مال شارۋاشىلىق قىستاعىنداعى جاڭا وزگەرىستەر
□ انار بۇلت \ شينجياڭ گازەتىنىڭ ءتىلشىسى بارشا تەگىس
رەداكتوردان
پارتيا 20 - قۇرىلتايى رۋحىنىڭ نەگىزگى ساتىعا جەتۋىن، بۇقاراعا جەتۋىن ىشكەرىلەي ىلگەرىلەتىپ، پارتيا بەكىمىن، حالىق تىلەگىن، جىگەرلەنە ەكپىندەي ىلگەرىلەۋ كۇشىن اناعۇرلىم ۇيىستىرۋ ءۇشىن، انار بۇلت \ شينجياڭ گازەتى جالپىلىق مەديا تىلشىلىك توبى قالالار مەن اۋىلداردى، الەۋمەتتىك اۋماقتاردى، ورگانداردى، كاسىپورىن - ءىسورىندارىن، مەكتەپتەردى، ءتۇرلى جاڭا ەكونوميكالىق ۇيىمدار مەن جاڭا قوعامدىق ۇيىمداردى ارالاپ تۇيىندە تۇرىپ تىلشىلىك ىستەپ، جەر - جەردىڭ، تاراۋلاردىڭ پارتيا 20 - قۇرىلتايىنىڭ رۋحىمەن وي - سانانى قارۋلاندىرۋداعى، امالياتقا جەتەكشىلىك ەتۋدەگى، قىزمەتتەردى ىلگەرىلەتۋدەگى ناقتى شارالارى مەن ءىس جۇزىندىك ارەكەتتەرىن، نەگىزگى ساتىداعى كادرلار مەن بۇقارانىڭ پارتيا 20 - قۇرىلتايىنىڭ رۋحىن ۇيرەنۋدەگى، دايەكتىلەندىرۋدەگى تيپتىك ادىستەرى مەن تاماشا بەت - بەينەلەرىن ىشكەرىلەي ۇگىتتەپ، ءار ۇلت كادرلارى مەن بۇقاراسى جاپپاي سوتسياليستىك وسىزاماندانعان مەملەكەت قۇرۋدىڭ جاڭا جورىعىندا كورىكتى شينجياڭ قۇرۋعا قۇلشىنعان جالىندى كورىنىستى ايگىلەيدى. بۇگىننەن باستاپ گازەتىمىز ”جاڭا ءداۋىر، جاڭا جورىق، جاڭا ۇلى ءىس“ ارناۋلى ايدارىن اشىپ، قاتىستى حابارلاردى جالعاستىرىپ بەرەدى، نازارلارىڭىزدا بولسىن.
11 - ايدىڭ 19 - كۇنى قۇلجا قالا اۋماعىنان كولىكپەن جولعا شىعىپ، جارتى ساعاتتاي جۇرگەنىمىزدە كەڭ كوسىلگەن تاۋ اڭعارى كوزگە ۇشىراستى، تاۋ بۇلاعىنىڭ ەكى جاعىنا نۋ بولىپ جابايى الما اعاشى ءوسىپتى. بۇل جەر قۇلجا قالاسى بايانداي قالاشىعى سۋلى الماتى قىستاعى. سۋلى الماتى قىستاعىنا كىرگەنىمىزدە، قىستاق تۇرعىندار كوميتەتىنىڭ جانىنداعى قۇرىلىس ورنىندا جەر قازۋ ماشيناسىن، سەمەنت ارالاستىرعىش ماشينانى جۇرگىزىپ جۇمىسشىلار قاربالاس جۇمىس ىستەپ جاتىر ەكەن. ”بۇل قىستاعىمىزدىڭ ساياحات كاسىبىمەن ۇشتاستىرىپ سالىپ جاتقان كەشەندى قىزمەت وتەۋ ورتالىعى، كەلەر جىلعى ساياحات ماۋسىمىنان بۇرىن پايدالانۋعا بەرۋ جوسپارلانعان“. قىستاق تۇرعىندار كوميتەتىنىڭ مەڭگەرۋشىسى ەرادىل نۇرالىنىڭ تانىستىرۋىنشا، تاياۋدا قىستاقتىڭ ەرەكشە ونىمدەرىن ساتۋ ورتالىعى، قىستاقتىڭ قونىس ورتاسىن كەشەندى رەتتەۋ - وڭاۋ، جاقسارتۋ، جاڭارتۋ ينجەنەرياسى، ەرەكشە جىلقى شارۋاشىلىعىن دامىتۋ ورتالىعى سياقتى نىساندار مەن سايكەستى قۇرىلعىلاردىڭ قۇرىلىسى دا ىركەس - تىركەس باستالعان.
”پارتيا 20 - قۇرىلتايىنىڭ بايانداماسىندا اۋىل - قىستاقتاردىڭ نەگىزدىك قۇرىلعىسى مەن الەۋمەتتىك قىزمەت وتەۋ ورنالاسۋىن ءبىر تۇتاس جوسپارلاپ، قونىسقا جايلى، كاسىپكە ىڭعايلى جاراسىمدى، كوركەم اۋىل - قىستاق قۇرۋ العا قويىلدى“. ەرادىل بىلاي دەدى: ”قىستاعىمىزداعى وسى نىساندار سالىنىپ بىتكەننەن كەيىن، بۇكىل قىستاقتاعى 586 وتباسى، 2230 ادامدى يگىلىككە كەنەلدىرىپ قانا قويماي، توڭىرەكتەگى اۋىل - قالاشىقتاردان 1000نان استام ەگىنشى - مالشى وتباسىن جۇمىستانۋعا، كىرىسىن ارتتىرۋعا جەتەكتەيدى. قىستاق تۇرعىندار كوميتەتىنىڭ قارسىنداعى حۋلان دۇكەنىنىڭ قوجايىنى دوحتىرباي اكىمباي قۇرىلىس الاڭىنداعى قىزۋ ەڭبەك دۋمانىنا قاراپ ايرىقشا تولقىدى: ”بۇرىن مالشىلاردىڭ ءبارى قىستاۋعا كوشىپ كەتەتىندىكتەن، قىس كەلىسىمەن بۇل جەرگە جىم - جىرت تىنىشتىق ورنايتىن. بۇگىنگى تاڭدا، بۇل جەرگە مالشىلار وتىرىقتانىپ، بەيقۇت ءۇي، جىلى قورا، مەكتەپ، شيپاحانا سياقتى ءتۇرلى قۇرىلعىلارمەن تولىق جابدىقتالىپ، قىستاعىمىزدا جىلدىڭ ءتورت ماۋسىمىندا دا دۋماندى ءومىردىڭ جالىندى تىنىسى قاۋلاپ تۇراتىن بولدى“.
تالاي جىلدىڭ الدىندا دوحتىرباي ۇيىندەگى مالىن ساتىپ، دۇكەن اشىپتى. 3 جىلدىڭ الدىندا ول ايەلىمەن بىرگە مالشىلار شاتتىعى ساياجايىن اشقان. ”بىلتىر مالشىلار شاتتىعى ساياجايىنىڭ ايلىق ورتاشا تازا كىرىسى 4000 يۋان اينالاسىندا بولدى“. دوحتىربايدىڭ ايتۋىنشا، وسى بىرنەشە جىلدا قىستاق قۇرىلىسى بارعان سايىن جاقسارىپ، ساياحاتشىلار بارعان سايىن كوبەيگەن، ءسويتىپ، ونىڭ ”ساياحاتتان اس ءىشىپ“ مۇنان دا جاقسى تۇرمىس كەشىرۋ سەنىمى ونان ارى نىعايا تۇسكەن.
بيىل سۋلى الماتى قىستاعى اۋىل - قىستاق ساياحاتى بويىنشا 4 - توپتاعى مەملەكەتتىك ءتۇيىندى قىستاقتار قاتارىنا تاڭدالدى. قۇلجا قالاسىنداعى ءىرى مالشىلىق قىستاعى رەتىندە، جاعراپيالىق باسىمدىقتان پايدالانىپ، سۋلى الماتى قىستاعى ەكولوگيالىق قىستاق قۇرۋ، مادەنيەتتە ايگىلى قىستاق قۇرۋ، ساياحات ارقىلى قىستاقتى گۇلدەندىرۋ جاڭا نىساناسىن العا قويىپ، مالشىلاردى مال شارۋاشىلىعىمەن شۇعىلدانۋمەن بىرگە، ءۇيدىڭ جانىندا ساياحات كاسىبىن دامىتۋعا شابىتتاندىردى.
مالشى قامارگۇل تۇرعاننىڭ ۇيىنە كەلسەك، ءۇيى جاراسىمدى دا جايلى جايعاستىرىلىپتى، قامارگۇل كەستەشىلىك ماشيناسىمەن تاپسىرىسقا العان ونىمدەرىن ۇلگىرتىپ شىعارۋمەن قاربالاستاپ جاتىر ەكەن. ول سۋلى الماتى قىستاعىنىڭ بەيزاتتىق مادەنيەت مۇرالارى ارقىلى كەدەيلەردى سۇيەمەلدەۋ، جۇمىستاندىرۋ شەبەرحاناسىنىڭ جاۋاپتىسى. ”بيىل شەبەرحانامىز ميلليون يۋاننان استام تاپسىرىس قابىلدادى، 30 نەشە قىستاق تۇرعىنى وسى ارادا جۇمىستانىپ، جان باسىندىق ورتاشا ايلىق كىرىستەرىن 4000 يۋان اينالاسىنا جەتكىزدى“، - دەدى قامارگۇل، - ”بۇدان بىلاي ءبىز بەيزاتتىق مادەني مۇرا ونەرى مەن اۋىل - قىستاق ساياحات كاسىبىنىڭ دامۋىن ۇشتاستىرىپ، اناعۇرلىم كوپ ساياحات ونىمدەرىن جوبالايمىز، زەرتتەپ - جاسايمىز“.
بيىك تەكشەگە سالىنعان مالشى قۋانبەك اۋىلجاننىڭ ۇيىنە كۇن شۋاعى مەيلىنشە تولىق توگىلەدى ەكەن. شەشەسى قايناتقان ءبىر شاۋگىم اق شايدى ءيىسىن بۇرقىراتا قۇشىرلانا تارتىپ، جاڭا شىققان ىستىق ناننان الا وتىرىپ ءبىر ءۇيلى جان كوڭىلدى اڭگىمە دۇكەن قۇردى. قۋانبەك قازىر وزدەرىنىڭ 100 شارشى مەترلىك بەيقۇت ۇيدە تۇراتىندىعىن، بۇكىل قىستاقتاعىلاردىڭ بارلىعىنىڭ ءۇيى وسىنداي ەكەندىگىن ايتتى.
بيىل قۋانبەك ۇيىندەگى 11 جىلقى، 15 سيىر جانە 300گە تاياۋ قويدى اراسان اۋدانىنىڭ قازان قىستاۋلىعىنا بارىپ قىستاتىپ كەلمەك. ”بۇرىن اتقا ءمىنىپ قوي ايداپ قىستاۋلىققا 7 كۇندە زورعا جەتەتىنبىز. تاياۋ جىلداردان بەرى مالشىلار تۇگەلدەي ماشينامەن كوشىپ - قوناتىن بولدى، ءبىر ۇلكەن جۇك اۆتوموبيلىن ءۇش بولىككە ءبولىپ، 300 قويدى ءبىر جولدا - اق باسىپ اكەتىپ، ءبىر - اق كۇندە جەتكىزەدى“، - دەدى ول، - ”ۇكىمەت ءار ۇساق مالعا 10 يۋان اينالاسىندا، ءىرى قاراعا 50 يۋان اينالاسىندا ’كولىككە ءمىنۋ‘ جاردەماقىسىن بەرەدى، مالشىلاردىڭ ءبارى ايرىقشا قۋانۋلى“.
بيىل قۋانبەك تاعى 40 اسىل تۇقىمدى قوشقار ەنگىزىپ، قوي تۇقىمىن اسىلداندىرعاندا، ءار قويعا ۇكىمەت 500 يۋان قوسىمشا قاراجات بەرىپتى. كەلەر جىلى دا ول مال تۇقىمىن ۇزدىكسىز اسىلداندىرىپ، تاعى ءبىر جىلى قورا سالىپ، باعىمشىلىق كولەمىن كەڭەيتپەك ەكەن.
قۋانبەكتىڭ اكەسى بۇگىنگى وزگەرىستەر جايلى توقتالعاندا ايرىقشا اسەرلەندى: ”قازىر مالشىلار نە كاسىپ ىستەگىسى كەلسە، بارىنە ساياساتتىق قولداۋ بەرىلەدى، پارتيانىڭ ابزال ساياساتىنىڭ ارقاسىندا، ءبىز باقىت جولىنا تۇستىك. پارتيانىڭ پارمەندى باسشىلىعى بار دا ءبىز بۇدان بىلاي مەكەنىمىزدى اناعۇرلىم كوركەم ەتىپ قۇرىپ شىعىپ، تۇرمىسىمىزدى اناعۇرلىم شالقىتا تۇسۋگە كامىل سەنىمدىمىز“.
