شينحۋا اگەنتتىگىنىڭ 10 - ايدىڭ 18 - كۇنى بەيجيڭنەن بەرگەن حابارى. 10 - ايدىڭ 18 - كۇنى مەملەكەت ءتوراعاسى شي جينپيڭ ۋگاندانىڭ زۇڭتۇڭى مۋسەۆەنيمەن ءوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 60 جىلدىعىن قۇتتىقتادى.
شي جينپيڭ بىلاي دەپ اتاپ كورسەتتى: جۇڭگو مەن ۋگاندانىڭ ءداستۇرلى دوستىعى ۋاقىت وتكەن سايىن نىعايا ءتۇستى. سوڭعى جىلدارى ەكى ەل جان - جاقتى سەلبەستىك سەرىكتەستىك قارىم - قاتىناس ورناتتى، ساياسي ءوزارا سەنىمدىلىگى كۇن سايىن بەكەمدەلدى، ءتۇرلى سالاداعى سەلبەستىگى ۇزدىكسىز تەرەڭدەپ، ءبىر - ءبىرىنىڭ وزەكتى مۇددەسىنە ساياتىن جانە ءجىتى قاداعالاپ وتىرعان كەلەلى ماسەلەلەردە ءبىرىن - ءبىرى تاباندىلىقپەن قولداپ، حالىقارالىق جانە وڭىرلىك ىستەردە تىعىز سايكەسىپ كەلەدى. جاڭا تيپتى ايدارشا ۆيرۋس وكپە قابىنۋ ىندەتى الدىندا ەكى ەل حالقى قيىندىقتى بىلەك بىرىكتىرە جەڭىپ، ءوزارا قارايلاسىپ، جۇڭگو - ۋگاندا دوستىعىنىڭ جاڭا تاراۋىن جازدى. مەن جۇڭگو - ۋگاندا قارىم - قاتىناسىنىڭ دامۋىنا باسا ءمان بەرەمىن، مۋسەۆەني زۇڭتۇڭمەن بىرگە قۇلشىنىپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 60 جىلدىعىن وراي ەتىپ، ”ءبىر بەلدەۋ، ءبىر جولدى“ بىرگە قۇرۋ جانە جۇڭگو - افريكا سەلبەستىك تالقى مىنبەرى جۇلگەسىندە ءتۇرلى سالاداعى سەلبەستىكتى تەرەڭدەتىپ، ەكى ەلدى جانە ەكى ەل حالقىن باقىتقا كەنەلتىپ، جاڭا داۋىردەگى جۇڭگو - افريكا تاعدىرلاس ورتاق تۇلعاسىن قول ۇستاسا قۇرۋدى قالايمىن.
مۋسەۆەني مىنالاردى ءبىلدىردى: ديپلوماتيالىق قارىم - قاتىناس ورناتقان 60 جىلدان بەرى ۋگاندا مەن جۇڭگو ەكى جاق تىعىز سەلبەسىپ، سايكەسىپ، كوپتەگەن كەلەلى سەلبەستىكتەردى بىرگە ىلگەرىلەتىپ، اتقارىپ، ەكى ەل اراسىنداعى تاماشا قارىم - قاتىناس باستان - اياق ومىرشەڭدىك كۇشكە تولى بولدى. ۋگاندا جاق ۋگاندا - جۇڭگو قارىم - قاتىناسىنىڭ دامۋىن ىلگەرىلەتۋگە ۇزدىكسىز كۇش سالادى. مەن ەكى ەلدىڭ دوستىق سەلبەستىك قارىم - قاتىناسىنىڭ، ءسوز جوق، ۇزدىكسىز تەرەڭدەپ، ەكى ەل حالقىن اناعۇرلىم باقىتقا كەنەلتىپ، دۇنيە ءجۇزىنىڭ بەيبىتشىلىگىن، ورنىقتىلىعىن جانە سەلبەستىگىن جەبەۋگە ۇلەس قوساتىندىعىنا سەنەمىن.
