شي جينپيڭ ازيا - تىنىق مۇحيت ەكونوميكالىق سەلبەستىك ۇيىمىنىڭ ونەركاسىپ - ساۋدا باسشىلارى ماجىلىسىندە جازباشا لەكسيا سويلەدى
جۇڭگونىڭ ازيا - تىنىق مۇحيت تاعدىرلاس ورتاق تۇلعاسىن قۇرۋدى تاباندىلىقپەن ىلگەرىلەتەتىندىگىن باسا دارىپتەدى
شينحۋا اگەنتتىگىنىڭ 11 - ايدىڭ 17 - كۇنى بانگكوگتان بەرگەن حابارى (تىلشىلەر ياڭ يجۇن، جاڭ چۇڭفاڭ). جەرگىلىكتى ۋاقىت 11 - ايدىڭ 17 - كۇنى تۇستەن كەيىن مەملەكەت ءتوراعاسى شي جينپيڭ ۇسىنىس بويىنشا بانگكوگتا وتكىزىلگەن ازيا - تىنىق مۇحيت ەكونوميكالىق سەلبەستىك ۇيىمىنىڭ ونەركاسىپ - ساۋدا باسشىلارى ماجىلىسىندە «اۋەلگى ماقساتتان اينىماي، دامۋدى بىرگە جەبەپ، ازيا - تىنىق مۇحيت سەلبەستىگىنىڭ تىڭ تاراۋىن اشايىق» دەگەن تاقىرىپتا جازباشا لەكسيا سويلەپ، جۇڭگونىڭ ازيا- تىنىق مۇحيت تاعدىرلاس ورتاق تۇلعاسىن قۇرۋدى تاباندىلىقپەن ىلگەرىلەتىپ، ازيا - تىنىق مۇحيت ءوڭىرىنىڭ ورنىقتىلىعى مەن گۇلدەنۋىنە اناعۇرلىم كوپ ۇلەس قوساتىندىعىن باسا دارىپتەدى.
شي جينپيڭ بىلاي دەپ اتاپ كورسەتتى: دۇنيە ءجۇزى تاعى دا جول ايىرىعىنا كەلدى. دۇنيە ءجۇزى قايدا بارادى؟ ازيا - تىنىق مۇحيت ءوڭىرى نە ىستەۋى قاجەت؟ ءبىز، ءسوز جوق، بۇعان جاۋاپ بەرۋىمىز كەرەك. وتكەن نەشە ون جىلدا ازيا - تىنىق مۇحيت ەكونوميكالىق سەلبەستىك ۇيىمىنا مۇشە ەلدەردىڭ ەكونوميكالىق دامۋى كەرەمەت تابىستارعا قول جەتكىزدى، ازيا - تىنىق مۇحيت ءوڭىرىنىڭ ەكونوميكالىق سەلبەستىگى وڭىرلىك دامۋعا قۋاتتى قوزعاۋشى كۇش ۇستەپ، حالىقتىڭ قۇت - ىرىسىن ءونىمدى جوعارىلاتتى. تاجىريبە اسا باعالى، اۋەلگى ماقساتتان اينىماۋ قاجەت.
بەيبىت دامۋ جولىمەن ءجۇرۋ كەرەك. قىرعي قاباق سوعىستىڭ تۇمانىنان ايىققاننان كەيىن، ازيا - تىنىق مۇحيت ءوڭىرى، اسىرەسە، ورتا، شاعىن ەكونوميكالىق تۇلعالار وسىزاماندانۋعا بەت العان جەدەل ارناعا قادام تاستادى، انە سوندىقتان عانا ”ازيا - تىنىق مۇحيت كەرەمەتى“ جارىققا شىقتى. ازيا - تىنىق مۇحيت ءوڭىرى الدە بىرەۋلەردىڭ ارتقى اۋلاسى ەمەس، ءىرى ەلدەردىڭ تەكە - تىرەس الاڭى بولماۋعا ءتيىس. ”جاڭا قىرعي قاباقتىق سوعىستىڭ“ وتىن كوسەمەك بولعان ءارقانداي قاسكۇنەمدىككە حالىق كونبەيدى، ءداۋىر جول بەرمەيدى!
اشىق، سيىسىمدى بولۋ جولىمەن ءجۇرۋ كەرەك. نەشە ون جىلدان بەرى ازيا - تىنىق مۇحيت ەكونوميكالىق سەلبەستىك ۇيىمى اشىق وڭىرشىلدىكتى ۇستانىپ، الۋان تۇرلىلىك، كەمسىتپەۋ پرينسيبىنە تاباندى بولىپ، سيىسىمدى، جالپىعا ءتيىمدى وڭىرلىك سەلبەستىك جۇلگەسىن قالىپتاستىردى. ءدال وسىنداي دارقاندىق پەن دەڭگەيدىڭ ارقاسىندا عانا، ازيا - تىنىق مۇحيت ءوڭىرى وڭىرلىك ەكونوميكانى ءبىر تۇلعالاندىرۋ جاعىندا ءداۋىردىڭ الدىڭعى لەگىنە ءوتتى. ازيا - تىنىق مۇحيت ءوڭىرىنىڭ ۇزاق ۋاقىتتان بەرى قالىپتاسقان كاسىپ سالاسى تىزبەگى مەن قامداۋ تىزبەگىنە توسقاۋىل قويۋ، ءتىپتى ونى ءۇزۋ ازيا - تىنىق مۇحيت ەكونوميكالىق سەلبەستىگىن تەك قانا تۇيىققا تىرەيدى.
قيىندىقتى تىزە قوسا جەڭۋ جولىمەن ءجۇرۋ كەرەك. ۇزاق ۋاقىتتان بەرى ازيا تىنىق مۇحيت ءوڭىرى تار جول، تايعاق كەشۋدەن بىرگە وتۋگە، ۋاقىتتىق قيىندىقتاردى بىرگە جەڭۋگە تاباندى بولىپ، سەلبەستىك بارىسىندا ورتاق تۇلعا تانىمىن قالىپتاستىرىپ، ۇزدىكسىز دامۋدى جۇزەگە اسىرۋدىڭ ۇلتاندى نەگىزىنە اينالدى. سەلبەستىكتى كۇشەيتىپ، ءوزارا قولداۋ كورسەتىپ، ءوزارا كومەكتەسىپ، ازيا تىنىق مۇحيت ءوڭىرى ەكونوميكاسىنىڭ دۇنيە ءجۇزى ەكونوميكاسى جاندانۋىنىڭ الدىڭعى لەگىندە ءجۇرۋىن ىلگەرىلەتۋ كەرەك.
شي جينپيڭ مىنالاردى باسا دارىپتەدى: جاڭا جاعدايدا، ءبىز تاريحي تاجىريبەلەر مەن ساباقتاردى قابىلداپ، ءداۋىر سايىسىنا ۇيلەسىپ، ازيا تىنىق مۇحيت ءوڭىرى ەكونوميكاسىنىڭ ءبىر تۇلعالانۋىن تاباندىلىقپەن ىلگەرىلەتىپ، دامۋدىڭ جاڭا جاعدايىن بىرگە اشىپ، ازيا - تىنىق مۇحيت ءوڭىرىنىڭ تاعدىرلاس ورتاق تۇلعاسىن قۇرۋىمىز كەرەك.
ءبىرىنشى، بەيبىت دامۋدىڭ نەگىزىن بەكەمدەۋ. بىرلەسكەن مەملەكەتتەر ۇيىمى ۋستاۆىنىڭ باس ماقساتى مەن پرينسيبىنە بويسۇنىپ، ورتاق، كەشەندى، سەلبەسەتىن، باياندى حاۋىپسىزدىك كوزقاراسىن ورناتىپ، قىرعي قاباقتىق سوعىس ويى مەن توپقا ءبولىنىپ قارسىلاسۋعا بىرگە قارسى تۇرىپ، ازيا - تىنىق مۇحيت ءوڭىرىنىڭ حاۋىپسىزدىك جۇلگەسىن ورناتۋ كەرەك.
ەكىنشى، حالىقتى وزەك ەتۋ ۇستانىمىنا تاباندى بولۋ. ەكونوميكانى دامىتۋ بارىسىندا حالىق تۇرمىسىن قامتاماسىز ەتۋگە ءمان بەرىپ، سيىسىمدى دامۋ ورتاسىن قالىپتاستىرۋ كەرەك. ازيا - تىنىق مۇحيت وڭىرىندەگى دامىعان ەكونوميكالىق تۇلعالار وركەندەپ كەلە جاتقان ەكونوميكالىق تۇلعالاردى بەلسەنە قولداپ، ىنتىماقتى، تەرەزەسى تەڭ، بىركەلكى، جالپىعا ءتيىمدى جاڭا سەرىكتەستىك قارىم - قاتىناس ورناتۋى كەرەك.
ءۇشىنشى، اناعۇرلىم جوعارى دەڭگەيدەگى ەسىك اشۋ ارناسىن قالىپتاستىرۋ. ازيا - تىنىق مۇحيت ەركىن ساۋدا رايونىنىڭ اياق الىسىن ىلگەرىلەتىپ، دۇنيە جۇزىلىك ساۋدا ۇيىمىنىڭ رەفورماسىنا جاپپاي، ىشكەرىلەي ات سالىسىپ، «وڭىرلىك جان - جاقتى ەكونوميكالىق سەرىكتەستىك قارىم - قاتىناس كەلىسىمىن»، «جان - جاقتى جانە العا باسقان تىنىق مۇحيت اتتاعان سەرىكتەستىك قارىم - قاتىناس كەلىسىمىن»، «سيفرلى ەكونوميكا سەرىكتەستىك قارىم - قاتىناس كەلىسىمىن» ءوزارا ۇشتاستىرۋدى ىلگەرىلەتىپ، اشىق ازيا - تىنىق مۇحيت ەكونوميكاسىن قۇرۋ كەرەك.
ءتورتىنشى، اناعۇرلىم جوعارى دەڭگەيدەگى ۇلاسۋدى - تۇتاسۋدى جۇزەگە اسىرۋ. ازيا - تىنىق مۇحيت ەكونوميكالىق سەلبەستىك ۇيىمىنىڭ ۇلاستىرۋ - تۇتاستىرۋ جوباسىن جەتەكشى ەتىپ، قاتتى بولشەكتەردى جالعاستىرۋدى، جۇمساق بولشەكتەردى ءتۇيىستىرۋدى، ادامداردىڭ بارىس - كەلىسىن تارتىپپەن ىلگەرىلەتۋ كەرەك. جۇڭگو ”ءبىر بەلدەۋ، ءبىر جولدى“ بىرگە قۇرۋدىڭ ءار جاقتىڭ دامۋ ستراتەگياسىمەن ۇشتاسۋىن بەلسەنە ىلگەرىلەتىپ، جوعارى ساپالى ازيا - تىنىق مۇحيت ۇلاسۋ - تۇتاسۋ تورىن بىرگە قۇرادى.
بەسىنشى، تۇراقتى، ىركىلىسسىز كاسىپ سالاسى تىزبەگى مەن قامداۋ تىزبەگىن قالىپتاستىرۋ. ەكونوميكالىق زاڭدىلىققا بويسۇنىپ، بازار پرينسيبىنە تاباندى بولىپ، ازيا - تىنىق مۇحيت ءوڭىرىنىڭ قولايلى، جوعارى ءونىمدى، حاۋىپسىز كاسىپ سالاسى تىزبەگىن، قامداۋ تىزبەگىن تۇلعالاۋ كەرەك. سىڭار جاقتىلىققا، قورعانىمپازدىققا بىرگە قارسى تۇرۋ كەرەك.
التىنشى، ەكونوميكانى ساپالىلاندىرۋدى، دارەجەسىن جوعارىلاتۋدى ىلگەرىلەتۋ. عىلىم - تەحنيكادا جاڭالىق اشۋ مەن تۇزىمدە جاڭالىق اشۋدى جەدەلدەتىپ، جاڭا ەكونوميكا، جاڭا كاسىپ كۇيى، جاڭا ساۋدا ۇلگىسىن جەتىلدىرىپ، ازيا - تىنىق مۇحيت ەكونوميكاسىنىڭ سيفرلانۋعا قاراي تيپ وزگەرتۋىن جۇزەگە اسىرۋ كەرەك. جاسىل، تومەن كومىر قىشقىل گازدى دامۋعا تاباندى بولىپ، جاسىل كاسىپ سالاسى مەن جاسىل فينانستى كەڭەيتىپ، ازيا - تىنىق مۇحيت ءوڭىرىنىڭ جاسىل سەلبەستىك ارناسىن جەدەل قالىپتاستىرۋ كەرەك.
شي جينپيڭ جۇڭگو ۇلگىسىندەگى وسىزامانداندىرۋدىڭ نەگىزگى ەرەكشەلىگى مەن ماندىك تالابىن ىشكەرىلەي بايىمداپ، بىلاي دەپ اتاپ كورسەتتى: جۇڭگوداعى ءبىر ميلليارد 400 ميلليوننان استام حالىقتىڭ وسىزاماندانۋدى جۇزەگە اسىرۋى ادامزاتتىڭ دامۋ تاريحىندا بۇرىن بولماعان ءىرى ءىس بولادى. جۇڭگو حالىقتى وزەك ەتۋگە تاباندى بولىپ، ورتاشا كىرىستى قاۋىمنىڭ الداعى 15 جىلدا 800 ميلليوننان اسۋىنا مۇمكىندىك جاساپ، اسا ۇلكەن كولەمدەگى بازاردىڭ ۇزدىكسىز دامۋىن ىلگەرىلەتەدى. جۇڭگو جالپى حالىقتىڭ بىرگە بايۋىن ۇزدىكسىز ىلگەرىلەتىپ، الەمدىك دامۋ سەلبەستىگىنە بايلىق ۇسىنىلىمىن ارتتىرىپ، الەمدىك دامۋ باستاماسىنىڭ تياناقتانۋىن ىلگەرىلەتىپ، الەمدىك دامۋدىڭ ورتاق تۇلعاسىن قۇرادى. جۇڭگو حالىقتىڭ زاتتىق تۇرمىس جانە رۋحاني تۇرمىس دەڭگەيىن ۇزدىكسىز جوعارىلاتىپ، بۇكىل ادامزاتقا ورتاق قۇندىلىقتاردى اسقاقتاتىپ، دۇنيە ءجۇزى وركەنيەتىنىڭ تەڭگەرىمدى، بەلسەندى، ىزگى بەتالىسقا قاراي دامۋىنا دەم بەرەدى. جۇڭگو ەكونوميكالىق، قوعامدىق دامۋدىڭ جاپپاي جاسىل تيپكە بۇرىلىس جاساۋىن جەبەپ، ادام مەن تابيعاتتىڭ تىرشىلىك ورتاق تۇلعاسىن بىرگە قۇرادى. جۇڭگو دۇنيە ءجۇزىنىڭ بەيبىتشىلىگى مەن دامۋىن تاباندىلىقپەن قورعاۋ بارىسىندا ءوزىن دامىتۋعا تالپىنادى، سونىمەن بىرگە ءوزىن دامىتۋ ارقىلى دۇنيە ءجۇزىنىڭ بەيبىتشىلىگى مەن دامۋىن اناعۇرلىم ويداعىداي قورعايدى.
شي جينپيڭ بىلاي دەپ باسا دارىپتەدى: جۇڭگونىڭ دامۋى ازيا - تىنىق مۇحيت ءوڭىرىنىڭ يگىلىگىن كوردى ءارى ءوزىنىڭ دامۋى ارقىلى ازيا - تىنىق مۇحيت وڭىرىنە قارىمجى قايتارىپ، ازيا - تىنىق مۇحيت ءوڭىرىن باقىتقا كەنەلتتى. جۇڭگو ازيا - تىنىق مۇحيت ءوڭىرىنىڭ تاعدىرلاس ورتاق تۇلعاسىن قۇرۋدى مىزعىماس تاباندىلىقپەن ىلگەرىلەتىپ، ازيا - تىنىق مۇحيت ءوڭىرىنىڭ ورنىقتىلىعى، گۇلدەنۋى ءۇشىن اناعۇرلىم كوپ ۇلەس قوسادى. ونەركاسىپ - ساۋدا سالاسىنداعى دوستاردىڭ ەكونوميكالىق سەلبەستىكتى بەلسەنە جەبەپ، جۇڭگونىڭ رەفورما جاساۋىنا، ەسىك اشۋىنا جانە وسىزامانداندىرۋ قۇرىلىسىنا بەلسەنە ات سالىسىپ، ازيا - تىنىق مۇحيت ءوڭىرىنىڭ جانە دۇنيە ءجۇزىنىڭ دامۋىنا، گۇلدەنۋىنە وڭ ەنەرگيا ارناۋىن ءۇمىت ەتەمىن.
