سانجى قالاسى ۋىنحۋاگۇڭ الەۋمەتتىك اۋماعىنىڭ كادرى قىسىلتاياڭ ساتتە باتىلدىقپەن جاۋاپكەرشىلىك ارقالادى −
”بىرەر جاعداي تۋىلسا، مەن جاۋاپ بەرەمىن“!
□ ەرىكتى تىلشىلەر ما شياۋفاڭ، يىن ليلي
”سىزدەرگە راقىمەت، كۇيەۋىمنىڭ جانىن امان الىپ قالدىڭىزدار، سونداي - اق وتباسىمىزدى دا قۇتقارىپ قالدىڭىزدار...“
تاياۋدا سانجى قالاسى بەيجيڭ وڭتۇستىك جولى ءمالىسى ۋىنحۋاگۇڭ الەۋمەتتىك اۋماعى فىڭلينۋان شاعىن اۋماعىنىڭ تۇرعىنى دۋان شينحۋا ءبىر پارشا العىس حاتتى جانە العىس تۋدى الەۋمەتتىك اۋماق كادرى سۇن چياڭنىڭ قولىنا ۇستاتىپ، وتباستارىنا كومەكتەسكەن الەۋمەتتىك اۋماق كادرلارىنا العىس ايتتى.
8 - ايدىڭ 22 - كۇنى فىڭلينۋان شاعىن اۋماعى تىنىش كۇيدە باسقارىلۋدا بولاتىن، ساعات 9دان 30 مينۋت مولشەرىندە دۋان شينحۋانىڭ كۇيەۋى لي جىپىڭ كەۋدەسى قىسىپ، تىنىسى تارىلىپ، جونى اۋىرعانىن سەزەدى ءارى ونان جۇرەگى اينۋ، سۋىق تەر باسۋ سياقتى اۋرۋ بەلگىلەرى بايقالادى، جاتىپ دەمالسا دا جاعدايى جاقسارمايدى. ەسى شىققان دۋان شينحۋا الەۋمەتتىك اۋماقتىڭ جاۋاپتى كادرى سۇن چياڭعا تەلەفون شالادى. وسى كەزدە سۇن چياڭ قاتارلىلار تۇرعىنداردى حىسۋان سىناماسىن الۋعا ۇيىمداستىرۋعا دايىندالىپ جاتقان بولاتىن، دۋان شينحۋانىڭ كومەككە مۇقتاج ەكەندىگىن ەستىگەننەن كەيىن، وعان لي جىپىڭدى دەرەۋ عيماراتتان سۇيەپ ءتۇسىرۋدى تاپسىرادى.
”لي جىپىڭنىڭ ءوڭى قۋارىپ، قولى دا مۇزداپ كەتىپتى، ونىڭ اۋرۋ جاعدايىنىڭ ەرەكشە سالماقتى ەكەندىگىن اڭعاردىم“، - دەدى سۇن چياڭ ەسكە الىپ.
ۋاقىت − ءومىر.
سۇن چياڭ عيماراتتىڭ الدىندا توقتاتقان ەلەكترسيكلىن كورىپ، قورعانۋ كيىمىن كيىپ تۇرعان الەۋمەتتىك اۋماق كادرى ۋاڭ لۋعا: ”ۋاقىتتى مىقتى ۇستاپ ادام قۇتقارۋ بارىنەن دە ماڭىزدى، قازىر جوعارىعا مالىمدەۋگە ۇلگىرمەيمىز، مەنىڭ قورعانۋ كيىمىن كيۋىمە دە ۋاقىت كەرەك، سەن قىزمەت كۋالىگىڭدى ال دا، ەلەكترسيكلمەن ونى شيپاحاناعا دەرەۋ جەتكىز. بىرەر جاعداي تۋىلسا مەن جاۋاپ بەرەمىن“! - دەدى. كوپشىلىك لي جىپىڭدى ەلەكترسيكلگە سۇيەپ مىنگىزدى، ۋاڭ لۋ ەلەكترسيكلمەن زىمىراعان بەتى 10 مينۋتقا جەتپەيتىن ۋاقىتتا لي جىپىڭدى سانجى حۇيزۋ اۆتونوميالى وبلىستىق جۇڭگوشا شيپاگەرلىك شيپاحاناسىنا جەتكىزەدى.
دياگنوز قويۋ ارقىلى لي جىپىڭنىڭ شۇعىل حارەكتەرلى جۇرەك بۇلشىق ەتىنىڭ تۇيىلۋىنە شالدىققانى انىقتالىپ، ءسوزسىز، دەرەۋ وپەراتسيا جاساۋ، وتباسىنداعىلاردىڭ قوسىلۋى ءارى قول قويۋى قاجەت بولادى، سۇن چياڭ دۋان شينحۋانى دا دەرەۋ شيپاحاناعا جەتكىزدى. باقىتقا جاراي شيپاحاناعا دەر كەزىندە جەتكىزىلگەندىكتەن، ەمدەۋ ارقىلى 8 - ايدىڭ 27 - كۇنى لي جىپىڭ شيپاحانادان شىعىپ ۇيىنە قايتىپ كۇتىندى.
”شيپاگەر ءسال كەشىكسەك جاعدايدىڭ قيىن ەكەندىگىن ايتتى. قىسىلتاياڭ ساتتە جاۋاپكەرشىلىكتى باتىلدىقپەن ارقالادى، ولار، شىنىمەن، پارتيانىڭ جاقسى كادرى ەكەن“، - دەدى دۋان شينحۋا تەبىرەنە.
سۇن چياڭ مەن ۋاڭ لۋدىڭ ادام قۇتقارعان ءىسى جۇرتقا تارالعاننان كەيىن، فىڭلينۋان شاعىن اۋماعىنداعى ءۇي قوجالارى توبى دۋ ەتە ءتۇستى، كوپشىلىك جاپا - تارماعاي ولاردى القادى، الەۋمەتتىك اۋماقتا وسىنداي جاقسى كادرلاردىڭ بار بولعاندىعىن ماقتانىش سەزىندى.
بيىل 51 جاستاعى سۇن چياڭنىڭ سانجى قالاسى بەيجيڭ وڭتۇستىك جولى ءمالىسى ۋىنحۋاگۇڭ الەۋمەتتىك اۋماعىندا قىزمەت ىستەگەنىنە 5 جىل بولدى، ول سونداي - اق فىڭلينۋان شاعىن اۋماعىنىڭ جاۋاپتى كادرى. سانجى قالاسى ۋاقىتشا تىنىش كۇيدە باسقارۋدى اتقارعان مەزگىلدە سۇن چياڭ فىڭلينۋان شاعىن اۋماعىنىڭ ىندەتتەن ساقتانۋ، زاتتاردى جەتكىزۋ سياقتى قىزمەتتەرىنە جاۋاپتى بولدى، تۇرعىندار تۇتقيىل جاعدايعا ءدوپ كەلىپ سىرتقا شىقپاق بولسا وعان تىزىمگە الدىرادى، ول دارەجە بويىنشا جوعارىعا مالىمدەيدى. ”سول كەزدە جاعداي ەرەكشە شۇعىل بولدى، الەۋمەتتىك اۋماق كادرى رەتىندە، مەن، ءسوز جوق، كەۋدە كەرە العا شىعىپ، وسىنداي جاۋاپكەرشىلىك ارقالاي ءبىلۋىم قاجەت“، - دەدى سۇن چياڭ.
سۇن چياڭ: ”قول تەلەفونىمدا فىڭلينۋان شاعىن اۋماعىنداعى ءاربىر تۇرعىننىڭ ۋيچاتى نەمەسە تەلەفون ءنومىرى ساقتالعان، الەۋمەتتىك اۋماق كادرى بۇقارانىڭ ۋايىمداعانىن ۋايىمداپ، بۇقارانىڭ ويلاعانىن ويلاۋ كەرەك، بۇل ءبىز ىستەۋگە ءتيىستى ءىس“، - دەدى.
