداي ىستەدى، قازىر شيپاحاناداعى بارلىق ناۋقاستاردىڭ تىرشىلىك بەلگىلەرى ورنىقتى.
تىنىس جولى جانە قاتەرلى، اۋىر ناۋقاستار مەديتسينا ءبولىمىنىڭ ۇزاق جىلدىق ستاجى بار باس شيپاگەرى ياڭ چۇنحۋا ناۋقاستاردى قۇتقارۋ - ەمدەۋمەن بىرگە، تاعى ناۋقاستاردى پسيحيكالىق جاقتان جەتەكتەۋ جاۋاپكەرشىلىگىن ۇستىنە الدى. ءار كۇنى ناۋقاس بولمەلەرىن تەكسەرىپ، بىرلەسىپ دياگنوز قويعاننان كەيىن، ول ۇنەمى ناۋقاستارعا دەنساۋلىق ساقتاۋ عىلىمىن جالپىلاستىرادى، ولاردىڭ ءارقايسىسىنىڭ دەنساۋلىق احۋالىنا مەڭزەس، كەيبىر كوڭىل بولۋگە ءتيىس ىستەردى ايتادى. ناۋقاستار تاپ بولعان قيىندىقتاردى، تالاپ - تىلەكتەردى ول دەر كەزىندە شيپاحاناعا اڭىس ەتىپ، بەلسەندى تۇردە سايكەستىرىپ شەشەدى.
”شيپاحانانىڭ ءبىزدى تۇرمىستىق جاقتان، زاتتىق ماتەريالدارمەن قامتاماسىزداندىرۋى ەرەكشە تىڭعىلىقتى، ەمدەۋ - كۇتىمدەۋ قىزمەتكەرلەرى دە بىزگە ەرەكشە جان اشىرلىقپەن قىزمەت كورسەتەدى. ءار رەت ياڭ شيپاگەرمەن اڭگىمەلەسىپ بولعان سوڭ، تۇلا بويىمدى كۇش كەرنەپ شىعا كەلەمىن“. ناۋقاس لي كاي (وزگەرتىلگەن اتى) بىلاي دەدى: ”شيپاحانا بىزگە ەلىمىزدىڭ تۇڭعىش جاڭا تيپتى ايدارشا ۆيرۋس وكپە قابىنۋ ىندەتىن ەمدەيتىن ءدارىسى − ازۆۋددين تابلەتكاسىن قولداندى، ساۋىعىپ شيپاحانادان شىعۋدى كۇتىپ جاتىرمىز“!
تاۋلىك بويى قاداعالاپ قورعادى
8 - ايدىڭ 16 - كۇنى كەشتە، شينجياڭ مەديتسينا داشۋەسىنە قاراستى 1 - شيپاحانانىڭ قىزۋ امبولاتورياسىندا، تەتە اعا شيپاگەر جىڭ رۇڭگۇي قىزمەتتەن تۇسە سالىسىمەن، شۇعىل قايتا شاقىرتىلدى. ءبىر بالانىڭ اۋرۋ جاعدايىندا تۇتقيىل وزگەرىس بولىپتى، ەكى ناۋقاستىڭ اس قورىتۋ جولىنان قان شىعىپتى، ءبىر ناۋقاس جۇرەگىن، وكپەسىن كۇش جالعاپ قايتا ءتىرىلدىرۋدى قاجەت ەتەدى، ادام كۇشى شىنىمەن قىسىلتاياڭ بولىپ تۇر ەكەن ...
ىندەت تۋىلعاننان كەيىن، رايونىمىزداعى ءار دارەجەلى ەمدەۋ، دەنساۋلىق ساقتاۋ قۇرىلىمدارى ءتۇيىندى اۋماقتارداعى شيپاحانادا جۇعىمدالۋدان ساقتانۋ - تىزگىندەۋدى كۇشەيتىپ، قىزۋ امبولاتورياسىنداعى، شۇعىل ەمدەۋ بولىمىندەگى جاعدايى شۇعىل، اۋىر، قيىن ناۋقاستاردى جەتكىزۋدىڭ جاسىل ارناسىن ىركىلىسسىزدەندىرىپ، ءار ۇلت بۇقاراسىنىڭ ەمدەلۋىن بار كۇشپەن قامتاماسىزداندىردى.
8 - ايدىڭ 14 - كۇنى ساعات 3 مولشەرىندە، 6 ايلىق ءبىر نارەستە ايماق - وبلىستان تۇندەلەتىپ شينجياڭ مەديتسينا داشۋەسىنە قاراستى 1 - شيپاحانانىڭ قىزۋ امبولاتورياسىنا جەتكىزىلدى، قاندى ءىرىڭ اۋرۋىنا شالدىققاندىقتان، نارەستە ەسىنەن تانىپ، تالىپ قالىپتى، تىنىس الۋى، تامىر سوعۋى تىم باياۋ، حال ۇستىندە جاتىر ەكەن. كەزەكشى شيپاگەر حالچەگۇل نۇردين مەن قىزمەتتەستەرى دەرەۋ شۇعىل قۇتقارۋ جۇرگىزدى. نارەستەنىڭ تىرشىلىك بەلگىلەرىن ءار ۋاقىت قاداعالاپ وتىرۋ ءۇشىن، ول سەسترالارمەن بىرگە ءۇزىلىسسىز 15 ساعات بويى ناۋقاس توسەگىنىڭ قاسىندا كوز ىلمەي وتىردى. 30 نەشە ساعاتتىق قۇتقارۋ - ەمدەۋ ارقىلى نارەستە حاۋىپتەن ءساتتى اراشالاندى.
ىندەت كەزىندەگى ءار ۇلت بۇقاراسىنىڭ قالىپتى ەمدەۋ قاجەتىن قاناعاتتاندىرۋ ءۇشىن، ىلە وبلىسى سول جەردە ەمدەلۋ، شۇعىل بولماسا اۋىستىرماۋ، اۋىر ناۋقاستاردى جوعارى دارەجەلى شيپاحاناعا اۋىستىرۋ سىندى پرينسيپ بويىنشا، ءتۇرلى ەمدەۋ بايلىقتارىن ءبىر تۇتاس جوسپارلاپ، بۇقارانىڭ ەمدەلۋ ارناسىن ىركىلىسسىزدەندىردى. ىلە وبلىستىق دوستىق شيپاحاناسى شۇعىل قۇتقارۋ ورتالىعىن جابىق باسقارىپ، شۇعىل، قاتەرلى، اۋىر ناۋقاستاردى بار كۇشپەن قۇتقارىپ - ەمدەدى.
8 - ايدىڭ 18 - كۇنى تاڭەرتەڭ، ۇيىندە تۇتقيىل تالىپ قالعاندىقتان، 79 جاستاعى جالعىز تۇراتىن كاريا جاڭ گۇيفاڭ (وزگەرتىلگەن اتى) شۇعىل ىلە وبلىستىق دوستىق شيپاحاناسىنا جەتكىزىلدى. ”كاريا جەتكىزىلگەندە ءار مينۋتتاعى جۇرەك سوعۋى ارەڭ 29 رەت ەكەن، شينديانتۋدان 3 - دارەجەلى جۇرەك بولىمشە - قارىنشا وتكىزگىشتىگى بوگەلگەندىگى بايقالادى، جۇرەك سەبەبىنىڭ ميعا قان جەتىسپەۋ قاباتتامالى سىرقاتتارىنىڭ قوزعالعاندىعىن ويلاستىرساق، كەز كەلگەن ۋاقىتتا جۇرەك توقتاپ قالۋى مۇمكىن“. وسى شيپاحانانىڭ شۇعىل قۇتقارۋ ورتالىعىنىڭ مەڭگەرۋشىسى ۋ يۋانشىڭ بىلاي دەدى: ىشكەرىلەي تەكسەرگەندە، كاريادا ديابەت اۋرۋى بار ەكەنى بايقالدى. كاريانىڭ دەنساۋلىق جاعدايى سەبەبىنەن، ولار ءدارى ىستەتىپ جۇرەك سوعۋ جيىلىگىن جوعارىلاتىپ، قانداعى قانت قۇرامىن تومەندەۋمەن بىرگە، جۇرەك ىشكى اۋرۋلار ءبولىمىنىڭ شيپاگەرلەرى مەن وپەراتسيا بولمەسىندەگىلەرگە وپەراتسياعا دايىندالۋدى دا حابارلايدى.
ۇيىندەگىلەرى قاسىندا بولماعاندىقتان، كاريانىڭ كوڭىل كۇيى تۇراقسىز بولدى. ىلە وبلىستىق دوستىق شيپاحاناسى تاعى جان - جاقتان ونىڭ ۇيىندەگىلەر تۇرعان جەردىڭ قاتىستى تاراۋلارىنا حابارلاسىپ، قاراۋ - كۇتۋ ءىسىن سايكەستىردى. سول كۇنى ساعات 17 مولشەرىندە ۇيىندەگىلەرىنىڭ سەرىك بولۋىندا، كارياعا جۇرەك دەمەۋشى وپەراتسياسى جاسالدى. قازىر كاريانىڭ تىرشىلىك بەلگىلەرى ورنىقتى.
”ەمدەلەتىن ادامداردىڭ كوبەيۋىنە ىلەسە، شيپاحانا تاعى ءبىر عيمارات شىعارىپ، باسەيتۋ ناۋقاس اۋماعى ەتىپ، ىشكى اۋرۋلار ءبولىمى، سىرتقى اۋرۋلار ءبولىمى، ايەلدەر ءبولىمى، بالالار ءبولىمى سياقتى قاتىستى بولىمدەردى ورنالاستىرىپ، جابىق باسقارۋدى جولعا قويىپ، ءاربىر ناۋقاستىڭ دەر كەزىندە قۇتقارىلىپ - ەمدەلۋىنە شىنايى كەپىلدىك ەتتى“، - دەدى ىلە وبلىستىق دوستىق شيپاحاناسى پارتكومىنىڭ مۇشەسى، ورىنباسار باستىعى شۇي مين.
حاۋىپتى، شۇعىل ساتتە دەم بەردى
8 - ايدىڭ 17 - كۇنى ساعات 11 مولشەرىندە، ءۇرىمجى قالالىق 1 - حالىق شيپاحاناسىنىڭ (ءۇرىمجى بالالار شيپاحاناسى) وپەراتسيا بولمەسىندە، تۋىلعانىنا ۇزاق بولماعان شياۋميگە (وزگەرتىلگەن اتى) وڭەشتى جالعاۋ وپەراتسياسى جاسالىپ بولعاننان كەيىن، تىرشىلىك بەلگىلەرى ورنىقتى بولدى. وسى شيپاحانانىڭ ادەتتەگى سىرتقى اۋرۋلار، جاڭا تۋعان نارەستەلەر سىرتقى اۋرۋلار ءبولىمىنىڭ مەڭگەرۋشىسى الىمجان ابدۇرەيىم جالعاستىرا نەگىزگى وپەراتسيا پىشاعىن ۇستاپ، وعان 12 بارماق ىشەكتى جالعاۋ وپەراتسياسىن جاسادى.
ىندەت تۋىلعاننان بەرى، رايونىمىزداعى ءارقايسى ايماق، وبلىس، قالالار ىلگەرىندى - كەيىندى ەمدەلۋ جونىندە كەڭەس سۇراۋ تەلەفونىن جاريالاپ، شۇعىل ەمدەلۋدى قاجەت ەتكەن جۇكتى، بوساناتىن ايەلدەر، جاڭادان تۋعان نارەستەلەر سياقتىلارعا جاسىل ارنا اشىپ، قان سۇزدىرەتىن ناۋقاستارعا، رادياتسيالىق، حيميالىق ەمدەۋدى قاجەت ەتەتىن راكقا شالدىققان ناۋقاستارعا ساتىعا، دارەجەگە ءبولىپ دياگنوز قويۋ - ەمدەۋ جۇرگىزدى.
شياۋمي بيڭتۋان 3 - شى تۇمشۇق قالاسىنان كەلگەن، اناسىنىڭ قۇرساعىندا جۇرگەندە - اق تۋما حاراكتەرلى 12 بارماق ىشەك بىتەلۋ ماسەلەسى بار ەكەندىگى انىقتالعان. شياۋميدىڭ دۇنيەگە كەلگەننەن كەيىن دەر كەزىندە ەمدەلۋىنە شىنايى كەپىلدىك ەتۋ ءۇشىن، ناۋقاستى قابىلداعان ءۇرىمجى قالالىق انالار مەن بالالاردىڭ دەنساۋلىعىن قورعاۋ شيپاحاناسى الدىن الا ءۇرىمجى بالالار شيپاحاناسىمەن حابارلاستى.
8 - ايدىڭ 16 - كۇنى ساعات 17 مولشەرىندە، شياۋميدىڭ شەشەسى وپەراتسيا بولمەسىنە اپارىلىپ ءىشىن جارىپ بوساندىرعالى جاتقاندا، ءۇرىمجى بالالار شيپاحاناسى جاڭا تۋعان نارەستەلەر جاسىل ارناسىن اشتى. ساعات 18 مولشەرىندە، 120 جەدەل قۇتقارۋ كولىگى شياۋميدى الىپ، ءۇرىمجى بالالار شيپاحاناسىنا جەتكىزدى، وسى شيپاحانانىڭ ادەتتەگى سىرتقى اۋرۋلار ءبولىمى، جاڭا تۋعان نارەستەلەر سىرتقى اۋرۋلار ءبولىمى، جۇرەك ىشكى اۋرۋلار ءبولىمى، جاڭا تۋعان نارەستە ICU (جان ساقتاۋ بولمەسى) سياقتى كوپتەگەن بولىمدەردىڭ ماماندارى شۇعىل قۇتقارۋ ورتالىعىندا كۇتىپ تۇردى.
8 - ايدىڭ 17 كۇنى تۇستەن بۇرىن، الىمجاننىڭ جۇمىس توبى شياۋميگە وڭەشىن جالعاۋ، 12 بارماق ىشەكتى جالعاۋ، توق ىشەكتى اشۋ وپەراتسيالارىن ءساتتى جۇرگىزدى. ”قازىر بالانىڭ تىرشىلىك بەلگىلەرى ورنىقتى. الداعى 3 اي نەمەسە جارتى جىلدا ءبىز بالانىڭ قالپىنا كەلۋ احۋالىنا قاراي، ونىڭ تۋما جۇرەك اۋرۋى مەن باسقا ماسەلەلەرىن شەشەمىز“، - دەدى الىمجان.
