بازار بولاشاعى كەڭ، عىلىم - تەحنيكالىق قۇرامى جوعارى، كاسىپ سالاسىنا جەتەكشىلىگى كۇشتى
10 ميلليارد يۋاندىق 13 نىسان شينجياڭعا ىرگە تەپتى
انار بۇلت \ شينجياڭ گازەتىنىڭ ءتىلشىسى حي حۇڭۋي 9 - ايدىڭ 22 - كۇنى ۇرىمجىدەن حابارلايدى. 7 - كەزەكتى جۇڭگو − ازيا - ەۆروپا كورمەسىنىڭ اقپار جاريالاۋ ماجىلىسىنەن ۇعىسۋىمىزشا، 7 - كەزەكتى جۇڭگو − ازيا - ەۆروپا كورمەسى جالپى 448 سەلبەستىك نىسانىنا قول قويىپ، سوماسى ءبىر تريلليون 171 ميلليارد 300 ميلليون يۋانعا جەتكەن. مۇنىڭ ىشىندە، 9 - ايدىڭ 21 - كۇنى وتكىزىلگەن ”سەلبەسىپ بولاشاققا اتتانۋ − ساۋداگەر شاقىرىپ، قارجى ەنگىزۋدەگى ءتۇيىندى نىساندارعا قول قويۋ سالتىندا“ قول قويىلعان 55 نىساننىڭ ىشىندە جاڭا ەنەرگيا، جاڭا ماتەريال سياقتى كاسىپ سالالاردىڭ 10 ميلليارد يۋاننان اساتىن 13 نىسانى بار.
اۆتونوميالى رايوندىق ساۋدا ىستەرى مەڭگەرمەسىنىڭ قاتىستى جاۋاپتىسى وسى كەزەكتى كورمەدە قول قويىلعان نىسانداردىڭ ”ۇلكەن“، ”جاڭا“، ”ارناۋلى“، بازار بولاشاعى كەڭ، عىلىم - تەحنيكالىق قۇرامى جوعارى، كاسىپ سالاسىنا جەتەكشىلىگى كۇشتى بولۋداي ەرەكشەلىكتەرگە يە ەكەندىگىن ءبىلدىردى.
وسى كەزەكتى كورمەدە كۇشار قالاسىنىڭ حۇڭشى كرەمني نەگىزدى جاڭا ماتەريالدار كاسىپ سالاسى باقشاسى نىسانى، توقسۇن اۋدانىنىڭ كومىردى تازا، جوعارى ءونىمدى، كەشەندى پايدالانۋ اينالمالى تۇردە ءبىر تۇلعالاندىرىلعان كاسىپ سالاسى تىزبەگى قۇرىلىسى نىسانى، جاسىل، تومەن كومىر قىشقىل گازدى جاڭا ماتەريالدار بايلىعىنان كەشەندى پايدالانۋدان ۇلگى كورسەتۋ نىسانى سياقتى نىساندار شينجياڭعا ىركەس - تىركەس ىرگە تەپتى.
اۆتونوميالى رايوندىق ساۋدا ىستەرى مەڭگەرمەسىنىڭ قاتىستى جاۋاپتىسى بىلاي دەدى: 10 ميلليارد يۋاننان استام توقتامعا قول قويىلعان وسى نىساندار تۇگەلدەي شينجياڭنىڭ ەكونوميكالىق دامۋدىڭ جاڭا باسىمدىعىن جەتىلدىرىپ، اناعۇرلىم جوعارى دەڭگەيدەگى اشىق ەكونوميكانى دامىتىپ، جاپپاي ستەرەولدى ەسىك اشۋدىڭ جاڭا جاعدايىن قالىپتاستىرۋ سىندى دامۋ وي جەلىسىن ايگىلەيدى.
سونىمەن بىرگە، جەر - جەردىڭ وزدەرىنىڭ بايلىق باسىمدىعىمەن ۇشتاستىرىپ، تىزبەكتى ۇزارتۋ، تىزبەكتى تولىقتىرۋ، تىزبەكتى كەڭەيتۋ، تىزبەكتى كۇشەيتۋ جاعىندا دالمە - ءدال كۇش سالعاندىعىن دا كورۋگە بولادى. بيىل جىل باسىنان بەرى، رايونىمىز ساۋداگەر شاقىرىپ قارجى ەنگىزۋ تەبىنىن ۇزدىكسىز ارتتىرىپ، نازاردى جەتەكشى كاسىپ سالالارىنا شوعىرلاندىرىپ، ءىرى نىسانداردى ەنگىزىپ قۋاتتى كاسىپورىنداردى باۋراپ، جاڭا نىسانداردى ەنگىزىپ ۇزدىك كاسىپورىنداردى باۋراپ، كاسىپ سالاسىنىڭ وسىزاماندانۋ دەڭگەيى مەن وزەكتى باسەكەلىك قۋاتىن ۇزدىكسىز جوعارىلاتىپ، دامۋدى جەبەپ، دەڭگەيدى جوعارىلاتتى.
وسى كەزەكتى كورمەدە قۇمىل ۋاكىلدەر ۇيىرمەسىنىڭ قول قويعان نىساندارى جاڭا ەنەرگيا اشۋ قۇرىلىسى، جاڭا ماتەريال، كومىر، كومىر حيميا ونەركاسىبى، جاڭا ەنەرگيا جابدىقتارىن جاساۋ سياقتى كاسىپ سالالارىن قامتىدى. قۇمىلدا مول كومىر، مۇناي - تابيعي گاز، جەل ەنەرگياسى، جارىق ەنەرگياسى سياقتى ەنەرگيا بايلىعى شوعىرلانعان، ەنەرگيا مول ءارى الۋان ءتۇرلى، بۇكىل شينجياڭ، ءتىپتى، بۇكىل ەل بويىنشا ءداستۇرلى ەنەرگيا (كومىر) مەن تۋىندايتىن ەنەرگيانى (جەل، جارىق) بىرىكتىرىپ اشۋدىڭ شارت - جاعدايى ەڭ جاقسى وڭىرلەردىڭ ءبىرى سانالىپ، ساۋداگەر شاقىرىپ قارجى ەنگىزۋدىڭ ماڭىزدى تۇيىنىنە اينالدى.
وسى كەزەكتى كورمەدە ءىرى كاسىپورىندار، ءىرى توپتار ءتۇيىندى نىساندارعا قارجى قوسۋدىڭ نەگىزگى تۇلعاسىنا اينالدى.
”ءبىز ەنەرگيا بايلىعى ارتىقشىلىعى، كومىر قىشقىل گازىنىڭ شىعارىلۋىن ەڭ جوعارى ماننەن اسىرماۋ، كومىر قىشقىل گازىن بەيتاراپتاندىرۋ ساياساتىنىڭ جاڭا ورايى، جاڭا ەنەرگيا بازارىنىڭ قوزعاۋشى قۋاتى سياقتى باسىمدىقتاردى مىقتاپ ارقاۋ ەتىپ، ءتۇزىلىس مەحانيزمىن ونان ارى اقاۋسىزداندىرىپ، قىزمەت وتەۋ دەڭگەيىن ۇزدىكسىز جوعارىلاتىپ، قارجى قوسۋدىڭ جۇمساق ورتاسىن ساپالىلاندىرىپ، دالمە - ءدال، كاسىپ سالالانعان تىزبەكتى ۇلگىدەگى ساۋداگەر شاقىرۋ جولىمەن ءجۇرىپ، وسى زامانعى كاسىپ سالاسىنىڭ جاڭا جۇيەسىن كۇش سالا ورناتىپ، ەكونوميكانىڭ، قوعامنىڭ جوعارى ساپالى دامۋىن بەلسەنە ىلگەرىلەتەمىز“، - دەدى قۇمىل قالالىق ساۋدا ىستەرى مەكەمەسى پارتيا باسشىلىق گرۋپپاسىنىڭ ورىنباسار شۋجيى، مەكەمە باستىعى ايان داۋلەت.
مۇنان سىرت، ۇزدىكسىز ساپالىلانعان شارۋاشىلىق - ساۋدا ورتاسى دا ءىرى كاسىپورىنداردىڭ، ءىرى نىسانداردىڭ شينجياڭعا ىرگە تەبۋىندەگى ماڭىزدى سەبەپتەرىنىڭ بىرىنە اينالدى.
”’باسقارۋشى ۇلگىسىندەگى‘ جان - جاقتى قىزمەت وتەۋ شينجياڭدا قارجى قوسۋ، دامۋ سەنىمىمىزدى كۇشەيتتى، بۇل ءبىزدىڭ شينجياڭعا ىرگە تەبۋدەگى باستى فاكتورىمىز“. حۋاشيا دادي (گانسۋ) بيولوگيالىق ماتەريالدار شەكتى سەرىكتەستىگىنىڭ القا باستىعى لين في بىلاي دەدى: سونىمەن بىرگە، ءبىز دە جەرگىلىكتى ورىننىڭ بايلىق ارتىقشىلىعى مەن ەرەكشەلىككە يە كاسىپ سالالارىنىڭ باسىمدىعىنا ءمان بەرەمىز.
اتالعان سەرىكتەستىك وسى كەزەكتى كورمەدە قارامايلى ”بەسىك ەكونوميكاسى“ ەكولوگيالىق اينالمالى كاسىپ سالاسى باقشاسى نىسانىنا قول قويدى، بۇل نىسان قارامايلى قالاسىنىڭ بيوحيميا ونەركاسىبى سالاسىنداعى بوستىعىن تولتىردى.
”بۇل نىسانعا جالپى 27 ميلليارد 29 ميلليون يۋان قارجى قوسىلعان، 4 مەرزىمدىك قۇرىلىسقا بولىنەدى، 1 - مەرزىمدىك قۇرىلىس كەلەر جىلى 3 - ايدا باستالادى دەپ جوسپارلانعان، نىساندا، باستىسى، جۇگەرىنى شيكىزات ەتىپ پولي لاكتين وزگەرگەن سيپاتتاعى سۋلياۋ جارعاق، پولي لاكتين ەرەكشە كيىم - كەشەگى سياقتى جاسىل جاڭا ماتەريالدار جاسالادى“، - دەدى لين في.
اۆتونوميالى رايوننىڭ قاتىستى جاۋاپتىسى مىنالاردى ءبىلدىردى: جەر - جەر، تاراۋلار ءىرى كاسىپورىنداردى، ءىرى نىسانداردى ەنگىزۋمەن بىرگە، ساۋداگەر شاقىرىپ قارجى ەنگىزۋ فاكتورلارىمەن قامتاماسىز ەتۋدى كۇشەيتۋ، قىزمەت وتەۋ ساپاسىن جاقسارتۋ سياقتى جاقتارعا اناعۇرلىم زور كۇش سالىپ، تاماشا شارۋاشىلىق - ساۋدا ورتاسىن قالىپتاستىرىپ، كاسىپورىنداردىڭ شينجياڭدا قارجى قوسۋ، دامۋ سەنىمدىلىگىن كۇشەيتۋ كەرەك.
