حۋناننان شينجياڭعا كومەككە كەلگەن ەمدەۋ اترەتى:
تىعىز سايكەسىپ، ءومىردى قورعادى
□ انار بۇلت \ شينجياڭ گازەتىنىڭ ءتىلشىسى يە شياۋمين، ەرىكتى ءتىلشى لو شۋە - ى
شينجياڭ مەديتسينا داشۋەسىنە قاراستى 8 - شيپاحانادا حۋناننان شينجياڭعا كومەككە كەلگەن ەمدەۋ اترەتىنىڭ 5 كۇتىمدەۋ قىزمەتكەرىنەن جانە شينجياڭنىڭ جەرگىلىكتى 7 شيپاگەر - سەستراسىنان قۇرالعان ءبىر كۇتىمدەۋ اترەتى بار.
ءار كۇنگى قىزمەت بارىسىندا، گرۋپپا باستىعى ۋاڭ گوفي ناۋقاستار اۋماعىنداعى ناۋقاستاردىڭ جاعدايىن الدىن الا يەلەپ، ۋيشين توبىندا، كۇتىمدەۋ قىزمەتكەرلەرىن گرۋپپاعا ءبولىنىپ قىزمەت ىستەۋگە ۇيلەسىمدى ورنالاستىرادى ءارى ءارقايسى كەزەك، ءارقايسى گرۋپپانىڭ وزدەرى جاۋاپتى بولعان ناۋقاستارىنا قاتىستى كوڭىل بولۋگە ءتيىستى ىستەردى، جەكەلەردىڭ مىندەت - جاۋاپكەرشىلىكتەرىن قاداعالاي تاپسىرادى. ول قىزمەتتى ەگجەي - تەگجەيلى، جۇيەلى ورنالاستىرادى، قىزمەتتەن تۇسۋدەن ىلگەرى، ءاربىر گرۋپپا مۇشەسىنىڭ قىزمەت جاعدايىن تەكسەرىپ، ءاربىر گرۋپپانىڭ قىزمەتى جونىندە ۋيشين توبىندا قورىتىندى جاسايدى.
لۋ شينبيڭ، ليۋ تاۋ، ۋاڭ اۋ مىعىم كاسىپتىك شەبەرلىكتەرى ارقىلى، كۇتىمدەۋ گرۋپپاسىنداعى امبەباپ دارىندىلارعا اينالعان. ولار قان ءسۇزۋ جابدىعى، تىنىس الدىرۋ جابدىعى سياقتى ءتۇرلى جابدىقتاردى ىستەتۋگە شەبەر، ناۋقاستاردىڭ ەكپەتتەپ جاتىپ ەمدەلۋىنە تۋرا كەلگەندە، قىرپۋلى دا قارۋلى ولار جايسىزدانىپ تۇرعان ناۋقاستارعا بىرىنەن سوڭ - بىرىنە كومەكتەسەتىن.
بويىنىڭ بيىكتىگى ءبىر مەتر سەكسەن سانتيمەتر كەلەتىن ”2000 - جىلداردىڭ تۇلەگى“ ليۋ چي وسى گرۋپپاداعى جاسى ەڭ كىشىسى. ءار جولى اۋىر جۇمىس بولعاندا، ول قاشاندا ەڭ لاس، ەڭ اۋىر جۇمىستاردى ايەل كۇتىمدەۋ قىزمەتكەرلەرىنە ىستەتپەي، ءبىر ءوزى ۇستىنە الادى، 15 كيلوگرامدىق ۆەنا سۇيىقتىعى دورباسىن ءبىر ءوزى كوتەرە جونەلەتىن، ناۋقاستاردىڭ اۋرۋ جاعدايىندا وزگەرىس تۋىلعاندا، ۇنەمى كەۋدە كەرە العا شىعىپ، ”وقاسى جوق، مەن ىستەيىن“ دەگەندى ۇنەمى ايتاتىن. كەيدە، كوپشىلىكتىڭ مۇرساسى تيمەگەندە، ناۋقاستاردى كۇتىمدەۋ مىندەتىن كوبىرەك ۇستىنە الاتىن.
جاۋ شيۋلي ءىستى ىجداعاتپەن ىستەيدى، ناۋقاستاردى ەمدەۋگە ىستەتىلەتىن ەمدىك ناسوس - تۇتىكتەر وتە كوپ بولعان كەزدەرى، كوبىنەسە، بىرىنە - ءبىرى شىرمالىپ قالادى، مۇندايدا ول دەن قويا ىڭعايلاپ، جونىنە كەلتىرىپ، ءتۇرلى رەڭدەرمەن بەلگى سالىپ، ءبولىپ قويادى، ناۋقاستارعا جان اشىر - جاقىنىنداي مامىلە جاسايدى. ءبىر جولى، ءبىر ناۋقاس ءوزىنىڭ اۋرۋىنان الاڭداپ، تاماقتى جاقسى جەمەي قويعاندا، جاۋ شيۋلي وعان سابىرلىلىقپەن اقىل ايتىپ، بار امالىن سالىپ ونىڭ كوڭىلىن جۇباتادى، ناۋقاس جادىراپ، تۇسكى تاماعىن تاۋىسىپ جەگەننەن كەيىن بارىپ جانىنان كەتەدى.
قىزمەتتەن تۇسەردە كۇتىمدەۋ قىزمەتكەرلەرى اترەتىنىڭ قىزمەتى بىتپەسە، كوپشىلىك جابال كومەكتەسىپ، بىرگە قىزمەتتەن تۇسۋگە مۇمكىندىك جاسايدى. قىزمەتتەن تۇسكەننەن كەيىن، كۇتىمدەۋ قىزمەتكەرلەرى اترەتىنىڭ ۋيشين توبىندا كوپشىلىك سول كۇنگى قىزمەتتە تۋىلعان − تىنىس تۇتىكشەسىن سالعاندا قاقىرىقتى شىعارۋ، ەكپەتتەپ جاتقان ناۋقاستىڭ تۇتىكشەلەرىن ۇيلەسىمدى ورنالاستىرۋ سياقتى ماسەلەلەردى جانە ونى ءبىر جاقتى ەتۋ ادىستەرىن تالقىلاپ جاتادى. ولار تاعى شينجياڭنىڭ ءدامدى تاعامدارى، حۋناننىڭ ءدامدى قۇزىرى، شينجياڭنىڭ قاناس كولى، حۋناننىڭ جۇيزى جوۋتوۋى سياقتىلاردى دا اڭگىمەگە تيەك ەتىسەدى.
”ءبىز كاسىپتىك بىلىمدەردى ءوزارا ۇيرەنىپ، ناۋقاستاردىڭ ەرتەرەك ساۋىعۋىنا مۇمكىندىك جاساۋدى تىلەيمىز“، - دەدى كۇتىمدەۋ قىزمەتكەرلەرى اترەتىنىڭ مۇشەسى ميھراي تۇردى.
