شينجياڭدا 10 جىلدا 62 مىڭ 200 كيلومەتر تاس جول تىڭنان سالىندى
وڭتۇستىك، سولتۇستىك، ورتا ءۇش ۇلكەن جوعارى جىلدامدىقتى ارنا جاپپاي سالىنىپ بولدى
انار بۇلت \ شينجياڭ گازەتىنىڭ ءتىلشىسى لۋ فىڭباۋ 10 - ايدىڭ 5 - كۇنى ۇرىمجىدەن حابارلايدى. اۆتونوميالى رايوندىق قاتىناس - تاسىمال مەڭگەرمەسىنەن ۇعىسۋىمىزشا، 2012 - جىلدان بەرى شينجياڭدا جاڭادان قوسىلعان تاس جول ۇزىندىعى 62 مىڭ 200 كيلومەتر بولىپ، جالپى ۇزىندىعى 217 مىڭ 300 كيلومەترگە جەتىپ، تاس جول تورىنىڭ جيىلىگى 2012 - جىلدىڭ باسىنداعىدان 40 نەشە پايىز ارتقان.
9 - ايدىڭ 28 - كۇنى G331 لەنياسى شىڭگىل - كوكتوعاي - التاي تاس جولى 4 - مەردىگەرلىك بولىگىنە اسفالت جاتقىزۋ سىناق جۇمىسى باسىندا، اسفالت جاتقىزۋ ماشينالارى قارا ءتۇستى اسفالتتى جول بەتىنە جاتقىزدى، تاپتاعىش ماشينالاردىڭ سوڭىنان ىلەسە مۇقيات تاپتاۋىمەن اسفالت جول بەتى بىرتىندەپ قالىپتاستى.
”3 - ايدا جۇمىس قالپىنا كەلگەننەن بەرى، ءبىز قاۋىرت جۇمىس جۇرگىزۋ ورلەۋىن كوتەرىپ، نىسان اياق الىسىن تەزدەتتىك“. جۇڭگو تەمىر جول 1 - مەكەمەسى G331 لەنياسى شىڭگىل - كوكتوعاي - التاي تاس جولى 4 - مەردىگەرلىك بولىگى نىسان ءبولىمىنىڭ جاۋاپتىسى ليۋ شيانجۇن بىلاي دەدى: ءبىز ءونىمدى قۇرىلىس جۇرگىزۋ ۋاقىتى ىشىندە جاڭادان سالىناتىن 23 كيلومەتر جول بولىگىندە اسفالت توسەۋ، وزگەرتىپ، كەڭەيتىپ سالىناتىن جول بولىگىندە تاعان توپىراق - تاس جاتقىزۋ ينجەنەرياسى، كوپىر وتكىنىن سالۋ ينجەنەرياسى سياقتىلاردى تۇگەلدەي ورىنداپ، كەلەر جىلى جول بەتىن تەگىستەۋگە نەگىز قالايمىز.
بۇل جۋىق جىلداردان بەرى رايونىمىزدىڭ تاس جول نىسانىن قاۋىرت جۇرگىزۋىنىڭ ىقشام كورىنىسى. ”پارتيا 18 - قۇرىلتايىنان بەرى، شينجياڭنىڭ قاتىناس نىساندارى بارلىق جەردە دامىپ، تاس جولدار ايقاسپالى تور قالىپتاستىرىپ، قاتىناس - تاسىمال ىستەرىندە وراسان زور تاريحي جەتىستىككە قول جەتتى“. اۆتونوميالى رايوندىق قاتىناس - تاسىمال مەڭگەرمەسى پارتكومىنىڭ ورىنباسار شۋجيى، مەڭگەرمە باستىعى اسەنجان احمەت بىلاي دەدى: بۇل شينجياڭنىڭ قاتىناسىنىڭ دامۋ تاريحىنداعى قارجى قوسۋ كولەمى ەڭ زور، دامۋ قارقىنى ەڭ تەز، قۇرىلىس ساپاسى ەڭ جاقسى، بۇقارانىڭ تابىس سەزىمى ەڭ كۇشتى بولعان مەزگىل بولدى.
10 جىل ۋاقىتتا شينجياڭنىڭ مەملەكەت، ولكە نەگىزگى تاس جولدارىنىڭ جالپى ۇزىندىعى 36 مىڭ 700 كيلومەترگە جەتتى، مۇنىڭ ىشىندە جوعارى جىلدامدىقتى (1 - دارەجەلى) تاس جولدىڭ ۇزىندىعى 10 مىڭ كيلومەتردەن اسىپ، بارلىق ايماق، وبلىس، قالالارعا جوعارى جىلدامدىقتى تاس جول تۇتاسىپ، تيانشاننىڭ سولتۇستىك بوكتەرىندەگى قالا شوعىرى ”8 اۆتوكولىك جولدى“ جوعارى جىلدامدىقتى تاس جول داۋىرىنە الدىمەن قادام تاستادى، 107 اۋدان، قالانىڭ بارلىعىنا 2 - دارەجەلى جانە ودان جوعارى دارەجەلى تاس جول تۇتاستىرۋدى جۇزەگە اسىردى، مۇنىڭ 93ىنە جوعارى جىلدامدىقتى (1 - دارەجەلى) تاس جول تۇتاستىرىلدى. اۋىل - قىستاق تاس جولىنىڭ جالپى ۇزىندىعى 180 مىڭ 600 كيلومەترگە جەتتى، مۇنىڭ ىشىندە دارەجەلىك تاس جولدىڭ يەلەيتىن سالىستىرماسى ％9. 86كە جەتتى، بارلىق اۋىل - قالاشىققا جانە شارت - جاعدايى بار قۇرىلىمدىق قىستاقتارعا تۇگەلدەي قاتتىلاندىرىلعان جول تۇتاستى.
جۋىق جىلداردان بەرى شينجياڭنىڭ ءوڭىر اتتاعان ۇلكەن ارنا قۇرىلىسى ورنىقتى ىلگەرىلەدى، قازىر وڭتۇستىك، سولتۇستىك، ورتا 3 ۇلكەن جوعارى جىلدامدىقتى ارنا جاپپاي سالىندى. مۇنىڭ ىشىندە جوڭعار ويپاتىن اينالعان جوعارى جىلدامدىقتى (1 - دارەجەلى) تاس جول سالىنىپ بولدى، تارىم ويپاتىن اينالعان جوعارى جىلدامدىقتى (1 - دارەجەلى) تاس جول، نەگىزىنەن، سالىنىپ بولدى، 3 - تارماق قۇمدىق تاس جولى سالىنىپ بولىپ اۆتوكولىك قاتىنادى، شينجياڭعا كىرىپ - شىعاتىن 2 - تارماق ۇلكەن ارنا G7 لەنياسىنىڭ بەيجيڭ - شينجياڭ جوعارى جىلدامدىقتى تاس جولى تۇتاس لەنيا بويىنشا تۇتاستى، شينجياڭعا كىرىپ - شىعاتىن 3 - تارماق ۇلكەن ارنا G0612 لەنياسىنىڭ شينيڭنەن حوتانعا دەيىنگى جوعارى جىلدامدىقتى تاس جولىنىڭ شينجياڭ ىشىندەگى بولىگى تۇگەلدەي تۇتاسىپ، قاتىناس جول تورىنىڭ دەڭگەيى كورنەكتى جوعارىلادى.
