□ انار بۇلت \ شينجياڭ گازەتىنىڭ ءتىلشىسى جاڭ جىلي، ەرىكتى ءتىلشى ۋاڭ كى - ي
”شايار اۋىل - قىستاق ساۋدا بانكەسىنىڭ جاسىل ارنا اشقاندىعىنا ەرەكشە العىس ايتامىن، 2 كۇننىڭ ىشىندە - اق بىزگە 60 ميلليون يۋاننان استام قارىز اقشا جۇمىسىن ءبىتىرىپ بەرىپ، كاسىپورىننىڭ شۇعىل قيىنشىلىعىن شەشتى“، - دەدى 8 - ايدىڭ 25 - كۇنى اقسۋ جىڭلۇن ساۋدا - ونەركاسىپ شەكتى سەرىكتەستىگىنىڭ قازىنا ىستەرىنە جاۋاپتىسى ۋاڭ شياۋحۋان.
اقسۋ جىڭلۇن ساۋدا - ونەركاسىپ شەكتى سەرىكتەستىگى شايار اۋدانىنداعى اينالمالى ەكونوميكا ونەركاسىپ باقشاسىنا ورنالاسقان، الدىڭعى مەرزىمدە وندىرىلگەن وڭدەلمەگەن كەزدەمەنىڭ بازارداعى باعاسى قۇلدىراعاندىقتان، كاسىپورىننىڭ پايداسى ازايىپ، 8 - ايدىڭ باسىندا اينالمالى قارجىسى تاپشى بولادى. شايار اۋىل - قىستاق ساۋدا بانكەسى بۇل جاعدايدان حابار تاپقاننان كەيىن، وسى كاسىپورىنمەن دەر كەزىندە بايلانىس جاساپ، ءىس جۇزىندىك جاعدايعا نەگىزدەلىپ، ”كاسىپورىن الدىمەن قارىز اقشا الۋ، سوڭىنان شيكىزاتتى ساتىپ الىپ كەپىلگە قويۋ“ فورماسىمەن 68 ميلليون 900 مىڭ يۋان قارىز اقشا تاراتىپ، كاسىپورىننىڭ قارجى قۇراۋى قيىن بولۋ ماسەلەسىن شەشۋىنە كومەكتەسۋدى ۇيعارادى.
شايار اۋدانىنىڭ ءار جىلى ماقتا ەگەتىن جەر اۋدانى ءبىر ميلليون 800 مىڭ مۋدان اسادى. بايلىق ابزالدىلىعىنا سۇيەنگەن شايار اۋدانى ءوندىرىس، قىزمەت وتەۋ، اينالىم، مانەرلەۋ، ساتۋ ءبىر تۇلعالانعان ماقتا كاسىپ جۇيەسىن بەلسەنە ورناتىپ، ماقتانىڭ تەڭ جارىمىنا جۋىعىن سول جەردىڭ وزىندە كادەگە جاراتىپ، توقىماشىلىق ونىمدەرىنە اينالدىردى.
8 - ايدا ماقتا اتىزىن باسقارۋ شەشۋشى كەزەڭگە ءوتتى، ءىشىنارا ماقتا كاسىپ تىزبەگى جاڭا نىساندارى جەدەل قۇرىلىس جۇرگىزدى، شايار اۋدانىنداعى كوپتەگەن تاراۋلار بىرلەسىپ كۇش سالىپ، ءارقايسى ءوندىرىس، قۇرىلىس بۋىندارىنىڭ جاعدايىن ىرىقتىلىقپەن ۇعىستى، بوگەتتى ءتۇيىن قايدا بولسا، قىزمەت وتەۋ دە سول ارادان تابىلدى.
8 - ايدىڭ 24 - كۇنى شايار اۋدانى نۇرباق اۋىلى لياڭجۇڭچاڭ قىستاعىنداعى ماقتاشى ۋ ميڭشوۋدىڭ سۋارۋ ناسوس ۇيىندە مەملەكەت ەلەكتر تورى شايار اۋداندىق ەلەكترمەن قامداۋ سەرىكتەستىگىنىڭ قىزمەتكەرلەرى تامشىلاتىپ سۋارۋ جۇيەسىنىڭ ەلەكتر جابدىقتارى سياقتى قۇرىلعىلاردىڭ جۇمىس جۇرگىزۋ جاعدايىن تەكسەرىپ، ەلەكتردەن پايدالانۋداعى كومەسكى قاتەردى الاستادى. تاياۋدا مەملەكەت ەلەكتر تورى شايار اۋداندىق ەلەكترمەن قامداۋ سەرىكتەستىگى پارتيا مۇشەلەرىنىڭ 10 قىزمەت وتەۋ اترەتىن ۇيىمداستىرىپ، ماقتا اتىزىن سۋارۋدا ەلەكتردەن پايدالانۋداعى كومەسكى قاتەرلەردى ءبىر - بىرلەپ اداقتاپ تەكسەردى جانە قىزمەت وتەدى، سونداي - اق ءشيت ايىرۋ زاۆودى، توقىماشىلىق كاسىپورىندارى سياقتىلارعا ەلەكتر قۋاتى جاعىنان قىزمەت وتەدى. وسى سەرىكتەستىك تاعى ەكىنشى ماۋسىمداعى ەلەكتر اقىسىنا قوسىمشا قاراجات بەرۋ ساياساتىنان يگىلىكتەنەتىن ماقتا توقىماشىلىعى كاسىپورىندارىنا تەكسەرۋ جۇرگىزىپ، قوسىمشا قاراجات ساياساتىنىڭ ناقتاپ تياناقتانۋىنا شىنايى كەپىلدىك ەتتى.
شايار اۋدانىندا جالپى 33 ماقتا مانەرلەۋ كاسىپورنى، توقىماشىلىق، كيىم - كەشەك كاسىپورنىنان (سەلبەستىك كووپەراتيۆى) 150دەن استامى، ماقتا ۇرىعىن مانەرلەيتىن كاسىپورىننان ۇشەۋى بار. وسى رەتكى ىندەت تۋىلعاننان بەرى شايار اۋداندىق اينالمالى ەكونوميكا ونەركاسىپ باقشا رايونىن باسقارۋ كوميتەتى ماقتا كاسىپورىندارىنا بىرلەسىپ كوتەرمەگە الىپ قىزمەت وتەپ، ءبىر جاعىنان، كاسىپورىنداردىڭ ىندەتتەن ساقتانۋ - تىزگىندەۋ قىزمەتىن ويداعىداي ىستەۋىنە جەتەكشىلىك ەتسە، ەندى ءبىر جاعىنان، كاسىپورىنداردىڭ جابدىق، شيكىزات جانە ساتۋ جاقتارىندا جولىققان قيىن ماسەلەلەردى شەشۋىنە كومەكتەستى.
