شينحۋا اگەنتتىگىنىڭ 9 - ايدىڭ 19 - كۇنى بەيجيڭنەن بەرگەن حابارى. جۋىقتا جۇڭگو كوممۋنيستىك پارتياسى ورتالىق كوميتەتى كەڭسەسى «باسشى كادرلاردىڭ شىعا دا الاتىن، تۇسە دە الاتىن بولۋىن ىلگەرىلەتۋ بەلگىلەمەسىن» (تومەندە قىسقارتىلىپ «بەلگىلەمە» دەلىنەدى) باسىپ تاراتتى ءارى حابارلاندىرۋ جاريالاپ، جەر - جەردەن، تاراۋلاردان وسى بويىنشا مۇقيات اتقارۋدى تالاپ ەتتى.
حابارلاندىرۋدا مىنالار اتاپ كورسەتىلدى: «بەلگىلەمە» شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتىپ، جاڭا داۋىردەگى پارتيا قۇرىلىسىنىڭ باس تالابى مەن جاڭا داۋىردەگى پارتيانىڭ ۇيىمدىق لۋشيانىن دايەكتىلەندىرىپ، پارتيانى جاپپاي قاتاڭ باسقارۋدىڭ جاڭا تاجىريبەسىن قابىلداپ، شىعا دا الاتىن، تۇسە دە الاتىن بولۋداي ادام تاڭداۋ، ادام ىستەتۋ مەحانيزمىن اقاۋسىزداندىرىپ، قابىلەتتىلەر شىعا الاتىن، ۇزدىكتەر سيلاناتىن، جاۋتىكتەر كەيىن سىرىلاتىن، ناشارلار قاتاردان قالاتىن ادام ىستەتۋ باعىتى مەن بيلىك جۇرگىزۋ ورتاسىن قالىپتاستىرۋدى ىلگەرىلەتىپ، ادال، كىرشىكسىز، جاۋاپكەرشىلىك ارقالايتىن جوعارى ساپالى بيلىك جۇرگىزەتىن تىرەكتى كادرلار قوسىنىن قۇرۋ جونىنەن ماڭىزدى مانگە يە.
حابارلاندىرۋدا مىنالار تالاپ ەتىلدى: ءار دارەجەلى پارتكومدار (پارتيا باسشىلىق گرۋپپاسى) جانە ونىڭ ۇيىمداستىرۋ (كادرلار) تاراۋلارى پارتيانى جاپپاي قاتاڭ باسقارۋدىڭ، كادرلاردى جونگە سالۋدىڭ ساياسي جاۋاپكەرشىلىگىن شىنايى ارقالاۋ، شىنايى باسقارۋ، شىنايى قاتايتۋ، باتىلدىقپەن باسقارۋ، باتىلدىقپەن قاتايتۋ، ۇزاق ۋاقىت باسقارۋ، ۇزاق ۋاقىت قاتايتۋ، كادرلاردىڭ شىعا دا الۋىن، تۇسە دە الۋىن ۇدايلاندىرۋدى ىلگەرىلەتۋ كەرەك. قاتاڭ باسقارۋ مەن شىنايى ىقىلاستى ۇشتاستىرۋدان، جىگەرلەندىرۋ مەن تەجەۋگە قاتار ءمان بەرۋدەن جازباي، تەرەڭ دە ەگجەي - تەگجەيلى يدەيالىق قىزمەتتى ويداعىداي ىستەپ، كادرلاردىڭ ءىس تىندىرىپ، شارۋاشىلىق قۇرۋ بەلسەندىلىگىن قورعاۋ كەرەك. قۋزاۋ - تەكسەرۋدى كۇشەيتىپ، «بەلگىلەمەنى» دايەكتىلەندىرۋدە، تياناقتاندىرۋدا كۇش سالماعانداردىڭ جاۋاپكەرشىلىگىن قاتاڭ قۋزاۋ كەرەك. «بەلگىلەمەنى» اتقارۋ بارىسىنداعى ماڭىزدى جاعداي مەن ۇسىنىستاردى دەر كەزىندە پارتيا ورتالىق كوميتەتىنە مالىمدەۋ كەرەك.
