انار بۇلت \ شينجياڭ گازەتىنىڭ ءتىلشىسى ليۋ ي 11 - ايدىڭ 10 - كۇنى ۇرىمجىدەن حابارلايدى. اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسىنەن ۇعىسۋىمىزشا، بيىل بۇكىل رايوندا (جەرگىلىكتى ورىن) كوكونىس ەگىلگەن جەر اۋدانى 3 ميلليون 940 مىڭ مۋعا جەتكەن، مۇندا، ۇلكەن بايساي، ءسابىز، شامعۇر سياقتى قىستا ساقتايتىن كوكونىس ەگىلگەن جەر اۋدانى ءبىر ميلليون 50 مىڭ مۋ اينالاسىنا جەتىپ، جوسپارداعى كولەمنەن 200 مىڭ مۋدان استام ارتقان. تۇتاس رايوندا كوكونىسپەن، اسىرەسە، كۇز، قىس ماۋسىمدارىنداعى كوكونىسپەن قامداۋدى قامتاماسىز ەتۋ قۋاتى اناعۇرلىم جوعارىلاعان.
سوڭعى مەزگىلدە توعىزتاراۋ اۋدانى ءدوڭمالى قالاشىعى ويتام قىستاعىندا ەگىلگەن سارىمساق ىركەس - تىركەس پىستى، جەرگىلىكتى ورىنداعى شارۋالار سارىمساقتى جەدەل قازىپ الىپ، قىس ماۋسىمىندا توڭ جۇرۋدەن بۇرىن جيناۋ قىزمەتىن ورىنداپ بولۋعا قۇلشىندى. ساۋان قالاسى داچۋان اۋىلى داچۋان قىستاعىنىڭ قۇرىلعىلى اۋىل شارۋاشىلىعى ءوندىرىس بازاسىنداعى كوكونىس جىلىجايىندا قىزاناق، ساڭىراۋقۇلاق، قىزىل بۇرىش سياقتى كوكونىستەردىڭ ءوسۋ جاعدايى جاقسى، جەرگىلىكتى ورىنداعى كوپتەگەن تاراۋلار بىرلەسە ارەكەتتەنىپ، جاسىل ارنا اشىپ، ءوندىرۋ، ساتۋ بۋىندارىن بەلسەنە ۇشتاستىرىپ، كوكونىستىڭ دەر كەزىندە بۇقارانىڭ داستارقانىنا جەتۋىن قامتاماسىز ەتتى.
بيىل جىل باسىنان بەرى، رايونىمىزداعى ءار دارەجەلى اۋىل شارۋاشىلىعى، اۋىل - قىستاق تاراۋلارى ءونىمدى شارا قولدانىپ، ”كوجە قاتىقپەن“ قامداۋدى قامتاماسىز ەتۋ قۋاتىن ۇزدىكسىز جوعارىلاتىپ، اتىزداعى كوكونىستى، سۋدى، تىڭايتقىشتى باسقارۋدى جانە دەرت - دەربەزدەن، زياندى جاندىكتەردەن ساقتانۋ، سونداي - اق ونى جويۋدى ويداعىداي يگەرىپ، ءوندىرۋ مەن ساتۋدى ۇشتاستىرۋدى كۇشەيتىپ، ءتۇرلى كوكونىستەردى دەر كەزىندە جيناپ الىپ، بازارعا شىعارۋعا شىنايى كەپىلدىك ەتتى، اسىرەسە، كۇزگى اۋىل شارۋاشىلىعى ءوندىرىسى بارىسىندا جەر - جەر ۋاقىتتى ۇتىپ، قايتالاي كوكونىس ەگۋدەگى تەرەزەلىك شەكتى مەرزىمنەن پايدالانىپ، ەگۋ تەبىنىن ارتتىردى، ءبيداي ورىپ الىنعان اتىزداردان جانە اۋلاداعى بوس جەرلەردەن تولىق، ويداعىداي پايدالاندى، شارۋالاردى قىستا ساقتايتىن كوكونىستەردى ەگۋگە بەلسەنە جەتەكتەپ، قىس جانە كوكتەمدە كوكونىسپەن ءوزىن - ءوزى قامداۋ قۋاتىن جوعارىلاتتى. كوكونىس ەگۋ (قالامشا وتىرعىزۋ)، ءونىم الۋ سياقتى ەگىس ۋاقىتىنىڭ شەشۋشى مەزگىلىندە كاسىپتىك تەحنيكالىق قىزمەتكەرلەردى ءوندىرىستىڭ الدىڭعى شەبىنە بارىپ تەحنيكالىق قىزمەت وتەۋگە ۇيىمداستىرىپ، كوكونىستىڭ ورنىقتى ءونىم بەرۋىنە، ءونىمدى ارتتىرۋعا شىنايى كەپىلدىك ەتتى.
قىس ماۋسىمىنداعى كوكونىس ءوندىرىس قۋاتىن اناعۇرلىم جوعارىلاتۋ ءۇشىن، سوڭعى جىلدارى بۇكىل رايون وڭتۇستىك شينجياڭ ءوڭىرىنىڭ كۇن نۇرى، جىلۋ بايلىعى باسىمدىعىنا سۇيەنە وتىرىپ، قۇرىلعىلى كوكونىس كاسىپ سالاسىن جەدەل دامىتتى. قازىر بۇكىل رايوندا قۇرىلعىلى كوكونىس تۇرلەرى 10نان استى. رايونىمىز جيىنى اۋدان دارەجەلى 30 زەردەلى قالامشا جەتىلدىرۋ ورتالىعىن، اۋىل دارەجەلى 120 قالامشا جەتىلدىرۋ سەحىن تىڭنان سالىپ، اۋدان، اۋىل ەكى دارەجە ءوزارا ۇشتاسقان، كەمەلدى، سايكەستى كوكونىس قالامشاسىن جەتىلدىرۋ جۇيەسىن بىرتىندەپ قۇرىپ، قۇرىلعىلى كوكونىس كاسىپ سالاسىن دامىتۋعا اناعۇرلىم بەرىك نەگىز قالاۋعا شىنايى كەپىلدىك ەتتى.
