تيانشان تورى
تيانشان تورى   ›   جاڭالىقتار   ›   شينجياڭ حابارلارى

اق حالاتتان ساۋىت كيىپ، جاستىق كوكتەمدەرىن قۇلپىرتتى

”90 - جىلداردىڭ تۇلەكتەرىنەن“، ”2000 - جىلداردىڭ تۇلەكتەرىنەن“ ۇيىمداسقان ەمدەۋ قىزمەتكەرلەرى −

اق حالاتتان ساۋىت كيىپ، جاستىق كوكتەمدەرىن قۇلپىرتتى

□ انار بۇلت \ شينجياڭ گازەتىنىڭ ءتىلشىسى يە شياۋمين

  ”مەن بارامىن“ دەگەن ۇندەر، شايقاسقا سۇرانۋ حاتتارى، جاس ەكپىندىلەر اترەتتەرى... جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋدىڭ ەڭ الدىڭعى شەبىندە، اۆتونوميالى رايوندىق 5 - حالىق شيپاحاناسىنداعى ”90 - جىلداردىڭ تۇلەكتەرىنەن“ ، ”2000 - جىلداردىڭ تۇلەكتەرىنەن“ ۇيىمداسقان ءبىر توپ ەمدەۋ قىزمەتكەرى بار قايراتتارىن سالىپ قىزمەتكە كىرىستى.

  9 - ايدىڭ سوڭىنداعى ءبىر كۇنى تاڭەرتەڭ، قوڭىراۋلى ساعات شىرىلداسىمەن، ”90 - جىلداردىڭ تۇلەگى“ شيپاگەر جاڭ يۋانيۋان ەكىنشى دارەجەلى ساقتانۋ كيىمىن كيىپ، ءبىر كۇندىك زارارسىزداندىرۋ قىزمەتىن باستادى. ءبىر ساعاتتان كەيىن، ول ناۋقاستار اۋماعىندا بولمەلەردى تەكسەردى، ءدارى تاراتتى، تاڭعى اس جەتكىزدى، قايناعان سۋ اپارىپ بەردى.

  بيىل 83 جاستاعى جىڭ يۇڭشين شۇعىل حاراكتەرلى ميشىق بۇلشىق ەتىنىڭ ولەتتەنۋىنە شالدىققان، سونداي - اق ول ناۋقاستار اۋماعىنداعى اۋرۋ جاعدايى ەڭ سالماقتى ناۋقاس ەدى. ولباستاپتا شيپاگەردى كورە سالا بالا قۇساپ بوز بورانى شىعا جىلاپ، ءدارى ىشپەيمىن، تاماق جەمەيمىن دەپ الەك سالدى. ”اتا، ءدارى ءىشىڭىز، اۋزىڭىزدى ۇلكەندەۋ اشىڭىز“. ”اقىرىن، قولىمنان ۇستاپ، تۇرەگەلىڭىز“... جاڭ يۋانيۋان ىلعي دا وسى ”قارت بالانى“ بايىپپەن الداپ - سۋلايدى.

  دەن قويا كۇتىلگەن جىڭ يۇڭشين شيپاحانادان شىققاندا، كوز جاسىنا ەرىك بەرىپ، جاڭ يۋانيۋاننىڭ قولىنان ۇستاپ تۇرىپ بۋلىعا: ”شيپاگەر، ساعان راقىمەت، باعىما جاراي ساعان كەزىگىپپىن“، - دەدى. كەيىن قارتتىڭ ۇيىندەگىلەر العىس تۋىن اكەلىپ بەردى، وعان ”ناۋقاستارعا جاقىن تۋىسىنداي قارادى“ دەپ جازىلعان.

  جاڭ يۋانيۋان: ”وسى العس تۋدى كورگەن سايىن تۇلا بويىمدى كۇش - قايرات كەرنەپ، قالجىراۋدان ايىعىپ شىعا كەلەمىن“، - دەدى.

  10 - ايدا، ىندەتتەن ساقتانۋ قىزمەتى قامال الۋ كەزەڭىنە ءوتتى، شيپاحانا ەمدەۋ اترەتىنىڭ فاڭساڭ شيپاحاناسىنا جايعاسۋىن شۇعىل قاجەت ەتتى، جاڭ يۋانيۋان جۇمىس ورنىندا تالاي كۇن تاپجىلماي شايقاس جاساعانىمەن، تاعى دا بۇرىنعىداي ەش ءارى - ءسارى بولماستان: ”مەن پارتيا مۇشەسىمىن، مەن الدىمەن بارايىن“! - دەدى.

  ءار كۇنى كەشتە ”90 - جىلداردىڭ تۇلەگى“ شيپاگەر لوۋ ۋي ناۋقاستار بولمەسىندەگى جۇمىستارىن ۋاقىتشا قويا تۇرىپ، نەگىزگى زەيىنىن شيپاگەرلەر مەن ناۋقاستار تىلدەسەتىن ۋيچات توبىنا شوعىرلاندىرادى. بايلانىسشىلاردىڭ ءبىرى بولعان ول، ۇيدە جاتقانداعى سالاماتتىق ەسكەرتپەلەردى ۋاعىندا جاريالاۋعا دايىندالدى. كەنەت، ءبىر ينفورماتسيا ونىڭ نازارىن اۋداردى: ”قۇتقارىڭدار، جوعارعى قان قىسىمى 160قا، تومەنگى قان قىسىمى 100گە شىقتى، قازىر باسى اينالىپ، كوزى قاراۋىتىپ تۇر، تەز“!

  ورىندىقتا وتىرعان لوۋ ۋي ورنىنان اتىپ تۇرىپ، دەرەۋ جاۋاپ قايتاردى: ”باسىن 30 گرادۋس بيىكتەتىپ، تىنىش، جارىعى جوق جەردە شالقاسىنان جاتقىزىڭىزدار، قىسقا ونىمدىلىكتى قان قىسىم ءتۇسىرەتىن ءدارى، باس اينالۋعا قارسى ءدارى ىشكىزىڭىزدەر“. وسى ساتتە، شيىرشىق اتقان ناۋقاستىڭ ۇيىندەگىلەرى لوۋ ۋيدىڭ ەسكەرتۋى بويىنشا، دەرەۋ قۇتقارۋعا كىرىسەدى. جارتى ساعاتتان كەيىن، ناۋقاستىڭ اۋرۋ بەلگىسى بۇكىلدەي باسەيىپ، قان قىسىمى قالىپقا تۇسەدى.

  25 جاستاعى سەسترا ياڭ يە شيپاگەرلەر مەن ناۋقاستار تىلدەسەتىن ۋيچات توبىندا ناۋقاستاردىڭ سوزىلمالى اۋرۋلارىن قايتا تەكسەرۋ، ءدارى جازدىرۋدى باسقارۋ جۇمىستارىنا جاۋاپتى. ىندەت كەزىندە، ناۋقاستاردىڭ قايتا تەكسەرىلۋى، ءدارى ساتىپ الۋى قاجەت بولسا، ياڭ يە ىلعي ناۋقاستاردىڭ قاجەتى بويىنشا دەرەۋ كومەك كورسەتەدى.

  ”كومەكتەسۋگە كەلسە، ءسوزسىز، كومەكتەسەمىن“، - دەيدى ياڭ يە. سوزىلمالى اۋرۋى بار ناۋقاستاردىڭ ءدارى الۋىنا قولايلى بولۋ ءۇشىن، ول ۇيلەرىندە جاتقان ناۋقاستاردىڭ سوزىلمالى اۋرۋ كارتچكاسىن تارتىپپەن جيناپ الىپ، قاۋىرت كەزگە شوعىرلاندىرماي، ناۋقاستاردى شيپاحانانىڭ امبولاتورياسىنان ءدارى الۋعا سايكەستىردى.

  ءتۇن شىمىلدىعى تۇسە، سەسترا يان گىگى ءوزىنىڭ كەشكى كەزەكتەگى جۇمىسىن باستايدى. ەكىنشى دارەجەلى قورعانۋ كيىمىن كيىپ، زارارسىزداندىرىپ بولعان سوڭ، ناۋقاستارعا بارىپ قان قىسىمىن، قانداعى قانت قۇرامىن ولشەيدى، جۇڭي ءدارى جەتكىزەدى، تاماققا تاپسىرىس الادى، قايناعان سۋ اپارىپ بەرەدى. ىندەت كەزىندە، ول شيپاحانادا قالىپ، تاپجىلماي ىستەۋدى ىرىقتىلىقپەن تالاپ ەتتى.

  بيىل 21 جاستاعى يان گىگىنىڭ قىزمەتكە قاتىناسقانىنا نەبارى جارتى جىل عانا بولعان، ادەتتە كەم ءسوزدى، قىزمەت ىستەگەندە ەرەكشە قىزعىندىلىق تانىتادى. ءار رەت قىزمەتتەستەرى جۇكتىلىك نەمەسە جايسىزدانۋ سەبەبىنەن كەشكى كەزەكتەگى جۇمىسقا شىعا المايتىن بولسا، ول ىلعي: ”مەن ەڭ شىدامدىمىن عوي، مەن ىستەيىن“! - دەيدى. ورتا ەسەپپەن ءار 3 كۇندە ءبىر رەت كەشكى كەزەكتەگى جۇمىسقا شىعاتىن يان گىگى ەشقاشان شارشاپ - شالدىقتىم دەمەي، ناۋقاستاردى ءۇنسىز كۇتىمدەۋمەن بولدى.

  ءبىر كۇنى تۇندە، سەسترالار پۋنكتىندەگى شۇعىل قۇتقارۋ بولمەسىنىڭ قوڭىراۋى شىرىلداپ، ءبىر ناۋقاستىڭ كەنەتتەن تالما اۋرۋى ۇستاپ، اۋزىنان اق كوبىك اعىپ، قول - اياعى قۇرىسىپ قالادى. يان گىگى دەرەۋ شۇعىل قۇتقارۋ بولمەسىنە بارىپ، نۇسقاۋ بويىنشا ناۋقاسقا وتتەگىن سىمىرتكىزىپ، ۆەنا تامىرىن اشادى، تىنىشتاندىرعىش ۋكول سالىپ، قان قىسىمىن ولشەيدى، قانداعى قانت قۇرامىن ولشەيدى، قاقىرىعىن سورعىزادى، مۇز ارقىلى فيزيكالىق جولمەن دەنە تەمپەراتۋراسىن تۇسىرەدى... ءبىر قىدىرۋ ىستەردى جاتىق دا ولشەمدى ىستەپ، كەزەكشى شيپاگەرلەرمەن ءۇنسىز سەلبەسىپ، ەڭ سوڭىندا ناۋقاستى قۇتقارىپ الادى.

  كەزىندە ءبىر قىزمەتتەسى يان گىگىدان: ”قورىقپايسىڭ با؟“ دەپ سۇراعاندا، ول كۇلىپ تۇرىپ: ”قورقامىن، الايدا بۇل مەنىڭ قىزمەتىم، ءسوزسىز، جاقسى ىستەۋىم كەرەك. ساقتانۋ شارالارى بولعاندىقتان، سىزدەرمەن بىرگە ىستەگەندىكتەن، قورىقپايتىن بولدىم“، - دەپ جاۋاپ بەردى.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.