شي جينپيڭ حىنان ان - ياڭ قالاسى كايشيندا ساۋدا شەكتى سەرىكتەستىگىندەگى ءورت اپاتى شىرعالاڭى جونىندە ماڭىزدى نۇسقاۋ بەردى
جارالانعانداردى بار كۇشپەن قۇتقارىپ - ەمدەپ، جاۋاپكەرشىلىكتى زاڭ بويىنشا قاتاڭ قۋزاستىرىپ، حالىقتى بارىنەن جوعارى قويۋعا، ءومىردى بارىنەن جوعارى قويۋعا باستان - اياق تاباندى بولىپ، اۋىر، ەرەكشە اۋىر شىرعالاڭداردىڭ تۋىلۋىنان باتىل ساقتانۋدى جانە ونى تەجەۋدى تالاپ ەتتى
شينحۋا اگەنتتىگىنىڭ 11 - ايدىڭ 22 - كۇنى بەيجيڭنەن بەرگەن حابارى. 11 - ايدىڭ 21 - كۇنى ساعات 16 مولشەرىندە، حىنان ان - ياڭ قالاسى كايشيندا ساۋدا شەكتى سەرىكتىگىنىڭ زاۆود ۇيىنە ءورت كەتتى. قازىرگە دەيىن، شىرعالاڭدا 38 ادام قازا بولىپ، 2 ادام جارالاندى.
شىرعالاڭ تۋىلعاننان كەيىن، جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ دەرەۋ بىلاي دەپ ماڭىزدى نۇسقاۋ بەردى: حىنان قاتارلى جەرلەردە ءورت اپاتى سياقتى ءوندىرىس حاۋىپسىزدىگى شىرعالاڭدارى ىركەس - تىركەس تۋىلىپ، اۋىر ءولىم - ءجىتىم بولدى، بۇدان تەرەڭ ساباق الۋ كەرەك! جارالانعانداردى بار كۇشپەن قۇتقارۋ - ەمدەۋ، وتباسىنداعىلاردى جۇباتۋ، سوڭعى جۇمىستاردى ىڭعايلاستىرۋ سياقتى قىزمەتتەردى ۇيلەسىمدى ويداعىداي ىستەۋ، شىرعالاڭنىڭ سەبەبىن تەكسەرىپ - انىقتاپ، جاۋاپكەرشىلىكتى زاڭ بويىنشا قاتاڭ قۋزاستىرۋ كەرەك. جىل سوڭى تايادى، دامۋ مەن حاۋىپسىزدىكتى ءبىر تۇتاس جوسپارلاۋ قىزمەت مىندەتتەرى ءبىرشاما اۋىر، جەر - جەر جانە قاتىستى تاراۋلار حالىقتى بارىنەن جوعارى قويۋعا، ءومىردى بارىنەن جوعارى قويۋعا باستان - اياق تاباندى بولىپ، ءوندىرىس حاۋىپسىزدىگى جاۋاپكەرشىلىگىن نىعايتىپ، ءتۇرلى حاۋىپ - قاتەرلەر مەن كومەسكى كىناراتتاردى جالپى بەتتىك اداقتاپ تەكسەرىپ، رەتتەپ - وڭاپ، اۋىر، ەرەكشە اۋىر شىرعالاڭداردىڭ تۋىلۋىنان باتىل ساقتانۋى جانە ونى تەجەۋى كەرەك.
شي جينپيڭنىڭ نۇسقاۋىنا ساي، شۇعىل جاعدايعا توتەپ بەرۋدى باسقارۋ مينيسترلىگى سياقتى قاتىستى تاراۋلار قىزمەت گرۋپپاسىن حىنانعا قۇتقارۋ - كومەكتەسۋ قىزمەتىنە جەتەكشىلىك ەتۋگە جىبەردى، حىنان ولكەسىنىڭ قاتىستى جاۋاپتى جولداستارى ناق مايداندا قولباسشىلىق ىستەپ، ءبىر جاقتى ەتتى. قازىر ناق مايداندا قۇتقارۋ، كومەك بەرۋ، جارالانعانداردى قۇتقارۋ - ەمدەۋ جانە شىرعالاڭ سەبەبىن تەكسەرۋ سياقتى قىزمەتتەر قاربالاس، ءتارتىپتى جۇرگىزىلۋدە.
