ماڭگىلىككە قوشتاسقان شاق، العا ىلگەرىلەيتىن شاق
− جياڭ زىمين جولداسقا ازا ءبىلدىرۋ جينالىسىنان ەستەلىك
ءدال وسى ساتتە، تاۋ - وزەن تىنىشتىققا شومىپ، اسپان مەن جەر قاسىرەت شەكتى.
ءدال وسى كورىنىستە، قايعىلى ساعىنىش جالعاستى، ساعىنىش سارقىلمادى.
2022 - جىلى 12 - ايدىڭ 6 - كۇنى تۇستەن بۇرىن، استانا بەيجيڭ، حالىق سارايى.
باس شۋجي شي جينپيڭ قاتارلى پارتيا مەن مەملەكەت باسشىلارى ءار سالا ۋاكىلدەرىنەن كەلگەن 5000 اداممەن بىرگە ءۇنسىز تۇرىپ، قادىرلى جياڭ زىمين جولداسقا قايعىلى ازا ءبىلدىردى.
”ءبىز جياڭ زىمين جولداستى قادىرلەيمىز، جياڭ زىمين جولداستى ساعىنا ەسكە الامىز، ويتكەنى ول عۇمىرىندا بارلىق جۇرەك قانى مەن قاجىر - قايراتىن جۇڭگو حالقىنا ارناپ، ۇلتتىڭ تاۋەلسىزدىگىنە، حالىقتىڭ ازاتتىعىنا قول جەتكىزۋ جانە مەملەكەتتىڭ باي - قۇدىرەتتى بولۋىن، حالىقتىڭ باقىتتى بولۋىن جۇزەگە اسىرۋ ءۇشىن اقتىق دەمىنە دەيىن قىزمەت ەتىپ، عۇمىر بويى كۇرەس جاساپ ءوتتى“. باس شۋجي شي جينپيڭ سويلەگەن ازالى ءسوزى حالىق سارايىندا ۇزاققا دەيىن جاڭعىرىپ تۇردى، ميللياردتاعان حالىقتىڭ جۇرەگىندە ۇزاققا دەيىن جاڭعىرىپ تۇردى.
قىس ايىنداعى تيان - انمىن الاڭى، ىزعارلى جەل ازىناۋدا.
تۇستەن بۇرىن ساعات 7دەن 21 مينۋت وتكەندە بەس جۇلدىزدى قىزىل تۋ ايبىندى «ەرىكتىلەر مارشى» اۋەنى ىشىندە باعانا باسىنا دەيىن كوتەرىلگەننەن كەيىن، قايتادان باياۋ ءتۇسىرىلدى.
بۇگىن بۇكىل ەل بويىنشا تۋ جارتىلاي ءتۇسىرىلىپ، ازا ءبىلدىرىلدى. بۇگىن بارلىق الەۋمەتتىك كوڭىل اشۋ قيمىلدارى توقتاتىلدى.
ازا بىلدىرگەن ادامدار قاۋىمى شار تاراپتان كەلدى. ورتالىق پەن مەملەكەت ورگاندارىنىڭ ءارقايسى تاراۋلارىنىڭ ۋاكىلدەرى كەلدى، بۇكىل ەلدەگى ءارقايسى ولكە، اۆتونوميالى رايون، توتە قاراستى قالالاردىڭ ۋاكىلدەرى كەلدى، ازاتتىق ارميا جانە قارۋلى ساقشى بولىمدەرىندەگى وفيتسەر - اسكەرلەردىڭ ۋاكىلدەرى كەلدى، جياڭ زىمين جولداستىڭ كوزى تىرىسىندەگى دوستارى مەن اۋىلداستارىنىڭ ۋاكىلدەرى كەلدى...
ولار اۋىر قاداممەن باياۋ باسىپ حالىق سارايىنىڭ شىعىس ەسىگىنىڭ سىرتىنداعى باسپالداقتان شىقتى، كەۋدەلەرىنە تاققان اق گۇل ىزعارلى جەلدە تەربەلدى.
”4 ميلليوننان استام ياڭجوۋ حالقىنىڭ ۋاكىلى رەتىندە، مەن قادىرلى جياڭ زىمين جولداستى سوڭعى ساپارعا شىعارىپ سالۋعا كەلدىم“. ياڭجوۋ قالالىق حالىق قۇرىلتايى تۇراقتى كوميتەتىنىڭ بۇرىنعى ورىنباسار مەڭگەرۋشىسى ۋاڭ ميننىڭ كوز شاناعىنان جاس مولتىلدەدى، ”جياڭ زىمين جولداستىڭ زەينەتكە شىققاننان كەيىن اۋىلىنا قايتىپ تۋىسشىلاعان كەزدەگى كورىنىستەرى ءالى دە كوز الدىمىزدا، جايدارى كۇلكى ءۇنى قۇلاعىمىزدان كەتپەيدى. اۋىلىنداعى حالىق وسى ’كونە كورشىلەرىن‘ ساعىندى، ول كىسى ءبىزدىڭ جۇرەگىمىزدە ماڭگى جاسايدى“.
قارداي اپپاق گۇلدەر، وكسىك اتقان ازالى ءسوز.
حالىق سارايىنىڭ ورتالىق زالى مەن ۇلكەن زالىنىڭ ءىشىنىڭ اينالاسىنا تولتىرا قويىلعان، گۇل شارباقتارى بۇكىل پارتيانىڭ، بۇكىل ارميانىڭ، بۇكىل ەلدەگى ءار ۇلت حالقىنىڭ شەكسىز قايعىلى ساعىنىشىن تەرەڭ سەزىممەن جەتكىزىپ تۇر.
جينالىس الاڭى ايبىندى بەينەگە شومىپ، ازالىق تورعىندار تىپ - تىنىش توگىلىپ تۇر.
ءتوراعالار مىنبەسىنىڭ ءدال ورتاسىنا، جياڭ زىمين جولداستىڭ ۇلكەن رەڭدى سۋرەتى قويىلعان. جياڭ زىمين جولداستىڭ سۇيەك كۇل ساۋىتى جايناعان گۇلدەر مەن جاسىل ارشالاردىڭ اراسىنا قويىلعان. ۇستىنە جابىلعان نارت قىزىل پارتيا تۋى نۇر - شۇعىلا شاشىپ، ءبىر ۇلى ماركسيزمشىنىڭ كوممۋنيزمگە دەگەن بەرىك تالپىنىسىنان سىر شەرتىپ تۇرعانداي.
تۇستەن بۇرىن ساعات 9دان 55 مينۋت وتكەندە، باس شۋجي شي جينپيڭ قاتارلى پارتيا مەن مەملەكەتتىڭ باسشى جولداستارى قايعىلى سەزىممەن باياۋ باسىپ ۇلكەن زالعا كەلىپ، تۇتاس الاڭداعىلارمەن بىرگە ءتوراعالار مىنبەسىنە قاراپ ءۇنسىز تۇردى.
ۇلكەن زال تىپ - تىنىش كۇيدە.
ساعات ءدال 10دا، ازا ءبىلدىرۋ جينالىسى باستالدى. باياۋ تولقىعان ازا مۋزيكاسىنىڭ ءۇنى شىققاندا، تۇتاس جينالىس الاڭىنداعىلار 3 مينۋت ءۇنسىز ازا ءبىلدىردى.
وتانىمىزدىڭ بايتاق دالاسى، كۇللى ەل قايعى - مۇڭعا باتتى. ازا مۋزيكاسىنىڭ اۋەنى ەلەكتر تولقىنى ارقىلى چاڭجياڭ دارياسىنىڭ تۇستىگى مەن تەرىستىگىنە، ۇلى قورعاننىڭ ءىشى مەن سىرتىنا تەگىس تارالدى، قارلى ۇستىرتكە، قالىڭ ورمانعا، ءشول دالاعا، شەكارا قورعانىسى قاراۋىلدارىنا دەيىن جەتتى، بايتاق وڭىردەگى ورگاندارعا، زاۆودتارعا، مەكتەپتەرگە، دۇكەندەرگە، ءمالى، الەۋمەتتىك اۋماقتارعا دەيىن جەتتى...
حۋاڭپۋجياڭ وزەنىندە، كەمە گۋدوگى كوك اسپانعا شىعانداپ، حۋاڭپۋجياڭ وزەنىنىڭ ەكى جاعالاۋى قاسىرەتكە شومدى.
شاڭحاي يمين ازىق - تۇلىك 1 - زاۆودى شەكتى سەرىكتەستىگىندەگى جۇمىسشى - قىزمەتكەرلەردىڭ ۋاكىلدەرى كەۋدەلەرىنە اق گۇل تاعىپ، بىلەكتەرىنە قارا بەلگى شۇپەرەك بايلاپ، ”ساقا زاۆود باستىعىنا“ ءۇنسىز ازا ءبىلدىردى.
”ساقا زاۆود باستىعى، باقىل بولعايسىز! ءسىزدىڭ ەڭبەگىڭىز تالاي ۇرپاق يمين قىزمەتكەرلەرىنىڭ جۇرەگىنە تەرەڭ ۇيالادى. ءسىزدىڭ قىزمەتتە داۋىرمەن بىرگە ىلگەرىلەيتىن، باتىلدىقپەن جاڭالىق اشاتىن قاسيەتىڭىز ءبىزدى ۇزدىكسىز العا ىلگەرىلەۋگە ماڭگى شابىتتاندىرادى“. ءوندىرىس ءبولىمىنىڭ ديرەكتورى ما دياننىڭ ءۇنى قىستىعا شىقتى.
”بۇكىل پارتيا، بۇكىل ارميا، بۇكىل ەلدەگى ءار ۇلت حالقى جياڭ زىمين جولداس سىندى وسى ۇلى تۇلعادان ايرىلىپ قالعانى ءۇشىن شەكسىز قايعىعا باتتى، دۇنيە جۇزىندەگى ءار ەل حالقى، ءار ەلدىڭ باسشىلارى جانە ءار جاقتاعى حالىقارالىق دوستار دا قايعىلى ازا ءبىلدىردى“. تۇتاس الاڭداعى قايعىلى راي ىشىندە، باس شۋجي شي جينپيڭ ازالى ءسوز سويلەپ، جياڭ زىمين جولداستىڭ وراسان ۇلى ۇلەسى مەن اسقاق قاسيەتىن تەرەڭ سەزىممەن ساعىنا ەسكە الدى.
ۋاقىت جياڭ زىمين جولداستىڭ ۇلى، شۇعىلالى ءومىرىن ادالدىقپەن ەستە بەرىك ساقتايدى.
جاس ءوسپىرىم كەزىندە وتباسى - وتانىنىڭ ويرانىن باستان كەشىرىپ، اقيقاتقا تالپىنۋدى مۇرات ەتىپ، حالىقتىق توڭكەرىستىك قوزعالىستىڭ تاسقىنىنا بەلسەنە ارالاستى؛ جاڭا جۇڭگو قۇرىلعان سوڭ، ىلگەرىندى - كەيىندى كاسىپورىنداردا، عىلمي زەرتتەۋ ورىندارىندا، مەملەكەتتىك مينيسترلىك - كوميتەتتەردە قىزمەت ىستەدى، شاڭحايدان سولتۇستىكتە چاڭچۇنگە بۇيرىق بويىنشا اۋىسىپ باردى، الىستاعى موسكۆاعا بارىپ پراكتيكادان ءوتىپ، شاڭحايعا قايتىپ كەلدى، باتىستا ۋحانعا قىزمەت اۋىستىردى، بەيجيڭگە كەلىپ مىندەت اتقاردى، ونان شاڭحايعا قايتىپ بارىپ باسشىلىق مىندەت وتەدى، 1989 - جىلى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى بولىپ سايلاندى...
”1946 - جىلى 4 - ايدا جۇڭگو كوممۋنيستىك پارتياسىنا مۇشە بولدى، وسىدان سوڭ ومىرلىك قاجىر - قايراتىن پارتيا مەن حالىققا ارنادى“، ”ءار جۇمىس ورنىندا ءوز قىزمەتىن تىڭعىلىقتى ىستەپ، قاجىرلىلىقپەن قۇلشىنىپ، وتتاي لاۋلاعان ءومىر داۋرەنىن سوتسياليستىك توڭكەرىس جانە قۇرىلىس ىستەرىنە ارناپ، رەفورما جاساۋ، ەسىك اشۋ جاعىندا قىرۋار نەگىز قالارلىق قىزمەتتەر ىستەدى“، - دەدى باس شۋجي شي جينپيڭ ازالى سوزدە تەرەڭ سەزىممەن.
96 جىلدىق تىرشىلىك عۇمىرى، 70 نەشە جىلدىق توڭكەرىستىك داۋرەنىندە، جياڭ زىمين جولداستىڭ تۇتاس ءومىرى پارتيا مەن مەملەكەتتىڭ تاعدىرىمەن بىتە قايناسىپ، جۇڭحۋا ۇلتىنىڭ قورلىقتان گۇلدەنۋگە بەت العان عاسىرلىق جورىعىنا كۋا بولدى.
جينالىس زالىنىڭ ءىشى، سول جىلدارداعى اسقاق سەزىم لاۋلاعان شاقتاردى ەسكە العان چاڭچۇن 1 - ماشينا جاساۋ زاۆودىنىڭ 89 جاستاعى بۇرىنعى قىزمەتكەرى ليۋ رىنۋي شەكسىز تولقىدى: ”جياڭ زىمين جولداس ەڭ تاماشا جاستىق كوكتەمىن 1 - ماشينا جاساۋ زاۆودىنا ارنادى. ول جاڭا جۇڭگونىڭ ماشينا ونەركاسىبى مەن شىعىس سولتۇستىكتەگى بايىرعى ونەركاسىپ بازاسى قۇرىلىسىنا قىرۋار قاجىر - قايراتىن ارناپ، بۇقارانى باستاپ قاجىرلىلىقپەن شارۋاشىلىق قۇرىپ، مەملەكەتكە تۇتاس ءومىرىن ارنادى“.
تاريح جياڭ زىمين جولداستىڭ ماڭگى وشپەس ەلەۋلى ەڭبەكتەرىن جادىندا ساقتايدى.
”پايدالى بولسا ەلىمە، پەيىلمىن جاندى قيۋعا. باسىما قاتەر كەلەر دەپ، تايسالمايمىن استە مەن“ جياڭ زىمين جولداستىڭ كوڭىلدەگى مۇراتىن ايقىن بىلدىرەتىن حۇسنيحات تۋىندىسى سۋرەتى بىرنەشە كۇننەن بەرى ينتەرنەتتە كەڭىنەن جالعاپ تاراتىلدى.
ازالى سوزدە، باس شۋجي شي جينپيڭ بىلاي دەپ اتاپ كورسەتتى: ”جياڭ زىمين جولداس پارتيا مەن ارميانىڭ نەگىزگى باسشىسى مىندەتىن اتقارعان كەز ەلىمىز سىرتتان قىسىم تۇسكەن، ىشتە قيىنشىلىق قىسقان اۋىر كەزەڭ ەدى، سوندىقتان مۇنى قىسىلتاياڭ ساتتە مىندەت قابىلدادى دەۋگە بولادى. جياڭ زىمين جولداس باتىل تۇردە: ’پارتيا مەن حالىقتىڭ ىستەرى ءۇشىن مەن، ءسوز جوق، اقتىق دەمىمە دەيىن قىزمەت ەتىپ، بار ءومىرىمدى ارنايمىن‘، - دەدى“.
پارتيا 13 - كەزەكتى ورتالىق كوميتەتىنىڭ ءتورتىنشى جالپى ماجىلىسىنەن پارتيانىڭ 16 - قۇرىلتايىنا دەيىنگى 13 جىل ۋاقىتتا حالىقارالىق جاعداي اۋمالى - توكپەلى بولدى، ەلىمىزدىڭ رەفورما جاساۋ، ەسىك اشۋ جانە سوتسياليستىك وسىزامانداندىرۋ قۇرىلىسى قۇلاشىن كەڭگە جايدى.
سوتسياليستىك بازار شارۋاشىلىعى ءتۇزىلىسى رەفورماسىنىڭ نىسانالارى مەن نەگىزگى جۇلگەسى تۇراقتاندىرىلدى، دۇنيە ءجۇزى ساۋدا ۇيىمىنا كىردىك، مەملەكەتتى زاڭمەن باسقارۋدىڭ نەگىزگى جالپى جوباسى اتقارىلدى، شياڭگاڭنىڭ، اۋمىننىڭ وتان قۇشاعىنا ورالۋى جۇزەگە استى، بەيجيڭ وليمپيادا سپورت جارىسىن وتكىزۋگە ءوتىنىش ەتۋ ءساتتى بولدى، شاڭحاي سەلبەستىك ۇيىمى قۇرىلدى، پارتيا قۇرىلىسىنىڭ جاڭا ۇلى ينجەنەرياسى ىلگەرىلەتىلدى، جۇڭگوشا اسكەري ىستەر وزگەرىسى ىلگەرىلەتىلدى...
”پارتيا 13 - كەزەكتى ورتالىق كوميتەتىنىڭ ءتورتىنشى جالپى ماجىلىسىنەن كەيىنگى 13 جىلدا پارتيامىز بەن مەملەكەتىمىزدىڭ قول جەتكىزگەن وراسان زور تابىستارىن جياڭ زىمين جولداستىڭ اسقان كەمەڭگەرلىگىنەن، شەشۋشى رولىنان، ەرەن ساياسي باسشىلىق ونەرىنەن بولە قاراۋعا بولمايدى“. ازالى سوزدەگى جوعارى باعا تاريح دالەلدەگەن قورىتىندى.
جياڭ زىمين جولداستىڭ اسىل قۇلقىن، قاسيەتىن حالىق ماڭگى ساعىنا ەسكە الادى.
مىڭداعان شاقىرىم شالعايداعى حۋبەيدىڭ ۋحانىنداعى ءبىر تۇرعىندار عيماراتىندا، جيڭجوۋ قالالىق پارتكومنىڭ بۇرىنعى شۋجيى ليۋ كى - ي ۇيىندە ازا ءبىلدىرۋ جينالىسىنىڭ تىكە تاراتىلۋىن ۇيىپ كورىپ وتىر.
”ەلىمىزدىڭ يەلىك ۇقىعى مەن حاۋىپسىزدىگىنە قاتىستى ءبىر قىدىرۋ حالىقارالىق توسىن وقيعالارعا بايىپپەن توتەپ بەرىپ، ساياسي، ەكونوميكا سالاسىندا جانە تابيعات دۇنيەسىندە تۋىلعان قيىنشىلىقتار مەن حاۋىپ - قاتەرلەردى جەڭۋىمىزگە باسشىلىق ەتتى، اسىرەسە، ءبىزدىڭ ازيا فينانس داعدارىسىنىڭ سوققىسىنا ءساتتى توتەپ بەرۋىمىزگە، 1998 - جىلعى ەرەكشە زور تاسقىن اپاتىن جەڭىپ شىعۋىمىزعا، ت.ب باسشىلىق ەتتى ...“
باس شۋجي شي جينپيڭ سويلەگەن ازالى سوزدەگى وسى سويلەمدەردى ەستىگەندە، ليۋ كى - يدىڭ قيالى 24 جىلدىڭ الدىنداعى سول كەزدى شارلاپ كەتتى، ”ول 1998 - جىلى 8 - ايدىڭ 13 - كۇنى ەدى، چاڭجياڭنىڭ 5 - رەتكى تاسقىن وركەشى ورتا، تومەنگى اعارعا قاراي جوڭكىلگەن كىلتەڭ ءسات بولاتىن، جياڭ زىمين جولداس حۇڭحۋ قالاسى ۋلين قالاشىعى جۇڭشا ءمۇيىسىنىڭ قاتەرلى بولىگىندەگى توسپانىڭ ۇستىندە قولىنا داۋىس زورايتقىش كەرناي الىپ تاسقىنعا قارسى اتتانىپ، اپاتتان اراشالاپ جاتقان ارميا مەن حالىقتى تاسقىنعا قارسى اتتانىپ، اپاتتان اراشالاۋ كۇرەسىنىڭ ەڭ سوڭعى جەڭىسىنە جەتۋىنە بەل بۋۋعا جىگەرلەندىردى“.
”الىسقا كوز جىبەرىپ، اۋقىمدى باعامداي ءبىلدى“، ”سەنىمى بەرىك، ءىس تىندىرۋى باتىل بولدى“، ”امالياتقا قۇرمەت ەتىپ، داۋىرمەن بىرگە العا باستى“، ”بۇقارانى قۇرمەتتەپ، بۇقاراعا كوڭىل ءبولدى“ − جياڭ زىمين جولداستىڭ ايقىن توڭكەرىستىك رۋحى مەن توڭكەرىستىك قاسيەتى ءبىزدىڭ جۇرەگىمىزدە ماڭگىلىككە كەستەلەنىپ قالدى، ءبىزدى العا ىلگەرىلەۋگە ماڭگى تاربيەلەيدى جانە شابىتتاندىرا بەرەدى.
مۇحيتتىڭ ارعى جاعى، امەريكا نيۋ - يورك.
امەريكانىڭ جۇڭگو ماسەلەسى جونىندەگى مامانى روبەت كۋىن ينتەرنەت ارقىلى تىكە تاراتۋدى ءبىر ۋاقىتتا كورىپ وتىر، كىتاپ سورەسىندە ونىڭ «ول جۇڭگونى وزگەرتتى: جياڭ زىميننىڭ ءومىرى» اتتى شىعارماسى تۇر.
”مەنىڭ كوڭىل كۇيىم دە بەيجيڭدە ناق مايداندا تۇرعان ادامدارمەن ۇقساس، بارلىعىمىز قاتتى قايعىردىق“، - دەدى كۋىن، ”بولاشاقتا تاريحشىلار تاريحقا قايىرىلا قاراعان ساتتەرىندە، جياڭ زىميننىڭ جۇڭگو پارتياسى مەن مەملەكەتىنىڭ باسشىلىق مىندەتىن وتەگەن كەزىن جۇڭگونىڭ رەفورما جاساۋعا، ەسىك اشۋعا تاباندى بولعان جانە ونى ىلگەرىلەتكەن مەزگىلى دەيتىن بولادى“.
جۇڭحۋا ۇلتىنىڭ ۇلى گۇلدەنۋ ىسىنە جياڭ زىمين جولداستى قامتىعان سان ۇرپاق جۇڭگو كوممۋنيستەرىنىڭ قاجىر - قايراتى مەن كۇرەسى ۇيىسقان.
جۇرەكتەگى قايعىنى ارەكەتتىڭ كۇش - قۋاتىنا اينالدىردى.
ۇلكەن زالدىڭ 3 - قاباتىنداعى تەكشەگە ىلىنگەن، اق جازۋ جازىلعان، سارى جيەكتى قارا ءتۇستى كەرمە تۋ ميللياردتاعان حالىقتىڭ ورتاق ەركىن جەتكىزىپ تۇر: ”شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ باسشىلىعىندا، جياڭ زىمين جولداستىڭ مۇراتىنا مۇراگەرلىك ەتىپ، جاڭا داۋىردەگى جۇڭگوشا سوتسياليزم ۇلى ءىسىن العا ىلگەرىلەتەيىك!“
مۇراتىنا مۇراگەرلىك ەتىپ، ۇزدىكسىز كۇرەس جۇرگىزەمىز. ازالى سوزدە، باس شۋجي شي جينپيڭ جاڭا جورىقتاعى ەكپىندەي ىلگەرىلەۋ بەتالىسىن ايقىن كورسەتتى −
”ءبىز، ءسوز جوق، ماركسيزمنىڭ نەگىزگى قاعيدالارىن جۇڭگونىڭ ناقتى ءىس جۇزىندىگىمەن ۇشتاستىرۋعا، جۇڭحۋانىڭ تاڭداۋلى ءداستۇرلى مادەنيەتىمەن ۇشتاستىرۋعا تاباندى بولۋىمىز كەرەك“؛
”ءبىز، ءسوز جوق، ’ەمتيحان تاپسىراتىن‘ سەرگەكتىك پەن باتىلدىقتى ساقتاپ، ’ءتورت تانىمدى‘ كۇشەيتىپ، ’ءتورت سەنىمدى‘ بەكەمدەپ، ’ەكىنى قورعاۋدى‘ ورىنداۋىمىز كەرەك“؛
”ءبىز، ءسوز جوق، جۇڭگوشا سوتسياليزم جولىنا تاباندى بولىپ، پارتيانىڭ نەگىزگى نازارياسىنا، نەگىزگى لۋشيانىنا، نەگىزگى جالپى جوباسىنا تاباندى بولۋىمىز كەرەك“؛
”ءبىز، ءسوز جوق، حالىقتى بارىنەن جوعارى قويۋعا تاباندى بولىپ، بۇكىل ىنتا - پەيىلىمىزبەن حالىق ءۇشىن قىزمەت ىستەپ، حالىقتى وزەك ەتكەن دامۋ يدەياسىن دايەكتىلەندىرۋىمىز كەرەك“؛
”ءبىز، ءسوز جوق، وزگەرىستى دالمە - ءدال تانىپ، وزگەرىسكە عىلمي توتەپ بەرىپ، وزگەرىسكە ىرىقتىلىقپەن ۇمتىلىپ، جاڭا دامۋ ۇستانىمىن دايەكتىلەندىرىپ، جاڭا دامۋ ارناسىن قالىپتاستىرىپ، جوعارى ساپالى دامۋدى ىلگەرىلەتۋىمىز كەرەك“؛
”ءبىز، ءسوز جوق، بۇكىل الەمگە قۇشاق اشۋعا تاباندى بولىپ، بەيبىتشىلىك، دامۋ، سەلبەستىك، تەڭ يگىلىككە كەنەلۋ تۋىن بيىك ۇستاۋىمىز كەرەك“؛
”ءبىز، ءسوز جوق، ۋاقىتپەن جارىساتىن، قايراتتانا ىسكەرلىك كورسەتەتىن كۇرەسكەرلىك بەينەنى جانە نەعۇرلىم قيىن، قاتەرلى بولعان سايىن، سولعۇرلىم العا ۇمتىلاتىن كۇرەسكەرلىك رۋحتى ساقتاۋىمىز كەرەك“...
تەرەڭ ساعىنىشپەن ەسكە الۋ − اناعۇرلىم پارمەندى تۇردە العا ىلگەرىلەۋ ءۇشىن.
شاڭحاي جياۋتۇڭ داشۋەسىنىڭ اۋلاسىندا، شوق گۇلدەر جانە قولمەن جازىلعان كارتچكالار جاس وقۋشىلاردىڭ قايعىلى ساعىنىشىن بىلدىرۋدە. مينحاڭ مەكتەپ رايونى ۋىنبو عيماراتىنىڭ 1 - قاباتىنداعى جيىن زالىندا، 100گە جۋىق وقىتۋشى - وقۋشىلار ۋاكىلى قايعىلى سەزىممەن باس شۋجي شي جينپيڭ سويلەگەن ازالى ءسوزدى تىڭداۋدا.
ەلەكترون - ينفورماتسيا جانە ەلەكتر - گاز ينجەنەريا شۋەيۋانىنىڭ وقۋشىسى ياڭ دالي قول تەلەفونىنا جياڭ زىمين جولداستىڭ سول جىلدارى جياۋتۇڭ داشۋەسىنىڭ عىلمي جۋرنالىندا جاريالاعان «جاڭا داۋىردەگى ەلىمىز ينفورماتسيا تەحنيكاسى كاسىپ سالاسىنىڭ دامۋى» دەگەن عىلمي ماقالاسىن ساقتاپ الىپتى. ”ءبىز اعا مەكتەپتەسىمىزدىڭ مۇراتىنا مۇراگەرلىك ەتىپ، اعا مەكتەپتەسىمىزدىڭ رۋحىنان ۇيرەنىپ، قايعىنى قايراتقا جەڭدىرىپ، ءىلمي زەرتتەۋ سالاسىندا قامال الىپ، قيىنشىلىقتاردى جەڭىپ، جاڭالىق اشۋدى مۇرات ەتىپ، جاستىق ورالىمىزدا ۇلى داۋىردەگى ارمانعا قۇلاش سەرمەپ، پارتيا مەن مەملەكەت ىستەرىنە اقىل - پاراساتىمىز بەن كۇش - قۋاتىمىزدى ارنايمىز“.
ازالى ءسوز سويلەنگەن 50 مينۋتتان استام ۋاقىتتا تۇتاس زال تىپ - تىنىش كۇيدە تۇردى.
ازالى ءسوزدىڭ سوڭىندا باس شۋجي شي جينپيڭنىڭ ءسوزى تەرەڭ دە بەكەم بولدى −
” جياڭ زىمين جولداس بىزبەن ماڭگىلىككە قوشتاستى. ونىڭ ۇلاعاتتى ەسىمى، ەڭبەگى، يدەياسى، قاسيەتى تاريحقا ماڭگى جازىلىپ، ۇرپاقتار بويى حالىق جۇرەگىندە ساقتالادى. بۇكىل پارتيا، بۇكىل ارميا، بۇكىل ەلدەگى ءار ۇلت حالقى پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، قايراتتانا ۇمتىلىپ، ەرلىكپەن العا باسىپ، جاپپاي سوتسياليستىك وسىزاماندانعان مەملەكەت قۇرۋ، جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋ جولىندا ىنتىماقتاسا كۇرەس جۇرگىزۋى كەرەك“.
تۇتاس جينالىس الاڭىنداعىلار جياڭ زىمين جولداسقا 3 رەت تاعزىم ەتتى. باس شۋجي شي جينپيڭ قاتارلى پارتيا مەن مەملەكەتتىڭ باسشى جولداستارى جياڭ زىمين جولداستىڭ حانىمى ۋاڭ يەپيڭگە جانە تۋىس - تۋعاندارىنا بارىپ، ەڭ شىنايى ىقىلاسپەن كوڭىل ايتتى.
ايبىندى «ينتەرناتسيونال ءانى» حالىق سارايى ىشىندە جاڭعىردى.
ءبىزدىڭ ارمانىمىز سان ۇرپاق جۇڭگو كوممۋنيستەرىنىڭ تىنباي كۇرەس جاساۋىنىڭ ارقاسىندا ،ءسوز جوق، جۇزەگە اساتىن بولادى.
(شينحۋا اگەنتتىگىنىڭ 12 - ايدىڭ 6 - كۇنى بەيجيڭنەن بەرگەن حابارى، شينحۋا اگەنتتىگىنىڭ تىلشىلەرى جۋ جيچاي، ديڭ شياۋشي، حالىق گازەتىنىڭ ءتىلشىسى گۇي سۇڭلۋ)
