شي جينپيڭ سىچۋاننىڭ گانزى لۋديڭ اۋدانىندا 8. 6 بال جەر سىلكىنىسى تۋىلعاندىعىنا بايلانىستى ماڭىزدى نۇسقاۋ بەردى
ءومىردى قۇتقارۋدى ماڭداي الدى مىندەت ەتىپ، اپاتقا ۇشىراعان بۇقارانى بار كۇشپەن قۇتقارىپ، ءولىم - ءجىتىمدى بارىنشا ازايتۋدى تالاپ ەتتى
لي كىچياڭ بەكىتۋ جاسادى
شينحۋا اگەنتتىگىنىڭ 9 - ايدىڭ 5 - كۇنى بەيجيڭنەن بەرگەن حابارى. بەيجيڭ ۋاقىتى 9 - ايدىڭ 5 - كۇنى ساعات 12دەن 52 مينۋت وتكەندە، سىچۋان گانزى زاڭزۋ اۆتونوميالى وبلىسى لۋديڭ اۋدانىندا 8. 6 بال جەر سىلكىنىسى تۋىلدى، سىلكىنىس كوزىنىڭ تەرەڭدىگى 16 كيلومەتر. قازىرگە دەيىن جەر سىلكىنىسىندە 21 ادام قازا بولىپ، 30 نەشە ادام جارالاندى، كەيبىر سۋ، ەلەكتر، قاتىناس، حابارلاسۋ سياقتى نەگىزدىك قۇرىلعىلار زيانعا ۇشىرادى.
جەر سىلكىنىسى تۋىلعاننان كەيىن، جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ وسكەلەڭ ءمان بەردى ءارى بىلاي دەپ ماڭىزدى نۇسقاۋ بەردى: سىچۋان گانزى لۋديڭ اۋدانىنداعى 8. 6 بال جەر سىلكىنىسىندە اۋىر ءولىم - ءجىتىم بولدى، ءومىردى قۇتقارۋدى ماڭداي الدى مىندەت ەتىپ، اپاتقا ۇشىراعان بۇقارانى بار كۇشپەن قۇتقارىپ، ولىم - ءجىتىمدى بارىنشا ازايتۋ كەرەك. سىلكىنىس جاعدايىن باقىلاۋ - تەكسەرۋدى كۇشەيتۋ، قوسالقى اپاتتىڭ تۋىلۋىنان ساقتانۋ، اپاتقا ۇشىراعان بۇقارانى قاتەردەن اۋاشالاۋ - ورنالاستىرۋ سياقتى قىزمەتتەردى ۇيلەسىمدى جاقسى ىستەۋ كەرەك. شۇعىل جاعدايعا توتەپ بەرۋ، باسقارۋ مينيسترلىگى سياقتى تاراۋلار سىچۋانعا قىزمەت گرۋپپاسىن جەر سىلكىنىسىنە قارسى اتتانىپ، اپاتتان قۇتقارۋ قىزمەتىنە جەتەكشىلىك ەتۋگە جىبەرۋ، ازاتتىق ارميا جانە قارۋلى ساقشى اسكەري بولىمدەرى جەرگىلىكتى ورىننىڭ قىزمەت ورىستەتۋىنە بەلسەنە سايكەسىپ، حالىق بۇقاراسىنىڭ ءومىرىنىڭ، مال - مۇلكىنىڭ حاۋىپسىزدىگىنە ەڭ زور قۇلشىنىسپەن شىنايى كەپىلدىك ەتۋ كەرەك.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى لي كىچياڭ بەكىتۋ جاساپ مىنالاردى تالاپ ەتتى: اپات جاعدايىن شۇعىل انىقتاپ، بار كۇشپەن قاتەردەن اراشالاۋ جانە جارالانعانداردى قۇتقارىپ ەمدەۋ، جەر كوشكىنى، لاي تاسقىنى سياقتى قوسالقى اپاتتاردان ساقتانۋعا ءمان بەرىپ، اپاتقا ۇشىراعان بۇقارانى لايىقتى ورنالاستىرىپ، بۇلىنگەن قاتىناس، حابارلاسۋ سياقتى نەگىزدىك قۇرىلعىلاردى تەزىرەك جوندەۋ كەرەك، قاتىستى تاراۋلار جەرگىلىكتى ورىننىڭ جەر سىلكىنىسىنە قارسى اتتانىپ، اپاتتان قۇتقارۋ ىستەرىنە جەتەكشىلىكتى جانە قولداۋدى كۇشەيتۋ كەرەك.
شي جينپيڭنىڭ نۇسقاۋى جانە لي كىچياڭنىڭ تالابى بويىنشا، شۇعىل جاعدايعا توتەپ بەرۋ، باسقارۋ مينيسترلىگى، جاراتىلىستىق بايلىق مينيسترلىگى، مەملەكەتتىك دەنساۋلىق ساقتاۋ - سالاماتتىق كوميتەتى سياقتى تاراۋلار قىزمەت گرۋپپالارىن اپات بولعان وڭىرگە كومەكتەسۋگە، اپاتتان قۇتقارۋعا جەتەكشىلىك ەتۋگە جىبەردى. سىچۋان ولكەسى، گانزى وبلىسى قۇتقارۋ كۇشتەرىن اپاتتان قۇتقارۋ قىزمەتىن ورىستەتۋگە ۇيىمداستىردى ءارى شاتىر، ماقتالى كورپە، بۇكتەمەلى توسەك سياقتى اپاتتان قۇتقارۋ ماتەريالدارىن اپات بولعان وڭىرگە شۇعىل جەتكىزدى. جەر سىلكىنىسىنە قارسى اتتانۋ، اپاتتان قۇتقارۋ قىزمەتتەرى شۇعىل، ءتارتىپتى جۇرگىزىلۋدە.
