شينحۋا اگەنتتىگىنىڭ 11 - ايدىڭ 17 - كۇنى بانگكوگتان بەرگەن حابارى (تىلشىلەر گىڭ شۋەپىڭ، ماۋ پىڭفي). جەرگىلىكتى ۋاقىت 11 - ايدىڭ 17 - كۇنى تۇستەن كەيىن مەملەكەت ءتوراعاسى شي جينپيڭ تايلاندتىڭ بانگكوگىندا فيليپپيننىڭ زۇڭتۇڭى ماركوسپەن كەزدەستى.
شي جينپيڭ بىلاي دەپ اتاپ كورسەتتى: جۇڭگو جاق جۇڭگو مەن فيليپپين قارىم - قاتىناسىنا باستان - اياق ستراتەگيالىق بيىكتەن قاراپ كەلەدى. بيىل 5 - ايدا ءبىز تەلەفوندا سويلەسكەنىمىزدە، جاڭا داۋىردەگى جۇڭگو مەن فيليپپين قارىم - قاتىناسىنىڭ دامۋى جونىندە ءبىر قىدىرۋ ماڭىزدى ورتاق تانىمعا كەلدىك، ەكى جاق اۋىل شارۋاشىلىعى، نەگىزگى قۇرىلىس، ەنەرگيا، گۋمانيتارلىق ىستەر سىندى 4 ۇلكەن ءتۇيىندى سەلبەستىك سالاسىن تۇراقتاندىردى. ەكى جاق سەلبەستىكتىڭ جارقىن تۇيىندەرىن تۇلعالاپ، سەلبەستىك ساپاسىن جوعارىلاتىپ، ەكى ەل حالقىن باقىتقا كەنەلدىرۋ كەرەك. جۇڭگو جاق فيليپپين جاقپەن دوستىققا مۇراگەرلىك ەتىپ، سەلبەستىكتى جالعاستىرىپ، مەملەكەتتى دامىتۋعا، گۇلدەندىرۋگە بىرگە كۇش سالىپ، جۇڭگو مەن فيليپپين دوستىعىنىڭ جاڭا تاراۋىن جازۋدى قالايدى.
شي جينپيڭ بىلاي دەپ باسا دارىپتەدى: جۇڭگو جاق فيليپپين جاقپەن ۇنەمىلىك بايلانىستى ساقتاپ، قارسى تاراپىنىڭ ءجىتى قاداعالاپ وتىرعان ىستەرىمەن ۇزدىكسىز ساناسۋدى قالايدى. ەكى جاق ”ءبىر بەلدەۋ، ءبىر جول“ باستاماسى مەن فيليپپيننىڭ ”كوپتەپ قۇرۋ، جاقسى قۇرۋ“ جوباسىن ۇشتاستىرۋدى ۇزدىكسىز تەرەڭدەتىپ، داۆاۋ - سامال ۇلكەن كوپىرى نىسانىن ويداعىداي سالىپ، ”ەكى ەل، ەكى باقشا“ سەلبەستىگىن ورىستەتۋدى اقىلداسىپ، تازا ەنەرگيا، وقۋ - اعارتۋ، الەۋمەتتىك دەنساۋلىق ساقتاۋ سەلبەستىگىن كۇشەيتۋ كەرەك. جۇڭگو جاق فيليپپيننىڭ اناعۇرلىم كوپ ساپالى اۋىل شارۋاشىلىعى قوسىمشا ونىمدەرىن يمپورت ەتۋدى كەڭەيتۋدى قالايدى. ەكى جاق ناقتى شارالاردى كوپتەپ العا قويىپ، گۋمانيتارلىق اۋىس - كۇيىستى جيىلەتىپ، جۇڭگو مەن فيليپپين دوستىعىنىڭ حالىق تىلەگى نەگىزىن بەكەمدەۋ كەرەك. نانحاي تەڭىزى ماسەلەسىندە ەكى جاق دوستىق كەڭەسۋگە تاباندى بولىپ، الاۋىزدىقتى، تالاس - تارتىستى ۇيلەسىمدى ءبىر جاقتى ەتۋ كەرەك. جۇڭگو مەن فيليپپين ەكەۋى دە ازياداعى وركەندەپ كەلە جاتقان ەلدەر، سوندىقتان ستراتەگيالىق دەربەستىككە تاباندى بولىپ، بەيبىت، اشىق، سيىسىمدى بولۋعا تاباندى بولىپ، وڭىرلىك سەلبەستىكتىڭ ۇلكەن بەتالىسىن مەڭگەرىپ، سىڭار جاقتىلىق پەن زورەكەر ارەكەتتەرگە كۇش بىرىكتىرە قارسى تۇرىپ، ادىلدىكتى، تۋراشىلدىقتى بىرگە قورعاپ، ءوڭىردىڭ بەيبىتشىلىگىن، ورنىقتىلىعىن قورعاۋى كەرەك.
ماركوس مىنالاردى ءبىلدىردى: جۇڭگو كوممۋنيستىك پارتياسى 20 - قۇرىلتايىنىڭ تابىسپەن اشىلعاندىعىن تاعى ءبىر مارتە قۇتتىقتايمىن، ءتوراعا شي جينپيڭنىڭ جۇڭگو كوممۋنيستىك پارتياسى ورتالىق كوميتەتىنىڭ باس شۋجيى بولىپ جالعاستى سايلانعاندىعىن قۇتتىقتايمىن، بۇل جۇڭگونىڭ بولاشاق دامۋىنا ءتىپتى دە زور تۇراقتىلىق اكەلىپ قانا قويماي، وڭىرگە جانە بۇكىل دۇنيە جۇزىنە دە پايدالى. فيليپپين مەن جۇڭگونىڭ مىڭ جىلدىق دوستىق بارىس - كەلىس تاريحى بار، ديپلوماتيالىق قارىم - قاتىناس ورناتقاننان بەرى ەكى ەلدىڭ ءار سالاداعى سەلبەستىكتەرى ۇزدىكسىز ىلگەرىلەدى. جۇڭگو جاق فيليپپيننىڭ مەملەكەت قۇرىلىسىن قولداپ جانە كومەكتەسىپ، بۇل ءۇشىن ماڭىزدى ۇلەس قوستى، فيليپپين مەن جۇڭگونىڭ ءوزارا سەنىمى كۇن سايىن نىعايۋدا. فيليپپين جاق جۇڭگو جاقپەن بىرگە كومەسكى كۇشتەردى اشىپ، نەگىزدىك قۇرىلعىلار، ەنەرگيا، اۋىل شارۋاشىلىعى، گۋمانيتار سياقتى سالالارداعى سەلبەستىكتى كەڭەيتىپ، اناعۇرلىم تياناقتى ءارى بەرىك ەكى جاقتى قارىم - قاتىناستى سومداۋدى قالايدى. مەن تەڭىز ءۇستى ماسەلەسى ارقىلى جالپى فيليپپين - جۇڭگو قارىم - قاتىناسىنا انىقتاما بەرۋگە بولمايدى دەگەندى ەجەلدەن دارىپتەپ كەلەمىن، ەكى جاق وسى جونىندە تىلدەسۋدى اناعۇرلىم كۇشەيتۋىنە بولادى. فيليپپين جاق ءبىر جۇڭگو ساياساتىنا ۇزدىكسىز تاباندى بولادى، بەيبىتشىلىك پرينسيبىنە تاباندى بولادى، دەربەس، ءوز - وزىنە قوجايىن بولۋداي ديپلوماتياعا تاباندى بولادى، ءبىر تاراپتى تاڭداپ، سول جاقتا تۇرمايدى. فيليپپين جۇڭگو جاقپەن بەلسەندى تۇردە كەڭەسىپ، تەڭىزدە مۇناي - تابيعي گازدى بىرگە اشۋدى ىلگەرىلەتۋدى اقىلداسۋدى قالايدى.
ديڭ شۋەشياڭ، ۋاڭ ي، حى ليفىڭ قاتارلىلار كەزدەسۋگە قاتىناستى.
شينحۋا اگەنتتىگىنىڭ 11 - ايدىڭ 17 - كۇنى بانگكوگتان بەرگەن حابارى (تىلشىلەر جياڭ گوپىڭ، چىن جيان). جەرگىلىكتى ۋاقىت 11 - ايدىڭ 17 - كۇنى تۇستەن كەيىن، مەملەكەت ءتوراعاسى شي جينپيڭ بانگكوگتا سينگاپۋردىڭ زۇڭليى لي شيانلۇڭمەن كەزدەستى.
شي جينپيڭ بىلاي دەپ اتاپ كورسەتتى: عاسىرلىق ىندەت جانە 100 جىلدىق وزگەرىس الدىندا، جۇڭگو مەن سينگاپۋر قارىم - قاتىناسىنىڭ دامۋ ارىنى جاقسى بولدى، بۇل ەكى ەلدىڭ ىندەتكە قارسى اتتانۋىنا جانە ەكونوميكانىڭ جاندانۋىنا دەم بەرىپ قانا قويماي، ءوڭىردىڭ ورنىقتىلىعى مەن گۇلدەنۋىنە دە وڭ ەنەرگيا ۇستەدى. جۇڭگو مەن سينگاپۋر قارىم - قاتىناسىندا كورەگەندىك سيپات، ستراتەگيالىق سيپات جانە ۇلگىلىك سيپات بار. جۇڭگو كوممۋنيستىك پارتياسىنىڭ 20 - قۇرىلتايى جۇڭگونىڭ جاپپاي سوتسياليستىك وسىزاماندانعان مەملەكەت قۇرۋى، جۇڭگو ۇلگىسىندەگى وسىزامانداندىرۋدى جاپپاي ىلگەرىلەتۋى جونىندە ستراتەگيالىق ورنالاستىرۋ جاسادى. جۇڭگو جاق سينگاپۋر جاقپەن ەكى ەلدىڭ داۋىرمەن بىرگە العا باسقان جان - جاقتى سەلبەستىك سەرىكتەستىك قارىم - قاتىناسىنىڭ ۇزدىكسىز تىڭ ىلگەرىلەۋشىلىكتەرگە جەتۋىن تىزە قوسا ىلگەرىلەتۋدى قالايدى.
شي جينپيڭ بىلاي دەپ باسا دارىپتەدى: جۇڭگو جاق سينگاپۋر جاقپەن جوعارى جىكتەگىلەر بارىس - كەلىسىن جيىلەتۋدى قالايدى. سينگاپۋر جاقتىڭ جۇڭگونىڭ جاڭا دامۋ ارناسىن قالىپتاستىرۋىنا تەرەڭدەي ات سالىسۋىن قارسى الامىز، ”جوعارى ساپانى“ جۇڭگو مەن سينگاپۋر سەلبەستىگىنىڭ ايقىن بەلگىسىنە اينالدىرۋ كەرەك. ەكى جاق قۇرلىق، تەڭىز جاڭا ارناسى سىندى جۇڭگو مەن سينگاپۋردىڭ ”ءبىر بەلدەۋ، ءبىر جولدى“ جوعارى ساپامەن بىرگە قۇرۋىنداعى بەلگى سيپاتتى نىساندى ويداعىداي تياناقتاندىرىپ، سيفرلاندىرۋ، جاسىل دامۋ سىندى سالالارداعى سەلبەستىك نىساندارىن ساپالىلاندىرىپ، دارەجەسىن ءوسىرۋدى ىلگەرىلەتىپ، جۇڭگو − سينگاپۋر ەركىن ساۋدا كەلىسىمىنىڭ دارەجەسىن جوعارىلاتۋدىڭ سوڭعى كەلىسسوزدەرىن تەز ارادا ورىنداپ، ەكى ەلدىڭ ساۋدانى جانە قارجى قوسۋدى ەركىندەستىرۋ دەڭگەيىن جوعارىلاتىپ، ەكى ەل ادامدارىنىڭ بارىس - كەلىسىن ىركىلىسسىزدەندىرۋگە قۇلشىنۋ كەرەك. جۇڭگو مەن سينگاپۋر ەكى ەلدىڭ دامۋى وڭىرگە سۇيەنەدى، وڭىرمەن توعىسادى، ءوڭىردى يگىلىككە كەنەلتەدى. جۇڭگو جاق سينگاپۋر جاقپەن ءوڭىردىڭ ىنتىماعىن، سەلبەستىگىن بىرگە قورعاپ، توپشىلدىق ساياسيعا قارسى تۇرىپ، توپقا ءبولىنىپ قارسىلاسۋدى تەجەپ، ەكونوميكا مەن ءوڭىردىڭ ءبىر تۇلعالانۋىنىڭ دۇرىس بەتالىسىن قورعاپ، ”الشاقتاپ بايلانىستى ۇزۋگە“، ”شاعىن اۋلاسىنا بيىك داۋال“ سوعۋعا باتىل قارسى تۇرۋدى قالايدى. ەكى جاقتىڭ الەمدىك دامۋ باستاماسىنىڭ وسى وڭىردە تياناقتانۋىن بىرگە ىلگەرىلەتۋىن ءۇمىت ەتەمىن.
لي شيانلۇڭ مىنالاردى ءبىلدىردى: بەتپە - بەت كەزدەسىپ جۇڭگو كوممۋنيستىك پارتياسى 20 - قۇرىلتايىنىڭ تابىسپەن اشىلعاندىعىن تاعى ءبىر مارتە قۇتتىقتاعانىما، ءتوراعا شي جينپيڭنىڭ جۇڭگو كوممۋنيستىك پارتياسى ورتالىق كوميتەتىنىڭ باس شۋجيى بولىپ جالعاستى سايلانعاندىعىن قۇتتىقتاعانىما اسا قۋانىشتامىن. سينگاپۋر مەن جۇڭگونىڭ ەكى جاقتى سەلبەستىگىنىڭ ارىنى كۇشتى. قازىرگى كۇردەلى حالىقارالىق جاعدايدا سينگاپۋر جاق سينگاپۋر مەن جۇڭگو قارىم - قاتىناسىن ونان ارى تەرەڭدەتۋدى، كەڭەيتۋدى ءۇمىت ەتەدى، جۇڭگو جاقپەن بىرگە قازىرگى ەكى جاقتى سەلبەستىك مەحانيزمىن ۇزدىكسىز جاقسارتىپ، ەكى ەلدىڭ سۋجوۋ، تيانجين، چۇڭچيڭ سىندى 3 ۇكىمەت ارالىق نىسانىنىڭ جانە گۋاڭجوۋ ءبىلىم ورداسى مەملەكەت دارەجەلى نىسانىنىڭ (”3 + 1“) ساپاسىن جوعارىلاتىپ، دارەجەسىن ءوسىرۋدى ىلگەرىلەتۋدى قالايدى. جۇڭگونىڭ ەڭسە كوتەرۋى بوگەۋ بەرمەيدى، قۋاتتى، دوس جۇڭگو ءوڭىر مەن دۇنيە جۇزىنە بەلسەندى ىقپال جاسايدى، بۇل ورتا، شاعىن ەلدەرگە كومەكتەسىپ بىرگە دامۋدى جۇزەگە اسىرۋعا ءتيىمدى. سينگاپۋر جاق باستان - اياق جۇڭگونىڭ دامۋىنا بەلسەندى تۇرعىدا قارايدى، الەمدىك دامۋ باستاماسىن قولداۋدى، وعان ات سالىسۋدى قالايدى.
ديڭ شۋەشياڭ، ۋاڭ ي، حى ليفىڭ قاتارلىلار كەزدەسۋگە قاتىناستى.
شينحۋا اگەنتتىگىنىڭ 11 - ايدىڭ 17 - كۇنى بانگكوگتان بەرگەن حابارى (تىلشىلەر حاۋ ۋيۋي، ۋاڭ ياگۋاڭ). جەرگىلىكتى ۋاقىت 11 - ايدىڭ 17 - كۇنى تۇستەن كەيىن مەملەكەت ءتوراعاسى شي جينپيڭ بانگكوگتا جاپونيانىڭ باس ءۋازىرى انتيان ۋىنشيۇڭمەن كەزدەستى.
شي جينپيڭ بىلاي دەپ اتاپ كورسەتتى: بيىل جۇڭگو مەن جاپونيا ەكى جاق ديپلوماتيالىق قارىم - قاتىناستىڭ قالىپقا تۇسكەندىگىنىڭ 50 جىلدىعىن بىرگە ەسكە الدى. 50 جىلدان بەرى، ەكى جاق ىلگەرىندى - كەيىندى 4 ساياسي حۇجاتقا جانە ءبىر قىدىرۋ ماڭىزدى ورتاق تانىمعا كەلىسىپ، ءار سالاداعى اۋىس - كۇيىس پەن سەلبەستىك سۇبەلى جەمىس بەرىپ، ەكى ەل حالقىنا ماڭىزدى قۇت - ىرىس سيلادى، سونداي - اق ءوڭىردىڭ بەيبىتشىلىگىن، دامۋىن، گۇلدەنۋىن جەبەدى. جۇڭگو مەن جاپونيا ءوزارا جاقىن كورشىلەر، ەكەۋى دە ازيا مەن دۇنيە جۇزىندەگى ماڭىزدى مەملەكەت، كوپتەگەن ورتاق مۇددەگە جانە سەلبەستىك ورىسىنە يە. جۇڭگو - جاپونيا قارىم - قاتىناسىنىڭ ماڭىزدىلىعى وزگەرگەن جوق، وزگەرمەيدى دە. جۇڭگو جاق جاپونيا جاقپەن بىرگە ەكى ەل قارىم - قاتىناسىنىڭ جالپى بەتالىسىن ستراتەگيالىق تۇرعىدان ويداعىداي يگەرىپ، جاڭا ءداۋىر تالابىنا ساي كەلەتىن جۇڭگو - جاپونيا قارىم - قاتىناسىن ورناتۋدى قالايدى.
شي جينپيڭ بىلاي دەپ باسا دارىپتەدى: ەكى جاق ءوزارا شىنايىلىقپەن سيلاسىپ، سەنىمدىلىكپەن قارىم - قاتىناس جاساپ، جۇڭگو مەن جاپونيانىڭ 4 ساياسي حۇجاتىنىڭ پرينسيبىنەن اۋىتقىماي، تاريحي تاجىريبەلەردى قورىتىندىلاپ، قابىلداپ، ءبىر - ءبىرىنىڭ دامۋىنا وبيەكتيۆ، اقىلدىق تۇرعىدان قاراپ، ”ءبىر - بىرىنە سەلبەستىك سەرىكتەس بولاتىن، ءبىر - بىرىنە حاۋىپ توندىرمەيتىن“ ساياسي ورتاق تانىمدى ساياساتتا ايگىلەۋى كەرەك. تاريح، تايۋان سياقتى كەلەلى پرينسيپتىك ماسەلەلەر ەكى ەل قارىم - قاتىناسىنىڭ ساياسي نەگىزىنە جانە نەگىزگى سەنىم - ادامگەرشىلىگىنە سايادى، ءسوز جوق، ۋادەگە ادال، سەنىمگە بەرىك بولىپ، ۇيلەسىمدى ءبىر جاقتى ەتۋ كەرەك. جۇڭگو وزگە ەلدىڭ ىشكى ىسىنە كيلىكپەيدى، ءارقانداي ادامنىڭ ءارقانداي سىلتاۋمەن جۇڭگونىڭ ىشكى ىسىنە كيلىگۋىن دە قابىلدامايدى.
شي جينپيڭ بىلاي دەپ باسا دارىپتەدى: جۇڭگو - جاپونيا ەكى ەلدىڭ قوعامدىق ءتۇزىمى مەن مەملەكەت جاعدايى ۇقسامايدى، ەكى جاق ءوزارا قۇرمەت ەتىپ، سەنىمدىلىكتى ارتتىرىپ، كۇدىك - كۇماننان ارىلۋى كەرەك. تەڭىز - مۇحيت جانە تەرريتوريا داۋ - شارى ماسەلەسىندە قازىرگە دەيىن كەلىسىلگەن پرينسيپتىك ورتاق تانىمنان تايماي، ساياسي اقىل - پاراسات جانە جاۋاپكەرشىلىك ارقالاۋ ارقىلى الاۋىزدىقتاردى ۇيلەسىمدى تىزگىندەۋ كەرەك. ەكى جاق جاعراپيالىق جاقتان جاقىن، گۋمانيتارلىق جاقتان توعىسقان وزگەشە ابزالدىلىقتى ۇزدىكسىز ساۋلەلەندىرىپ، ۇكىمەت، ساياسي پارتيالار، پارلامەنتتەر، جەرگىلىكتى ورىندار سياقتى ءتۇرلى ارنالارمەن بارىس - كەلىس، اۋىس - كۇيىس جاساۋى، اسىرەسە، ۇزاق بولاشاقتى كوزدەي وتىرىپ، جاستار مەن ورەندەردىڭ اۋىس - كۇيىسىن بەلسەنە ورىستەتىپ، ءوزارا وبيەكتيۆ، بەلسەندى تانىم قالىپتاستىرىپ، حالىقتار تىلەگىنىڭ توعىسۋىن جەبەۋى كەرەك.
شي جينپيڭ بىلاي دەپ اتاپ كورسەتتى: ەكى ەل ەكونوميكاسىنىڭ ءوزارا يەك سۇيەۋ دارەجەسى وتە جوعارى، سيفرلى ەكونوميكا، جاسىل دامۋ، قازىنا - فينانس، ەمدەۋ - زەينەتكەرلىك، كاسىپ سالاسى تىزبەگىنىڭ، قامداۋ تىزبەگىنىڭ ورنىقتىلىعىن، ىركىلىسسىزدىگىن قورعاۋ سياقتى جاقتاردا تىلدەسۋدى، سەلبەستىكتى كۇشەيتىپ، اناعۇرلىم جوعارى دەڭگەيدە باسىمدىقتاردىڭ ءوزارا تولىقتاۋىن جانە ءوزارا پايدا جەتكىزىپ، تەڭ يگىلىككە كەنەلۋدى جۇزەگە اسىرۋ كەرەك. ەكى ەل وزدەرىنىڭ ۇزاق بولاشاقتىق مۇددەسى مەن وڭىرلىك ورتاق مۇددەلەرىن كوزدەي وتىرىپ، ستراتەگيالىق دەربەستىككە، تاتۋ كورشىلىككە، ىزگى كورشىلىككە تاباندى بولىپ، قاقتىعىس پەن قارسىلاسۋعا قارسى تۇرىپ، ناعىز كوپ جاقتىلىقتى امالياتتا ايگىلەپ، ءوڭىردىڭ ءبىر تۇلعالانۋ اياق الىسىن ىلگەرىلەتىپ، بىرگە ازيانى ويداعىداي دامىتىپ، ويداعىداي كوركەيتىپ، الەمدىك سىن - سايىستارعا ويداعىداي توتەپ بەرۋى كەرەك.
انتيان ۋىنشيۇڭ مىنالاردى ءبىلدىردى: بىلتىر 10 - ايدا ءبىز تەلەفوندا ءساتتى سويلەسىپ، جاڭا ءداۋىر تالابىنا ساي كەلەتىن جاپونيا − جۇڭگو قارىم - قاتىناسىن ورناتۋ جونىندە ءبىر اۋىزدىلىققا قول جەتكىزگەن ەدىك. قازىر ەكى ەلدىڭ ءار سالاداعى اۋىس - كۇيىسى مەن سەلبەستىگى بىرتىندەپ قالپىنا كەلۋدە. جاپونيا مەن جۇڭگو جاقىن كورشى رەتىندە، ءبىر - بىرىنە حاۋىپ توندىرمەيدى، بەيبىت قاتار تۇرۋدى قاجەت ەتەدى ءارى سولاي بولۋعا ءتيىس. جاپونيانىڭ دامۋى مەن گۇلدەنۋى جۇڭگودان قول ۇزە المايدى، كەرىسىنشە دە سولاي. جاپونيا جاق جۇڭگونىڭ ءوزىنىڭ دامۋى ارقىلى دۇنيە جۇزىنە بەلسەندى ۇلەس قوسۋىن قارسى الادى. جاپونيا - جۇڭگو سەلبەستىگى اسا زور كومەسكى كۇشكە يە، ەكى ەل ءوڭىردىڭ جانە دۇنيە ءجۇزىنىڭ بەيبىتشىلىگى مەن گۇلدەنۋى جونىنەن ماڭىزدى جاۋاپكەرشىلىك ارقالايدى، جاپونيا جاق جۇڭگو جاقپەن بىرگە قۇلشىنىپ، جاپونيا - جۇڭگو قارىم - قاتىناسىنىڭ اقاۋسىز، ورنىقتى دامۋىن جۇزەگە اسىرۋدى قالايدى. تايۋان ماسەلەسىندە جاپونيا جاقتىڭ جاپونيا - جۇڭگو بىرلەسكەن مالىمدەمەسىندە بەرگەن ۋادەسىندە تيتتەي دە وزگەرىس بولعان جوق. مەن جۇڭگو جاقپەن كەڭەسۋدى، تىلدەسۋدى كۇشەيتىپ، جاپونيا - جۇڭگو قارىم - قاتىناسىنىڭ دۇرىس بەتالىسىنا بىرگە جەتەكشىلىك ەتۋدى قالايمىن.
ەكى جاق جوعارى جىكتەگىلەردىڭ بارىس - كەلىسىن جانە كەڭەسۋىن، تىلدەسۋىن ساقتاپ، ساياسي ءوزارا سەنىمدىلىكتى ارتتىرىپ، ناقتى سەلبەستىكتى ىلگەرىلەتىپ، گۋمانيتارلىق اۋىس - كۇيىستى كەڭەيتىپ، حالىقارالىق، وڭىرلىك ىستەردەگى سايكەسۋدى، سەلبەسۋدى كۇشەيتىپ، جاڭا ءداۋىر تالابىنا ساي كەلەتىن ورنىقتى جانە سىندارلى جۇڭگو - جاپونيا قارىم - قاتىناسىن ورناتۋعا بىرگە كۇش سالۋعا ءبىر اۋىزدان قوسىلدى.
ديڭ شۋەشياڭ، ۋاڭ ي، حى ليفىڭ قاتارلىلار كەزدەسۋگە قاتىناستى.
