شينحۋا اگەنتتىگىنىڭ 12 - ايدىڭ 2 - كۇنى بىرلەسكەن مەملەكەتتەر ۇيىمىنان بەرگەن حابارى (ءتىلشى شاڭ شۇيچيان). بىرلەسكەن مەملەكەتتەر ۇيىمىنىڭ حاۋىپسىزدىك القالار كەڭەسى 11 - ايدىڭ 30 - كۇنى جياڭ زىمين جولداستىڭ قايتىس بولعاندىعىنا ءۇنسىز ازا ءبىلدىرۋ سالتىن وتكىزدى. بىرلەسكەن مەملەكەتتەر ۇيىمىنىڭ باس حاتشىسى گۋتەرەس سول كۇنى مالىمدەمە جاريالاپ، جياڭ زىمين جولداستىڭ قايتىس بولعاندىعىنا قاباعات قايعىراتىندىعىن ءبىلدىردى.
حاۋىپسىزدىك القالار كەڭەسى 11 - ايدىڭ 30 - كۇنى تۇستەن بۇرىن ءماجىلىس وتكىزدى، حاۋىپسىزدىك القالار كەڭەسىنىڭ سول ايداعى كەزەكتى ءتوراعاسى، گانانىڭ بىرلەسكەن مەملەكەتتەر ۇيىمىنداعى تۇراقتى ۋاكىلى گارولد اگەمان ءماجىلىستى باسقاردى. ءماجىلىس باستالا سالىسىمەن اگەمان حاۋىپسىزدىك القالار كەڭەسىنىڭ مۇشەلەرى اتىنان جياڭ زىميننىڭ قايتىس بولعاندىعىنا قايعىلى ازا بىلدىرەتىندىگىن ايىتتى. اگەمان بىلاي دەدى: حالىقارالىق قوعام جياڭ زىميننىڭ بۇكىل الەمنىڭ بەيبىتشىلىگىنە، حاۋىپسىزدىگىنە جانە دامۋىنا كورنەكتى ۇلەس قوسقاندىعىن، سونداي - اق ول كىسىنىڭ جۇڭگونىڭ رەفورما جاساۋ، ەسىك اشۋ، وسىزامانداندىرۋ قۇرىلىسى جانە ەكونوميكانىڭ دامۋى بارىسىندا ساۋلەلەندىرگەن رولىن ەستەن شىعارمايدى. اگەماننىڭ ۇسىنىسىمەن ماجىلىسكە قاتىناسقان بارلىق ادام ورىندارىنان تۇرىپ، جياڭ زىميننىڭ قايتىس بولعاندىعىنا ءبىر مينۋت ءۇنسىز ازا ءبىلدىردى.
اگەمان سودان كەيىن جۇڭگونىڭ ۋاكىلىن ءسوز سويلەۋگە ۇسىنىس ەتتى. جۇڭگونىڭ بىرلەسكەن مەملەكەتتەر ۇيىمىنداعى تۇراقتى ورىنباسار ۋاكىلى گىڭ شۋاڭ حاۋىپسىزدىك القالار كەڭەسىنىڭ ازا ءبىلدىرۋ سالتىن ارنايى ورنالاستىرعاندىعىنا العىس ايتتى. گىڭ شۋاڭ مىنالاردى ءبىلدىردى: جياڭ زىمين جولداستىڭ قايتىس بولۋى − جۇڭگو كوممۋنيستىك پارتياسى، جۇڭگو ۇكىمەتى جانە جۇڭگو حالقى جونىنەن ولشەۋسىز جوعالتۋ. ول كىسى جۇڭگوشا سوتسياليزم ىستەرىنىڭ دامۋىن، العا باسۋىن ىلگەرىلەتۋگە كورنەكتى ۇلەس قوستى، سونداي - اق جۇڭگو مەن دۇنيە جۇزىندەگى ءار ەلدىڭ دوستىق، سەلبەستىك قارىم - قاتىناسىن جەبەۋگە دە ماڭىزدى ۇلەس قوستى.
حاۋىپسىزدىك القالار كەڭەسى سودان كەيىن بەلگىلەنگەن ءماجىلىس كەڭەستىك ءتارتىبى بويىنشا تارالۋدان ساقتانۋ ماسەلەسى جونىندەگى قاراردى داۋىسقا سالىپ ماقۇلدادى، رەسەي، اراب بىرىككەن امىرلىگى، مەكسيكا، يرلانديا، نورۆەگيا، البانيا، گانا ۋاكىلدەرى قارار ماقۇلدانعاننان كەيىن ءتۇسىندىرۋ سيپاتتى ءسوز سويلەگەندە، ءبارى دە ەڭ الدىمەن جياڭ زىميننىڭ قايتىس بولعاندىعىنا كوڭىل ايتتى، سونداي - اق جۇڭگو ۇكىمەتىنەن جانە جياڭ زىميننىڭ وتباسىنداعىلاردان حال سۇرادى. رەسەي ۋاكىلى مىنالاردى ءبىلدىردى: جياڭ زىمين كورنەكتى ساياساتشى، ول كىسى جۇڭگونىڭ وراسان زور ەكونوميكالىق، قوعامدىق دامۋ تابىستارىنا قول جەتكىزۋىن ىلگەرىلەتتى ءارى جۇڭگونىڭ حالىقاراداعى ورنىن بارىنشا جوعارىلاتتى. اراب بىرىككەن امىرلىگىنىڭ ۋاكىلى مىنالاردى ءبىلدىردى: جياڭ زىميننىڭ جۇڭگو ەكونوميكاسىنىڭ گۇلدەنۋىنە، ورنىقتىلىعىنا قوسقان ۇلەسى ماڭگى ەستە ساقتالادى. گانا ۋاكىلى مىنالاردى ءبىلدىردى: جياڭ زىمين جۇڭگونىڭ العا باسۋى مەن گۇلدەنۋىنە، سونداي - اق الەمنىڭ بەيبىتشىلىگى مەن دامۋىنا ەلەۋلى ۇلەس قوستى.
سول كۇنى ەرتەمەن گۋتەرەس مالىمدەمە جاريالاپ، جياڭ زىميننىڭ قايتىس بولعاندىعىنا قاباعات قايعىراتىندىعىن ءبىلدىردى، سونداي - اق بىرلەسكەن مەملەكەتتەر ۇيىمى اتىنان جياڭ زىميننىڭ وتباسىنداعىلاردان جانە جۇڭگو ۇكىمەتى مەن حالقىنان شىنايى حال سۇرادى. مالىمدەمەدە بىلاي دەلىندى: جياڭ زىمين جۇڭگونىڭ حالىقارالىق ىستەرگە ات سالىسۋىن بۇلجىماي دارىپتەدى، ول كىسى مىندەت اتقارعان كەزدە جۇڭگو وراسان زور ەكونوميكالىق دامۋشىلىققا قول جەتكىزدى ءارى دۇنيە جۇزىلىك ساۋدا ۇيىمىنا ءساتتى مۇشە بولدى.
