3000نان استام اۆتوموبيلگە كومەك بەردى
شينجياڭ جوعارى قارقىندى تاس جولىنداعى بۇل قىزمەت وتەۋ اترەتى كەرەمەت ەكەن
□ انار بۇلت \ شينجياڭ گازەتىنىڭ ءتىلشىسى ۋاڭ جيڭجيڭ
11 - ايدىڭ 4 - كۇنى كەشتە ءبىر جۇك اۆتوموبيلى شوفەرىنەن كومەك سۇراعان تەلەفون كەلگەندە، شينجياڭ كۇشار − اقسۋ جوعارى قارقىندى تاس جولى يانتاققۇدىق قىزمەت وتەۋ اۋماعىنىڭ جاۋاپتىسى ليۋ حاۋ كەشكى اسىن ىشپەك بولىپ جاتىر ەدى. ”ونىڭ ماشيناسىنىڭ دوڭگەلەگى جارىلىپ قالىپتى. جۇرىڭدەر، الدىمەن بارىپ كومەكتەسەيىك“! دەگەن ول قىزمەت وتەۋ اۋماعىنىڭ اۆتوموبيلدەرگە كومەك بەرۋ جانە جوندەۋ بويىنشا قىزمەت وتەۋ اترەتىنىڭ مۇشەلەرىن باستاپ، قۇرال - سايماندارىن الىپ دەرەۋ جولعا شىقتى.
ىمىرت ۇيىرىلە قىزمەت وتەۋ اۋماعىنان 20 كيلومەتر كەلەتىن جەردەن ولار بوگەلىپ تۇرعان اۆتوموبيلدى تاپتى، ”وڭ جاق ارتقى دوڭگەلەگى جارىلىپ كەتىپتى، زاپاس دوڭگەلەك تە ىستەن شىققان ەكەن، مەن بىلەتىن اۆتوموبيل جوندەۋ دۇكەنىنىڭ جۇمىسى توقتاپ قالىپتى، جاقىن ماڭداعى قىزمەت وتەۋ اۋماعىنان كومەك سۇرايىن دەگەن وي ارتىنان بارىپ ءبىراق ەسىمە ءتۇستى“، - دەدى بوگەلىپ تۇرعان اۆتوموبيلدىڭ شوفەرى گاۋ ۇستاز، - قىزمەت وتەۋ اترەتىنىڭ بىرنەشە مۇشەسى دەرەۋ ماعان كومەكتەسىپ زاپاس دوڭگەلەكتى جاماپ، ونى اۋىستىرىپ سالىسىپ بەردى.
”قاراڭعى ءتۇن بولسا مىناۋ، كۇن دە سونداي سۋىق، ولارعا شىنىمەن ەرەكشە راقىمەت“. گاۋ ۇستازدىڭ ايتۋىنشا، ونىڭ اۆتوموبيلىنە شينجياڭنان شىعاتىن جاس جەمىس - جيدەكتەر تيەلىپتى، جولدا ءبىر كۇن ارتىق ايالداسا، شىعىن دا ءبىر ۇلەس كوپ بولاتىنى انىق. ول كومەك العان ءىستى جۇك اۆتوموبيلى شوفەرلارىنىڭ ۋيچات توبىنا جىبەرىپ، كوپشىلىككە جولدا قيىنشىلىق بولسا قىزمەت وتەۋ اۋماعىن ىزدەۋگە بولاتىنىن ايتتى.
ليۋ حاۋلاردىڭ اۆتوموبيلدەرگە كومەك بەرۋ جانە جوندەۋ بويىنشا قىزمەت وتەۋ اترەتىن شينجياڭ قاتىناسقا قارجى قوسۋ (توبى) شەكتى جاۋاپكەرشىلىك سەرىكتەستىگىنىڭ وسى رەتكى ىندەت كەزىندە قۇرعان، 100گە جۋىق ادامنان قۇرالعان بۇل قىزمەت وتەۋ اترەتى بۇكىل شينجياڭداعى 40تان استام قىزمەت وتەۋ اۋماعىنا تارالعان، 24 ساعات بويى بۇيرىق كۇتىپ دايىن وتىراتىن ولار ارلى - بەرلى وتكەن شوفەرلاردى ۋايىمنان ارىلتىپ، قيىنشىلىقتارىن شەشىپ بەرەدى.
”ماشينا جوندەۋدەن سىرت، شوفەرلار قانداي دا ءبىر شۇعىل جاعدايعا تاپ بولسا، ءبىز بار كۇشىمىزبەن كومەكتەسەمىز“. ليۋ حاۋدىڭ ايتۋىنشا، ءبىر اپتانىڭ الدىندا، حيلۇڭجياڭنىڭ كولىك ءنومىرىن تاققان ءبىر ۇلكەن جۇك اۆتوموبيلىنىڭ شوفەرى ولاردان كومەك سۇراپتى، جۇكتەردى دۇرىستاپ ءتىزىپ تيەمەۋدىڭ كەسىرىنەن، اۆتوموبيلدە كەز كەلگەن ۋاقىتتا قيسايىپ اۋناپ كەتۋ حاۋپى تۋىپ، ونان ارى جۇرە بەرۋگە شاراسىز قالعان ەكەن. باسىندا ايىرلى تيەگىش تاۋىپ جۇكتىڭ قيسايىپ تۇرعان بولىگىن يتەرىپ تۇزەمەكشى بولعان شوفەر ايىرلى تيەگىش تاۋىپ كەلگەندە بۇل امالدىڭ جارامايتىنىن بايقاعان. ”ءبىزدىڭ كومەك بەرۋ جانە جوندەۋ بويىنشا قىزمەت وتەۋ اترەتىمىز 3 ساعات ۋاقىت جۇمساپ، 100 داعارعا جۋىق جۇكتى جەرگە ءتۇسىرىپ، ونى قايتا دۇرىستاپ كولىككە تيەپ، تەكسەرىپ حاۋىپسىزدىك كىناراتى جوق ەكەندىگىنە كوز جەتكىزگەن سوڭ بارىپ ونى جوعارى قارقىندى جولعا شىعارىپ قويدىق“، - دەدى ليۋ حاۋ.
3 ايعا جۋىق ۋاقىتتان بەرى شينجياڭ قاتىناسقا قارجى قوسۋ (توبى) شەكتى جاۋاپكەرشىلىك سەرىكتەستىگى ءتۇرلى اۆتوموبيلدەردەن جالپى 3287سىن جوندەپ نەمەسە ولارعا كومەك بەرىپ، 80 مىڭنان استام ادامعا (رەت) قىزمەت وتەپ، قۇنى 200 مىڭ يۋاننان اساتىن ءتۇرلى تۇرمىستىق زاتتىق ماتەريالدار تاراتقان.
”جۇك اۆتوموبيلىنىڭ شوفەرلارى تاسىمال ءوندىرىسىنىڭ الدىڭعى شەبىنەن تاپجىلماي، قوعامدىق ءوندىرىس، تۇرمىستىڭ ءونىمدى اينالىمىن قامتاماسىز ەتۋ ءۇشىن ۇلەس قوسىپ جاتىر، ءبىز شوفەرلارعا قولىمىزدان كەلگەنشە قورعان بولىپ، جالعاستى ساپالى قىزمەت وتەپ، ىركىلىسسىزدىكتى قامتاماسىز ەتەمىز“، - دەدى شينجياڭ قاتىناسقا قارجى قوسۋ (توبى) شەكتى جاۋاپكەرشىلىك سەرىكتەستىگىنىڭ تيجارات باقىلاۋشىسى، تيجارات سەرىكتەستىگىنىڭ پارتكوم شۋجيى گاۋ فاڭسۇي.
