مەملەكەت ءتوراعاسى شي جينپيڭ قۇتتىقتاۋ حات جولدادى
7 - كەزەكتى جۇڭگو − ازيا - ەۆروپا كورمەسى اشىلدى
حۋ چۇنحۋا قۇتتىقتاۋ حاتىن وقىدى، توقايەۆ، وربان، شاھباز، قاسىماليەۆ، سايد، امىربايسحلىڭ، لين يۇيحۇي، جاڭ ميڭ لەكسيا سويلەدى
ۋاڭ شوۋۋىن ارناۋ ءسوز سويلەدى، ما شيڭرۇي ارناۋ ءسوز سويلەدى ءارى كورمەنىڭ اشىلعاندىعىن جاريالادى، ەركىن تۇنياز باسقاردى، لي يفي قاتىناستى
9 - ايدىڭ 19 - كۇنى 7 - كەزەكتى جۇڭگو − ازيا - ەۆروپا كورمەسىنىڭ اشىلۋ سالتى جانە تيانشان تالقى مىنبەرى شينجياڭ حالىقارالىق ءماجىلىس - كورمە ورتالىعىندا وتكىزىلدى.
□ سۋرەتتى انار بۇلت \ شينجياڭ گازەتىنىڭ ءتىلشىسى شيە لۇڭ تۇسىرگەن
انار بۇلت \ شينجياڭ گازەتىنىڭ تىلشىلەرى ياۋ تۇڭ، ۋاڭ شيڭرۇي 9 - ايدىڭ 19 - كۇنى ۇرىمجىدەن حابارلايدى. 7 - كەزەكتى جۇڭگو − ازيا - ەۆروپا كورمەسىنىڭ اشىلۋ سالتى جانە تيانشان تالقى مىنبەرى 9 - ايدىڭ 19 - كۇنى شينجياڭ حالىقارالىق ءماجىلىس - كورمە ورتالىعىندا وتكىزىلدى.
اشىلۋ سالتىندا الدىمەن مەملەكەت ءتوراعاسى شي جينپيڭنىڭ 7 - كەزەكتى جۇڭگو − ازيا - ەۆروپا كورمەسىنە جولداعان قۇتتىقتاۋ حاتى وقىلدى. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، مەملەكەتتىك كەڭەستىڭ ورىنباسار زۇڭليى حۋ چۇنحۋا قۇتتىقتاۋ حاتىن وقىدى.
وسى كەزەكتى كورمەنىڭ نەگىزگى قوناق ەلى قازاقستاننىڭ زۇڭتۇڭى توقايەۆ، نەگىزگى قوناق ەلدەرى ۆەنگريانىڭ زۇڭليى وربان، پاكيستاننىڭ زۇڭليى شاھباز، قىرعىزستاننىڭ ءبىرىنشى ورىنباسار زۇڭليى قاسىماليەۆ، تاجىكستاننىڭ ءبىرىنشى ورىنباسار زۇڭليى سايد، موڭعۇليا ۇكىمەتىنىڭ باس حاتشىسى امىربايسحلىڭ، شىعىس وڭتۇستىك ازيا ەلدەرى وداعىنىڭ باس حاتشىسى لين يۇيحۇي، شاڭحاي سەلبەستىك ۇيىمىنىڭ باس حاتشىسى جاڭ ميڭ بەينە ەكران ارقىلى لەكسيا سويلەدى.
ساۋدا مينيسترلىگىنىڭ حالىقارالىق ساۋدا كەلىسسوزى ۋاكىلى، قوسىمشا ورىنباسار مينيسترى ۋاڭ شوۋۋىن بەينە ەكران ارقىلى ارناۋ ءسوز سويلەدى، اۆتونوميالى رايوندىق پارتكومنىڭ شۋجيى ما شيڭرۇي ارناۋ ءسوز سويلەدى ءارى كورمەنىڭ اشىلعاندىعىن جاريالادى. اۆتونوميالى رايوننىڭ ءتوراعاسى ەركىن تۇنياز باسقاردى.
ۋاڭ شوۋۋىن ارناۋ سوزىندە جۇڭگو ساۋدا مينيسترلىگى اتىنان 7 - كەزەكتى جۇڭگو − ازيا - ەۆروپا كورمەسىنىڭ وتكىزىلگەندىگىن قىزۋ قۇتتىقتادى. ول بىلاي دەدى: ءتوراعا شي جينپيڭ 2013 - جىلى ”ءبىر بەلدەۋ، ءبىر جولدى“ بىرگە قۇرۋ باستاماسىن العا قويعاننان بەرى جۇڭگونىڭ قاتىستى ەلدەرمەن ناقتى سەلبەستىگى ۇزدىكسىز تەرەڭدەپ، ناقتى، قوماقتى تابىستارعا قول جەتكىزدى. جۇڭگونىڭ شينجياڭى − جىبەك جولى ەكونوميكالىق بەلدەۋىنىڭ وزەكتى رايونى، جۇڭگونىڭ باتىسقا ەسىك اشۋداعى ماڭىزدى قاقپاسى. شاڭحاي سەلبەستىك ۇيىمىنىڭ مۇشەلەر قاتارىن ونان ارى كەڭەيتۋگە مەڭزەس، ”ءبىر بەلدەۋ، ءبىر جول“ باستاماسى ەۆروپا - ازيا ەكونوميكالىق وداعىمەن ءتۇيىلىسىپ، جۇڭگو مەن ورتا ازيانىڭ سەلبەستىك مەحانيزمى اناعۇرلىم كەمەلدەنىپ جانە تەرەڭدەپ، جۇڭگو − ازيا - ەۆروپا كورمەسىنىڭ بەلسەندى رولى اناعۇرلىم كورنەكتىلەندى. شينجياڭنىڭ سىرتقى ساۋدانىڭ جاڭالىق اشا دامۋىن جانە ەسىك اشۋ تۇعىرى قۇرىلىسىن ىلگەرىلەتۋىنە ۇزدىكسىز قولداۋ كورسەتىپ، ”ءبىر بەلدەۋ، ءبىر جولدى“ بىرگە قۇرۋدىڭ جوعارى ساپالى دامۋىن ىلگەرىلەتىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە تىڭ ۇلەس قوسامىز.
ما شيڭرۇي ارناۋ سوزىندە اۆتونوميالى رايوندىق پارتكوم، ۇكىمەت جانە بۇكىل رايونداعى ءار ۇلت حالقى اتىنان جۇڭگولىق، شەتەلدىك سيلى قوناقتار مەن ءار سالاداعى دوستاردى قىزۋ قارسى الاتىندىعىن ءبىلدىردى. ول بىلاي دەدى: ءتوراعا شي جينپيڭ ارنايى قۇتتىقتاۋ حات جولداپ، كورمەنىڭ اشىلعاندىعىن قىزۋ قۇتتىقتاپ، جىبەك جولى رۋحىن اسقاقتاتۋ، ازيا - ەۆروپا سەلبەستىگىن تەرەڭدەتۋ جونىندە ىقىلاستى ءۇمىت ارتتى، ءبىز بۇدان ەرەكشە جىگەرلەنىپ، ايرىقشا جەلپىندىك. ءبىز تاپسىرمانى ەستە بەرىك ساقتاپ، العىس سەزىمىمەن ەكپىندەي ۇمتىلىپ، ءىس جۇزىندىك ارەكەتىمىز ارقىلى ءتوراعا شي جينپيڭنىڭ قامقورلىعىن، تەرەڭ سۇيىسپەنشىلىگىن كورىكتى شينجياڭ قۇرۋدىڭ، كوركەم بولاشاققا جول اشۋدىڭ جاندى امالياتىنا اينالدىرامىز. ەل ءىشى - سىرتىنداعى ءار سالاداعى دوستارمەن بىرگە بەيبىت بولۋ جانە سەلبەسۋ، اشىق جانە سيىسىمدى بولۋ، ءوزارا ۇيرەنىپ، ءبىر - بىرىنەن ۇلگى الۋ، ءوزارا پايدا جەتكىزىپ، تەڭ يگىلىكتەنۋ سىندى جىبەك جولى رۋحىن اسقاقتاتىپ، جوعارى ولشەمدى، باياندى بولۋعا، حالىق تۇرمىسىنا تيىمدىلىك جاساۋعا تاباندى بولىپ، ”بەستى ۇلاستىرۋدى“ ىشكەرىلەي ىلگەرىلەتىپ، ازيا - ەۆروپا سەلبەستىگى سالالارىن ۇزدىكسىز كەڭەيتىپ، ازيا - ەۆروپا سەلبەستىگىنىڭ دەڭگەيىن جوعارىلاتىپ، جىبەك جولىنىڭ گۇلدەنۋىنىڭ، دامۋىنىڭ تىڭ تاراۋىن بىرگە جازۋدى قالايمىز.
تيانشان تالقى مىنبەرى مەن كورمەنىڭ اشىلۋ سالتى قاتار وتكىزىلدى، 6 مەملەكەتتىڭ بەلدى ساياسي قايراتكەرلەرى، 2 حالىقارالىق ۇيىمنىڭ ۋاكىلدەرى وسى كەزەكتى كورمەنىڭ ”بىرگە اقىلداسۋ، بىرگە قۇرۋ، بىرگە يگىلىكتەنۋ، سەلبەسىپ بولاشاققا اتتانۋ“ سىندى نەگىزگى تاقىرىبىن ارقاۋ ەتىپ لەكسيا سويلەدى.
توقايەۆ لەكسياسىندا بىلاي دەدى: بۇگىنگى دۇنيە جۇزىندە حالىقارالىق جاعدايدا تەرەڭ وزگەرىستەر تۋىلىپ، ”ءبىر بەلدەۋ، ءبىر جولدى“ بىرگە قۇرۋ باستاماسىنىڭ وزەكتى باسىمدىعى اناعۇرلىم كورنەكتىلەندى. قازاقستان ”ءبىر بەلدەۋ، ءبىر جولدى“ بىرگە قۇرۋدى تياناقتاندىرۋدى بەلسەنە ىلگەرىلەتەدى. جۇڭگو − ازيا - ەۆروپا كورمەسى حالىقارالىق ساۋدا تۇعىرىنا اينالىپ ۇلگىرىپ، ءار ەلدىڭ ەكسپورتىنا اناعۇرلىم كەڭ وراي ازىرلەدى. وسى رەتكى كورمەنىڭ الەمدىك ساۋدانىڭ دامۋىنا جانە زات اينالىمى تاسىمالىنىڭ ىركىلىسسىزدىگىنە، ءسوز جوق، ماڭىزدى ۇلەس قوساتىندىعىنا سەنەمىن.
وربان لەكسياسىندا بىلاي دەدى: ۆەنگريا − شىعىس پەن باتىس سەلبەستىگىنىڭ تاباندى دارىپتەۋشىسى، جۇڭگو ۆەنگريانىڭ ەۆروپادان سىرت ەڭ ۇلكەن ساۋدا سەرىكتەسىنە اينالدى، جۇڭگو - ورتا ەۆروپا ۇلگىسى بۇل ءۇشىن جوعارى ءونىمدى تۇعىر ازىرلەدى، ءبىز جۇڭگومەن ”ءبىر بەلدەۋ، ءبىر جول“ سەلبەستىك حۇجاتىنا قول قويعان العاشقى ەۆروپا مەملەكەتى بولعاندىعىمىزدى ايرىقشا ماقتانىش ەتەمىز. ءبىز ۆەنگريانىڭ ورتا، شىعىس ەۆروپاداعى باسەكەلىك قۋاتى ەڭ كۇشتى قارجى قوسۋ ورتاسىن ۇزدىكسىز ساقتاپ، اناعۇرلىم تىعىز ەۆروپا − ازيا سەلبەستىگىن ورناتۋدى جەبەيمىز.
شاھباز لەكسياسىندا بىلاي دەدى: پاكيستان مەن جۇڭگو ءوزارا بارلىق جاعدايدا بىردەي ستراتەگيالىق سەلبەستىك سەرىكتەستەر، تالاي سىننان وتكەن جاقسى اعايىندار. ءتوراعا شي جينپيڭنىڭ كورەگەندىككە، دانالىققا تولى ”ءبىر بەلدەۋ، ءبىر جول“ باستاماسى اياسىندا جۇڭگو − پاكيستان ەكونوميكالىق ءدالىزى نىسانى قازىر جاڭا ارتۋ قوزعاۋشى كۇشىن قالىپتاستىرۋدا. ءبىز وڭىرلىك سەلبەستىك مەحانيزمىن ونان ارى كۇشەيتىپ، جۇڭگونىڭ شينجياڭىمەن ساۋدا، ساياحات، مادەنيەت جانە گۋمانيتارلىق ىستەر جاقتارداعى سەلبەستىك پەن اۋىس - كۇيىستى تەرەڭدەتۋدى ءۇمىت ەتەمىز.
قاسىماليەۆ لەكسياسىندا بىلاي دەدى: شاڭحاي سەلبەستىك ۇيىمى سامارحان باسشىلار ماجىلىسىندە جۇڭگو - قىرعىزستان - وزبەكستان تەمىر جول قۇرىلىسى نىسانى سەلبەستىك كەلىسىمىنە قول قويىلدى، بۇل قىرعىزستان - جۇڭگو قارىم - قاتىناسىنىڭ باسىم باعىتتا جاڭا دامۋدى جۇزەگە اسىرۋىن ىلگەرىلەتەدى. وسى رەتكى كورمە، ءسوز جوق، قىرعىزستان مەن جۇڭگونىڭ جان - جاقتى ستراتەگيالىق سەرىكتەستىك قارىم - قاتىناسىن ونان ارى تەرەڭدەتەدى.
سايد لەكسياسىندا بىلاي دەدى: جۇڭگو تاجىكستان اۋماعىندا اتقارىلعان جانە اتقارىلىپ جاتقان قارجى قوسۋ نىساندارى ءۇشىن وراسان زور ۇلەس قوستى. جۇڭگو − ازيا - ەۆروپا كورمەسى وڭىرلىك ەكونوميكا - ساۋدا سەلبەستىگىنىڭ دامۋىن ىلگەرىلەتۋ جاعىندا ماڭىزدى رول اتقارۋدا. كورمە ارقىلى بەلسەندى، ناقتى قارىم - قاتىناس، بايلانىس ورناتۋدى ءۇمىت ەتەمىز.
امىربايسحلىڭ لەكسياسىندا بىلاي دەدى: جاڭا تيپتى ايدارشا ۆيرۋس وكپە قابىنۋ ىندەتىنىڭ سىن - سايىسىمەن بەتپە - بەت كەلگەن بۇگىنگى تاڭدا، ۇكىمەت ەكونوميكالىق سەلبەستىكتى كۇشەيتۋ ارقىلى ەكونوميكانىڭ قالپىنا كەلۋىن جۇزەگە اسىرۋى كەرەك. ىندەت جاعدايىنىڭ جاقسارۋىنا بايلانىستى، جۇڭگو − ازيا - ەۆروپا كورمەسى كاسىپكەرلەر ءۇمىت كۇتكەن ۇلكەن تۇعىرعا اينالىپ، كولەمىن ۇزدىكسىز كەڭەيتە تۇسەدى.
لين يۇيحۇي لەكسياسىندا بىلاي دەدى: جۇڭگو − ازيا - ەۆروپا كورمەسى ازيا مەن ەۆروپا - ازيا وڭىرىندەگى ەلدەردىڭ ەكونوميكالىق سەلبەستىگىن ءساتتى جەبەدى. جاپپاي قالپىنا كەلۋ جۇلگەسىن اتقارۋ شىعىس وڭتۇستىك ازيا ەلدەرى وداعىنىڭ ىندەتكە توپتىق توتەپ بەرۋ قۇلشىنىسىنىڭ ماڭىزدى بولىگى بولىپ تابىلادى. تۇسىنىستىكتى ونان ارى تەرەڭدەتىپ، سەلبەستىكتى كۇشەيتىپ، ىندەتتەن كەيىنگى داۋىردە ونان ارى الۋەتتەنە ءتۇسۋدى ءۇمىت ەتەمىز.
جاڭ ميڭ لەكسياسىندا بىلاي دەدى: شاڭحاي سەلبەستىك ۇيىمى باسشىلار ماجىلىسىندە ءار جاق ءبىر قىدىرۋ ماڭىزدى سەلبەستىك حۇجاتتارىن ماقۇلداپ، جۇڭگونىڭ شينجياڭىنىڭ سىرتپەن سەلبەستىگىنە جاڭا وراي اكەلدى. شاڭحاي سەلبەستىك ۇيىمى جۇڭگو − ازيا - ەۆروپا كورمەسىن تۇعىر ەتىپ، جۇڭگونىڭ شينجياڭى مەن توڭىرەگىندەگى وڭىرلەردىڭ جان - جاقتى، كوپ ساتىلى سەلبەستىك ورناتۋىن ىلگەرىلەتۋدى قالايدى.
تيانجين، ىشكى موڭعۇل، حيلۇڭجياڭ، شاڭحاي، جياڭسۋ، جىجياڭ، انحۇي، فۋجيان، جياڭشي، حىنان، حۋبەي، گۋاڭدۇڭ، گۋاڭشي، گۇيجوۋ، شانشي، گانسۋ، چيڭحاي، نيڭشيا سياقتى ولكە، اۆتونوميالى رايون، قالالارداعى قاتىستى جاۋاپتى جولداستار، اۆتونوميالى رايوندىق پارتكومنىڭ ورىنباسار شۋجيى، بيڭتۋاننىڭ جىڭۋيى لي يفي قاتارلى اۆتونوميالى رايون مەن بيڭتۋانداعى باسشى جولداستار، دۇنيە جۇزىندەگى 500 قۋاتتى كاسىپورىننىڭ، جۇڭگوداعى 100 قۋاتتى كاسىپورىننىڭ جاۋاپتىلارى، ت.ب اشىلۋ سالتىنا جانە نەگىزگى تالقى مىنبەرىنە قاتىناستى. قاتىستى ەلدەردىڭ مينيستر دارەجەلى سيلى قوناقتارى مەن جۇڭگودا تۇراتىن ەلشىلەرى، ەلىمىزدىڭ شەتەلدە تۇراتىن ەلشىلەرىنىڭ ۋاكىلدەرى قاتارلىلار بەينە ەكران ارقىلى قاتىناستى.
اشىلۋ سالتىنان بۇرىن ما شيڭرۇي، ەركىن تۇنياز قاتارلى اۆتونوميالى رايون باسشىلارى مەن ماڭىزدى سيلى قوناقتار كورمە سارايىن ارالاپ شىقتى ءارى شينجياڭعا كورمەگە قاتىناسۋعا كەلگەن ءبىر ءبولىم ولكە، قالالاردىڭ ۋاكىلدەر ۇيىرمەلەرىنىڭ باستىقتارىمەن، كاسىپورىنداردىڭ جوعارى دارەجەلى باسقارۋشىلارىمەن جانە تاعى باسقالارمەن كەزدەستى.
