□ انار بۇلت \ شينجياڭ گازەتىنىڭ ءتىلشىسى لي ياڭ
”مىناۋ ءبىزدىڭ بۇلىڭكول اۋىلىنىڭ ەڭ جاڭا ساياحات ۇگىت ’فيلمى‘، مىنا قىز - جىگىتتەر قازىر پامير ءۇستىرتى ساياحاتىنىڭ ’ينتەرنەتتەگى تانىمال ادامدارىنا‘ اينالدى، ءار كۇنى تىكە تاراتادى، جان كۇيەرلەرى وتە كوپ“، - دەدى 10 - ايدىڭ 20 - كۇنى تۇستە پارتيا 20 - قۇرىلتايىنىڭ شينجياڭ ۋاكىلدەر ۇيىرمەسى تۇرعان جەردە، ۋاكىل لي ۋىنجۋان قول تەلەفونىن قاسىنداعى ۋاكىل گۇلانبەر راۋشانعا ۇستاتىپ جاتىپ، ونىڭ سوزىنەن ماقتانىش لەبى ەسەدى.
قول تەلەفونداعى بەينەجازبادا بايشاحۋ كولى كوك جاقۇتتاي جارقىراپ، بار اسەمدىكتى بويىنا جيناپ، تاماشا تابيعاتتىڭ ادەمى كارتيناسى كورگەن جاننىڭ كوڭىلىن جادىراتادى. كولدىڭ بويىنداعى اعاشتان سالىنعان كورىنىس تاماشالاۋ تەكشەسىندە قىرعىز ۇلتىنىڭ ءداستۇرلى كيىمىن كيگەن جاستار اسقاقتاتا ءان شىرقاپ، بۇرالا بيگە باسىپ، «قايىرلى تاڭ، بۇلىڭكولدىڭ سۇلۋ بويجەتكەنى» ءانىن شىرقاۋدا؛ ”سەن ماعان ءبىر كورگەننەن ۇناپ ەدىڭ، وزىڭە جانارىمدى بۇرا بەردىم...“
”ۋىنجۋان شۋجي، مەنىڭ بۇلىڭكولگە بارماعانىما بىرنەشە اي عانا بولدى، سەندەردىڭ ول جەرلەرىڭنىڭ ساياحاتى وسىنشاما شالقىپ، بارعان سايىن دۋمانداپ كەتەتىنىن ويلاماپپىن“، - دەدى تاشقورعان تاجىك اۆتونوميالى اۋدانى تاجىكابات قالاشىعى پارتكومىنىڭ مۇشەسى، ۋاكىل گۇلانبەر راۋشان.
ۋاكىل لي ۋىنجۋان اقتاۋ اۋدانى بۇلىڭكول اۋىلدىق پارتكومنىڭ شۋجيى، بۇل اۋىلدىڭ تەڭىز دەڭگەيىنەن ورتاشا بيىكتىگى 3400 مەتر، ”بۇلت اراسىنداعى اۋىل“ دەپ اتالادى، اقتاۋ اۋدانىنداعى تەڭىز دەڭگەيىنەن ەڭ بيىك اۋىل - قالاشىق. 2019 - جىلى لي ۋىنجۋان ساياحاتتى يگەرۋدى جولعا قويادى، ”بىزدە ساياحات بايلىعى مول، بايشاشان تاۋى، بايشاحۋ كولى، مۇزتاع شىڭى، قوڭىر شىڭى ءبارى - ءبارى ايرىقشا كوركەم، تاعى قىرعىزدىڭ باتىرلىق ەپوسى «ماناس» جانە باتىس كۇنلۇن اڭىز - ەرتەگىسى بار، استە ’التىن كەسەمەن‘ قايىر تىلەۋگە كەلمەيدى“، - دەدى ول.
”قازىر ساياحاتشىلاردىڭ دارالانعان سۇرانىسى بارعان سايىن مولايۋدا، ساياحاتشىلاردى دامىلداتىپ، قوندىرىپ، كوڭىلىن كوتەرۋدى سىزدەر قالاي ورىندادىڭىزدار“؟ - دەپ سۇرادى گۇلامبەر راۋشان.
لي ۋىنجۋان بىلاي دەدى: جۋىق جىلداردان بەرى بۇلىڭكول اۋىلى جالپى 30 نەشە ميلليون يۋان قارجى قوسىپ، كورىنىس ءوڭىرىنىڭ نەگىزدىك قۇرىلعىلارىن ۇزدىكسىز كەمەلدەندىرىپ، تاقتاي جول سياقتىلاردى سالدى. ساياحاتشىلاردىڭ ماڭىزدى فاكتورى بولعان ”اس - سۋعا“ قاراتا، اۋىلىمىز تاعى قوداس ەتىن جىنتىكتەي مانەرلەۋ كاسىپورنىن ەنگىزىپ، ساياحاتشىلارعا ۇستىرتتەگى قوداس ەتىنىڭ جىلى - جۇمساعىنان ءدام تاتتىردى. ”ءبىز تاعى قىرعىز ۇلتتىق ەرەكشەلىگىنە يە ءبىر توپ سارا حالىقتىق تۇسەلحانا جانە ەرەكشە اس - سۋدى تۇلعالادىق، قازىر تۇتاس اۋىلدىڭ 5 قىستاعىندا 272 وتباسىنداعى 1064 ادام ساياحات كاسىبىمەن شۇعىلدانادى. دالاعا تۇنەۋ، جاياۋ ءجۇرۋ سياقتى ساياحاتتىڭ جاڭا كاسىپ كۇيلەرىن دە جىلدام جەتىلدىرۋدە“.
”مەملەكەت تاس جولى 314 - لەنياسى سىزدەردىڭ اۋىلدى كەسىپ وتەدى، ەكى ساعاتقا جەتپەيتىن ۋاقىتتا ءبىزدىڭ اۋىلعا كەلۋگە بولادى. وسى لەنيا بويىندا ەڭ كوركەم كورىنىس پەن ادامداردى ايرىقشا باۋرايتىن مادەنيەت شوعىرلانعان. ءبىز قول ۇستاسا سەلبەسىپ، ءتىپتى دە كوپ سارا ساياحات جەلىسى مەن نىساندارىن اشاتىن بولساق، ءسوز جوق، ءتىپتى دە مول ساياحاتشىلاردى باۋرايتىن بولامىز“، - دەدى گۇلامبەر راۋشان اسەرلەنە.
جۋىق جىلداردان بەرى تاشقورعان تۇتاس وڭىرلىك ساياحاتتى جۇزەگە اسىرۋدى نىسانا ەتىپ، جەرگىلىكتى ورىننىڭ مادەنيەت جانە ساياحات بايلىعىن بىرىكتىرىپ، ءوز ىڭعايىنا قاراي شەكارا ساياحاتى، اۋىل - قىستاق ساياحاتى، اراسان ساياحاتى، تاۋعا شىعۋ ساياحاتى، قار - مۇز ساياحاتى، سەزىنۋ ساياحاتى سياقتى ساياحات ماركالارىن تۇلعالاپ، تاشقورعان − ياركەن بايىرعى جولى، پانلۇڭ بايىرعى جولى تۇگەلدەي ينتەرنەتتە تانىمال، ءسوزسىز، باراتىن جەرگە اينالدى.
”ءبىز تاعى مۇزتاع مۇزدىعى باقشاسى، حونچيراپ مەملەكەت قاقپاسى، ۋاحان ءدالىزى سياقتى ءتۇيىندى ساياحات كورىنىس ءوڭىرى قۇرىلىسىن ىلگەرىلەتىپ، ’شۋانزاڭنىڭ شىعىسقا ورالۋى‘ اتتى تەرەڭ سەزىنۋ، ساياحاتتاۋ، سۋرەتكە ءتۇسىرۋ نىسانىن تۇلعالاپ، پانلۇڭ بايىرعى جولى كورىنىس ءوڭىرىن جاڭالاپ، دارەجەسىن ءوسىرۋ سياقتىلاردى اتقارىپ، ساياحاتتى شالقىتۋعا سەنىمدىمىز“! - دەدى گۇلامبەر راۋشان.
”پارتيا 20 - قۇرىلتاي بايانداماسىندا، كورىكتى جۇڭگو قۇرىلىسىن ىلگەرىلەتۋ العا قويىلدى. ساياحاتتى اشۋمەن قاتار، ءبىز، ءسوز جوق، ەكولوگيالىق ورتانى ويداعىداي قورعاپ، پامير ءۇستىرتىنىڭ كەلبەتىن ونان ارى اسىرىپ، بۇقارانىڭ تۇرمىسىن بارعان سايىن جاقسارتامىز“! - دەدى لي ۋىنجۋان.
