انار بۇلت \ شينجياڭ گازەتىنىڭ ءتىلشىسى لۋ فىڭباۋ 11 - ايدىڭ 11 - كۇنى ۇرىمجىدەن حابارلايدى. جۇڭگو تەمىر جولى ءۇرىمجى مەكەمەسى توبى شەكتى سەرىكتەستىگىنەن ۇعىسۋىمىزشا، 1 - ايدان 10 - ايعا دەيىن الاتاۋ تەمىر جول شەكارا وتكەلى ارقىلى شەكارادان كىرىپ - شىققان جۇڭگو - ەۆروپا (ورتا ازيا) كەزەكشى پويەزدارى 5193 كەزەككە جەتىپ، سايكەس مەزگىلدەگىدەن ％7 ارتقان.
بيىل جىل باسىنان بەرى جۇڭگو - ەۆروپا (ورتا ازيا) كەزەكشى پويەزدارى اۋە تاسىمالىنىڭ، تەڭىز تاسىمالىنىڭ ءبىر ءبولىم جۇك قاينارىن تاسۋ مىندەتىن ۇستىنە العاندىقتان، كەزەكشى پويەزداردىڭ جۇرگىزىلۋى ءتيىمسىز جاعدايدا ارتتى. ەل ىشىندەگى جەر - جەر جۇڭگو - ەۆروپا (ورتا زيا) كەزەكشى پويەزدارى سىندى ماڭىزدى دانەكەردەن تولىق پايدالانىپ، كەزەكشى پويەزداردى جۇرگىزۋ ۇلگىسىن جاڭالاپ، كەزەكشى پويەزداردى جۇرگىزۋ كولەمىن كەڭەيتىپ، كەزەكشى پويەزداردىڭ جۇرگىزىلۋ سانىن ۇزدىكسىز ارتتىردى. جۇڭگو - ەۆروپا (ورتا ازيا) كەزەكشى پويەزدارىنىڭ باتىسقا بەت الۋىنداعى ماڭىزدى وتكەلدىڭ ءبىرى رەتىندە، الاتاۋ شەكارا وتكەلى ارقىلى شەكارادان كىرىپ - شىعاتىن كەزەكشى پويەزداردىڭ ارتۋ قارقىنى ءبىرشاما تەز بولدى.
”ءبىز سىرتتان كىرۋدەن ساقتانۋدى، ءوندىرىس حاۋىپسىزدىگىن جاقسى ىستەۋ العى شارتىندا، تاسىمالعا ۇيىمداستىرۋدى ۇزدىكسىز ساپالىلاندىرىپ، دالمە - ءدال ورنالاستىرىپ، ءجون كورسەتىپ، ۆوگزال، الاڭ، جەلىلەرىنەن ۇيلەسىمدى پايدالانىپ، كەزەكشى پويەزداردىڭ اۋىستىرىپ تيەۋ، قابىلداۋ - جونەلتۋ جۇمىستارىن بىركەلكى ۇيىمداستىرىپ، جۇڭگو - ەۆروپا (ورتا ازيا) كەزەكشى پويەزدارى جولىنىڭ حاۋىپسىز، جوعارى ءونىمدى، ىركىلىسسىز بولۋىنا شىنايى كەپىلدىك ەتتىك“، - دەدى الاتاۋ ۆوگزالى جۇمىس جۇرگىزۋدى باسقارۋ ءبولىمىنىڭ باستىعى يان حۋاپىڭ.
الاتاۋ ۆوگزالى قايتالامالى پويەز تاسىمالىن ۇيىمداستىرۋدى جانە ءار كۇنگى ءوندىرىس جوسپارىن ورىنداۋدى كوزدەپ، ارالىق تاسىمال قۋاتىن تولىق اشىپ - پايدالانىپ، بەلەت شىعارۋ، جەتكىزۋ جانە اۋىستىرىپ تيەۋ ۋاقىتىن قىسقارتىپ، ۆاگونداردى اينالىمعا سالۋدى جانە بوس ۆاگونداردى پايدالانۋدى جەدەلدەتىپ، كەدەنگە مالىمدەۋ بويىنشا تەكسەرۋ، ۆاگونداردى يكەمدى ورنالاستىرۋ، ۆاگونعا اۋىستىرىپ تيەۋ سياقتى بۋىنداردىڭ جىكسىز ءتۇيىلىسۋىن جۇزەگە اسىردى. سونىمەن بىرگە، جۇڭگو - قازاقستان تەمىر جولى ”سەنىمدى تۇتاسۋ“، ”سيفرلى شەكارا وتكەلى“ حالىقارالىق بىرلەسىپ تاسىمالداۋ قاعازسىز جۇيەسىنەن ويداعىداي پايدالانىپ، كەزەكشى پويەزدارعا ءبىر بەكەتتىك قىزمەت ازىرلەپ، كەزەكشى پويەزداردىڭ ءوتۋ ونىمدىلىگىن جوعارىلاتتى.
جۇڭگو - ەۆروپا (ورتا ازيا) كەزەكشى پويەزدارىنىڭ قارقىنىن ارتتىرىپ، ونىمدىلىگىن جوعارىلاتۋ ءۇشىن، الاتاۋ كەدەنى كەدەننەن وتكىزۋ راسمياتتارىن ۇزدىكسىز ىقشامداپ، قىزمەت وتەۋ ورەسىن ساپالىلاندىرىپ، ”تەمىر جولدا تەز وتكىزۋ“ سىندى جولداۋ ۇلگىسىن بەلسەنە جالپىلاستىرىپ، كەزەكشى پويەزداردىڭ كەدەننەن ءوتۋ ۋاقىتىن قىسقارتتى؛ قايتقان كەزەكشى پويەزدارعا قاراتا ”الدىن الا ۆاگون ءوتىنىش ەتۋ، جۇك جەتكىزىلگەن سوڭ دەرەۋ اۋىستىرۋ“ ءادىسىن جولعا قويىپ، كەزەكشى پويەزداردى تاسىمالعا ۇيىمداستىرۋ ۇلگىسىن ساپالىلاندىرۋعا دەم بەردى؛ جۇڭگو - ەۆروپا (ورتا ازيا) كەزەكشى پويەزدارى ارناۋلى تەرەزەسىن بەلگىلەپ، جاسىل وتكەل اشىپ، كىرىپ - شىعاتىن كەزەكشى پويەزداردىڭ جەدەل كەدەننەن ءوتۋىن جۇزەگە اسىردى.
قازىر الاتاۋ تەمىر جول شەكارا وتكەلىنەن وتەتىن كەزەكشى پويەزدار جەلىسى 91گە جەتىپ، 18 مەملەكەتكە باراتىن بولدى، تاسىمالداناتىن جۇك ءتۇرى 200دەن استى.
