شي جينپيڭ ريادقا باردى
تۇڭعىش كەزەكتى جۇڭگو - اراب ەلدەرى باسشىلار ماجىلىسىنە، جۇڭگو - شىعاناقتاعى اراب ەلدەرى سەلبەستىك كوميتەتى باسشىلار ماجىلىسىنە قاتىناسادى ءارى ساۋد ارابياسىندا مەملەكەتتىك ساپاردا بولادى
ساۋد ارابياسىنىڭ پاتشاسى سالماننىڭ ۇسىنىسىمەن، تۇڭعىش كەزەكتى جۇڭگو - اراب ەلدەرى باسشىلار ماجىلىسىنە، جۇڭگو - شىعاناقتاعى اراب ەلدەرى سەلبەستىك كوميتەتىنىڭ باسشىلار ماجىلىسىنە قاتىناسۋ جانە ساۋد ارابياسىندا مەملەكەتتىك ساپاردا بولۋ ءۇشىن، جەرگىلىكتى ۋاقىت 12 - ايدىڭ 7 - كۇنى تۇستەن كەيىن، مەملەكەت ءتوراعاسى شي جينپيڭ ارناۋلى ۇشاقپەن ريادقا باردى. سۋرەتتە: شي جينپيڭ وتىرعان ارناۋلى ۇشاق ريادتاعى حاليد پاتشا اۋەجايىنا جەتكەن كەزدە، ساۋد ارابياسى رياد ولكەسىنىڭ باستىعى فايسال حانزادا، سىرتقى ىستەر ءۋازىرى فايسال حانزادا، جۇڭگو ىستەرى جونىندەگى ءۋازىر رۋماييان قاتارلى پاتشا اۋلەتىنىڭ ماڭىزدى مۇشەلەرى جانە ۇكىمەتتىڭ جوعارى دارەجەلى ءمانساپتىلارى ىستىق ىقىلاسپەن قارسى الدى.
□ سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن
شينحۋا اگەنتتىگىنىڭ 12 - ايدىڭ 7 - كۇنى ريادتان بەرگەن حابارى (تىلشىلەر ليۋ حۋا، حۋ گۋان). جەرگىلىكتى ۋاقىت 12 - ايدىڭ 7 - كۇنى تۇستەن كەيىن مەملەكەت ءتوراعاسى شي جينپيڭ ساۋد ارابياسى پاتشالىعىنىڭ پاتشاسى سالماننىڭ ۇسىنىسىمەن، تۇڭعىش كەزەكتى جۇڭگو - اراب ەلدەرى باسشىلار ماجىلىسىنە، جۇڭگو - شىعاناقتاعى اراب ەلدەرى سەلبەستىك كوميتەتى باسشىلار ماجىلىسىنە قاتىناسۋ ءارى ساۋد ارابياسىندا مەملەكەتتىك ساپاردا بولۋ ءۇشىن ارناۋلى ۇشاقپەن ريادقا باردى.
شي جينپيڭ وتىرعان ارناۋلى ۇشاق ساۋد ارابياسى كەڭىستىگىنە كىرگەننەن كەيىن، ساۋد ارابياسى اۋە ارمياسىنىڭ 4 سوعىس ۇشاعى كەڭىستىككە كوتەرىلىپ قورعادى. ارناۋلى ۇشاق رياد كەڭىستىگىنە كىرگەننەن كەيىن، 6 ”ساۋد ارابياسى قىرانى“ قوناق قورعاۋشى ۇشاعى بىرگە سەرىك بولىپ ۇشتى.
شي جينپيڭ ارناۋلى ۇشاقپەن ريادتاعى حاليد پاتشا اۋەجايىنا جەتكەندە، ساۋد ارابياسى جاقتىڭ سالتاناتتى قىزۋ قارسى الۋىنا يە بولدى. اۋەجايدا 21 رەت قۇرمەت ساليۋتى اتىلدى، قوناق قورعاۋ ۇشاقتارى كەڭىستىكتە جۇڭگونىڭ مەملەكەت تۋىنا سيمۆول بولعان قىزىل، سارى ءتۇستى جولاق سالىپ ۇشتى. قۇرمەت قاراۋىلى كۇلگىن كىلەمنىڭ ەكى جاعىندا قاتار تۇزەپ تۇردى، جۇڭگو، ساۋد ارابياسى ەلدەرىنىڭ مەملەكەت تۋلارى جەلمەن جەلبىرەپ تۇر. ساۋد ارابياسى رياد ولكەسىنىڭ باستىعى فايسال حانزادا، سىرتقى ىستەر ءۋازىرى فايسال حانزادا، جۇڭگو ىستەرى جونىندەگى ءۋازىر رۋماييان قاتارلى پاتشا اۋلەتىنىڭ ماڭىزدى مۇشەلەرى جانە ۇكىمەتتىڭ جوعارى دارەجەلى ءمانساپتىلارى ىستىق ىقىلاسپەن قارسى الدى.
شي جينپيڭ جازباشا ءسوز سويلەپ، جۇڭگو ۇكىمەتى مەن حالقى اتىنان ساۋد ارابياسى ۇكىمەتى مەن حالقىنا ىقىلاستى سالەم جولدادى جانە ىزگى تىلەك ءبىلدىردى. شي جينپيڭ بىلاي دەپ اتاپ كورسەتتى: جۇڭگو مەن ساۋد ارابياسى ديپلوماتيالىق قارىم - قاتىناس ورناتقان 32 جىلدان بەرى ەكى جاقتىڭ ستراتەگيالىق ءوزارا سەنىمدىلىگى ۇزدىكسىز بەكەمدەلىپ، ءتۇرلى سالاداعى ناقتى ىستەر سەلبەستىگىندە سۇبەلى جەتىستىككە قول جەتتى، اسىرەسە، 2016 - جىلى ەكى ەل جان - جاقتى ستراتەگيالىق سەرىكتەستىك قارىم - قاتىناس ورناتقاننان بەرى سالمان پاتشا ەكەۋىمىز جۇڭگو - ساۋد ارابياسى قارىم - قاتىناسىن قارىشتاپ دامۋعا باستاپ، ەكى ەل حالقىن باقىتقا كەنەلتۋمەن بىرگە، ءوڭىردىڭ بەيبىتشىلىگىن، ورنىقتىلىعىن جانە گۇلدەنىپ دامۋىن پارمەندى جەبەدىك. ساپار كەزىندە مەن سالمان پاتشامەن جانە پاتشا مۇراگەرى مۇحاممەدپەن ەكى جاقتى قارىم - قاتىناس، سونداي - اق بىرگە كوڭىل ءبولىپ وتىرعان حالىقارالىق جانە وڭىرلىك ماسەلەلەر جونىندە ىشكەرىلەي پىكىر اۋىستىرىپ، جۇڭگو - ساۋد ارابياسى قارىم - قاتىناسىنىڭ دامۋ بەتالىسىن بىرگە جوبالايمىز. مەن تۇڭعىش كەزەكتى جۇڭگو - اراب ەلدەرى باسشىلار ماجىلىسىنە جانە جۇڭگو - شىعاناقتاعى اراب ەلدەرى سەلبەستىك كوميتەتى باسشىلار ماجىلىسىنە قاتىناسىپ، اراب ەلدەرىنىڭ جانە شىعاناقتاعى اراب ەلدەرى سەلبەستىك كوميتەتىنە مۇشە ەلدەردىڭ باسشىلارىمەن بىرگە جۇڭگو مەن اراب ەلدەرى، جۇڭگو مەن شىعاناقتاعى اراب ەلدەرى قارىم - قاتىناسىنىڭ تىڭ ساتىعا كوتەرىلۋىن ىلگەرىلەتۋدى كۇتەمىن.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسەسىنىڭ مەڭگەرۋشىسى ديڭ شۋەشياڭ، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، مەملەكەتتىك كەڭەستىڭ مۇشەسى ۋاڭ ي، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، مەملەكەتتىك ساياسي كەڭەستىڭ ورىنباسار ءتوراعاسى حى ليفىڭ قاتارلى ساپارلاستارى وسى ۇشاقپەن بىرگە باردى.
جۇڭگونىڭ ساۋد ارابياسىنداعى باس ەلشىسى چىن ۋيچيڭ دە اۋەجايعا بارىپ قارسى الدى.
