ما شيڭرۇي باستالعاندىعىن جاريالادى، ەركىن تۇنياز ارناۋ ءسوز سويلەدى
9 - ايدىڭ 13 - كۇنى، از ۇلتتاردىڭ اۆتونوميالى رايوندىق 10 - كەزەكتى ءداستۇرلى سپورت جارىسى بۇراتالا قالاسىنىڭ بايگە الاڭىندا باستالدى.
□ سۋرەتتى انار بۇلت \ شينجياڭ گازەتىنىڭ ءتىلشىسى حان لياڭ تۇسىرگەن
انار بۇلت \ شينجياڭ گازەتىنىڭ ءتىلشىسى لي ياڭ 9 - ايدىڭ 13 - كۇنى بۇراتالادان حابارلايدى. از ۇلتتاردىڭ اۆتونوميالى رايوندىق 10 - كەزەكتى ءداستۇرلى سپورت جارىسى 9 - ايدىڭ 13 - كۇنى بۇراتالا قالاسىنىڭ بايگە الاڭىندا باستالدى. اۆتونوميالى رايوندىق پارتكومنىڭ شۋجيى ما شيڭرۇي باستالۋ سالتىنا قاتىناستى ءارى باستالعاندىعىن جاريالادى، اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ءتوراعاسى ەركىن تۇنياز باستالۋ ءسوزىن سويلەدى.
تۇستەن بۇرىن ساعات 11دە، باستالۋ سالتى رەسمي باستالدى. «وتاندى جىرلايمىز» ءانىنىڭ اسقاق اۋەنىمەن قۇرمەت قاراۋىلى الاۋلاعان بەس جۇلدىزدى قىزىل تۋدى قورعاپ نىق قاداممەن سپورت الاڭىنا كىردى. الاڭدا ەكپىندى «سپورتشىلار مارشى» شىرقالدى، از ۇلتتاردىڭ اۆتونوميالى رايوندىق 10 - كەزەكتى ءداستۇرلى سپورت جارىسىنىڭ جارىس تۋى جانە جارىس تۋى شارشى توبى، تورەشىلەر ۋاكىلدەرى شارشى توبى ءتوراعالار مىنبەسى الدىنان ءجۇرىپ ءوتتى. رايونىمىزدىڭ 14 ايماق، وبلىس، قالاسىنان جانە شينجياڭ ءوندىرىس - قۇرىلىس بيڭتۋانىنان كەلگەن 15 سپورت ۋاكىلدەر ۇيىرمەسىنىڭ سپورت ساڭلاقتارى كوتەرىڭكى رۋحپەن رەتتى ساپ تۇزەپ تۇردى.
الاڭعا كىرۋ سالتى اياقتاعاندا، بۇكىل الاڭداعىلار ورىندارىنان تۇردى، جۇڭحۋا حالىق رەسپۋبليكاسىنىڭ ايبىندىمەملەكەت انىمەن بىرگە، بەس جۇلدىزدى قىزىل تۋ باياۋ كوتەرىلدى. ونان سوڭ، از ۇلتتاردىڭ اۆتونوميالى رايوندىق 10 - كەزەكتى ءداستۇرلى سپورت جارىسىنىڭ جارىس ءانىنىڭ اۋەنىمەن جارىس تۋى باياۋ كوتەرىلدى.
ساعات 11دەن 20 مينۋت وتە بەرە، ما شيڭرۇي: ”از ۇلتتاردىڭ شينجياڭ ۇيعۇر اۆتونوميالى رايوندىق 10 - كەزەكتى ءداستۇرلى سپورت جارىسى باستالدى!“، - دەپ جاريالادى، جارىس الاڭىن قىزۋ قول شاپالاق ءۇنى مەن الاقايلاعان ۇندەر كەرنەدى.
باستالۋ سالتىنداعى ارناۋ سوزىندە، ەركىن تۇنياز اۆتونوميالى رايوندىق پارتكوم، اۆتونوميالى رايوندىق حالىق ۇكىمەتى اتىنان بارلىق سپورتشىلاردى، باپكەرلەردى، تورەشىلەردى قارسى الاتىندىعىن، وسى كەزەكتى از ۇلتتاردىڭ ءداستۇرلى سپورت جارىسىنىڭ وتكىزىلۋىن قۇتتىقتايتىندىعىن ءبىلدىردى. ول بىلاي دەپ اتاپ كورسەتتى: پارتيا 18 - قۇرىلتايىنان بەرى، باس شۋجي شي جينپيڭ مەن پارتيا ورتالىق كوميتەتى شينجياڭ قىزمەتىنە ايرىقشا ءمان بەردى، اسىرەسە، بيىل 7 - ايدا، باس شۋجي شي جينپيڭ تاعى دا كەلىپ شينجياڭدى كوزدەن كەشىرىپ، ءار ۇلت كادر - بۇقاراسىنا امانداسىپ، ولاردان حال سۇراپ، ماڭىزدى ءسوز سويلەپ، ماڭىزدى نۇسقاۋ بەرىپ، جاڭا جاعدايداعى شينجياڭ قىزمەتىن ويداعىداي ىستەۋگە قۋاتتى ساياسي قوزعاۋشى كۇش، رۋحاني قوزعاۋشى كۇش جانە قىزمەت قوزعاۋشى كۇشىن ۇستەدى. از ۇلتتاردىڭ اۆتونوميالى رايوندىق 10 - كەزەكتى ءداستۇرلى سپورت جارىسىن وتكىزۋ باس شۋجي شي جينپيڭنىڭ شينجياڭدى كوزدەن كەشىرگەندەگى ماڭىزدى ءسوزىنىڭ، ماڭىزدى نۇسقاۋىنىڭ رۋحىن دايەكتىلەندىرۋدىڭ، تياناقتاندىرۋدىڭ ماڭىزدى شاراسى، جۇڭحۋا ۇلتى ۇلى ىنتىماعىنىڭ جاندى بەينەسى، جۇڭحۋا ۇلتىنىڭ تاڭداۋلى ءداستۇرلى مادەنيەتىن جالعاستىرۋدىڭ جانە جالپى حالىقتىق دەنە شىنىقتىرۋ مەملەكەت ستراتەگياسىن اتقارۋدىڭ ناقتى ارەكەتى. ءبىز وسى كەزەكتى از ۇلتتاردىڭ ءداستۇرلى سپورت جارىسىن جۇڭحۋا ۇلتى ورتاق تۇلعا تانىمىن بەرىك ورناتۋدىڭ سالتاناتتى جينالىسى، ۇلتتاردىڭ ارالاسۋىن، ىشتەسۋىن، توعىسۋىن جەبەۋدىڭ سالتاناتتى جينالىسى، شينجياڭنىڭ رەفورما، دامۋ، ورنىقتىلىق جەتىستىكتەرىن جاپپاي ايگىلەۋدىڭ سالتاناتتى جينالىسى ەتىپ وتكىزىپ، پارتيا 20 - قۇرىلتايىنىڭ جەڭىسپەن اشىلۋىن ءىس جۇزىندىك ارەكەتپەن شاتتانا قارسى الۋىمىز كەرەك.
اشىلۋ سالتىندا «بۇراتالا ءسىزدى قارسى الادى» اتتى تارتىمدى ادەبيەت - كوركەمونەر كونسەرتى قويىلدى. دارا ەرەكشەلىككە يە بيلەر، قۇلاقتان كىرىپ بويدى الار اسەم اندەر دوستىقتىڭ دانەكەرى بولىپ، اسقاقتىق پەن اسەرلى سەزىمدى بەينەلەدى.
وسىدان كەيىن وتكىزىلگەن 2000 مەترلىك ات بايگەسىندە، شاباندوزدار جۇيرىكتەرىنە قامشى ۇيىرە قۇيعىتتى. تۇيە جارىسى، قىزقۋار، اتپەن شاۋىپ كەلىپ حادا ءىلۋ سياقتى ويىندار ءداستۇرلى دەنە تاربيەنىڭ وزگەشە تارتىمدىلىعىن تولىق ايگىلەپ، ءار ۇلت پەرزەنتتەرىنىڭ ءبىر نيەتپەن ىنتىماقتاسىپ، كوركەم شينجياڭدى بىرگە قۇراتىن اسقاق ارمانىن بەينەلەدى.
وسى كەزەكتى از ۇلتتاردىڭ ءداستۇرلى سپورت جارىسى ”ىنتىماقتاسۋ، العا باسۋ، جاراسىمدىلىق، ەكپىندەي ىلگەرىلەۋدى“ نەگىزگى تاقىرىپ ەتىپ، ”ينتەرنەت جەلىسىندە + ينتەرنەت جەلىسىنەن تىس“ جارىس ۇلگىسىنەن پايدالانىپ، جيىنى 16 ۇلكەن جارىس ءتۇرىن، 10 ويىن كورسەتۋ ءتۇرىن ورنالاستىردى. مۇنىڭ ىشىندە، ءداستۇرلى ات بايگەسى، كوكپار تارتۋ سياقتى بۇقارا ۇناتىپ كورەتىن تۇرلەرمەن بىرگە، جاڭادان قوسىلعان حىچيۋ، توعىزقۇمالاق سياقتى تاماشالاۋ سيپاتتى جانە باسەكەلىك سيپاتتى تۇرلەر دە بار. جيىنى 1752 سپورتشى جارىسقا قاتىناستى.
ءزۇمىرات وبۇل، سۇن حۇڭمەي، ءمۇتالىپ ءماتتوحتى قاتارلىلار اشىلۋ سالتىنا قاتىناستى.
