جۇڭحۋا حالىق رەسپۋبليكاسى قۇرىلعاندىعىنىڭ 73 جىلدىعىن قۇتتىقتاۋ بايلانىسىمەن
مەملەكەتتىك كەڭەس مەملەكەت مەرەكەسىن قۇتتىقتاۋ قوناعاسىن وتكىزدى
شي جينپيڭ، لي جانشۋ، ۋاڭ ياڭ، ۋاڭ حۋنيڭ، جاۋ لىجي، ۋاڭ چيشان قاتارلىلار قاتىناستى
لي كىچياڭ ارناۋ ءسوز سويلەدى، حان جىڭ قوناعاسىنى باسقاردى
9 - ايدىڭ 30 - كۇنى كەشتە مەملەكەتتىك كەڭەس بەيجيڭ حالىق سارايىندا مەملەكەت مەرەكەسىن قۇتتىقتاۋ قوناعاسىن وتكىزىپ، جۇڭحۋا حالىق رەسپۋبليكاسى قۇرىلعاندىعىنىڭ 73 جىلدىعىن قىزۋ قۇتتىقتادى. شي جينپيڭ، لي كىچياڭ، لي جانشۋ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان قاتارلى پارتيا مەن مەملەكەت باسشىلارى جۇڭگولىق، شەتەلدىك قايراتكەرلەرمەن ءبىر ارادا شاتتىقپەن باس قوسىپ، رەسپۋبليكانىڭ مەرەي تويىن بىرگە قۇتتىقتادى.
□ سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن
شينحۋا اگەنتتىگىنىڭ 9 - ايدىڭ 30 - كۇنى بەيجيڭنەن بەرگەن حابارى. 9 - ايدىڭ 30 - كۇنى كەشتە مەملەكەتتىك كەڭەس حالىق سارايىندا مەملەكەت مەرەكەسىن قۇتتىقتاۋ قوناعاسىن وتكىزىپ، جۇڭحۋا حالىق رەسپۋبليكاسى قۇرىلعاندىعىنىڭ 73 جىلدىعىن قىزۋ قۇتتىقتادى. شي جينپيڭ، لي كىچياڭ، لي جانشۋ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان قاتارلى پارتيا مەن مەملەكەت باسشىلارى جۇڭگولىق، شەتەلدىك 500گە جۋىق قايراتكەرمەن ءبىر ارادا شاتتىقپەن باس قوسىپ، رەسپۋبليكانىڭ مەرەي تويىن بىرگە قۇتتىقتادى.
حالىق سارايىنىڭ قوناعاسى زالىندا اشەكەيلى شامدار جارقىراپ، گۇلدەر شەشەك اتىپ، مەرەيلى دە دۋماندى مەرەكەلىك لەپ ەستى. ءتوراعالار مىنبەسىنىڭ جوعارعى جاعىنا ايبىندى مەملەكەت گەربى ءىلىنىپ، ”1949 − 2022“ دەگەن ۇلكەن ءارىپتى جىلناما قىزىل تۋدىڭ ايشىقتاۋىندا ەرەكشە كوز تارتىپ تۇر.
ساعات 17دەن 30 مينۋت مولشەرىندە، دۋماندى «قوناق قارسى الۋ» مۋزيكاسىنىڭ ورىندالۋىمەن، شي جينپيڭ قاتارلى پارتيا مەن مەملەكەت باسشىلارى قوناعاسى زالىنا كىردى، بۇكىل زالدان دۋ قول شاپالاق ءۇنى كوتەرىلدى.
قوناعاسى باستالدى. اسكەري وركەستر «ەرىكتىلەر مارشىن» ورىندادى، بۇكىل زالداعىلار ورىندارىنان تۇرىپ مەملەكەت ءانىن اسقاقتاتا شىرقادى. مەملەكەتتىك كەڭەستىڭ زۇڭليى لي كىچياڭ ارناۋ ءسوز سويلەدى. ول الدىمەن پارتيا ورتالىق كوميتەتى، مەملەكەتتىك كەڭەس اتىنان بۇكىل ەلدەگى ءار ۇلت حالقىنىڭ مەرەكەسىن قۇتتىقتادى؛ شياڭگاڭدىق، اۋمىندىق باۋىرلاستارعا، تايۋاندىق باۋىرلاستارعا جانە شەتەلدەگى چياۋباۋ باۋىرلاستارعا شىن ىقىلاستى سالەم جولدادى؛ جۇڭگونىڭ وسىزامانداندىرۋ قۇرىلىسى ىستەرىنە كوڭىل بولگەن، قولداۋ كورسەتكەن حالىقاراداعى دوستارعا شىن جۇرەكتەن العىس ايتتى.
لي كىچياڭ بىلاي دەدى: 73 جىلدان بەرى جۇڭگو حالقى جۇڭگو كوممۋنيستىك پارتياسىنىڭ باسشىلىعىندا، بەلدى بەكەم بۋىپ العا ۇمتىلىپ، ءتۇرلى قيىنشىلىقتار مەن حاۋىپ - قاتەرلەردى جەڭدى، مەملەكەتىمىزدىڭ دامۋ جەتىستىكتەرى كۇللى دۇنيەنى جالت قاراتتى. بيىل جۇڭگو كوممۋنيستىك پارتياسىنىڭ مەملەكەتتىك 20 - قۇرىلتايى اشىلادى، بۇل بۇكىل پارتيانىڭ، بۇكىل ەلدەگى ءار ۇلت حالقىنىڭ جاپپاي سوتسياليستىك وسىزاماندانعان مەملەكەت قۇرۋدىڭ جاڭا جورىعىنا قادام تاستاپ، ەكىنشى 100 جىلدىق كۇرەس نىساناسىنا شەرۋ تارتقان شەشۋشى ساتتە اشىلاتىن ءبىر رەتكى توتەنشە ماڭىزدى قۇرىلتاي. بيىلعى جىل ەلىمىزدىڭ دامۋ تاريحىندا ايرىقشا وزگەشە جىل بولدى. كۇردەلى دە قاتاڭ ەل ءىشى - سىرتى جاعدايى الدىندا، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، بۇكىل ەل جوعارىدان تومەنگە دەيىن جىگەرلەنە العا باسىپ، ورنىقتىلىق بارىسىندا ىلگەرىلەۋ قىزمەت جالپى ارناسىنا تاباندى بولىپ، جاڭا دامۋ ۇستانىمىن تولىق، دالمە - ءدال، جاپپاي دايەكتىلەندىرىپ، جاڭا دامۋ ارناسىن قالىپتاستىرىپ، جوعارى ساپالى دامۋدى ىلگەرىلەتىپ، ىندەتتەن ساقتانۋ - تىزگىندەۋ مەن ەكونوميكالىق، قوعامدىق دامۋدى ءبىر تۇتاس جوسپارلاۋعا تاباندى بولىپ، ماكرولىق ساياساتتى اتقارۋ سەرپىنىن ارتتىرىپ، رەفورما جاساۋ، ەسىك اشۋ ارقىلى ومىرشەڭدىك كۇشتى قاۋلاتىپ، قوزعاۋشى كۇشتى ارتتىرىپ، زات باعاسى دەڭگەيىنىڭ جالپى جاقتان تۇراقتىلىعىن ساقتاپ، حالىق تۇرمىسىن تىڭعىلىقتى قامتاماسىز ەتىپ، قۋاڭشىلىق، تاسقىن، جەر سىلكىنىسى سياقتى اپاتتارعا بەلسەنە توتەپ بەرىپ، بەيجيڭ قىسقى وليمپيادا سپورت جارىسىن، مۇگەدەكتەر قىسقى وليمپيادا سپورت جارىسىن ءساتتى وتكىزىپ، ءتۇرلى ىستەردە جاڭا ناتيجەلەرگە قول جەتكىزدى. بۇل ايتىپ - ايتپاي وڭاي ەمەس.
لي كىچياڭ بىلاي دەپ اتاپ كورسەتتى: جۇڭگو ەكونوميكاسىنىڭ نىق قاداممەن الىسقا جەتۋىن ىلگەرىلەتۋدە ەكونوميكانىڭ نەگىزگى اۋقىمىن ورنىقتىرۋعا كۇش سالۋ كەرەك. ءبىز مەجەدەن اسقان فاكتورلاردىڭ سوققىسىنا پارمەندى توتەپ بەرىپ، ەكونوميكانى ورنىقتىرۋدىڭ ءبىر قىدىرۋ ساياساتتارىن دەر كەزىندە، باتىلدىقپەن شىعارىپ، ەكونوميكانى ورنىقتىرۋدى اناعۇرلىم كورنەكتى ورىنعا قويىپ، بازار تۇلعالارىنا كەپىلدىك ەتىپ، جۇمىسقا ورنالاستىرۋدى ورنىقتىرىپ، زات باعاسىن ورنىقتىرىپ، كوپ شارانى قاتار قولدانىپ، ءونىمدى سۇرانىستى كەڭەيتتىك. جاڭالىق اشۋ ارقىلى دامۋعا دەم بەرۋ ستراتەگياسىن ىشكەرىلەي اتقارۋىمىز كەرەك. قالا مەن اۋىلدىڭ، وڭىرلەردىڭ سايكەسە دامۋىن جانە اۋىل - قىستاقتى گۇلدەندىرۋدى جەبەۋىمىز كەرەك. قازىر دامۋ ءالى دە كوپتەگەن قيىنشىلىقتار مەن سىن - سايىستارعا ءدوپ كەلىپ وتىر، ۋاقىت كۇتىپ تۇرمايدى دەيتىن ۇتقىرلىقپەن ەكونوميكانى ورنىقتىرۋعا قاتىستى ءتۇرلى ساياساتتاردى پارمەندى، ءونىمدى تۇردە تىڭعىلىقتى تياناقتاندىرىپ، ءار جاقتىڭ بەلسەندىلىگىن جۇمىلدىرىپ، زەيىن - زەردەنى شوعىرلاندىرا وتىرىپ ءوز ءىسىمىزدى ويداعىداي ىستەپ، ەكونوميكانىڭ ورنىقتى كۇيگە ورالۋ نەگىزىن بەكەمدەپ، ورنىقتى كۇيگە ورالۋ نەگىزىندە ورگە ۇمتىلۋىن كۇش سالا جەبەۋىمىز كەرەك، ەكونوميكالىق اينالىمنىڭ ۇيلەسىمدى ارالىقتا بولۋىنا شىنايى كەپىلدىك ەتۋگە ءبىزدىڭ سەنىمىمىز كامىل، قابىلەتىمىز قاپتال جەتەدى. رەفورما جاساۋ، ەسىك اشۋ − جۇڭگونىڭ نەگىزگى مەملەكەت ساياساتى، دامۋدى ىلگەرىلەتۋدىڭ ءتۇبىرلى قوزعاۋشى كۇشى. ءبىز سوتسياليستىك بازار شارۋاشىلىعى رەفورماسى بەتالىسىنا تاباندى بولىپ، ”ەكىدەن تيتتەي دە اۋىتقىماۋعا“ تاباندى بولىپ، بازار تۇلعالارىن جەتىلدىرىپ، زورايتىپ، اكىمشىلىكتى زاڭ بويىنشا جۇرگىزۋگە تاباندى بولىپ، بازارلانعان، زاڭمەن باسقارىلاتىن، حالىقارالانعان شارۋاشىلىق - ساۋدا ورتاسىن قالىپتاستىرىپ، بازاردىڭ ومىرشەڭدىك كۇشى مەن قوعامنىڭ جاسامپازدىق قۋاتىن اناعۇرلىم جوعارى دەڭگەيدە قاۋلاتامىز. جوعارى دەڭگەيدە سىرتقا ەسىك اشۋدى ىلگەرىلەتىپ، سىرتقى ساۋدانى ورنىقتىرىپ، شەتەل قارجىسىن ورنىقتىرىپ، كوپ جاقتى، ەكى جاقتى ەكونوميكا - ساۋدا سەلبەستىكتەرىن تەرەڭدەتىپ، جۇڭگونىڭ قاشاندا شەتەل ساۋداگەرلەرى قارجى قوساتىن قۇتتى مەكەن بولۋىنا مۇمكىندىك جاساپ، تەڭ يگىلىككە كەنەلەتىن دامۋدى جۇزەگە اسىرامىز. بيلىك جۇرگىزۋدە بۇقارانى وزدەرىنە پايدا تۇسەتىن جۇمىستارمەن شۇعىلدانۋعا جەتەلەي وتىرىپ ىرىسقا كەنەلتە بىلگەن ءجون. ءبىز نازاردى حالىقتىڭ تاماشا تۇرمىسقا دەگەن تالپىنىسىن جۇزەگە اسىرۋعا شوعىرلاندىرۋعا تاباندى بولىپ، حالىق بۇقاراسىنىڭ حال - جاعدايىن، مۇڭ - مۇقتاجىن قاي - قاشان دا كوكەيىمىزدە ساقتاپ، حالىققا ءتيىمدى شارالار اتقارىپ، حالىققا قولايلى امالدار قولدانامىز. جۇمىستاندىرۋدى الدىمەن ويلاستىرۋ ساياساتىن تياناقتاندىرىپ، كەدەيلىكتەن ارىلتۋدان قامال الۋدىڭ جەتىستىكتەرىن بەكەمدەپ جانە كەڭەيتىپ، اپاتقا ۇشىراعان بۇقارانى ورنالاستىرۋ جانە قۇتقارۋ - كومەكتەسۋدى ۇيلەسىمدى ويداعىداي ىستەپ، قيىنشىلىعى بار بۇقارانىڭ نەگىزگى حالىق تۇرمىسى تومەنگى شەگىن بەكەمدەپ، وقۋ - اعارتۋ، ەمدەۋ، زەينەتكەرلىك، تۇرعىن ۇيمەن قامتاماسىز ەتۋ سياقتى ناقتى ىستەردى تىڭعىلىقتى ويداعىداي ىستەپ، حالىقتىڭ قۇت - ىرىسىن ۇزدىكسىز مولايتامىز.
لي كىچياڭ بىلاي دەدى: ءبىز ”ءبىر ەل، ەكى ءتۇزىم“، ”شياڭگاڭدى شياڭگاڭدىقتار باسقارۋ“، ”اۋمىندى اۋمىندىقتار باسقارۋ“، وسكەلەڭ اۆتونوميا باعىتىن مىزعىماس تاباندىلىقپەن، جاپپاي، دالمە - ءدال دايەكتىلەندىرىپ، ەرەكشە اكىمشىلىك رايون ۇكىمەتىنىڭ زاڭ بويىنشا اكىمشىلىك جۇرگىزۋىن، ەكونوميكانى دامىتۋىن، حالىق تۇرمىسىن جاقسارتۋىن، مەملەكەتتىڭ دامۋ كەلەلى جاعدايىمەن اناعۇرلىم ويداعىداي توعىسۋىن، شياڭگاڭنىڭ، اۋمىننىڭ ۇزاق ۋاقىت گۇلدەنىپ - كوركەيۋىن، ورنىقتىلىعىن ساقتاۋىن بار كۇشپەن قولدايمىز. جاڭا داۋىردەگى پارتيانىڭ تايۋان ماسەلەسىن شەشۋ جونىندەگى جالپى جوباسىن جاپپاي دايەكتىلەندىرىپ، ءبىر جۇڭگو پرينسيبى مەن ”92 - جىلعى ورتاق تانىمعا“ تاباندى بولىپ، ”تايۋاندى دەربەستەندىرۋدى كوزدەۋشىلەردىڭ“ بولشەكتەۋشىلىگىنە جانە سىرتقى كۇشتەردىڭ كيلىگۋىنە باتىل قارسى تۇرىپ، ەكى جاعالاۋ قارىم - قاتىناسىنىڭ بەيبىت دامۋىن، توعىسپالى دامۋىن بەلسەنە ىلگەرىلەتىپ، وتاننىڭ بىرلىككە كەلۋى، ۇلتتىڭ گۇلدەنۋى سىندى تاريحي ۇلى ءىستى بىرگە جۇزەگە اسىرامىز. دەربەس، ءوز - وزىنە قوجايىن بولاتىن بەيبىت ديپلوماتيالىق ساياساتقا تاباندى بولىپ، بەيبىت دامۋ جولىمەن جۇرۋگە تاباندى بولىپ، جاڭاشا حالىقارالىق قارىم - قاتىناس ورناتۋدى ىلگەرىلەتىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتەمىز. حالىقارالىق جانە وڭىرلىك سەلبەستىكتى تەرەڭدەتىپ، ادامداردىڭ اۋىس - كۇيىسىن جەبەپ، الەمدىك سىن - سايىستارعا قول ۇستاسا توتەپ بەرىپ، دۇنيە ءجۇزىنىڭ بەيبىتشىلىگى مەن ورنىقتىلىعىن جانە دامۋىن، گۇلدەنۋىن بىرگە جەبەيمىز.
لي كىچياڭ سوڭىندا بىلاي دەدى: شۇعىلالى ناتيجە ناقتى ىسكەرلىكپەن جاراتىلادى. ءبىز جۇڭگوشا سوتسياليزم ۇلى تۋىن بيىك ۇستاپ، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتىپ، زەيىن - زەردەنى، كۇش - قۋاتتى شوعىرلاندىرىپ، ۇدەرە العا تارتىپ، ەلىمىزدى باي، قۇدىرەتتى، دەموكراتيالى، وركەنيەتتى، جاراسىمدى، كورىكتى سوتسياليستىك وسىزاماندانعان قۋاتتى ەل ەتىپ قۇرىپ شىعۋ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋ جولىندا قۇلشىنا كۇرەس جۇرگىزۋىمىز كەرەك!
دۋماندى مۋزيكا ءۇنى ىشىندە جۇڭگولىق، شەتەلدىك قوناقتار، دوستار توست كوتەرىپ، جاڭا جۇڭگو قۇرىلعاندىعىنىڭ 73 جىلدىعىن بىرگە قۇتتىقتاپ، جۇڭگونىڭ گۇلدەنۋىن، بايۋىن، قۇدىرەتتەنۋىن، حالىقتىڭ باقىتتى، امان - ەسەن بولۋىن، جۇڭگو حالقى مەن دۇنيە جۇزىندەگى ءار ەل حالقىنىڭ دوستىعىنىڭ ماڭگى جالعاسۋىن تىلەدى.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ ورىنباسار زۇڭليى حان جىڭ قوناعاسىنى باسقاردى.
قوناعاسىعا جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ بەيجيڭدەگى مۇشەلەرى، ورتالىق كوميتەت شۋجيچۋىنىڭ شۋجيلەرى، مەملەكەتتىك حالىق قۇرىلتايى تۇراقتى كوميتەتىنىڭ ورىنباسار باستىقتارى، مەملەكەتتىك كەڭەستىڭ ورىنباسار زۇڭليلەرى، مەملەكەتتىك كەڭەستىڭ مۇشەلەرى، مەملەكەتتىك باقىلاۋ - تەكسەرۋ كوميتەتىنىڭ مەڭگەرۋشىسى، ەڭ جوعارى حالىق سوتى مەكەمەسىنىڭ باستىعى، ەڭ جوعارى حالىق پروكۋراتۋراسىنىڭ باس پروكۋرورى، مەملەكەتتىك ساياسي كەڭەستىڭ ورىنباسار ءتوراعالارى جانە باسشىلىق مىندەتىنەن شەگىنگەن جولداستار، سونداي - اق ورتالىق اسكەري ىستەر كوميتەتىنىڭ مۇشەلەرى، كەزىندە ورتالىق اسكەري ىستەر كوميتەتىنىڭ مۇشەسى مىندەتىن وتەگەن جولداستار دا قاتىناستى.
ورتالىقتاعى پارتيا، ۇكىمەت، ارميا ورىندارىنىڭ، بۇقارالىق ۇيىمداردىڭ قاتىستى تاراۋلارىنىڭ جاۋاپتىلارى، دەموكراتيالىق پارتيا - توپتاردىڭ، مەملەكەتتىك ساۋدا - ونەركاسىپشىلەر بىرلەستىگىنىڭ جاۋاپتىلارى جانە پارتيادا، توپتا جوق قايراتكەرلەردىڭ ۋاكىلدەرى، بەيجيڭ قالاسىنىڭ جاۋاپتىلارى، وردەن يەگەرلەرىنىڭ، داڭق اتاعى يەگەرلەرىنىڭ ۋاكىلدەرى، بەيجيڭ 2022 - جىلعى قىسقى وليمپيادا سپورت جارىسىنداعى، قىسقى مۇگەدەكتەر وليمپيادا سپورت جارىسىنداعى جۇڭگو دەنە تاربيە ۋاكىلدەر ۇيىرمەسىنىڭ ۋاكىلدەرى، مەملەكەتتىك ەڭبەك ەرلەرى مەن وزات تۇلعالاردىڭ ۋاكىلدەرى، ۇلتتىق وڭىرلەردىڭ ورنىقتىلىعىنا، دامۋىنا، ىنتىماعىنا ماڭىزدى ۇلەس قوسقان از ۇلت ۋاكىلى قايراتكەرلەرى، بەيجيڭدەگى ءىشىنارا شياڭگاڭ ەرەكشە اكىمشىلىك رايونىنىڭ قايراتكەرلەرى، اۋمىن ەرەكشە اكىمشىلىك رايونىنىڭ قايراتكەرلەرى، تايۋاندىق باۋىرلاستار مەن حۋاچياۋلاردىڭ، حۋارىنداردىڭ ۋاكىلدەرى، ءار ەلدىڭ جۇڭگودا تۇراتىن ەلشىلەرى، حالىقارالىق ۇيىمداردىڭ جۇڭگودا تۇراتىن ۋاكىلدەرى، ءىشىنارا شەتەلدىك ماماندار دا قوناعاسىعا قاتىناستى.
