ءتىلشىنىڭ التاي ايماقتىق دەنساۋلىق ساقتاۋ، سالاماتتىق كوميتەتىنەن ۇعىسۋىنشا، التاي ايماقتىق جۇڭي شيپاحاناسى (التاي ايماقتىق قازاق شيپاگەرلىگى شيپاحاناسى)، شينجياڭ ۇيعۇر اۆتونوميالى رايوندىق ءدارى - دارمەك زەرتتەۋ ورنى (اۆتونوميالى رايوندىق قازاق شيپاگەرلىگى، ءدارى - دارمەكتەرىن زەرتتەۋ ورنى) شينجياڭ رۇڭچىڭ حاكى ءدارى جاساۋ شەكتى سەرىكتەستىگىمەن بىرلەسىپ زەرتتەپ جاساعان قازاق شيپاگەرلىگىندە قولدانىلاتىن قىزىمىق تۇيىرشىگى 2 - مەرزىمدىك كلينيكالىق زەرتتەۋ كەزەڭىنە وتكەن.
قىزىمىق تۇيىرشىگى − قازاق شيپاگەرلىگىنىڭ ءداستۇرلى رەتسەبى، ونىڭ باستى قۇرامى قازاق شيپاگەرلىگىندە ۇنەمى قولدانىلاتىن ءدارى ماتەريالدارى قارا جەمىستى كۇرەڭكەي، قۇمدىق كۇرەڭكەي قاتارلىلار، ىستەتكەن ءدارى ماتەريالدارى تۇگەلدەي التايدىڭ جەرگىلىكتى ەرەكشە جۇڭگوشا ءشوپ دارىلەرى، كىشى دارەت جاقسى كەلمەۋ، نەسەپ قىسۋ، نەسەپ شانشۋى، قۋىق تۇسى جانە بەل ومىرتقاسى تالۋ قاتارلى اۋرۋ بەلگىلەرىن ەمدەۋگە قولدانىلادى.
شينجياڭ رۇڭچىڭ حاكى ءدارى جاساۋ شەكتى سەرىكتەستىگىنىڭ باس جوراسى ديڭ رۇڭچىڭنىڭ تانىستىرۋىنشا، بۇل ءدارى 2019 - جىلدىڭ سوڭىندا مەملەكەتتىك ءدارى - دارمەك باقىلاۋ - باسقارۋ مەكەمەسىنىڭ قابىلداۋ حۇجات نومىرىنە يە بولعان، 2020 - جىلى مەملەكەتتىك ءدارى - دارمەك باقىلاۋ - باسقارۋ مەكەمەسىنىڭ ”كلينيكالىق تاجىريبە ۇقتىرۋىنا“ يە بولعان. شينجياڭ رۇڭچىڭ حاكى ءدارى جاساۋ شەكتى سەرىكتەستىگى 50 ميلليون يۋان قارجى قوسىپ، قىزىمىق تۇيىرشىگىنىڭ 2 - مەرزىمدىك، 3 - مەرزىمدىك كلينيكالىق زەرتتەۋىن ورىستەتۋدى جوسپارلاپ وتىر.
شينجياڭ رۇڭچىڭ حاكى ءدارى جاساۋ شەكتى سەرىكتەستىگىنىڭ قىزمەتكەرلەرى قىزىمىق تۇيىرشىگىنىڭ قاتىستى ساپا ولشەمىن تەكسەرۋدە. سۋرەتتى گو فىڭ تۇسىرگەن
ۇعىسۋعا قاراعاندا، بۇل سەرىكتەستىك العاش قۇرىلعان كەزدە التاي ايماقتىق جۇڭي شيپاحاناسىمەن (التاي ايماقتىق قازاق شيپاگەرلىك شيپاحاناسى) ۇزاق ۋاقىتتىق ستراتەگيالىق سەلبەستىك كەلىسىمىنە قول قويىپ، قازاق ءدارى - دارمەكتەرىن ساۋلەلەندىرۋدى، جالعاستىرۋدى، جاڭالىق اشا زەرتتەۋدى كاسىپورىننىڭ دامۋىنداعى وزەكتى كاسىپ ەتكەن. كوپ جىلداردان بەرى، بۇل كاسىپورىن شي - ان قاتىناس داشۋەسىمەن، جۇڭگو اۋىل شارۋاشىلىق عىلىم اكادەمياسىمەن، جۇڭگو شيپاگەرلىگى - دارىگەرلىگى وقۋ - اعارتۋ قوعامىمەن تىعىز سەلبەسىپ، شينجياڭداعى تۇڭعىش جۇڭگوشا ءشوپ ءدارى اكادەميك - ماماندار قىزمەت پۋنكتىن قۇرىپ، قازاق شيپاگەرلىگىندە ۇنەمى قولدانىلاتىن ءدارى ماتەريالدارىن بەيىمدەۋ، ءوسىرۋ جانە جاساندى جولمەن ەگۋ، ءدارى ماتەريالدارى ساپا ولشەمىن كەمەلدەندىرۋ جانە جوعارىلاتۋ، سونداي - اق قازاق ۇلتتىق شيپاگەرلىگى - دارىگەرلىگى ەمدەۋ قۇرىلىمدارىنىڭ جاساۋلى ءدارى - دارمەكتەرىن زەرتتەپ اشۋ جانە مەملەكەتتىك ءدارى - دارمەك بەكىتۋ ءنومىرىن الۋىنا كۇش سالدى.
التاي ايماعى كولەمىندە 2000 نان استام دارىلىك وسىمدىك بار، مۇنىڭ ىشىندە بۋپلەۋىر، ۋسويقى، كيەلى ەرمەن، قىزىل مارال، بۇعى ءشوپ قاتارلى 700دەن استام قازاق شيپاگەرلىگىندە ۇنەمى قولدانىلاتىن ءدارى ماتەريالدارى بار، مول وسىمدىك تۇرلەرى توبى شينجياڭنىڭ سولتۇستىگىندەگى وزگەشە دارىلىك وسىمدىكتەر بايلىعى قامباسىن قالىپتاستىردى. قازاق شيپاگەرلىگى - دارىگەرلىگى التاي ايماعىنىڭ ەرەكشە مەديتسينالىق بايلىعى سانالادى، قازىر 101 ءتۇرلى قازاق شيپاگەرلىگى بويىنشا دياگنوز قويۋ، ەمدەۋ تەحنيكاسى جانە 100 دەن استام قازاق شيپاگەرلىگى بايىرعى رەتسەبى، حالىقتىق رەتسەبى، تاجىريبە رەتسەبى، سونداي - اق 60 تۇردەن ارتىق قازاقى دەنساۋلىق ساقتاۋ بۇيىمدارى كلينيكالىق امالياتقا ەنگىزىلدى.
سوڭعى جىلدارى، جۇڭي ۇلتتىق شيپاگەرلىك ىستەرىن العا ىلگەرىلەتىپ، ءداستۇرلى قازاق شيپاگەرلىگى - دارىگەرلىگى ارقىلى ناۋقاستارعا تيىمدىلىك جاساۋ ءۇشىن، التاي ايماقتىق پارتكوم، اكىمشىلىك مەكەمەسى جۇڭي شيپاگەرلىگى - دارىگەرلىگىن دامىتۋ قىزمەتىنە وسكەلەڭ ءمان بەرىپ، جۇڭي شيپاگەرلىگى - دارىگەرلىگى قىزمەت وتەۋ جۇيەسىن ۇزدىكسىز كەمەلدەندىرىپ، جۇڭي شيپاگەرلىگى - دارىگەرلىگى قىزمەت وتەۋىنىڭ قول جەتىمدىلىگىن جوعارىلاتىپ، جۇڭي ءدارى - دارمەگى، ۇلتتىق ءدارى - دارمەكتەرى بايلىعىن رەتتەۋ، ەكىنشى رەت اشىپ، جەرگىلىكتى ءدارى ماتەريالدارى تۋرامالى كۇيىنىڭ ولشەمى سياقتىلاردى ارقاۋ ەتە وتىرىپ قىزمەت ورىستەتىپ، زەرتتەۋدى كۇشەيتىپ، جاڭا ءدارى - دارمەكتەردى زەرتتەۋ، اشۋ سەرپىنىن ارتتىرىپ، ءونىمى كورنەكتى، كلينيكالىق قۇنى جوعارى قازاق ءدارى - دارمەكتەرىن زەرتتەۋ، اشۋدى جانە كاسىپ سالالاندىرۋدى ىلگەرىلەتۋدى تەزدەتىپ، ۇلتتىق شيپاگەرلىك - دارىگەرلىككە تىڭ تىنىس جانە ومىرشەڭدىك كۇش سيلادى.
التاي ايماقتىق جۇڭي شيپاحاناسىنىڭ (التاي ايماقتىق قازاق شيپاگەرلىك شيپاحاناسى) ورىنباسار باستىعى، اعا شيپاگەر ميحۋا نيعىمەت قىزى بىلاي دەدى: 2011 ـ جىلى ”قىزىمىق تۇيىرشىگىنىڭ كلينيكادان بۇرىنعى زەرتتەلۋى جانە قارا جەمىستى كۇرەڭكەي ساپا ولشەمىن جاساۋدان“ قازىرگە دەيىن 10 جىلدان استام ۋاقىت ءوتتى، قازىر 1 - مەرزىمدىك كلينيكالىق زەرتتەۋ ءساتتى ورىندالدى.
”قىزىمىق تۇيىرشىگىن مەملەكەتتىك ءدارى - دارمەك بەكىتۋ نومىرىنە يە ءدارى - دارمەك ەتىپ زەرتتەۋ − اشۋ قازاق ۇلتتىق شيپاگەرلىگى - دارىگەرلىگىن جالعاستىرۋدا بەلەستىك مانگە يە“. ديڭ رۇڭچىڭنىڭ ايتۋىنا قاراعاندا، كاسىپورىن دامۋ ورايىن مىقتى يگەرىپ، ۇزبەي ءورىس اشا جاڭالىق جاراتىپ، ۇلتتىق شيپاگەرلىك - دارىگەرلىگىن زەرتتەۋ، اشۋ سەرپىنىن اناعۇرلىم ارتتىرا تۇسەدى ەكەن.
