كوپ جاق بىرلەسە قيمىلداپ، كۇنى - ءتۇنى سۋىت ءجۇرىپ
المۇرتتى قالاداعى قاتەرلى، سالماقتى ناۋقاسقا شالدىققان بوبەك تيانجينگە بارىپ ەمدەلۋ ءۇشىن جەدەل جەتكىزىلۋ ۇستىندە
انار بۇلت \ شينجياڭ گازەتىنىڭ ءتىلشىسى دۋ جيانحۇي، ەرىكتى ءتىلشى يۇي شياۋجياڭ 10 - ايدىڭ 12 - كۇنى كورلادان حابارلايدى. ”اينالايىن قۇلىنىم، قۇتقارىلاتىن بولدىڭ، ءبىز ءدال قازىر اتتانىپ، سەنى تيانجينگە اپارىپ ەمدەتەمىز“. 10 - ايدىڭ 11 - كۇنى ساعات 17 مولشەرىندە جەدەل جاردەم اۆتوكولىگى ۇيلەرىنىڭ ەسىك الدىنا اكەلىنگەنىن كورگەندە، چين مان - ي ەرلى - زايىپتىلار بوبەگىن كوتەرىپ جىلدام اۆتوكولىككە شىقتى. ولاردىڭ بۇل ساپارىنىڭ نىساناسى تيانجين بولىپ، تۋىلعانىنا 6 اي بولعان بالاسىن ەمدەتۋگە اپارا جاتىر ەدى.
بيىل 30 جاسقا كەلگەن چين مان - ي بايىنعولين موڭعۇل اۆتونوميالى وبلىسى كورلا قالاسى تەكەشى اۋىلى شانان الەۋمەتتىك اۋماعىنىڭ تۇرعىنى، قازىر قۇرىلىس ورنىندا باقىلاۋ قىزمەتىمەن شۇعىلدانادى. بالاسى ناۋقاستانىپ قالعاننان كەيىن، چين مان - ي ەرلى - زايىپتى ەكەۋى بالاسىن كوتەرىپ الىپ ءارقايسى شيپاحانالاردى ارالاپ اۋرۋعا شيپا ىزدەدى.
”العاشقى مەزگىلدە 200 مىڭ يۋاننان استام ەمدەۋ قاراجاتىن جۇمسادىق، ونىڭ كوبىن تۋىس - تۋعان، دوس - جاراندارىمىزدان قارىزعا الدىق“. چين مان - ي بىلاي دەدى: بالامىز ءوت وزەگىنىڭ قابىنۋى، ءوت وزەگىنىڭ بىتەلۋى، ءوت سۇيىقتىعى سيپاتتى باۋىردىڭ قاتايۋى اۋرۋلارىنا شالدىعىپتى، تيانجين 1 - ورتالىق شيپاحاناسىنا اپارىپ سايكەس ۇلگى جاساتىپ، باۋىر كوشىرۋ وتاسىنا دايىندالامىز. قازىر بالامىز كاساي وتاسىن جاساتقاننان كەيىن جۇعىمدالىپ، قىزۋى باسىلماي، دەرەۋ تيانجينگە اپارىپ ەمدەتۋ قاجەت بولدى.
ىندەت جاعدايىندا شينجياڭنان شىعىپ تيانجينگە بارىپ ەمدەلۋ ءۇشىن، اۋىر قيىنشىلىقتار بار ەكەندىگىن چين مان - ي ابدەن بىلەتىن، ءبىراق ول اۆتونوميالى رايون، بايىنعولين وبلىسى، كورلا قالاسى سىندى 3 دارەجەلى ىندەتتەن ساقتانۋ - تىزگىندەۋ قىزمەتى قولباسشىلىق شتابىنىڭ قامقورلىعىندا، سايكەستىرۋىندە، ءبىر وتباسىنىڭ ادامدارى ءساتتى تۇردە جولعا شىعارىن ويلاماعان ەدى.
”ءبىز چين مان - يدىڭ شينجياڭنان شىعىپ ەمدەلۋ جونىندەگى ءوتىنىش قاعازىن تاپسىرىپ العاننان كەيىن، دەر كەزىندە تۇجىرىم جاساپ، ونىڭ تيانجينگە بارىپ بالاسىن ەمدەتۋىنە قوسىلدىق ءارى اۆتونوميالى رايوننىڭ ىندەتتەن ساقتانۋ - تىزگىندەۋ قىزمەتى قولباسشىلىق شتابىنا تىزىمگە الۋعا جولداپ بەردىك. سونىمەن بىرگە ەمدەۋ - قۇتقارۋ، قىزمەت وتەۋ قىزمەتىن ويداعىداي ىستەپ، جاسىل ارنا اشىپ، بالانىڭ ءساتتى تۇردە تيانجينگە بارىپ ەمدەلۋىنە شىنايى كەپىلدىك ەتتىك“. بايىنعولين وبلىسىنىڭ ىندەتتەن ساقتانۋ - تىزگىندەۋ قىزمەتى قولباسشىلىق شتابىنىڭ قاتىستى جاۋاپتىسى: قازىرگى ىندەت جاعدايىنا نەگىزدەلىپ، چين مان - يدىڭ ءوز اۆتوكولىگىمەن ۇرىمجىگە بارعاننان كەيىن، ۇشاققا وتىرىپ تيانجينگە بارۋىنا نەمەسە ءوز كولىگىمەن تيانجينگە بارۋىنا قوسىلدىق، - دەدى.
10 - ايدىڭ 9 - كۇنى تيانجينگە ۇشاتىن كەزەكشى ۇشاق قالىپتى ۇشپايتىن بولعاندىقتان، چين مان - ي كورلا قالاسىنىڭ ىندەتتەن ساقتانۋ - تىزگىندەۋ قىزمەتى قولباسشىلىق شتابىنان تاعى دا كومەك سۇرادى. كورلا قالاسىنىڭ ىندەتتەن ساقتانۋ - تىزگىندەۋ قىزمەتى قولباسشىلىق شتابى چين مان - يگە ءوز اۆتوكولىگىمەن تيانجينگە بارۋدى ۇسىنىس ەتەدى ءارى جوعارى ورىننىڭ سايكەستىرۋ جاساپ، جول بويىنداعى ءار قايسى ولكە، قالالارعا قاتىناس قاعازىن جولداپ، جاسىل ارنامەن جۇرۋگە جاعداي جاساۋىن ءوتىنىش ەتۋگە بولاتىندىعىن ءبىلدىردى.
”ەگەر مەن ءوز اۆتوكولىگىممەن تيانجينگە باراتىن بولسام، جول الىس، بالام وتە كىشكەنە، ىندەت جاعدايى ورنىقتى ەمەس، الدا - جالدا، جولدا بىرەر جاعداي تۋىلا قالىپ، دەر كەزىندە ءونىمدى قۇتقارۋعا - ەمدەۋگە قول جەتكىزە الماسام قايتەمىن“؟ - دەپ چين مان - ي الاڭداعانىن جاسىرمادى. بايىنعولين وبلىسىنىڭ، كورلا قالاسىنىڭ ىندەتتەن ساقتانۋ - تىزگىندەۋ قىزمەتى قولباسشىلىق شتابى تاعى دا شۇعىل اقىلداسىپ، ءبىر قۇتقارۋ اۆتوكولىگىن شىعارىپ چين مان - ي وتباسىنداعىلاردى تيانجينگە جەتكىزۋدى ۇيعارادى.
10 - ايدىڭ 10 - كۇنى تيانجين قالاسى نانكاي رايونىنىڭ ىندەتتەن ساقتانۋ - تىزگىندەۋ قىزمەتى قولباسشىلىق شتابىمەن حابارلاسقاننان كەيىن، كورلا قالاسىنىڭ ىندەتتەن ساقتانۋ - تىزگىندەۋ قىزمەتى قولباسشىلىق شتابى شۇعىل تۇردە جالپى بەتتىك تۇجىرىمداۋ جيىنىن اشتى ءارى جوعارىعا شينجياڭنان شىعىپ ەمدەلۋ ءوتىنىشىن تاپسىرىپ، تەز ارادا ماقۇلداپ بەكىتۋگە يە بولدى.
10 - ايدىڭ 11 - كۇنى اۆتونوميالى رايونداعى، بايىنعولين وبلىسىنداعى جانە كورلا قالاسىنداعى قاتىستى تاراۋلاردىڭ بىرگە كومەكتەسۋىندە چين مان - ي وتباسىنىڭ جول ءجۇرۋ ءتاسىلى، جولى، اۆتوكولىگى تولىق شەشىم ەتىلدى. كورلا قالالىق ۇكىمەت 120 جەدەل جاردەم اۆتوكولىگىن شىعارىپ، بىرگە باراتىن ءبىر شيپاگەر ورنالاستىردى، نىسانالى جەرگە تەز ارادا جەتۋ ءۇشىن، كورلا قالاسى جەدەل جاردەم اۆتوكولىگىنە تاعى 2 شوفەر شىعارىپ، اۆتوكولىكتى كەزەكتەسىپ جۇرگىزىپ، كۇنى - ءتۇنى سۋىت جۇرۋگە مۇمكىندىك جاسادى.
ءتىلشى وسى حاباردى جاريالاعانعا دەيىن چين مان - ي ەرلى - زايىپتىلار بالاسىن الىپ، بىرگە باراتىن شيپاگەردىڭ قارايلاسۋىندا تيانجينگە كەتىپ بارا جاتىپتى، قازىر بالانىڭ ناۋقاس جاعدايى ءبىر قالىپتى ەكەن.
