زورىگۇل نياز:
جۇڭگو ”ىستىق ۇيەگىنىڭ“ ەرجۇرەك اتويشىسى بولدى
□ انار بۇلت \شينجياڭ گازەتىنىڭ ءتىلشىسى چىن چياڭۋي
7 - ايدىڭ 3 - كۇنى زورىگۇل نياز (سولدا) جاڭا قىزمەتكەرلەردى جۇمىس باسىندا باۋلۋدا.
□ سۋرەتتى راناگۇل تۇرعۇنجان تۇسىرگەن
”مەن كاسىپورىننىڭ قاراپايىم قىزمەتكەرىمىن، پارتيا 20 - قۇرىلتايىنىڭ ۋاكىلى بولارىمدى ويلاماعان ەكەنمىن، ەرەكشە تەبىرەنىپ ءجۇرمىن. بۇل كۇندەرى مەن باس شۋجي شي جينپيڭنىڭ جەلىلەس ماڭىزدى سوزدەرىنىڭ رۋحىن توقتاۋسىز ۇيرەنىپ جاتىرمىن، پارتيا مۇشەلەرىنىڭ، بۇقارانىڭ پىكىرلەرىن اشالاپ، پارتيا ۋاكىلى بولۋ ءۇشىن نەگىزدىك قىزمەتتى جاقسى ىستەۋىم كەرەك“، - دەدى 9 - ايدىڭ 5 - كۇنى زورىگۇل نياز تىلشىگە.
بيىل 45 جاستاعى زورىگۇل مەملەكەت ەلەكتر تورى شينجياڭ ەلەكتر قۋاتى شەكتى سەرىكتەستىگى اسقىن جوعارى كەرنەۋلى ەلەكتر جەتكىزۋ بولىمشە سەرىكتەستىگى ەلەكتر كەرنەۋىن وزگەرتۋ اينالىم - قورعاۋ 2 - ورتالىعى تۇرپان كەرنەۋ وزگەرتىپ ەلەكتر جەتكىزۋ اينالىم - قورعاۋ ءبانىنىڭ بانجاڭى، 1997 - جىلى قىزمەتكە قاتىناسقاننان بەرى، ەلەكتر تورىنىڭ اينالىم - قورعاۋ ءبىرىنشى شەبىندە قىزمەت ىستەپ، شينجياڭنىڭ 750 كيلوۆولتتىق ەلەكتر كەرنەۋى دارەجەسىندەگى ەلەكتر تورىنىڭ جوقتان بار بولىپ، تۇيىننەن كولەمگە كەڭەيگەنىنە، ودان دۇنيە جۇزىندەگى ەڭدەرگە قاراي دامۋ بارىسىنا كۋا بولدى.
كەرنەۋ وزگەرتۋ پۋنكتى، نەگىزىنەن، يەن دالاعا ورنالاسقان، ورتاسى ناشار. وسىنداي جاپالى ورتادا زورىگۇل تابانى كۇرەكتەي 15 جىل ىستەدى.
زورىگۇلدىڭ كاسىپتىك ومىرىندە ۇستازى باي ميڭ وعان تەرەڭ ىقپال جاسادى. ”ۇستازىمىز ساقا پارتيا مۇشەسى، قىزمەت بارىسىندا ول بارلىق ىستە باستاماشى بولىپ، ونەگە كورسەتتى“، - دەدى زورىگۇل. ۇستازىنىڭ ىقپالىندا، 2012 - جىلى زورىگۇل داڭقپەن جۇڭگو كوممۋنيستىك پارتياسىنا مۇشە بولادى. ول دا ۇستازى سياقتى جاس ەلەكترشىلەردىڭ ونەگەسى بولۋعا بەل بايلايدى.
2014 - جىلى 750 كيلوۆولتتىق ءۇرىمجى سولتۇستىك كەرنەۋ وزگەرتۋ پۋنكتىنىڭ باستىعى بولعان زورىگۇل ورتاسى ناشار 750 كيلوۆولتتىق تۇرپان كەرنەۋ وزگەرتۋ پۋنكتىندە باستىقتىڭ ورنىنىڭ بوس ەكەندىگىن ەستىپ، دەرەۋ ىرىقتىلىقپەن تۇرپانعا بارۋدى ءوتىنىش ەتەدى.
تۇرپاننىڭ جۇڭگونىڭ ”ىستىق ۇيەگى“ دەگەن اتى بار، 750 كيلوۆولتتىق تۇرپان كەرنەۋ وزگەرتۋ پۋنكتى تۇرپان قالاسىنان شامامەن 30 كيلومەتر قاشىقتىقتا، يەن جاتقان بەتپاق دالاعا ورنالاسقان، جازدا اۋا تەمپەراتۋراسى شىجىعان ىستىق، كليماتى قۇرعاق، ماڭايىندا تاستان باسقا ەشنارسە جوق. سول كەزدە زورىگۇل ءۇرىمجى قالاسىندا تۇراتىن، ۇلى ەندى عانا 4 جاسقا تولعان ەدى.
”2015 - جىلى 750 كيلوۆولتتىق تۇرپان كەرنەۋ وزگەرتۋ پۋنكتىن جاڭالاپ، كەڭەيتىپ سالۋ كەرەك بولدى، بۇل ينجەنەريا جەرگىلىكتى ورىننىڭ ەلەكتردەن پايدالانۋ ساپاسىن جوعارىلاتۋدا، وڭتۇستىك - سولتۇستىك شينجياڭ ەلەكتر تورىن تۇتاستىرۋدا ماڭىزدى مانگە يە. مەن سەرىكتەستىكتىڭ اينالىم - قورعاۋ قىزمەتكەرلەرى اراسىنداعى تاجىريبەسى مول ساقا قىزمەتكەرلەردىڭ ءبىرىمىن ءارى كوممۋنيستىك پارتيا مۇشەسىمىن، مەن، ارينە، ىرىقتىلىقپەن بارۋىم كەرەك“، - دەدى زورىگۇل. وسىلايشا ول قۇبا تۇزدەگى تۇرپان كەرنەۋ وزگەرتۋ پۋنكتىنە 8 جىل تابان تىرەپ تۇرادى.
”پارتيا 20 - قۇرىلتايىنىڭ ۋاكىلى بولىپ سايلانۋ − پارتيا مەن حالىقتىڭ ماعان بەرگەن ەڭ جوعارى داڭقى. مەن ەلەكتر قۋاتى ىستەرىنىڭ ءبىرىنشى شەبىندە باستان - اياق تاپجىلماي، بولماشى كۇشىممەن شينجياڭنىڭ ەكونوميكالىق، قوعامدىق دامۋىنا ءوز ۇلەسىمدى قوسامىن“، - دەدى زورىگۇل.
