جۇڭگو كوممۋنيستىك پارتياسى ورتالىق كوميتەتى ساياسي بيۋروسى ءماجىلىس اشتى
2023 - جىلعى ەكونوميكالىق قىزمەتكە تالداۋ جاسادى، زەرتتەۋ جۇرگىزدى پارتيا ستيلى، پاكتىك قۇرىلىسى جانە شىرىكتەسۋگە قارسى تۇرۋ قىزمەتىن اقىلداستى، ورنالاستىردى
جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ ءماجىلىستى باسقاردى
شينحۋا اگەنتتىگىنىڭ 12 - ايدىڭ 7 - كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتى ساياسي بيۋروسى 12 - ايدىڭ 6 - كۇنى ءماجىلىس اشىپ، 2023 - جىلعى ەكونوميكالىق قىزمەتكە تالداۋ جاسادى، زەرتتەۋ جۇرگىزدى؛ ورتالىق ءتارتىپ تەكسەرۋ كوميتەتىنىڭ، مەملەكەتتىك باقىلاۋ - تەكسەرۋ كوميتەتىنىڭ قىزمەت مالىمەتىن تىڭدادى، 2023 - جىلعى پارتيا ستيلى، پاكتىك قۇرىلىسى جانە شىرىكتەسۋگە قارسى تۇرۋ قىزمەتىن اقىلداستى، ورنالاستىردى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ ءماجىلىستى باسقاردى.
ءماجىلىس بىلاي دەپ قارادى: بيىل − پارتيا مەن مەملەكەت تاريحىنداعى توتەنشە ماڭىزدى ءبىر جىل. اۋمالى - توكپەلى حالىقارالىق ورتا جانە ەل ءىشىنىڭ جاپالى دا اۋىر رەفورما، دامۋ، ورنىقتىلىق مىندەتى الدىندا، شي جينپيڭ جولداستى ۇيتقى ەتكەن پارتيا ورتالىق كوميتەتى بۇكىل پارتيانى، بۇكىل ەلدەگى ءار ۇلت حالقىن ىنتىماقتاستىرىپ جانە باستاپ، قيىندىقتان تايسالماي العا ۇمتىلىپ، ماكرولىق رەتتەۋ - مەڭگەرۋ سەرپىنىن ارتتىرىپ، دامۋ ساپاسىن ورنىقتى قاداممەن جوعارىلاتىپ، عىلىم - تەحنيكادا جاڭالىق اشۋدا سۇبەلى ناتيجەلەرگە قول جەتكىزدى، رەفورما جاساۋدى، ەسىك اشۋدى جاپپاي تەرەڭدەتىپ، جۇمىستانۋدى، زات باعاسىن نەگىزىنەن ورنىقتىردى، استىق حاۋىپسىزدىگىن، ەنەرگيا حاۋىپسىزدىگىن جانە حالىق تۇرمىسىن ءونىمدى قامتاماسىز ەتىپ، ەكونوميكالىق، قوعامدىق كەلەلى جاعدايدىڭ ورنىقتىلىعىن ساقتادى. بەيجيڭ قىسقى وليمپيادا سپورت جارىسىن، مۇگەدەكتەر قىسقى وليمپيادا سپورت جارىسىن ءساتتى وتكىزدى. پارتيانىڭ 20 - قۇرىلتايىن جەڭىسپەن اشىپ، جاپپاي سوتسياليستىك وسىزاماندانعان مەملەكەت قۇرۋدىڭ جاڭا جورىعىنا نىق قادام تاستادى.
ءماجىلىس مىنالاردى باسا دارىپتەدى:
كەلەر جىلى − جۇڭگو كوممۋنيستىك پارتياسى 20 - قۇرىلتايىنىڭ رۋحىن جاپپاي دايەكتىلەندىرۋدە، تياناقتاندىرۋدا باستاما اشاتىن جىل. كەلەر جىلعى ەكونوميكالىق قىزمەتتى ويداعىداي ىستەۋدە شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتىپ، پارتيا 20 - قۇرىلتايىنىڭ رۋحىن جاپپاي دايەكتىلەندىرىپ، تياناقتاندىرىپ، جۇڭگو ۇلگىسىندەگى وسىزامانداندىرۋدى تىڭعىلىقتى ىلگەرىلەتىپ، ورنىقتىلىق بارىسىندا ىلگەرىلەۋ قىزمەت جالپى ارناسىنا تاباندى بولىپ، جاڭا دامۋ ۇستانىمىن تولىق، دالمە - ءدال، جاپپاي دايەكتىلەندىرىپ، جاڭا دامۋ ارناسىن جەدەل قالىپتاستىرىپ، جوعارى ساپالى دامۋدى كۇش سالا ىلگەرىلەتىپ، ىندەتتەن ساقتانۋ - تىزگىندەۋ مەن ەكونوميكالىق، قوعامدىق دامۋدى اناعۇرلىم ويداعىداي ءبىر تۇتاس جوسپارلاپ، دامۋ مەن حاۋىپسىزدىكتى اناعۇرلىم ويداعىداي ءبىر تۇتاس جوسپارلاپ، رەفورما جاساۋدى، ەسىك اشۋدى جاپپاي تەرەڭدەتىپ، بازار سەنىمىن زور كۇشپەن سەرپىلتىپ، ىشكى سۇرانىستى كەڭەيتۋ ستراتەگياسىن اتقارۋدى قامداۋ جاعىنداعى قۇرىلىمدىق رەفورمانى تەرەڭدەتۋمەن ورگانيكالى ۇشتاستىرىپ، ارتۋدى ورنىقتىرۋ، جۇمىستانۋدى ورنىقتىرۋ، زات باعاسىن ورنىقتىرۋ قىزمەتىن كورنەكتى تۇردە ويداعىداي ىستەپ، ەلەۋلى حاۋىپ - قاتەرلەردەن ءونىمدى تۇردە ساقتانىپ جانە ونى جويىپ، ەكونوميكالىق اينالىمنىڭ تۇلعالىق جاقتان جاقسارۋىن ىلگەرىلەتىپ، ساپانىڭ ءونىمدى ارتۋىن جانە ساننىڭ ۇيلەسىمدى ارتۋىن جۇزەگە اسىرىپ، جاپپاي سوتسياليستىك وسىزاماندانعان مەملەكەت قۇرۋدا جاقسى باستاما اشۋ، جاقسى قادام تاستاۋ كەرەك.
ءماجىلىس مىنالاردى اتاپ كورسەتتى: كەلەر جىلى ورنىقتىلىقتى ماڭداي الدى ورىنعا قويۋعا، ورنىقتىلىق بارىسىندا ىلگەرىلەۋگە تاباندى بولىپ، بەلسەندى قازىنا ساياساتى مەن ورنىقتى، اقاۋسىز اقشا ساياساتىن ۇزدىكسىز اتقارىپ، ءتۇرلى ساياساتتاردىڭ سايكەسۋىن، ۇشتاسۋىن كۇشەيتىپ، ىندەتتەن ساقتانۋ - تىزگىندەۋ شارالارىن ساپالىلاندىرىپ، جوعارى ساپالى دامۋدى بىرگە جەبەيتىن بىرىككەن كۇش قالىپتاستىرۋ كەرەك. بەلسەندى قازىنا ساياساتىندا كۇش ۇستەپ، ونىمدىلىكتى جوعارىلاتۋ، ورنىقتى، اقاۋسىز اقشا ساياساتىندا دالمە - ءدال، پارمەندى بولۋ، كاسىپ سالاسى ساياساتىندا دامۋ مەن حاۋىپسىزدىكتى قاتار جۇرگىزۋ، عىلىم - تەحنيكا ساياساتىندا نازاردى ءوز كۇشىنە سۇيەنۋگە، ءوزىن الۋەتتەندىرۋگە شوعىرلاندىرۋ، قوعامدىق ساياساتتا حالىق تۇرمىسىنىڭ تومەنگى شەگىن مىقتاپ ساقتاۋ كەرەك. ەل ءىشى سۇرانىسىن كۇش سالا كەڭەيتىپ، تۇتىنۋدىڭ نەگىزدىك رولى مەن قارجىلاندىرۋدىڭ شەشۋشى رولىن تولىق ساۋلەلەندىرۋ كەرەك. وسىزاماندانعان كاسىپ سالاسى جۇيەسىن جەدەل قۇرىپ، كاسىپ سالاسى تىزبەگىنىڭ، قامداۋ تىزبەگىنىڭ سەرپىمدىلىگىن جانە حاۋىپسىزدىك دەڭگەيىن جوعارىلاتۋ كەرەك. ”ەكىدەن تيتتەي دە اۋىتقىماۋدى“ شىنايى تياناقتاندىرىپ، ەلىمىزدىڭ سوتسياليستىك وسىزامانداندىرۋ قۇرىلىسىنىڭ قوزعاۋشى كۇشى مەن ومىرشەڭدىگىن ارتتىرۋ كەرەك. جوعارى دەڭگەيدە سىرتقا ەسىك اشۋدى ىلگەرىلەتىپ، شەتەل قارجىسىن اناعۇرلىم زور سەرپىنمەن باۋراۋ جانە ودان پايدالانۋ كەرەك. ەلەۋلى ەكونوميكالىق فينانس حاۋىپ - قاتەرىنەن ءونىمدى ساقتانىپ جانە ونى جويىپ، جۇيەلىك حاۋىپ - قاتەر تۋىلماۋ تومەنگى شەگىن ساقتاۋ كەرەك.
ءماجىلىس مىنالاردى باسا دارىپتەدى: پارتيانىڭ ەكونوميكالىق قىزمەتكە جاپپاي باسشىلىعىن كۇشەيتىپ، پارتيا 20 - قۇرىلتايىنىڭ رۋحىن جاپپاي ۇيرەنىپ، يگەرىپ، تياناقتاندىرىپ، پارتيا ورتالىق كوميتەتىنىڭ كەلەلى شەشىمدەرىن، ورنالاستىرۋلارىن تياناقتاندىرۋ مەحانيزمىن كەمەلدەندىرۋ كەرەك. شىنايى يگەرىپ، ناقتى ىستەۋگە تاباندى بولىپ، تۇتاس قوعامنىڭ ءىس تىندىرۋىنا، ناتيجە جاراتۋ ومىرشەڭدىگىن قاۋلاتىپ، كادرلاردىڭ باتىلدىقپەن ءىس تىندىرۋىنا، جەرگىلىكتى ورىننىڭ باتىلدىقپەن قامال الۋىنا، كاسىپورىنداردىڭ باتىلدىقپەن ىستەۋىنە، بۇقارانىڭ باتىلدىقپەن ءتول جاسامپازدىق جاراتۋىنا مۇمكىندىك جاساۋ كەرەك. ماڭىزدى حالىق تۇرمىسى تاۋارلارىمەن قامداۋدى قامتاماسىز ەتۋدى، باعانى ورنىقتىرۋدى جانە كومىرمەن، ەلەكترمەن، مۇناي - تابيعي گازبەن، تاسىمالمەن قامداۋدى قامتاماسىز ەتۋدى ءبىر تۇتاس جوسپارلاپ ويداعىداي ىستەپ، قيىنشىلىعى بار بۇقارانىڭ ءوندىرىس، تۇرمىسىنا كوڭىل ءبولىپ، شارۋا جۇمىسكەرلەردىڭ ەڭبەكاقىسىنىڭ تاراتىلۋىن قامتاماسىز ەتىپ، ءوندىرىس حاۋىپسىزدىگى جانە اپاتتان ساقتانۋ، اپات شىعىنىن ازايتۋ قىزمەتتەرىن مىقتى، ناقتى يگەرىپ، قوعامنىڭ جاراسىمدىلىعىن، ورنىقتىلىعىن قورعاۋ كەرەك.
ءماجىلىس مىنالاردى اتاپ كورسەتتى: پارتيانى جاپپاي قاتاڭ باسقارۋدا كوپ جىلعى قاجىرلى قۇلشىنىس كورسەتىلىپ، شىرىكتەسۋگە قارسى تۇرۋ كۇرەسىندە ۇستەم جەڭىسكە قول جەتتى ءارى جاپپاي بەكەمدەلدى، ءبىراق كەلەلى ءىس اياقتادى دەيتىن كەز ءالى كەلە قويعان جوق. قاي - قاشان دا ءىرى پارتياعا عانا ءتان قيىن ماسەلەلەردى شەشەتىن سەرگەكتىك پەن تاباندىلىقتى ساقتاپ، ماڭگى جالعاستىراتىن قايسارلىق پەن ۇستامدىلىقتى قاي - قاشان دا ساقتاپ، پارتيانى تاباندىلىقپەن جاپپاي قاتاڭ باسقارۋ ساياسي تاباندىلىعىن ونان ارى كۇشەيتىپ، قاتاڭ بولۋ نەگىزگى ارناسىن، قاتاڭ شارالاردى، قاتاڭ رايدى ۇزاق ۋاقىت تاباندىلىقپەن جالعاستىرىپ، جاڭا داۋىردەگى پارتيانىڭ وزىنە - ءوزى ۇلى توڭكەرىس جاساۋىن سوڭىنا دەيىن جۇرگىزۋ كەرەك. ءتارتىپ تەكسەرۋ، باقىلاۋ - تەكسەرۋ ورگاندارى پارتيانىڭ اۋەلگى ماقساتى مەن بورىشىنا باستان - اياق تاباندى بولىپ، پارتيا ۋستاۆى مەن نەگىزگى زاڭدا جۇكتەلگەن قىزمەت جاۋاپكەرشىلىگىن ادالدىقپەن اتقارىپ، پارتيانىڭ وزىنە - ءوزى توڭكەرىس جاساۋ ستراتەگيالىق ورنالاستىرۋىن جانە پارتيانى جاپپاي قاتاڭ باسقارۋ ستراتەگيالىق باعىتىن باتىل دايەكتىلەندىرىپ، تاباندىلىقپەن ستيلدى دۇرىستاپ، ءتارتىپتى قاتايتىپ، شىرىكتەسۋگە قارسى تۇرىپ، پارتيا مەن مەملەكەتتىڭ باقىلاۋ جۇيەسىن كەمەلدەندىرۋدى ىلگەرىلەتىپ، ءتارتىپ تەكسەرۋ، باقىلاۋ - تەكسەرۋ قۇرىش قوسىنىن سومداپ، ءتارتىپ تەكسەرۋ، باقىلاۋ - تەكسەرۋ قىزمەتىنىڭ جوعارى ساپالى دامۋىن ىشكەرىلەي ىلگەرىلەتىپ، جاڭا داۋىردەگى جاڭا جورىقتا پارتيانىڭ بورىشى مەن مىندەتىن جۇزەگە اسىرۋعا پارمەندى كەپىل ازىرلەۋ كەرەك.
ءماجىلىس مىنالاردى باسا دارىپتەدى: پارتيا 20 - قۇرىلتايىنىڭ رۋحىن جاپپاي دايەكتىلەندىرۋ، تياناقتاندىرۋ سىندى نەگىزگى جەلىنى مىقتاپ يگەرىپ، پارمەندى ساياسي باقىلاۋ ارقىلى پارتيا ورتالىق كوميتەتىنىڭ بەدەلى مەن ورتالىقتانعان ءبىر تۇتاس باسشىلىعىن قورعاپ، ”جەتى ءتۇرلى نىساي“ ماسەلەسىن دەر كەزىندە بايقاۋ، كۇش سالا شەشۋ كەرەك. ورتالىقتىڭ 8 ءتۇرلى بەلگىلەمەسىنىڭ توسپاسىن تاباندىلىقپەن بەكەمدەپ، راقاتقۇمارلىق، استا - توك ىسىراپشىلدىق ستيلى بايقالعان زامان سوققى بەرىپ، قاسارىسىپ تارتىپكە قايشىلىق جاساۋ پيعىلدارىن قاتاڭ تەكسەرىپ، ءبىر جايلى ەتىپ، قايتا بەلەڭ بەرۋدەن، قايتا ورشۋدەن ساقتانىپ، جاسىرىن ءتۇرىن وزگەرتۋىنەن ساقتانىپ، قالجىراپ، شايقاستان جالىعۋدان ساقتانىپ، فورماشىلدىقتى، تورەشىلدىكتى ءتۇيىندى تۇردە تۇزەتىپ، قىزمەت بارىسىندا ساتى - ساتى بويىنشا اۋىرتپالىق قوسۋ، سالعىرتسۋ، بوساڭسۋ، ۇقىعىنان ءوز بىلگەنىنشە پايدالانۋ، جاۋاپكەرشىلىك ارقالاماۋ، ءىس تىندىرماۋ سياقتى ماسەلەلەردى ءجىتى قاداعالاپ، عىلمي، دالمە - ءدال نىسانالى رەتتەۋ - تۇزەتۋ كەرەك. ءتارتىپ قۇرىلىسىن اناعۇرلىم كورنەكتى ورىنعا قويىپ، قاتاڭ بولۋ تالابىن پارتيا ەرەجەسىن بەلگىلەۋدىڭ، پارتيا ءتارتىبى تاربيەسىنىڭ، ءتارتىپتىڭ اتقارىلۋىن باقىلاۋدىڭ تۇتاس بارىسىندا دايەكتىلەندىرىپ، بولاتتاي بەرىك ءتارتىپتىڭ تەگەۋىرىنىن، ايبارىن كورسەتىپ ءارى كادرلاردى وياتۋ، تيىلۋدى بىلگىزۋ كەرەك. وزىنە تۇبەگەيلى توڭكەرىس جاساۋ رۋحىمەن شىرىكتەسۋگە قارسى تۇرۋ كۇرەسىنىڭ قامال الۋ شايقاسىن، ۇزاققا سوزىلاتىن شايقاسىن ويداعىداي جۇرگىزىپ، پارتيا 18 - قۇرىلتايىنان بەرى ءوزىن تەجەمەگەندەردى، قولىن تارتپاعانداردى، ويىنا كەلگەنىن ىستەگەندەردى ماڭىزدىنىڭ ماڭىزدى ءتۇيىنى ەتىپ، تەرەڭ قازىپ، ەگجەي - تەگجەيلى تەكسەرىپ، قاتاڭ جازالاۋ، ساياسي ماسەلەلەر مەن ەكونوميكالىق ماسەلەلەر قاباتتاسقان شىرىكتەسۋ دەلولارىن ءتۇيىندى تۇردە تەكسەرىپ ءبىر جايلى ەتىپ، ۇقىق شوعىرلانعان، قارجى شوعىرلانعان، بايلىق شوعىرلانعان سالالارداعى شىرىكتەسۋدى ىشكەرىلەي رەتتەپ - وڭاپ، بۇقارانىڭ جانىنداعى ”شىبىن پاراقورلاردى“ باتىل جازالاپ، شىرىكتەسۋدىڭ ءوسىپ - ونەتىن توپىراعىن ونان ارى الاستاۋ كەرەك. پارتيا مەن مەملەكەتتىڭ باقىلاۋ جۇيەسىن كەمەلدەندىرىپ، ساياسي شارلاۋدىڭ وتكىر سەمسەرلىك رولىن اناعۇرلىم ويداعىداي ساۋلەلەندىرىپ، ”ءبىرىنشى باسشى“ مەن باسشىلىق القانى باقىلاۋدىڭ ناقتى ونىمدىلىگىن كۇشەيتۋ كەرەك.
وسىنىڭ الدىندا باس شۋجي شي جينپيڭ ورتالىق كوميتەت ساياسي بيۋروسى تۇراقتى كوميتەتىنىڭ ءماجىلىسىن باسقارىپ اشىپ، ورتالىق ءتارتىپ تەكسەرۋ كوميتەتىنىڭ، مەملەكەتتىك باقىلاۋ - تەكسەرۋ كوميتەتىنىڭ قىزمەت جاعدايى جانە 20 - كەزەكتى ورتالىق ءتارتىپ تەكسەرۋ كوميتەتىنىڭ ەكىنشى جالپى ماجىلىسىنە دايىندالۋ جاعدايى جونىندەگى مالىمەتتى تىڭدادى.
ءماجىلىس كەلەر جىلى 1 - ايدىڭ 9 - كۇنىنەن 1 - ايدىڭ 11 - كۇنىنە دەيىن 20 - كەزەكتى ورتالىق ءتارتىپ تەكسەرۋ كوميتەتىنىڭ ەكىنشى جالپى ءماجىلىسىن اشۋعا قوسىلدى.
ءماجىلىس باسقا دا ىستەردى اقىلداستى.
