9 - ايدىڭ 17 - كۇنى ءتىلشى شينجياڭ حالىقارالىق ءماجىلىس - كورمە ورتالىعىندا 7 - كەزەكتى جۇڭگو − ازيا - ەۆروپا كورمەسىنىڭ ءارقايسى كورمە اۋماقتارىنىڭ نەگىزگى تۇلعالىق قۇرىلىمىنىڭ سالىنىپ بولعاندىعىن كوردى. سۋرەتتە: ورنالاستىرىلۋ ۇستىندەگى ءۇرىمجى قالاسىنىڭ كورمە اۋماعى.
□ سۋرەتتى انار بۇلت \ شينجياڭ گازەتىنىڭ ءتىلشىسى تاڭ يۇڭ تۇسىرگەن
انار بۇلت \ شينجياڭ گازەتىنىڭ ءتىلشىسى حي حۇڭۋي 9 - ايدىڭ 17 - كۇنى ۇرىمجىدەن حابارلايدى. 7 - كەزەكتى جۇڭگو − ازيا - ەۆروپا كورمەسى 9 - ايدىڭ 19 - كۇنىنەن 22 - كۇنىنە دەيىن ۇرىمجىدە وتكىزىلەدى. 9 - ايدىڭ 17 - كۇنى ءتىلشى شينجياڭ حالىقارالىق ءماجىلىس - كورمە ورتالىعىندا ءارقايسى كورمە اۋماقتارىنىڭ نەگىزگى تۇلعالىق قۇرىلىمىنىڭ سالىنىپ بولعاندىعىن كوردى.
وسى كەزەكتى كورمەدە جيىنى 76 قۇرۋشى ساۋداگەر كورمە ورنىن قۇرۋعا قاتىناستى. قۇرۋشى ساۋداگەرلەردىڭ ءبىرى بولعان شينجياڭ حۇڭتۋ داجان مادەنيەت تاراتۋ شەكتى سەرىكتەستىگىنىڭ جاۋاپتىسى جاۋ يان: ”سەرىكتەستىگىمىز وسى كەزەكتى كورمەدە ەرەكشە جابدىقتالاتىن كورمە ورنىنان 9دى، جيىنى 1300 نەشە شارشى مەتردى كوتەرمەگە الدى، كولەمى ەڭ ۇلكەنى 360 شارشى مەتر“، - دەپ تانىستىردى.
كورمەنىڭ كورمەلەۋى، كورسەتۋى ينتەرنەت جەلىسىندە، ينتەرنەت جەلىسىنەن سىرت ءوزارا ۇشتاستىرىلعان ۇلگىدە وتكىزىلەدى. كورمە كولەمى 40 مىڭ شارشى مەتر، بۇكىل ساراي ەرەكشە جابدىقتالدى، قارجى قوسىپ سەلبەسۋ، حالىقارا جانە تاۋار ساۋداسى سىندى 3 ۇلكەن كورمە اۋماعى ورنالاستىرىلدى، جيىنى 2101 كورمە ورنى ورنالاستىرىلدى، مۇندا ءۇي ءىشى كورمە ورنىنان 2049ى، دالا كورمە ورنىنان 52سى بار.
شينجياڭ حالىقارالىق كورمە ىستەرى مەكەمەسى ساۋداگەر شاقىرۋ، كورمەگە شاقىرۋ ءبولىمىنىڭ باستىعى جۋ ديچياڭ بىلاي دەپ تانىستىردى: قازىر 7 الاڭ، سارايداعى ەرەكشە جابدىقتالعان كورمە ورنىن قۇرۋ قىزمەتى نەگىزىنەن ورىندالىپ بولدى، كورمە بۇيىمدارىن، ۇلگى بۇيىمداردى ورنالاستىرۋ قىزمەتى ىستەلۋدە.
ورنالاستىرۋ قىزمەتىنىڭ ءساتتى ىستەلۋىن قامتاماسىز ەتۋ ءۇشىن، وسى كەزەكتى كورمەنى ۇيىمداستىرۋ كوميسسياسى قاتىستى تاراۋلارمەن بەلسەنە ءتۇيىلىسىپ، سايكەسىپ، جۇڭگو پوچتا توبى شەكتى سەرىكتەستىگى سياقتى 5 زات اينالىمى ورنىن كورمەنىڭ بەلگىلەنگەن زات اينالىمى تاسىمال ورنى ەتىپ تۇراقتاندىردى ءارى جاسىل ارنا اشىپ، كورمە بۇيىمدارىنىڭ ۇرىمجىگە دەر كەزىندە كىرگىزىلۋىنە شىنايى كەپىلدىك ەتتى.
قازىرگە دەيىن وسى كەزەكتى كورمەگە قاتىناسۋعا تىزىمدەلگەن كاسىپورىن 861، دۇنيە جۇزىندەگى جانە جۇڭگوداعى 500 مىقتى كاسىپورىننان جانە ەل ارالىق كاسىپورىنداردان 20 نەشەسى جانە كاسىپ سالاسىنداعى باستاماشى كاسىپورىنداردان 100 نەشەسى كورمەگە قاتىناستى.
