11 - ايدىڭ 2 - كۇنى تۇستەن بۇرىن، مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا رەسمي ساپارمەن كەلگەن پاكيستاننىڭ زۇڭليى شاھبازبەن كەزدەستى.
□ سۋرەتتى شينحۋا اگەنتتىگىنىڭ ءتىلشىسى ياۋ دا - ۋي تۇسىرگەن
شينحۋا اگەنتتىگىنىڭ 11 - ايدىڭ 2 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 11 - ايدىڭ 2 - كۇنى تۇستەن بۇرىن حالىق سارايىندا جۇڭگوعا رەسمي ساپارمەن كەلگەن پاكيستاننىڭ زۇڭليى شاھبازبەن كەزدەستى.
شي جينپيڭ بىلاي دەپ اتاپ كورسەتتى: جۇڭگوعا ساپارلاي كەلگەندىگىڭىزدى قارسى الامىن، ءسىزدىڭ ەڭ الدىمەن حات جىبەرىپ، جۇڭگو كوممۋنيستىك پارتياسى مەملەكەتتىك 20 - قۇرىلتايىنىڭ اشىلعاندىعىن قۇتتىقتاعاندىعىڭىزعا العىس ايتامىن. جۇڭگو مەن پاكيستان جاقسى دوس، جاقسى سەرىك، جاقسى باۋىرلاس. سوڭعى جىلداردان بەرى، ەكى ەل دۇنيە ءجۇزىنىڭ وزگەرىسى جاعدايىندا، قىم - قۋىت جاعدايىندا ءوزارا قولداۋ كورسەتىپ، قايراتتانا العا ىلگەرىلەپ، جۇڭگو مەن پاكيستاننىڭ اينىماس دوستىق سۇيىسپەنشىلىگىن ايگىلەدى. جۇڭگو جاق باستان - اياق جۇڭگو مەن پاكيستان قارىم - قاتىناسىنا ستراتەگيالىق بيىكتەن جانە ۇزاق بولاشاقتىق تۇرعىدان قاراپ، باستان - اياق پاكيستاندى توڭىرەكتىك ديپلوماتيانىڭ الدىمەن ەسكەرىلەتىن بەتالىسىنا قويىپ، پاكيستان جاقپەن بىرگە جان - جاقتى ستراتەگيالىق سەلبەستىك ورەسىن جوعارىلاتىپ، جاڭا داۋىردەگى اناعۇرلىم تىعىز جۇڭگو - پاكيستان تاعدىرلاس ورتاق تۇلعاسىن جەدەل ورناتىپ، جۇڭگو مەن پاكيستاننىڭ بارلىق جاعدايدا بىردەي ستراتەگيالىق سەلبەستىك سەرىكتەستىك قارىم - قاتىناسىنا جاڭا قوزعاۋشى كۇش ۇستەۋدى قالايدى.
شي جينپيڭ بىلاي دەپ باسا دارىپتەدى: جۇڭگو جاق پاكيستان جاقتىڭ جۇڭگومەن دوستىق سەلبەستىكتى تاباندىلىقپەن ىلگەرىلەتكەندىگىن القايدى، پاكيستان جاقتىڭ جۇڭگونىڭ وزەكتى مۇددەسىنە ساياتىن جانە ءجىتى قاداعالاپ وتىرعان كەلەلى ماسەلەلەردە جۇڭگو جاقتى قولداعاندىعىنا العىس ايتادى، پاكيستان جاقتىڭ مەملەكەتتىڭ يەلىك ۇقىعى مەن تەرريتوريا تۇتاستىعىن، دامۋ مۇددەسىن، ۇلتتىڭ ار - نامىسىن قورعاۋىن باتىل قولدايدى، پاكيستاننىڭ ورنىقتىلىقتى، ىنتىماقتى، دامۋدى، گۇلدەنۋدى جۇزەگە اسىرۋىن باتىل قولدايدى. جۇڭگو جاق پاكيستان حالقىنىڭ ەرەكشە ۇلكەن تاسقىن اپاتىنا ۇشىراعاندىعىنا ايرىقشا جان اشىرلىق بىلدىرەدى، ۇستەمەلەپ شۇعىل كومەك بەرىپ، پاكيستاننىڭ اپاتتان كەيىنگى قايتا قۇرۋىنا كومەكتەسىپ، پاكيستان جاقتىڭ اپاتتان كەيىنگى اۋىل شارۋاشىلىعى ءوندىرىسىن قالپىنا كەلتىرۋىنە قولداۋ كورسەتىپ، اپاتتان ساقتانۋ، اپات زيانىن ازايتۋ، كليمات وزگەرىسىنە توتەپ بەرۋ سەلبەستىگىن كۇشەيتەدى.
شي جينپيڭ جۇڭگو كوممۋنيستىك پارتياسى مەملەكەتتىك 20 - قۇرىلتايى قول جەتكىزگەن ماڭىزدى جەتىستىكتەردى تانىستىردى. شي جينپيڭ بىلاي دەپ اتاپ كورسەتتى: جۇڭگو سىرتقا ەسىك اشۋ سىندى نەگىزگى مەملەكەت ساياساتىنا تىنباي تاباندى بولىپ، جۇڭگونىڭ جاڭا دامۋى ارقىلى پاكيستاندى قامتىعان دۇنيە جۇزىندەگى ەلدەرگە ۇزدىكسىز جاڭا وراي ازىرلەيدى. جۇڭگو جاق پاكيستان جاقپەن بىرگە دامۋ ستراتەگياسىنىڭ ءتۇيىلىسۋىن تەرەڭدەتۋدى قالايدى. ەكى جاق جۇڭگو - پاكيستان ەكونوميكالىق ءدالىزى بىرلەسكەن سەلبەستىك كوميتەتى مەحانيزمىنەن ويداعىداي پايدالانىپ، جۇڭگو - پاكيستان ەكونوميكالىق ءدالىزى قۇرىلىسىن اناعۇرلىم جوعارى ونىمدىلىكپەن ىلگەرىلەتىپ، ونى ”ءبىر بەلدەۋ، ءبىر جولدىڭ“ جوعارى ساپالى دامۋىنىڭ ۇلگى سيپاتتى ينجەنەرياسى ەتىپ تۇلعالاۋى كەرەك. گۋادار پورتىنىڭ سايكەستى نەگىزدىك قۇرىلعىلارى قۇرىلىسىن جەدەل ىلگەرىلەتىپ، پورتتىڭ ءوڭىردىڭ ۇلاسپالى دامۋىندا ىقپال جاساۋ، جەتەكتەۋ رولىن ساۋلەلەندىرۋى كەرەك. ەكى جاق بىرگە قۇلشىنىپ، 1 - ءنومىرلى تەمىر جول نەگىزگى جەلىسىنىڭ دارەجەسىن جوعارىلاتىپ جاڭالاۋ نىسانى مەن كاراچي قالا اينالمالى تەمىر جول نىسانىنىڭ ەرتەرەك اتقارىلۋىنا شارت - جاعداي جاساۋ كەرەك. جۇڭگو جاق پاكيستاننىڭ ساپالى اۋىل شارۋاشىلىق ونىمدەرىن جۇڭگوعا ەكسپورت ەتۋىن كەڭەيتۋىن قارسى الادى، پاكيستان جاقپەن بىرگە سيفرلى ەكونوميكا، ەلەكتروندى ساۋدا، فوتوۆولت سياقتى جاڭا ەنەرگيا سەلبەستىگىن كەڭەيتىپ، اۋىل شارۋاشىلىعى، عىلىم - تەحنيكا، حالىق تۇرمىسى سياقتى سالالارداعى سەلبەستىكتى تىڭعىلىقتى ىلگەرىلەتىپ، پاكيستان جاقتىڭ فينانس جاعدايىن ورنىقتىرۋىنا قولىنان كەلگەنىنشە ۇزدىكسىز قولداۋ كورسەتۋدى قالايدى. جۇڭگو جاق جۇڭگونىڭ ونەركاسىپتە قۋاتتى ولكەلەرىنىڭ پاكيستان جاقپەن جۇپ قۇراپ، كاسىپ سالالارى سەلبەستىگىن ىلگەرىلەتۋىن قولدايدى، پاكيستان جاقتىڭ تاماشا شارۋاشىلىق - ساۋدا ورتاسىن ازىرلەۋىن ءۇمىت ەتەدى. مەن پاكيستانداعى جۇڭگولىقتاردىڭ حاۋىپسىزدىك ماسەلەسىنەن قاتتى الاڭدايمىن، پاكيستان جاقتىڭ پاكيستانعا بارىپ سەلبەستىك ورىستەتكەن جۇڭگو قۇرىلىمدارى مەن قىزمەتكەرلەرىنە سەنىمدى، حاۋىپسىز ورتا ازىرلەۋىن ءۇمىت ەتەمىن.
شي جينپيڭ بىلاي دەپ اتاپ كورسەتتى: قازىر دۇنيە ءجۇزىنىڭ وزگەرىسى، ءداۋىردىڭ وزگەرىسى، تاريحتىڭ وزگەرىسى بۇرىن بولىپ كورمەگەن تاسىلمەن ورىستەۋدە. بارىنشا تۇراقسىز دۇنيە ءجۇزى الدىندا، ەكى جاق تاريحتىڭ دۇرىس جاعىندا تۇرىپ، حالىقارالىق كوپ جاقتى مەحانيزمىندە جوعارى ورەلى سەلبەستىكتى ساقتاپ، كەلەلى حالىقارالىق، وڭىرلىك ماسەلەلەردە تىعىز سايكەسىپ، ناعىز كوپ جاقتىلىقتى قورعاپ، حالىقارالىق ادىلدىكتى، تۋراشىلدىقتى قورعاپ، وركەندەپ كەلە جاتقان ەلدەردىڭ ورتاق مۇددەسىن قورعاپ، دۇنيە جۇزىنە تۇراقتىلىق جانە وڭ ەنەرگيا ازىرلەۋى كەرەك. جۇڭگو جاق پاكيستان جاقپەن بىرگە الەمدىك دامۋ باستاماسى مەن الەمدىك حاۋىپسىزدىك باستاماسىنىڭ ويداعىداي تياناقتانۋىن ىلگەرىلەتىپ، الەمدىك ەكونوميكانى باسقارۋ جۇيەسىنىڭ اناعۇرلىم ءادىل دە ۇيلەسىمدى، جالپىعا ءتيىمدى ءارى بىرگە يگىلىككە كەنەلەتىن بەتالىسقا قاراي دامۋىن ىلگەرىلەتىپ، ادامزاتتىڭ تاعدىرلاس ورتاق تۇلعاسىن قۇرىپ، ەكى ەلدىڭ دامۋىنا پارمەندى قامتاماسىزدىق ازىرلەپ، دۇنيە ءجۇزىنىڭ بەيبىتشىلىگى، ورنىقتىلىعى جانە بىرگە گۇلدەنىپ - كوركەيۋى ءۇشىن اناعۇرلىم كوپ ۇلەس قوسۋدى قالايدى.
شاھباز مىنالاردى ءبىلدىردى: بەلەستىك مانگە يە جۇڭگو كوممۋنيستىك پارتياسىنىڭ 20 - قۇرىلتايى ءساتتى اشىلعاننان كەيىن، العاشقى توپتا ۇسىنىسپەن جۇڭگوعا ساپارلاي كەلگەن شەتەل باسشىلارىنىڭ ءبىرى بولعانىمدى ەرەكشە باقىت سەزىنەمىن، بۇل جۇڭگو مەن پاكيستان اراسىنداعى قويۋ اينىماس دوستىق سۇيىسپەنشىلىكتى تولىق ايگىلەدى. مەن پاكيستان ۇكىمەتى جانە حالقى اتىنان ءتوراعا شي جينپيڭنىڭ جۇڭگو كوممۋنيستىك پارتياسىنىڭ باس شۋجيى بولىپ جالعاستى سايلانعاندىعىن قىزۋ قۇتتىقتايمىن. وتكەن 10 جىلدان بەرى ءتوراعا شي جينپيڭنىڭ دانىشپان باسشىلىعىندا، جۇڭگو ءداۋىر كەرەمەتى اتالعان ۇلى دامۋ تابىستارىنا قول جەتكىزدى ءارى حالىقارادا كوپ جاقتىلىققا تاباندى بولىپ، ىنتىماق پەن سەلبەستىكتى ىلگەرىلەتىپ، دۇنيە ءجۇزىنىڭ بەيبىتشىلىگى مەن دامۋىن قورعاۋ ءۇشىن ماڭىزدى ۇلەس قوسىپ، جاۋاپكەرشىلىك ارقالايتىن ءىرى ەلدىك كەلبەتتى تولىق ايگىلەدى. دۇنيە ءجۇزى جۇڭگودان ايرىلا المايدى، ەشقانداي كۇش جۇڭگونىڭ دامۋىن وقشاۋلاي المايدى، شاۋجايلاي المايدى. ءتوراعا شي جينپيڭنىڭ كورەگەندىگى مەن سۇڭعىلالىعى جۇڭگونىڭ اناعۇرلىم شۇعىلالى تابىسقا جەتۋىنە ۇزدىكسىز باسشىلىق ەتىپ قالماستان، دۇنيە ءجۇزىن دە اناعۇرلىم نۇرلى بولاشاققا قاراي بەت الۋعا باستايتىندىعىنا سەنەمىن.
شاھباز مىنالاردى ءبىلدىردى: پاكيستان مەن جۇڭگونىڭ بارلىق جاعدايدا بىردەي ستراتەگيالىق سەلبەستىك سەرىكتەستىك قارىم - قاتىناسىن تەرەڭدەتۋ − پاكيستاننىڭ ديپلوماتيا ساياساتىنىڭ ىرگە تاسى جانە قوعامداعى ءار سالانىڭ ورتاق تانىمى. جۇڭگو ۇكىمەتى مەن حالقىنىڭ پاكيستان جاقتىڭ جاڭا تيپتى ايدارشا ۆيرۋس وكپە قابىنۋ ىندەتىنە قارسى تۇرۋىنا قىمباتتى كومەك بەرگەندىگىنە، سونداي - اق پاكيستان ەرەكشە ۇلكەن تاسقىن اپاتىنا ۇشىراعاننان كەيىن جومارتتىقپەن كومەك بەرگەندىگىنە شىن جۇرەكتەن العىس ايتامىن. ەشقانداي ەل پاكيستان قاتارلى وركەندەپ كەلە جاتقان ەلدەرگە جۇڭگو سياقتى ادال نيەت، اق پەيىلمەن كومەكتەسىپ كورگەن جوق. پاكيستان جاق ءبىر جۇڭگو ساياساتىن باتىل ۇستانادى، جۇڭگو جاقتىڭ تايۋان، شينجياڭعا ساياتىن، شياڭگاڭعا ساياتىن، ت. ب وزەكتى مۇددە ماسەلەلەرىندەگى تۇرعىسىن باتىل قولدايدى، جۇڭگونىڭ ەل باسقارۋداعى تابىستى تاجىريبەلەرىنەن ۇيرەنىپ، ۇلگى الىپ، تاباندىلىقپەن ءوز كۇشىنە سۇيەنىپ ءومىر ءسۇرۋدى، سونىمەن بىرگە جۇڭگومەن ءار سالاداعى سەلبەستىكتى تەرەڭدەتىپ، سول ارقىلى وزىندىك دامۋدى اناعۇرلىم ويداعىداي جۇزەگە اسىرۋدى ءۇمىت ەتەدى، بۇل پاكيستاننىڭ بولاشاقتاعى العا باسۋ بەتالىسى جانە بىردەن - ءبىر تاڭداۋى بولىپ تابىلادى. جۇڭگو - پاكيستان ەكونوميكالىق ءدالىزى قۇرىلىسى پاكيستاننىڭ ەكونوميكالىق، قوعامدىق دامۋىنا تەرەڭ ىقپال جاسادى، پاكيستان جاق جۇڭگو جاقپەن بىرگە ”ءبىر بەلدەۋ، ءبىر جولدى“ جوعارى ساپالى بىرگە قۇرۋدى ۇزدىكسىز ىلگەرىلەتۋدى قالايدى، جۇڭگو جاقتىڭ 1 - ءنومىرلى تەمىر جول نەگىزگى جەلىسىنىڭ دارەجەسىن جوعارىلاتىپ جاڭالاۋ جانە كاراچي قالا اينالمالى تەمىر جولى سياقتى ماڭىزدى نەگىزدىك قۇرىلعى نىسانى قۇرىلىسىن ىلگەرىلەتۋدى زور كۇشپەن قولداۋىن ءۇمىت ەتەدى. پاكيستان جاق حاۋىپسىزدىكتى قورعاۋ شارالارىن ونان ارى كۇشەيتىپ، پاكيستانداعى جۇڭگو قۇرىلىمدارى مەن قىزمەتكەرلەرىنىڭ حاۋىپسىزدىگىن بار كۇشپەن قورعايدى. پاكيستان جاق ءتوراعا شي جينپيڭ العا قويعان الەمدىك دامۋ باستاماسى مەن الەمدىك حاۋىپسىزدىك باستاماسىن بار كۇشپەن قولدايدى، جۇڭگو جاقپەن بىرگە، حالىقارالىق، وڭىرلىك ىستەردەگى تىلدەسۋدى، سەلبەسۋدى كۇشەيتىپ، دۇنيە ءجۇزىنىڭ بەيبىتشىلىگى مەن دامۋىن قورعاۋعا بەلسەندى ۇلەس قوسۋدى قالايدى. پاكيستان مەن جۇڭگونىڭ دوستىعى مىزعىمايدى، پاكيستان جاق ماڭگى جۇڭگو جاقپەن تاباندىلىقپەن بىرگە تۇرادى.
كەڭەس اياقتاعاننان كەيىن، شي جينپيڭ حالىق سارايىنىڭ جينسى زالىندا شاھبازعا ارناپ قارسى الۋ قوناعاسىن وتكىزدى.
ۋاڭ ي، حى ليفىڭ قاتارلىلار جوعارىداعى قيمىلدارعا قاتىناستى.
