جياڭ زىمين جولداسقا ازا ءبىلدىرۋ جينالىسىندا سويلەنگەن ازالى ءسوز
(2022 - جىلى 12 - ايدىڭ 6 - كۇنى)
شي جينپيڭ
جولداستار، دوستار:
بۇگىن ءبىز استاناداعى حالىق سارايىندا ازا ءبىلدىرۋ جينالىسىن دابىرالى وتكىزىپ، قادىرلى جياڭ زىمين جولداسقا توتەنشە قايعىلى كوڭىلمەن ازا ءبىلدىرىپ وتىرمىز.
ءدال وسى ساتتە چاڭجياڭ دارياسىنىڭ تۇستىگى مەن تەرىستىگىندەگى، ۇلى قورعاننىڭ ءىشى مەن سىرتىنداعى، بۇكىل ەلدىڭ جەر - جەرىندەگى پارتيا، ۇكىمەت ورگاندارىنداعى، كاسىپورىن - ءىسورىندارداعى، اۋىل - قىستاقتارداعى، مەكتەپتەردەگى، اسكەري بولىمدەردەگى، مالىلەر مەن الەۋمەتتىك اۋماقتارداعى قالىڭ حالىق بۇقاراسى، ەلىمىزدىڭ شەتەلدەگى ەلشىلىكتەرى مەن كونسۋلحانالارىنداعى، سونداي - اق باسقا دا شەتەلدە تۇراتىن قۇرىلىمدارىنداعى قىزمەتكەرلەر، شياڭگاڭ ەرەكشە اكىمشىلىك رايونىنداعى باۋىرلاستار، اۋمىن ەرەكشە اكىمشىلىك رايونىنداعى باۋىرلاستار جانە تايۋاندىق باۋىرلاستار، سونداي - اق شەتەلدەگى چياۋباۋلار دا تۇگەلدەي بىزبەن بىرگە جياڭ زىمين جولداستىڭ وراسان زور ەڭبەگى مەن اسقاق قاسيەتىن تەرەڭ ساعىنىشپەن ەسكە الىپ، ءبىزدىڭ قايعىلى ساعىنىشىمىزدى بىلدىرۋدە.
بۇكىل پارتيا، بۇكىل ارميا، بۇكىل ەلدەگى ءار ۇلت حالقى جياڭ زىمين جولداس سىندى وسى ۇلى تۇلعادان ايرىلىپ قالعانى ءۇشىن شەكسىز قايعىعا باتتى، دۇنيە جۇزىندەگى ءار ەل حالقى، ءار ەلدىڭ باسشىلارى جانە ءار جاقتاعى حالىقارالىق دوستار دا قايعىلى ازا ءبىلدىردى.
جياڭ زىمين جولداس پارتيامىز، ارميامىز، بۇكىل ەلىمىزدەگى ءار ۇلت حالقى جاپپاي مويىنداعان اسقاق بەدەلگە يە ۇزدىك باسشى، ۇلى ماركسيزمشى، ۇلى پرولەتاريات توڭكەرىسشىسى، ساياساتشى، اسكەري ىستەر مامانى، ديپلومات، ۇزاق سىننان وتكەن كوممۋنيزم جاۋىنگەرى، جۇڭگوشا سوتسياليزم ۇلى ىستەرىنىڭ تاڭداۋلى باسشىسى، پارتيانىڭ ءۇشىنشى بۋىن ورتالىق كوميتەت باسشىلىق كوللەكتيۆىنىڭ ۇيتقىسى، ”ۇشكە ۋاكىلدىك ەتۋ“ ماڭىزدى يدەياسىنىڭ باستى جاراتۋشىسى.
ءبىز جياڭ زىمين جولداستى قادىرلەيمىز، جياڭ زىمين جولداستى ساعىنا ەسكە الامىز، ويتكەنى ول عۇمىرىندا بارلىق جۇرەك قانى مەن قاجىر - قايراتىن جۇڭگو حالقىنا ارناپ، ۇلتتىڭ تاۋەلسىزدىگىنە، حالىقتىڭ ازاتتىعىنا قول جەتكىزۋ جانە مەملەكەتتىڭ باي - قۇدىرەتتى بولۋىن، حالىقتىڭ باقىتتى بولۋىن جۇزەگە اسىرۋ ءۇشىن اقتىق دەمىنە دەيىن قىزمەت ەتىپ، عۇمىر بويى كۇرەس جاساپ ءوتتى. اسىرەسە، پارتيا 13 - كەزەكتى ورتالىق كوميتەتىنىڭ ءتورتىنشى جالپى ماجىلىسىنەن كەيىنگى 13 جىلدا پارتيامىز بەن مەملەكەتىمىزدىڭ قول جەتكىزگەن وراسان زور تابىستارىن جياڭ زىمين جولداستىڭ اسقان كەمەڭگەرلىگىنەن، شەشۋشى رولىنان، ەرەن ساياسي باسشىلىق ونەرىنەن بولە قاراۋعا بولمايدى. جياڭ زىمين جولداس پارتيا مەن حالىق ءۇشىن وشپەس ەڭبەك ءسىڭىرىپ، بۇكىل پارتيانىڭ، بۇكىل ارميانىڭ، بۇكىل ەلدەگى ءار ۇلت حالقىنىڭ شىنايى قادىرلەۋىنە جانە حالىقارالىق قوعامنىڭ جاپپاي القاۋىنا يە بولدى!
جولداستار، دوستار!
جياڭ زىمين جولداس جاس ءوسپىرىم كەزىنەن اقيقاتقا تالپىنۋدى مۇرات ەتىپ، حالىقتىق توڭكەرىستىك قوزعالىستىڭ تاسقىنىنا بەلسەنە ارالاستى. ول جياڭسۋ ولكەسىنىڭ ياڭجوۋ قالاسىنان، 1926 - جىلى 8 - ايدا وتانشىل زيالى وتباسىندا دۇنيەگە كەلدى، جاسىنان وتانشىلدىق يدەيامەن جانە دەموكراتيالىق توڭكەرىس يدەياسىمەن كوكىرەك كوزىن اشتى. 1943 - جىلى قىستا ول جۇڭگو كوممۋنيستىك پارتياسىنىڭ استىرتىن پارتيا ۇيىمى باسشىلىق ەتەتىن وتانشىل العاباسار وقۋشىلار قوزعالىسىنا قاتىناسىپ، 1946 - جىلى 4 - ايدا جۇڭگو كوممۋنيستىك پارتياسىنا مۇشە بولدى، وسىدان سوڭ ومىرلىك قاجىر - قايراتىن پارتيا مەن حالىققا ارنادى.
جاڭا جۇڭگو قۇرىلعان سوڭ، جياڭ زىمين جولداس ىلگەرىندى - كەيىندى كاسىپورىنداردا، عىلمي زەرتتەۋ ورىندارىندا، مەملەكەتتىك مينيسترلىك - كوميتەتتەردە قىزمەت ىستەپ، ءار جۇمىس ورنىندا ءوز قىزمەتىن تىڭعىلىقتى ىستەپ، قاجىرلىلىقپەن قۇلشىنىپ، وتتاي لاۋلاعان ءومىر داۋرەنىن سوتسياليستىك توڭكەرىس جانە قۇرىلىس ىستەرىنە ارناپ، رەفورما جاساۋ، ەسىك اشۋ جاعىندا قىرۋار نەگىز قالارلىق قىزمەتتەر ىستەدى. پارتيانىڭ 12 - قۇرىلتايىندا ول ورتالىق كوميتەتتىڭ مۇشەسى بولىپ سايلاندى.
1985 - جىلدان كەيىن، جياڭ زىمين جولداس شاڭحاي قالاسىنىڭ باستىعى، شاڭحاي قالالىق پارتكومنىڭ ورىنباسار شۋجيى، شۋجيى بولىپ تاعايىندالدى. ول شاڭحايدىڭ ەكونوميكالىق دامۋ جوباسىن جانە قالا قۇرىلىسى جوباسىن جاساۋعا باسشىلىق ەتىپ، 20 - عاسىردىڭ سوڭىندا شاڭحايدى اشىق، كوپ فۋنكتسيالى، كاسىپ سالاسى قۇرىلىمى ۇيلەسىمدى، عىلىم - تەحنيكاسى وزىق، جوعارى وركەنيەتكە يە سوتسياليستىك وسىزاماندانعان قالا ەتىپ قۇرىپ شىعۋ سىندى دامۋ باعىتىن العا قويىپ، پۋدۇڭدى حالىقارالىق، توراپتىق، وسىزاماندانعان، دۇنيە جۇزىندەگى ماڭداي الدى جاڭا قالا رايونى ەتىپ قۇرىپ شىعۋدى باسا دارىپتەپ، حالىق ءۇشىن ناقتى ءىس ىستەۋدى تۇزىمدەندىرۋدى بەلسەنە ىلگەرىلەتىپ، شاڭحايدىڭ رەفورما جاساۋ، ەسىك اشۋ جانە سوتسياليستىك وسىزامانداندىرۋ قۇرىلىسىندا جاڭا جاعداي اشۋىنا كورنەكتى ۇلەس قوستى. پارتيا 13 - كەزەكتى ورتالىق كوميتەتىنىڭ ءبىرىنشى جالپى ماجىلىسىندە ول ورتالىق كوميتەت ساياسي بيۋروسىنىڭ مۇشەسى بولىپ سايلاندى. 1989 - جىلى جازعا سالىم ەلىمىزدە اۋىر ساياسي تولقۋ تۋىلعاندا، جياڭ زىمين جولداس پارتيا ورتالىق كوميتەتىنىڭ بىلىقپالىققا تۋى ايقىن تۇردە قارسى تۇرۋ، سوتسياليستىك مەملەكەت بيلىگىن قورعاۋ، حالىقتىڭ ءتۇبىرلى مۇددەسىن قورعاۋ جونىندەگى دۇرىس شەشىمىن باتىل قولداپ جانە اتقارىپ، قالىڭ پارتيا مۇشەلەرىنە، كادرلارعا، بۇقاراعا تىعىز سۇيەنىپ، شاڭحايدىڭ ورنىقتىلىعىن پارمەندى قورعادى.
جولداستار، دوستار!
1989 - جىلى 6 - ايدا جياڭ زىمين جولداس پارتيا 13 - كەزەكتى ورتالىق كوميتەتىنىڭ ءتورتىنشى جالپى ماجىلىسىندە ورتالىق كوميتەت ساياسي بيۋروسىنىڭ تۇراقتى مۇشەسى، ورتالىق كوميتەتتىڭ باس شۋجيى بولىپ سايلاندى، سول جىلى 11 - ايدا پارتيا 13 - كەزەكتى ورتالىق كوميتەتىنىڭ بەسىنشى جالپى ءماجىلىسى ونىڭ جۇڭگو كوممۋنيستىك پارتياسى ورتالىق اسكەري ىستەر كوميتەتىنىڭ ءتوراعاسى بولۋىن ۇيعارىپ، جياڭ زىمين جولداستى ۇيتقى ەتكەن پارتيانىڭ 3 - بۋىن ورتالىق كوميتەت باسشىلىق كوللەكتيۆى قالىپتاستى.
جياڭ زىمين جولداس پارتيا مەن ارميانىڭ نەگىزگى باسشىسى مىندەتىن اتقارعان كەز ەلىمىز سىرتتان قىسىم تۇسكەن، ىشتە قيىنشىلىق قىسقان اۋىر كەزەڭ ەدى، سوندىقتان مۇنى قىسىلتاياڭ ساتتە مىندەت قابىلدادى دەۋگە بولادى. جياڭ زىمين جولداس باتىل تۇردە: ”پارتيا مەن حالىقتىڭ ىستەرى ءۇشىن مەن، ءسوز جوق، اقتىق دەمىمە دەيىن قىزمەت ەتىپ، بار ءومىرىمدى ارنايمىن“، - دەدى.
20 - عاسىردىڭ 80 - جىلدارىنىڭ سوڭى مەن 90 - جىلدارىنىڭ باسىندا حالىقارادا جانە ەل ىشىندە اۋىر ساياسي تولقۋ تۋىلىپ، دۇنيە ءجۇزى سوتسياليزمىندە اۋىر بۇراڭدىق بەلەڭ بەرىپ، كەيبىر باتىس ەلدەرى جۇڭگوعا ايتىلمىس ”جازالاۋ“ قولدانىپ، ەلىمىز سوتسياليزم ىستەرىنىڭ دامۋى بۇرىن بولماعان وراسان زور قيىنشىلىق پەن قىسىمعا تاپ بولدى. پارتيا مەن مەملەكەتتىڭ بولاشاعى مەن تاعدىرىن بەلگىلەيتىن وسى كەلەلى تاريحي كەزەڭدە، جياڭ زىمين جولداس پارتيانىڭ ورتالىق كوميتەت باسشىلىق كوللەكتيۆىن باستاپ، بۇكىل پارتياعا، بۇكىل ارمياعا، بۇكىل ەلدەگى ءار ۇلت حالقىنا تىعىز سۇيەنىپ، ەكونوميكالىق قۇرىلىس سىندى وزەككە تيتتەي دە مىزعىماستان تاباندى بولىپ، تۋى ايقىن تۇردە ءتورت نەگىزگى پرينسيپكە تاباندى بولىپ، رەفورما جاساۋعا، ەسىك اشۋعا تاباندى بولىپ، باتىل تۇردە جونگە سالۋ، رەتتەۋ ورىستەتىپ، يدەولوگيا قىزمەتىن جاپپاي كۇشەيتىپ، پارتيا ستيلى، پاكتىك قۇرىلىسىن جانە شىرىكتەسۋگە قارسى تۇرۋ كۇرەسىن ىشكەرىلەي ورىستەتىپ، پارتيانىڭ حالىق بۇقاراسىمەن بايلانىسىن كۇشەيتىپ، ديپلوماتيالىق كۇرەستى بەلسەنە جۇرگىزىپ، مەملەكەتتىڭ تاۋەلسىزدىگىن، ابىرويىن، حاۋىپسىزدىگىن، ورنىقتىلىعىن باتىل قورعادى، جۇڭگوشا سوتسياليزم ۇلى ىستەرىن قورعادى. قاجىرلى قۇلشىنىس ارقىلى پارتيا مەن حالىق رەفورمانىڭ، دامۋدىڭ كەلەلى جاعدايىن ءساتتى ورنىقتىرىپ، ەلىمىزدىڭ دامۋىنا بەرىك نەگىز قالادى.
پارتيا 13 - كەزەكتى ورتالىق كوميتەتىنىڭ ءتورتىنشى جالپى ماجىلىسىنەن پارتيا 16 - قۇرىلتايىنا دەيىنگى 13 جىلدا حالىقارالىق جاعداي اۋمالى - توكپەلى بولىپ، ەلىمىزدىڭ رەفورما جاساۋ، ەسىك اشۋ جانە سوتسياليستىك وسىزامانداندىرۋ قۇرىلىسى ءۇردىسى اسقاق ايبىنمەن قۇلاشىن كەڭ جايدى. حالىقاراداعى جانە ەل ىشىندەگى توتەنشە كۇردەلى جاعدايدا، جياڭ زىمين جولداس پارتيانىڭ ورتالىق كوميتەت باسشىلىق كوللەكتيۆىن باستاپ، ماركسيزم - لەنينيزم، ماۋ زىدۇڭ يدەياسى، دىڭ شياۋپيڭ نازارياسى ۇلى تۋىن بيىك ۇستاپ، پارتيانىڭ نەگىزگى لۋشيانىنا بۇلجىماي تاباندى بولىپ، بۇكىل پارتياعا، بۇكىل ارمياعا، بۇكىل ەلدەگى ءار ۇلت حالقىنا تىعىز سۇيەنىپ، جۇڭگوشا سوتسياليزمگە بۇلجىماي تاباندى بولدى جانە ونى دامىتتى. ول ورايدى مىقتى يگەرۋ، رەفورمانى تەرەڭدەتۋ، ەسىكتى ايقارا اشۋ، دامۋدى جەبەۋ، ورنىقتىلىقتى ساقتاۋ سىندى نەگىزگى باعىتتى العا قويىپ، سوتسياليستىك وسىزامانداندىرۋ قۇرىلىسى بارىسىنداعى 12 ۇلكەن قاتىناستى دۇرىس شەشۋدى جان - جاقتى بايىمداپ، ءبىزدىڭ سوتسياليستىك وسىزامانداندىرۋ قۇرىلىسىنىڭ زاڭدىلىعى جونىندەگى تانىمىمىزدى تەرەڭدەتتى، ورايدان ايرىلىپ قالماي، ورايدى مىقتى يگەرۋدى، ەسكىلىككە جارماسىپ الماي، ءورىس اشا العا ىلگەرىلەۋدى باسا دارىپتەپ، بىزگە باسشىلىق ەتىپ، رەفورمانى، دامۋدى، ورنىقتىلىقتى جەبەيتىن ءبىر قىدىرۋ باعىت - ساياساتتار مەن كەلەلى ستراتەگيالاردى بەلگىلەدى جانە اتقاردى. ول بىزگە باسشىلىق ەتىپ سوتسياليزمنىڭ العاشقى ساتىسىنداعى نەگىزگى تۇعىرنامانى تۇراقتاندىرىپ، ءبىزدىڭ جۇڭگوشا سوتسياليزم ىستەرىنە تاباندى بولۋىمىزعا جانە ونى دامىتۋىمىزعا پارمەندى جەتەكشىلىك ۇسىندى. ول بىزگە باسشىلىق ەتىپ سوتسياليستىك بازار شارۋاشىلىعى ءتۇزىلىسىنىڭ رەفورما نىساناسى مەن نەگىزگى جۇلگەسىن مىقتاپ ورناتتى، سوتسياليزمنىڭ العاشقى ساتىسىنداعى جالپىلىق مەنشىكتى نەگىزگى تۇلعا ەتكەن، كوپ ءتۇرلى مەنشىكتەگى شارۋاشىلىق قاتار داميتىن نەگىزگى ەكونوميكالىق ءتۇزىم مەن ەڭبەگىنە قاراي ءبولۋدى نەگىزگى تۇلعا ەتكەن، كوپ ءتۇرلى ءبولىس ءتاسىلى قاتار ءومىر سۇرەتىن ءبولىس ءتۇزىمىن مىقتاپ ورناتتى، ەكونوميكالىق ءتۇزىلىس رەفورماسىن، ساياسي ءتۇزىلىس رەفورماسىن، مادەنيەت ءتۇزىلىسى رەفورماسىن جانە باسقا جاقتارداعى رەفورمالاردى باتىلدىقپەن ىلگەرىلەتتى. ول جاپپاي دوڭگەلەك داۋلەتتى قوعام قۇرۋ، ءۇشىنشى قادامداعى ستراتەگيالىق نىسانانى جۇزەگە اسىرۋ جونىندە كورەگەندىكپەن ستراتەگيالىق وي جۇگىرتىپ، وسى عاسىردىڭ العاشقى 20 جىلىندا كۇش - قۋاتتى شوعىرلاندىرىپ، ءبىر ميلليارد نەشە ءجۇز ميلليون حالىقتى يگىلىككە كەنەلتەتىن اناعۇرلىم جوعارى دەڭگەيدەگى دوڭگەلەك داۋلەتتى قوعامدى جاپپاي قۇرۋ كەرەكتىگىن باسا دارىپتەدى. ول بىلاي دەپ باسا دارىپتەدى: باردام باتىمدى سويلەيدى، مەشەۋ قالعان تاياق جەيدى، دامۋدى، ءسوز جوق، پارتيانىڭ بيلىك جۇرگىزىپ، مەملەكەتتى كوركەيتۋدەگى ماڭداي الدى مىندەتى ەتىپ، بار زەيىنمەن قۇرىلىس جۇرگىزىپ، بار ىنتا - پەيىلمەن دامۋعا ۇمتىلۋ كەرەك. ول ”سىرتتان ەنگىزۋ“ مەن ”سىرتقا شىعارۋدى“ ءوزارا ۇشتاستىرۋعا تاباندى بولۋدى، ەسىك اشۋ ارقىلى رەفورمانى جەبەۋدى، دامۋدى جەبەۋدى العا قويىپ، ءبىزدىڭ دۇنيە جۇزىلىك ساۋدا ۇيىمىنا كىرۋىمىزگە باسشىلىق ەتىپ، سىرتقا ەسىك اشۋدىڭ جاڭا جاعدايىن قالىپتاستىردى. ول بىزگە باسشىلىق ەتىپ، سوتسياليستىك دەموكراتيالىق ساياسيدى دامىتىپ، مەملەكەتتى زاڭمەن باسقارۋ نەگىزگى جالپى جوباسىن اتقارىپ، سوتسياليستىك وزىق مادەنيەتتى دامىتىپ، شياڭگاڭنىڭ، اۋمىننىڭ وتان قۇشاعىنا ءساتتى ورالۋىن جۇزەگە اسىردى، ەكى جاعالاۋداعىلاردىڭ ءبىر جۇڭگو پرينسيبىن ايگىلەيتىن ”1992 - جىلعى ورتاق تانىمعا“ كەلۋىن ىلگەرىلەتىپ، بولشەكتەۋشىلىككە قارسى تۇرۋ، ”تايۋان دەربەستىگىنە“ قارسى تۇرۋ كەلەلى كۇرەسىن پارمەندى تۇردە ورىستەتتى. ول قاشاندا كەڭ الەمدىك كوز ايامەن دۇنيە ءجۇزى اۋقىمى دامۋىنىڭ جالپى بەتالىسىن باعامداپ، ءبىر قىدىرۋ ديپلوماتيالىق جانە حالىقارالىق ستراتەگيالىق يدەيالاردى العا قويىپ، دۇنيە ءجۇزىنىڭ كوپ ۇيەكتەنۋگە بەت الۋىن بەلسەندىلىكپەن جەبەپ، حالىقارالىق قارىم - قاتىناستىڭ دەموكراتيالانۋىن ىلگەرىلەتىپ، دۇنيە ءجۇزىنىڭ كوپ تۇرلىلىگىنە قۇرمەت ەتىپ، شاڭحاي سەلبەستىك ۇيىمىنىڭ قۇرىلۋىن ىلگەرىلەتىپ، ءبىزدىڭ ديپلوماتيا قىزمەتىندە جاڭا جاعداي اشۋىمىزعا باسشىلىق ەتتى. ول ەل باسقارۋدا، ءسوز جوق، الدىمەن پارتيانى باسقارۋدى، پارتيانى باسقارۋدا، ءسوز جوق، قاتاڭ بولۋدى باسا دارىپتەپ، ۇيرەنۋدى دارىپتەۋدى، ساياسيدى دارىپتەۋدى، دۇرىس سالتتى دارىپتەۋدى باسا دارىپتەپ، پارتيا قۇرىلىسىنىڭ جاڭا ۇلى ينجەنەرياسىن ىلگەرىلەتۋدى العا قويىپ، باسشىلىق ورە مەن بيلىك جۇرگىزۋ ورەسىن جوعارىلاتۋ، شىرىكتەسۋگە قارسى تۇرۋ، وزگەرۋدەن ساقتانۋ مەن حاۋىپ - قاتەرگە قارسى تۇرۋ قابىلەتىن كۇشەيتۋ سىندى ەكى ۇلكەن تاريحي تاقىرىپتى ويداعىداي شەشۋدى، پارتيا ستيلى، پاكتىك قۇرىلىسىن جانە شىرىكتەسۋگە قارسى تۇرۋ كۇرەسىن مىزعىماس تاباندىلىقپەن ىلگەرىلەتۋدى، كوممۋنيستەردىڭ جالىندى جىگەرىن، اسقاق ارىنىن جانە دارقان تۋراشىلدىعىن باستان - اياق ساقتاۋدى، پارتيانىڭ العاباسارلىعى مەن كىرشىكسىزدىگىن باستان - اياق ساقتاۋدى باسا دارىپتەدى. ول ءبىزدىڭ رەفورمانىڭ، دامۋدىڭ، ورنىقتىلىقتىڭ قاتىناسىن دۇرىس شەشۋىمىزگە باسشىلىق ەتىپ، سوتسياليستىك زاتتىق وركەنيەتتە، ساياسي وركەنيەتتە، رۋحاني وركەنيەتتە جانە پارتيا قۇرىلىسىندا كۇللى دۇنيەنى جالت قاراتقان تىڭ ىلگەرىلەۋشىلىككە قول جەتكىزۋدى ىلگەرىلەتىپ، ءساتتى تۇردە جۇڭگوشا سوتسياليزمدى 21 - عاسىرعا باستادى.
جياڭ زىمين جولداس دۇنيە جۇزىندەگى جاڭا اسكەري ىستەر وزگەرىستەرىنىڭ دامۋ بەتالىسىن تەرەڭ باعامداپ، جاڭا كەزەڭدەگى اسكەري ىستەر ستراتەگيالىق باعىتىن بەلگىلەۋ جۇمىسىن باسقارىپ، جۇڭگوشا اسكەري ىستەر وزگەرىسىن ىلگەرىلەتۋدى، جۇڭگوشا ارميانى بىرەگەيلەندىرۋ جولىمەن بۇلجىماي ءجۇرۋدى، حالىق ارمياسىن توڭكەرىستەندىرۋ، وسىزامانداندىرۋ، جۇيەلىلەندىرۋ قۇرىلىسىن كۇشەيتۋدى باسا دارىپتەدى. ول بىلاي دەپ باسا دارىپتەدى: ”وسى جىلدارى زەيىنىمدى شوعىرلاندىرا يگەرگەن ماسەلە، ءبىر اۋىز سوزگە جيناقتاسام، ارميامىز شايقاستا جەڭىپ شىعا الا ما، جوق پا؟ ساپاسى وزگەرىپ كەتە مە، جوق پا دەگەن ماسەلە بولدى“. ول پارتيانىڭ حالىق ارمياسىنا شارتسىز باسشىلىعىنا بۇلجىماي تاباندى بولۋدى، اسكەري بولىمدەردىڭ ساياسيدا تولىمدى، اسكەري ىستەردە ىسىلعان، ستيلى تاماشا، ءتارتىبى قاتاڭ، قامتاماسىزدىعى پارمەندى بولۋىن، حالىق ارمياسىنىڭ سيپاتىن، قاسيەتىن، ستيلىن ماڭگى ساقتاۋدى، اسكەري كۇرەس دايىندىعىنىڭ نەگىزگى ءتۇيىنىن ينفورماتسيالانۋ جاعدايىنداعى ءىشىنارالىق سوعىستىڭ جەڭىسىنە قول جەتكىزۋگە قويۋدى، مەملەكەت قورعانىسىنىڭ جانە قارۋ - جاراقپەن جابدىقتالۋدىڭ دامۋىن جەدەلدەتۋدى باسا دارىپتەدى. ول ارميا، قارۋلى ساقشى ءبولىمى جانە ساياسي - زاڭ ورگاندارى بارلىق ەكونوميكا - ساۋدا قيمىلدارىن، ءسوز جوق، ءۇزىلدى - كەسىلدى توقتاتۋى كەرەك دەگەن ستراتەگيالىق شەشىم جاسادى. جياڭ زىمين جولداستىڭ تىكەلەي باسشىلىق ەتۋىندە جانە زور كۇشپەن ىلگەرىلەتۋىندە، ەلىمىزدىڭ مەملەكەت قورعانىسى مەن ارميانى وسىزامانداندىرۋ قۇرىلىسى وراسان زور تابىسقا قول جەتكىزدى.
جياڭ زىمين جولداس يدەيانى ازات ەتۋگە، شىندىقتى ءىس جۇزىنەن ىزدەۋگە، داۋىرمەن بىرگە العا باسۋعا تاباندى بولىپ، امالياتقا قۇرمەت ەتىپ، بۇقاراعا قۇرمەت ەتىپ، جۇڭگوشا سوتسياليزم قۇرۋ سىندى نەگىزگى تاقىرىپتى ارقاۋ ەتە وتىرىپ ءبىر قىدىرۋ جاڭا يدەيالار، جاڭا كوزقاراستار، جاڭا تۇجىرىمدار العا قويىپ، پارتيانىڭ نەگىزگى نازارياسىنا، نەگىزگى لۋشيانىنا، نەگىزگى تۇعىرناماسىنا، نەگىزگى تاجىريبەلەرىنە تاباندى بولۋعا جانە ونى دامىتۋعا كورنەكتى ۇلەس قوستى. اسىرەسە، ول بۇكىل پارتيانىڭ اقىل - پاراساتىن شوعىرلاندىرىپ، ”ۇشكە ۋاكىلدىك ەتۋ“ ماڭىزدى يدەياسىن ورناتىپ، سوتسياليزم دەگەن نە؟ سوتسياليزمدى قالاي قۇرۋ كەرەك دەگەن ماسەلەگە ىشكەرىلەي جاۋاپ بەرىپ، قانداي پارتيا قۇرۋ؟ پارتيانى قالاي قۇرۋ ماسەلەسىنە جاسامپازدىقپەن جاۋاپ بەرىپ، ءبىزدىڭ جاڭا ءداۋىر شارت - جاعدايىندا جۇڭگوشا سوتسياليزم ىستەرىن ىلگەرىلەتۋدىڭ، پارتيا قۇرىلىسىن كۇشەيتۋدىڭ زاڭدىلىعى جونىندەگى تانىمىمىزدى تەرەڭدەتىپ، جاڭا يدەيا، كوزقاراس، تۇجىرىم ارقىلى ماركسيزم - لەنينيزمگە، ماۋ زىدۇڭ يدەياسىنا، دىڭ شياۋپيڭ نازارياسىنا مۇراگەرلىك ەتتى جانە ونى بايىتتى، دامىتتى.
پارتيا 13 - كەزەكتى ورتالىق كوميتەتىنىڭ ءتورتىنشى جالپى ماجىلىسىنەن كەيىنگى 13 جىلدا، جياڭ زىمين جولداس ءبىزدىڭ ەلىمىزدىڭ يەلىك ۇقىعى مەن حاۋىپسىزدىگىنە قاتىستى ءبىر قىدىرۋ حالىقارالىق توسىن وقيعالارعا بايىپپەن توتەپ بەرۋىمىزگە، ساياسي، ەكونوميكا سالاسىندا جانە تابيعات دۇنيەسىندە تۋىلعان قيىنشىلىقتار مەن حاۋىپ - قاتەرلەردى جەڭۋىمىزگە باسشىلىق ەتتى، اسىرەسە، ءبىزدىڭ ازيا فينانس داعدارىسىنىڭ سوققىسىنا ءساتتى توتەپ بەرۋىمىزگە، 1998 - جىلعى ەرەكشە زور تاسقىن اپاتىن جەڭىپ شىعۋىمىزعا، ت. ب باسشىلىق ەتىپ، رەفورما جاساۋ، ەسىك اشۋ جانە سوتسياليستىك وسىزامانداندىرۋ قۇرىلىسى كەمەسىنىڭ باستان - اياق دۇرىس بەتالىسپەن تولقىن جارا العا ىلگەرىلەۋىنە كەپىلدىك ەتتى.
جياڭ زىمين جولداس پارتيا مەن حالىق ىستەرىنە ساياتىن كەلەلى ستراتەگيالىق ماسەلەلەرگە ايرىقشا ءمان بەردى. پارتيا 16 - قۇرىلتايىنا دايىندىق كورۋ كەزىندە، پارتيا مەن مەملەكەتتىڭ جوعارى جىگىندەگى باسشىلاردا كونە مەن جاڭانىڭ الماسۋىن جەبەۋگە ءتيىمدى بولۋى ءۇشىن، ول ورتالىق كوميتەتتىڭ باسشىلىق قىزمەتىن ەندىگارى وتەمەيتىندىگىن، سونداي - اق ورتالىق كوميتەتتەن شەگىنەتىندىگىن ىرىقتى تۇردە العا قويدى. پارتيا ورتالىق كوميتەتى جياڭ زىمين جولداستىڭ وتىنىشىنە قوسىلدى. 2004 - جىلى ول ءوزى اتقارعان پارتيا مەن مەملەكەتتىڭ ورتالىق اسكەري ىستەر كوميتەتىنىڭ ءتوراعاسى مىندەتىنەن بوساۋدى دا ىرىقتىلىقپەن العا قويىپ، پارتيا مەن مەملەكەت ىستەرىنىڭ دامۋىن تەرەڭنەن تولعاپ، الىستى ويلايتىندىعىن تولىق ايگىلەدى.
باسشىلىق ورىننان شەگىنگەننەن كەيىن، جياڭ زىمين جولداس پارتيا ورتالىق كوميتەتىنىڭ قىزمەتىن باتىل قۋاتتاپ جانە قولداپ، جۇڭگوشا سوتسياليزم ۇلى ىستەرىنە كوڭىل ءبولىپ، پارتيا ستيلى، پاكتىك قۇرىلىسىن جانە شىرىكتەسۋگە قارسى تۇرۋ كۇرەسىن باتىل قولدادى. 2006 - جىلى جياڭ زىمين جولداس «جياڭ زىمين ماقالالارىنان تاڭدامالىلاردىڭ» 1 - ، 2 - ، 3 - تومدارىن رەداكسيالاۋ جۇمىسىن ءوزى باسقارىپ جۇرگىزىپ جانە ماقالالاردى ءبىر - بىردەن تەكسەرىپ بەكىتىپ، ءبىزدىڭ جۇڭگوشا سوتسياليزم ۇلى ىستەرى مەن پارتيا قۇرىلىسىنىڭ جاڭا دا ۇلى ينجەنەرياسىن ۇزدىكسىز ىلگەرىلەتۋىمىزگە ماڭىزدى وقۋلىق ۇسىندى.
جياڭ زىمين جولداس ۇزاق ۋاقىتتىق توڭكەرىس امالياتى بارىسىندا ايقىن توڭكەرىستىك رۋح پەن توڭكەرىستىك قاسيەتتى شىڭدادى. جياڭ زىمين جولداس الىسقا كوز جىبەرىپ، اۋقىمدى باعامداي ءبىلدى، قاشاندا جۇڭگو مەن دۇنيە ءجۇزىنىڭ دامۋ اۋقىمىن، پارتيا مەن مەملەكەت قىزمەتىنىڭ جالپى جاعدايىن نەگىز ەتە وتىرىپ ماسەلەلەرگە كوز جىبەرىپ جانە وي جۇگىرتىپ، نازاريادا جاڭالىق اشۋدى جانە باسقا دا جاقتاردا جاڭالىق اشۋدى ۇزدىكسىز ىلگەرىلەتتى. جياڭ زىمين جولداس سەنىمدە بەرىك، جۇمىس جۇرگىزۋدە باتىل بولدى، قاشاندا پارتيا مەن حالىقتى جۇرەگىنىڭ ەڭ بيىك تورىنە قويىپ، كوممۋنيستەردىڭ مۇرات - سەنىمىنە باستان - اياق اينىماي تاباندى بولدى، شەشۋشى ساتتە باتىل شەشىم جاسايتىن ەرەك پايىم - پاراساتقا جانە نازاريادا جاڭالىق اشاتىن وراسان زور جۇرەكتىلىككە يە. جياڭ زىمين جولداس امالياتقا قۇرمەت ەتىپ، داۋىرمەن بىرگە العا باستى، قاشاندا ءداۋىردىڭ دامۋ اۋقىمى مەن ورايىن مىقتى يگەرىپ، پارتيا مەن حالىقتىڭ جاندى امالياتىن نەگىز ەتە وتىرىپ تاجىريبەلەردى قورىتىندىلاۋعا، جول تابۋعا تاباندى بولىپ، پارتيا مەن مەملەكەتتىڭ ءتۇرلى قىزمەتتەرىن تىڭعىلىقتى تۇردە ءارى ءورىس اشا العا ىلگەرىلەتتى. جياڭ زىمين جولداس بۇقارانى قۇرمەتتەدى، بۇقاراعا كوڭىل ءبولدى، قاشاندا حالىق بۇقاراسىنىڭ حال - جاعدايىنا باسا نازار اۋدارىپ، قىزمەتتى ەڭ قالىڭ حالىقتىڭ ءتۇبىرلى مۇددەسى نەگىزىندە سىننان وتكىزدى جانە ىلگەرىلەتتى. جياڭ زىمين جولداستىڭ توڭكەرىستىك رۋحى مەن توڭكەرىستىك قاسيەتى ءبىزدىڭ جۇرەگىمىزدە ماڭگى ساقتالادى، ءبىزدى العا باسۋعا ماڭگى تاربيەلەيدى جانە شابىتتاندىرادى.
جياڭ زىمين جولداستىڭ قايتىس بولۋى − پارتيامىز، ارميامىز، ەلىمىزدەگى ءار ۇلت حالقى ءۇشىن ولشەۋسىز جوعالتۋ. پارتيا ورتالىق كوميتەتى بۇكىل پارتيانى، بۇكىل ارميانى، بۇكىل ەلدەگى ءار ۇلت حالقىن قايعىنى قايراتقا جەڭدىرىپ، جياڭ زىمين جولداستىڭ مۇراتىنا مۇراگەرلىك ەتىپ، ءىس جۇزىندىك ارەكەتپەن قايعىلى ساعىنىشىمىزدى ءبىلدىرىپ، جۇڭگوشا سوتسياليزم جولىندا پارتيا مەن مەملەكەت ىستەرى دامۋىنىڭ تىڭ تاراۋىن ۇزدىكسىز جازۋعا ۇندەيدى.
− ماركسيزم − ءبىزدىڭ پارتيا قۇرۋداعى، مەملەكەت قۇرۋداعى، پارتيانى گۇلدەندىرۋدەگى، مەملەكەتتى گۇلدەندىرۋدەگى ءتۇبىرلى جەتەكشى يدەيامىز. جياڭ زىمين جولداستىڭ بىزگە قالدىرعان ەڭ باعالى بايلىعى − ”ۇشكە ۋاكىلدىك ەتۋ“ ماڭىزدى يدەياسى. ول: ”مەن بۇل ماسەلەنى ۇزاق ۋاقىت وي ەلەگىنەن وتكىزۋدەن كەيىن العا قويدىم“.”’ۇشكە ۋاكىلدىك ەتۋ‘ يدەياسى جوقتان جونىپ تاپقان نارسە ەمەس، قايتا ءبىزدىڭ 13 جىلدان بەرگى نازاريا مەن امالياتتا توقتاۋسىز ىزدەنىس جاساۋىمىزدىڭ جانە ءورىس اشۋىمىزدىڭ جەمىسى“، - دەگەن ەدى. ”ۇشكە ۋاكىلدىك ەتۋ“ ماڭىزدى يدەياسى − پارتيا، ءسوز جوق، ۇزاق ۋاقىت تاباندى بولۋعا ءتيىستى جەتەكشى يدەيا. جاڭا جورىقتا، ءبىز، ءسوز جوق، ماركسيزمنىڭ نەگىزگى قاعيدالارىن جۇڭگونىڭ ناقتى ءىس جۇزىندىگىمەن ۇشتاستىرۋعا، جۇڭحۋانىڭ تاڭداۋلى ءداستۇرلى مادەنيەتىمەن ۇشتاستىرۋعا تاباندى بولىپ، بارلىعىندا ءىس جۇزىندىكتى نەگىزگە الۋعا تاباندى بولىپ، جۇڭگونىڭ سۇراعىنا، دۇنيە ءجۇزىنىڭ سۇراعىنا، حالىقتىڭ سۇراعىنا، ءداۋىردىڭ سۇراعىنا ۇزبەي جاۋاپ بەرىپ، ماركسيزمنىڭ جالىندى تىرشىلىك تىنىسى مەن قاۋلاعان ومىرشەڭدىگىن باستان - اياق ساقتاۋىمىز كەرەك.
− جۇڭگو كوممۋنيستىك پارتياسىنىڭ باسشىلىعى − پارتيا مەن حالىق ىستەرىنىڭ بوران - شاشىنعا بوگەلمەي العا ىلگەرىلەۋىنىڭ ءتۇبىرلى كەپىلى. جياڭ زىمين جولداس شىنايى جان اشىرلىقپەن تەرەڭىنەن تولعاپ: ”قارت كوممۋنيست رەتىندە، مەن بۇكىل پارتياداعى جولداستاردىڭ، اسىرەسە، ورتالىق كوميتەتتەگى ءارقايسى جولداستاردىڭ قاي - قاشان دا پارتيانى جۇرەگىنىڭ ەڭ بيىك تورىنە قويىپ، قاي - قاشان دا ءتۇرلى قىزمەتتەردە پارتيانىڭ باسشىلىعىنا سانالىلىقپەن تاباندى بولۋىن جانە ونى قورعاۋىن شىن نيەتىممەن ءۇمىت ەتەمىن، پارتيامىز بەن مەملەكەتىمىزدىڭ ءۇمىتى وسىندا“، - دەگەن ەدى. جاڭا جورىقتا، ءبىز، ءسوز جوق، ”ەمتيحان تاپسىراتىن“ سەرگەكتىك پەن باتىلدىقتى ساقتاپ، ”ءتورت تانىمدى“ كۇشەيتىپ، ”ءتورت سەنىمدى“ بەكەمدەپ، ”ەكىنى قورعاۋدى“ ورىنداپ، پارتيا قۇرۋ ۇلى رۋحىن اسقاقتاتىپ، اۋەلگى ماقسات پەن بورىشتى ۇمىتپاي، ءوز - وزىمىزگە توڭكەرىس جاساۋدى باتىلدىقپەن ىلگەرىلەتىپ، پارتيانىڭ جاڭا داۋىردە جۇڭگوشا سوتسياليزمگە تاباندى بولۋدىڭ جانە ونى دامىتۋدىڭ تاريحي ۇردىسىندە باستان - اياق پارمەندى باسشىلىق ۇيتقى بولۋىنا شىنايى كەپىلدىك ەتۋىمىز كەرەك.
− جۇڭگوشا سوتسياليزم جولى − زامانىمىزداعى جۇڭگونىڭ ارشىندى قاداممەن ءداۋىر كوشىن قۋىپ جەتۋىنىڭ، ءداۋىردىڭ دامۋىنا جەتەكشىلىك ەتۋىنىڭ داڭعىل جولى. 2001 - جىلى جياڭ زىمين جولداس جۇڭگو كوممۋنيستىك پارتياسى قۇرىلعاندىعىنىڭ 80 جىلدىعىن قۇتتىقتاۋ جينالىسىندا: 80 جىلدىق اماليات بىزگە مىناداي وي سالدى، ءسوز جوق، ءوز جولىمىزبەن بۇلجىماي ءجۇرۋىمىز كەرەك، بۇل پارتيامىزدىڭ تاريحىن قورىتىندىلاۋدان شىققان ەڭ نەگىزگى تاجىريبە دەپ باسا دارىپتەگەن ەدى. جاڭا جورىقتا، ءبىز، ءسوز جوق، جۇڭگوشا سوتسياليزم جولىنا تاباندى بولىپ، پارتيانىڭ نەگىزگى نازارياسىنا، نەگىزگى لۋشيانىنا، نەگىزگى جالپى جوباسىنا تاباندى بولىپ، وزىمىزگە سەنۋگە، ءوزىمىزدى الۋەتتەندىرۋگە، تۋراشىلدىقتان جازباي، جاڭالىق اشۋعا تاباندى بولىپ، ءوزىمىز تاڭداعان دۇرىس جولدا كوكىرەك كەرە ارشىندى قاداممەن العا باسىپ، جۇڭگو ۇلگىسىندەگى وسىزامانداندىرۋ ارقىلى جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋىمىز كەرەك.
− حالىق − پارتيا مەن مەملەكەتتىڭ بولاشاعىن، تاعدىرىن بەلگىلەيتىن ءتۇبىرلى كۇش. جياڭ زىمين جولداس حالىققا شەكسىز ادال بولدى، حالىقتى قاشاندا كوكەيىندە ساقتادى. ول ”حالىق بۇقاراسىن نەگىز ەتۋ“ كەرەكتىگىن العا قويىپ، ”ەڭ كوپ ساندى ادامنىڭ مۇددەسى ەڭ ماڭىزدى جانە ەڭ شەشۋشى سيپاتقا يە فاكتور. بۇل ماركسيزمنىڭ نەگىزگى كوزقاراسى“ ەكەندىگىن، ءسوز جوق، ەڭ كەڭ حالىق بۇقاراسىنىڭ ءتۇبىرلى مۇددەسىن ۇزدىكسىز تۇردە ويداعىداي جۇزەگە اسىرۋدى، ويداعىداي قورعاۋدى، ويداعىداي دامىتۋدى قايتا - قايتا باسا دارىپتەگەن ەدى. جاڭا جورىقتا، ءبىز، ءسوز جوق، حالىقتى بارىنەن جوعارى قويۋعا تاباندى بولىپ، بۇكىل ىنتا - پەيىلىمىزبەن حالىق ءۇشىن قىزمەت ىستەپ، حالىقتى وزەك ەتكەن دامۋ يدەياسىن دايەكتىلەندىرىپ، جالپى بارىستىق حالىق دەموكراتياسىن دامىتىپ، قاشاندا حالىق بۇقاراسىمەن ەتەنە بايلانىستى ساقتاپ، قاشاندا حالىقپەن تىنىستاس، تاعدىرلاس، تىلەكتەس بولىپ، ادامنىڭ جان - جاقتى دامۋىن، جالپى حالىقتىڭ بىرگە بايۋىن ىلگەرىلەتۋدە اناعۇرلىم كورنەكتى ماندىك ىلگەرىلەۋشىلىككە قول جەتكىزۋىمىز كەرەك.
− رەفورما جاساۋ، ەسىك اشۋ − زامانىمىزداعى جۇڭگونىڭ بولاشاعىن، تاعدىرىن بەلگىلەيتىن شەشۋشى شارا. جياڭ زىمين جولداس: ”نازاريادا جاڭالىق اشۋ ارقىلى تۇزىمدە جاڭالىق اشۋدى، عىلىم - تەحنيكادا جاڭالىق اشۋدى، مادەنيەتتە جاڭالىق اشۋدى، سونداي - اق باسقا دا جاقتاردا جاڭالىق اشۋدى ىلگەرىلەتىپ، اماليات بارىسىندا ۇزدىكسىز ىزدەنىس جاساپ، العا باسۋىمىز، ماڭگى توقمەيىلسىمەۋىمىز، ماڭگى بويكۇيەزدىك ىستەمەۋىمىز كەرەك، بۇل پارتيانى باسقارۋدا، ەل باسقارۋدا، ءبىز ۇزاق ۋاقىت تاباندى بولاتىن جول“ دەپ باسا دارىپتەگەن ەدى. جاڭا جورىقتا، ءبىز، ءسوز جوق، وزگەرىستى دالمە - ءدال تانىپ، وزگەرىسكە عىلمي توتەپ بەرىپ، وزگەرىسكە ىرىقتىلىقپەن ۇمتىلىپ، جاڭا دامۋ ۇستانىمىن دايەكتىلەندىرىپ، جاڭا دامۋ ارناسىن قالىپتاستىرىپ، جوعارى ساپالى دامۋدى ىلگەرىلەتىپ، رەفورما جاساۋدى، ەسىك اشۋدى جاپپاي ىلگەرىلەتىپ، جۇڭگوشا سوتسياليزم ءتۇزىمىن ۇزدىكسىز كەمەلدەندىرىپ، مەملەكەتتى باسقارۋ جۇيەسى مەن باسقارۋ قابىلەتىن وسىزامانداندىرۋدى ىلگەرىلەتىپ، باسىمدىققا، ىرىقتىلىققا، بولاشاققا ۇزدىكسىز قول جەتكىزۋىمىز كەرەك.
− جۇڭگونىڭ دامۋى دۇنيە جۇزىنەن قول ۇزە المايدى، دۇنيە ءجۇزىنىڭ گۇلدەنۋى دە جۇڭگونى قاجەت ەتەدى. جياڭ زىمين جولداس ءبىز، ءسوز جوق، تاريح اعىمىنا ۇيلەسىپ، ءادىل، ۇيلەسىمدى حالىقارالىق ساياسي - ەكونوميكانىڭ جاڭا ءتارتىبىن ورناتۋدى ىلگەرىلەتىپ، ۇزاق ۋاقىت بەيبىت حالىقارالىق ورتاعا قول جەتكىزۋگە قۇلشىنىپ، ەلىمىزدىڭ مەملەكەت حاۋىپسىزدىگى مەن مۇددەسىن جان - جاقتى قورعاپ، ادامزاتتىڭ بەيبىتشىلىگى مەن دامۋىنىڭ يگى ىستەرى ءۇشىن ۇزدىكسىز تىڭ، اناعۇرلىم كەسەك ۇلەس قوسۋىمىز كەرەك دەپ باسا دارىپتەگەن ەدى. جاڭا جورىقتا، ءبىز، ءسوز جوق، بۇكىل الەمگە قۇشاق اشۋعا تاباندى بولىپ، بەيبىتشىلىك، دامۋ، سەلبەستىك، تەڭ يگىلىككە كەنەلۋ تۋىن بيىك ۇستاپ، بۇكىل ادامزاتقا ورتاق قۇندىلىقتاردى اسقاقتاتىپ، ”ءبىر بەلدەۋ، ءبىر جولدى“ بىرگە قۇرۋدىڭ جوعارى ساپالى دامۋىن ىلگەرىلەتىپ، جاڭاشا حالىقارالىق قارىم - قاتىناس ورناتۋدى ىلگەرىلەتىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتىپ، دۇنيە جۇزىندەگى بارلىق العاباسار كۇشتەرمەن قول ۇستاسا العا ىلگەرىلەۋىمىز كەرەك.
− باتىلدىقپەن كۇرەس جۇرگىزۋ، باتىلدىقپەن جەڭىسكە جەتۋ − جۇڭگو كوممۋنيستىك پارتياسى مەن جۇڭگو حالقىنىڭ جەڭىلمەس قۋاتتى رۋحاني كۇشى. جياڭ زىمين جولداس: ”پارتيامىز حالىققا باسشىلىق ەتىپ سوتسياليستىك وسىزاماندانۋ قۇرىلىسىنىڭ ۇلى كۇرەسىن جۇرگىزۋدە، بۇل بارىستا كوپتەگەن كۇردەلى جاعدايلارعا تاپ بولماي قويمايدى، حالىقارالىق جانە ەل ىشىندەگى قاتاڭ جاعداي مەن تۇرلىشە قوعامدىق تۇزىمدەردىڭ، تۇرلىشە يدەيالىق جۇيەلەردىڭ قاراما - قارسىلىعى مەن كۇرەسى ءاربىر پارتيا مۇشەسىن ۇنەمى سىناقتان وتكىزەدى“، ”بارلىق جاۋدىڭ دەسىن باساتىن قاھارمان ارىن بولۋ كەرەك“، ”ادام ءوزىنىڭ ارداقتى باسىن يۋىنە بولمايدى“ دەپ باسا دارىپتەگەن ەدى. جاڭا جورىقتا، ءبىز، ءسوز جوق، ۋاقىتپەن جارىساتىن، قايراتتانا ىسكەرلىك كورسەتەتىن كۇرەسكەرلىك بەينەنى جانە نەعۇرلىم قيىن، قاتەرلى بولعان سايىن سولعۇرلىم العا ۇمتىلاتىن كۇرەسكەرلىك رۋحتى ساقتاپ، تاريحي ىرىقتىلىقتى يگەرىپ، بۇكىل پارتيانىڭ، بۇكىل ەلدەگى ءار ۇلت حالقىنىڭ جىگەرىن، جالىنىن، سەنىمىن كۇشەيتىپ، زۇلىم كۇشكە سەنبەي، سۇرقيا كۇشتەن قورىقپاي، قىسىمنان جاسقانباي، العا باسۋ جولىنداعى ءتۇرلى قيىنشىلىق پەن سىن - سايىستى كۇش سالا جەڭۋىمىز كەرەك.
جولداستار، دوستار!
جياڭ زىمين جولداس بىزبەن ماڭگىلىككە قوشتاستى. ونىڭ ۇلاعاتتى ەسىمى، ەڭبەگى، يدەياسى، قاسيەتى تاريحقا ماڭگى جازىلىپ، ۇرپاقتار بويى حالىق جۇرەگىندە ساقتالادى. بۇكىل پارتيا، بۇكىل ارميا، بۇكىل ەلدەگى ءار ۇلت حالقى پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، قايراتتانا ۇمتىلىپ، ەرلىكپەن العا باسىپ، جاپپاي سوتسياليستىك وسىزاماندانعان مەملەكەت قۇرۋ، جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋ جولىندا ىنتىماقتاسا كۇرەس جۇرگىزۋى كەرەك.
جياڭ زىمين جولداس ماڭگى جاسايدى!
(شينحۋا اگەنتتىگىنىڭ 12 - ايدىڭ 6 - كۇنى بەيجيڭنەن بەرگەن حابارى)
