قازىر ءدال ازىقتىق كۇنباعىس جيناۋ مەزگىلى، شيحۋ قالاسىنىڭ ءارقايسى اۋىل ـ قالاشىقتارىنداعى ەگىمشى وتباسىلارى ىندەتتەن ساقتانۋ ـ تىزگىندەۋدىڭ ءتۇرلى شارالارىن ويداعىداي ىستەۋمەن بىرگە، ەگىس مەزگىلىن مىقتى يگەرىپ، جيناۋ جۇمىسىن بار كۇشپەن ورىستەتتى.
10 ـ ايدىڭ 8 ـ كۇنى شيحۋ قالاسى بايياڭگوۋ قالاشىعى دۇڭشىڭ قىستاعىنىڭ تۇرعىنى تورەبايىر وتباسىنىڭ ازىقتىق كۇنباعىس اتىزىندا جۇمىسشىلار قولدارىنا پىشاق قۇرالدارىن الىپ، ازىقتىق كۇنباعىس گۇل تاباقشاسىن شەبەرلىكپەن شاۋىپ ءتۇسىردى، كومباين كەپتىرىلگەن ازىقتىق كۇنباعىستىڭ ٴدانىن ايىردى، ادام مەن ماشينانىڭ سەلبەستىگىندە مول ءونىمنىڭ قۋانارلىق جاعدايى جارىققا شىقتى.
”وسى 2 جىلدا قالاشىق پارتكومىنىڭ جەتەكشىلىگىندە، ءبىز سىناق رەتىندە ازىقتىق كۇنباعىس ەكتىك، بارلىعى تاپسىرىس بويىنشا ەگىلىپ، ونىمدىلىگى وتە جاقسى بولدى. بيىل 260 مۋ جەرگە ازىقتىق كۇنباعىس ەكتىم، مۋ باسىندىق ءونىم مولشەرى 200 كيلوگرامعا جەتىپ، مەجەمەن كىرىسىم 350 مىڭ يۋانعا جەتەدى، مال شارۋاشىلىعىن دامىتۋ نەگىزىندە بىزدە تاعى ءبىر كىرىس كوزى كوبەيدى، مەن بۇعان ءدان ريزامىن“، - دەدى تورەبايىر قۋانا.
ازىقتىق كۇنباعىس جيناۋ ماۋسىمىندا ادام ىستەتۋ مولشەرى زور بولعاندىقتان، ماڭايىنداعى قىستاق تۇرعىندارىنا دا جۇمىس ىستەپ، كىرىستەرىن ارتتىرۋ ورايى جاراتىلدى. شيحۋ قالاسى بايياڭگوۋ قالاشىعى دۇڭشىڭ قىستاعىنىڭ تۇرعىنى باتۋ مىڭكى بىلاي دەدى: ”بۇل ارادا جۇمىس ىستەسەك، ۇيگە جاقىن، كۇنىنە 200 يۋاننان استام اقشا تابامىز، وتە جاقسى“.
ۇعىسۋعا قاراعاندا، ازىقتىق كۇنباعىستىڭ ءوسۋ پەريودى ءبىرشاما قىسقا بولىپ، ۇيلەسمدىلىگى كۇشتى، قۋاڭشىلىققا، سورتاڭعا ءتوزىمدى بولۋ سياقتى ارتىقشىلىقتارعا يە، شيحۋ قالاسى بايياڭگوۋ قالاشىعىنىڭ وزگەشە توپىراق، كليمات شارت ـ جاعدايى ازىقتىق كۇنباعىستىڭ وسۋىنە ۇيلەسەدى، وندىرىلگەن كۇنباعىستىڭ ءدانى تولىق، ساپاسى تاماشا بولىپ، تۇتىنۋشىلاردىڭ قىزۋ قارسى الۋىنا يە بولدى.
شيحۋ قالاسى بايياڭگوۋ قالاشىعى دۇڭشىڭ قىستاعى پارتيا ياچەيكاسىنىڭ شۋجيى باتۋچيمگى بىلاي دەدى: ”بۇرىن قىستاعىمىز جالاڭ مال شارۋاشىلىق اترەتى بولعاندىقتان، قىستاق تۇرعىندارىنىڭ كىرىسى تۇگەلدەي قوي، سيىر باعۋدان كەلەتىن، قازىر قىستاق تۇرعىندارىندا قونىستانۋ ٴتۇيىنى بار، يدەيالىق تانىمدارىندا دا وزگەرىس بولدى، جوعارى ءونىمدى ەكونوميكالىق داقىل ەگىپ، قىستاق تۇرعىندارىنىڭ كىرىسىن ارتتىرۋداعى تاعى ٴبىر ارنا كوبەيدى. بىلايعى جەردە ٴبىز ٴىس جۇزىندىك جاعدايعا ۇشتاستىرىپ، پارتيا ياچەيكاسىنىڭ باستاماشىلىق رولىن اناعۇرلىم ساۋلەلەندىرىپ، بۇقارانىڭ كىرىسىن ارتتىرۋ ارناسىن كەڭەيتىپ، اۋىل – قىستاقتى گۇلدەندىرۋگە ۇزدىكسىز كۇش قوسامىز“. (ەرىكتى ءتىلشى گۇلزيرا)
