شينحۋا اگەنتتىگىنىڭ 11 - ايدىڭ 6 - كۇنى بەيجيڭنەن بەرگەن حابارى. 11 - ايدىڭ 6 - كۇنى مەملەكەت ءتوراعاسى شي جينپيڭ ماداگاسكاردىڭ زۇڭتۇڭى راجوەلينامەن ءوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعىن قۇتتىقتادى.
شي جينپيڭ بىلاي دەپ اتاپ كورسەتتى: ديپلوماتيالىق قارىم - قاتىناس ورناتقان 50 جىلدان بەرى، مەيلى حالىقارالىق جاعداي قالاي وزگەرسە دە، جۇڭگو مەن ماداگاسكاردىڭ قارىم - قاتىناسى باستان - اياق اقاۋسىز، ورنىقتى دامىدى. تاياۋ جىلداردان بەرى، ەكى ەل جان - جاقتى سەلبەستىك سەرىكتەستىك قارىم - قاتىناس ورناتىپ، ساياسي جاقتاعى ءوزارا سەنىمدىلىگى كۇن سايىن بەكەمدەلىپ، ءار سالاداعى اۋىس - كۇيىسى، سەلبەستىگى كورنەكتى ونىمدىلىككە قول جەتكىزدى. مەن جۇڭگو مەن ماداگاسكار قارىم - قاتىناسىنىڭ دامۋىنا ايرىقشا ءمان بەرەمىن، راجوەلينا زۇڭتۇڭمەن بىرگە قۇلشىنىپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعىن وراي ەتىپ، جۇڭگو مەن ماداگاسكاردىڭ دوستىق سەلبەستىك دەڭگەيىن ۇزدىكسىز جوعارىلاتىپ، ەكى ەل مەن ەكى ەل حالقىن باقىتقا كەنەلتۋدى قالايمىن.
راجوەلينا مىنالاردى ءبىلدىردى: ديپلوماتيالىق قارىم - قاتىناس ورناتقان جارتى عاسىردان بەرى، ماداگاسكار مەن جۇڭگونىڭ ءارقايسى سالاداعى دوستىق سەلبەستىگى ىشكەرىلەي دامىپ، سۇبەلى جەتىستىكتەرگە قول جەتكىزدى. شىنايى تاتۋ ءوتۋ، ءوزارا قۇرمەتتەۋ، ءوزارا سەنۋ، ءوزارا قولداۋ ماداگاسكار مەن جۇڭگونىڭ جان - جاقتى سەلبەستىك سەرىكتەستىك قارىم - قاتىناسىنىڭ كورنەكتى ەرەكشەلىگىنە اينالدى. ماداگاسكار جاق جۇڭگو جاقپەن بىرگە قۇلشىنىپ، ماداگاسكار مەن جۇڭگونىڭ اناعۇرلىم تىعىز تاعدىرلاس ورتاق تۇلعا قۇرۋىنا كۇش سالۋدى قالايدى.