شىنجوۋ 14 - ءنومىرلى عارىشكەرلى الەم كەمەسىنىڭ قايتا ورالۋ بولمەسى جەرگە ءساتتى قوندى
شىنجوۋ 14 - ءنومىرلى الەم كەمەسىنىڭ ادام الىپ ۇشۋ مىندەتى تولىق تابىستى بولدى
شينحۋا اگەنتتىگىنىڭ 12 - ايدىڭ 4 - كۇنى جيۋچۋاننان بەرگەن حابارى (تىلشىلەر حۋاڭ ميڭ، لي گولي، جاڭ ميمي). 12 - ايدىڭ 4 - كۇنى ساعات 20دان 9 مينۋت وتكەندە، شىنجوۋ 14 - ءنومىرلى عارىشكەرلى الەم كەمەسىنىڭ قايتا ورالۋ بولمەسى دۇڭفىڭ قونۋ الاڭىنا ءساتتى قوندى، سول جەردەگى مەديتسينالىق باقىلاۋ، مەديتسينالىق كۇتىمدەۋ قىزمەتكەرلەرى چىن دۇڭ، ليۋ ياڭ، ساي شۇيجى قاتارلى عارىشكەرلەردىڭ دەنساۋلىق جاعدايى جاقسى ەكەندىگىن تۇراقتاندىردى، شىنجوۋ 14 - ءنومىرلى الەم كەمەسىنىڭ ادام الىپ ۇشۋ مىندەتى تولىق تابىستى بولدى.
جۇڭگو عارىشقا ادام الىپ ۇشۋ ينجەنەرياسى كەڭسەسىنىڭ تانىستىرۋىنا قاراعاندا، ساعات 19دان 20 مينۋت وتكەندە، بەيجيڭ عارىشقا ۇشۋدى مەڭگەرۋ ورتالىعى جەر بەتىندەگى ولشەۋ - مەڭگەرۋ پۋنكتى ارقىلى قايتا ورالۋ بۇيرىعىن بەرىپ، شىنجوۋ 14 - ءنومىرلى عارىشكەرلى الەم كەمەسىنىڭ وربيتا بولمەسى مەن قايتا ورالۋ بولمەسى ءساتتى اجىراعان. وسىدان كەيىن، الەم كەمەسىنىڭ قايتا ورالۋ تورموزداۋ قوزعالتقىشى وت الىپ، قايتا ورالۋ بولمەسى مەن جىلجىتۋ بولمەسى اجىراعان. قايتا ورالۋ بولمەسى جەرگە ءساتتى قونعاننان كەيىن، ىزدەستىرۋ - قۇتقارۋ، قايتارىپ اكەلۋ مىندەتىن ارقالاعان ىزدەستىرۋ - قۇتقارۋ بولىمشە اترەتى نىسانانى دەر كەزىندە بايقاعان ءارى جەرگە قونۋ ورنىنا جەتكەن. قايتا ورالۋ بولمەسىنىڭ ەسىگى اشىلىسىمەن مەديتسينالىق باقىلاۋ، مەديتسينالىق كۇتىمدەۋ قىزمەتكەرلەرى عارىشكەرلەردىڭ دەنساۋلىعىنىڭ جاقسى ەكەندىگىن تۇراقتاندىرعان.
شىنجوۋ 14 - ءنومىرلى عارىشكەرلى الەم كەمەسى 2022 - جىلى 6 - ايدىڭ 5 - كۇنى جيۋچۋان جاساندى سەرىك ۇشىرۋ ورتالىعىنان كەڭىستىككە كوتەرىلىپ، ىلە - شالا تيانحى وزەكتى بولمەسىمەن ءتۇيىلىسىپ قۇرامالى تۇلعا قالىپتاستىردى. 3 عارىشكەر وربيتادا 6 اي ايالداعان كەزدە، ىلگەرىندى - كەيىندى 3 رەت بولمەدەن شىعىپ قيمىل جۇرگىزىپ، كەڭىستىك بەكەتى بولمەسىنىڭ ءىشى - سىرتىنداعى جابدىقتار مەن كەڭىستىكتەن پايدالانۋ مىندەتىنە قاتىستى قۇرىلعى، جابدىقتاردى ورناتۋ جانە سىناقتان وتكىزۋدى ورىنداپ، ءبىر قىدىرۋ كەڭىستىك عىلمي تاجىريبەلەرى مەن تەحنيكالىق تاجىريبەلەرىن ورىستەتىپ، وربيتادا 2 كەڭىستىك بەكەتى بولمە بولىگىنىڭ، ءبىر عارىشكەرلى الەم كەمەسىنىڭ، ءبىر زات تاسىمالى عارىش كەمەسىنىڭ كەلۋىن قارسى الىپ، جەر بەتىمەن سايكەسىپ، جۇڭگو كەڭىستىك بەكەتىنىڭ ”T“ فورمالى نەگىزگى قۇرىلىمىن قۇراستىرىپ ورناتۋدى ورىنداپ، شىنجوۋ 15 - ءنومىرلى عارىشكەرلەرىمەن بىرگە تۇڭعىش رەتكى وربيتادا كەزەك اۋىسۋدى ورىنداپ، زات تاسىمالى الەم كەمەسى مەن كەڭىستىك بەكەتىنىڭ ەڭ جىلدام تۇتاسىپ، ءتۇيىلىسۋى سىندى دۇنيە جۇزىلىك رەكورد سياقتى كوپتەگەن تاريحي ساتكە كۋا بولدى ءارى مىندەت ارەدىگىنەن پايدالانىپ، ءبىر رەت ”تيانگۇڭ ساباقحاناسى“ ارقىلى عارىشتا ساباق ءوتتى، سونداي - اق ءبىر قىدىرۋ وزگەشە عىلىم جالپىلاستىرۋ تاربيەسى مەن مادەنيەت تاراتۋ قيمىلىن جۇرگىزدى.
چىن دۇڭ جۇڭگونىڭ تۇڭعىش وربيتادا تۇرعان ۋاقىتى 200 كۇننەن اسقان عارىشكەرىنە اينالدى.
