شي جينپيڭ ساۋد ارابياسى مەدياسىندا اۆتورلى ماقالا جاريالادى
مىڭ جىلدىق دوستىقتى جالعاپ، جارقىن بولاشاققا بىرگە جول اشايىق
شينحۋا اگەنتتىگىنىڭ 12 - ايدىڭ 8 - كۇنى بەيجيڭنەن بەرگەن حابارى. 12 - ايدىڭ 8 - كۇنى ريادقا بارىپ تۇڭعىش كەزەكتى جۇڭگو - اراب ەلدەرى باسشىلار ماجىلىسىنە، جۇڭگو - شىعاناقتاعى اراب ەلدەرى سەلبەستىك كوميتەتىنىڭ باسشىلار ماجىلىسىنە قاتىناسۋ ءارى ساۋد ارابياسىندا مەملەكەتتىك ساپاردا بولۋ قارساڭىندا، مەملەكەت ءتوراعاسى شي جينپيڭ ساۋد ارابياسىنىڭ «رياد گازەتىندە» «مىڭ جىلدىق دوستىقتى جالعاپ، جارقىن بولاشاققا بىرگە جول اشايىق» دەگەن تاقىرىپتا اۆتورلى ماقالا جاريالادى.
ماقالادا بىلاي دەلىندى: جۇڭگو حالقىنىڭ تەرەڭ دوستىق سۇيىسپەنشىلىگىن ارقالاپ، اراب دوستارىممەن بىرگە تۇڭعىش كەزەكتى جۇڭگو - اراب ەلدەرى باسشىلار ءماجىلىسىن، جۇڭگو - شىعاناقتاعى اراب ەلدەرى سەلبەستىك كوميتەتىنىڭ باسشىلار ءماجىلىسىن اشۋ ءارى ساۋد ارابياسىندا مەملەكەتتىك ساپاردا بولۋ ءۇشىن، مەن ريادقا تاعى كەلدىم. بۇل مۇراگەرلىك ەتۋ ساپارى، اسىرەسە، ءورىس اشۋ ساپارى. ساپاردىڭ ماقساتى − جۇڭگو مەن اراب ەلدەرىنىڭ، جۇڭگو مەن شىعاناقتاعى اراب ەلدەرىنىڭ، جۇڭگو مەن ساۋد ارابياسىنىڭ ءداستۇرلى دوستىعىن ونان ارى اسقاقتاتىپ، جۇڭگونىڭ اراب دۇنيەسىمەن، شىعاناقتاعى اراب ەلدەرىمەن، ساۋد ارابياسىمەن قارىم - قاتىناسىنىڭ جاڭا ءداۋىرىن اشۋ.
ماقالا جالپى 4 بولىككە بولىنگەن: ءبىرىنشى، ارىدان جالعاسقان مىڭ جىلدىق دوستىق؛ ەكىنشى، ىنتىماقتاسا سەلبەسىپ، جاڭا داۋىرگە بەت العان جۇڭگو - اراب ەلدەرى تاعدىرلاس ورتاق تۇلعاسىن قۇرۋ؛ ءۇشىنشى، قول ۇستاسا العا ىلگەرىلەپ، جۇڭگو - شىعاناقتاعى اراب ەلدەرى ستراتەگيالىق سەرىكتەستىك قارىم - قاتىناسىن ورناتۋ؛ ءتورتىنشى، كۇش ۇستىنە كۇش قوسىپ، جۇڭگو مەن ساۋد ارابياسىنىڭ جان - جاقتى ستراتەگيالىق سەرىكتەستىك قارىم - قاتىناسىنىڭ تاعى دا تىڭ بەلەسكە كوتەرىلۋىن ىلگەرىلەتۋ.
ماقالادا مىنالار اتاپ كورسەتىلدى: جۇڭگو جاق وسى رەتكى ساپاردى وراي ەتىپ، ساۋد ارابياسىمەن جان - جاقتى ستراتەگيالىق سەرىكتەستىك قارىم - قاتىناستى كۇشەيتىپ، قاشاندا ءوزارا تۇسىنىستىكتەن، ءوزارا قولداۋدان اينىماي، دەربەس، وزىنە - ءوزى قوجايىن بولۋدى بىرگە دارىپتەپ، سىرتتىڭ كيلىگۋىنە قول ۇستاسا قارسى تۇرادى. ”ءبىر بەلدەۋ، ءبىر جولدى“ بىرگە قۇرۋ باستاماسىن ساۋد ارابياسىنىڭ ”2030 ارمانىمەن“ ۇشتاستىرۋدى كۇشەيتىپ، ءار سالاداعى ناقتى سەلبەستىكتەردىڭ تەرەڭدەۋىن، ناقتىلانۋىن ىلگەرىلەتىپ، ەكى ەل مۇددەلەرىنىڭ ساباقتاسۋىن، حالىقتار تىلەگىنىڭ توعىسۋىن تەرەڭدەتەدى. بىرلەسكەن مەملەكەتتەر ۇيىمى، 20 ەل توبى، شاڭحاي سەلبەستىك ۇيىمى سياقتى كوپ جاقتى مەحانيزمدەر اياسىنداعى ىستەستىكتى كۇشەيتىپ، ناعىز كوپ جاقتىلىقتى بىرگە امالياتتا ايگىلەپ، ورتا شىعىستىڭ بەيبىتشىلىگى مەن ورنىقتىلىعىن قورعاۋعا، دۇنيە ءجۇزىنىڭ دامۋى مەن گۇلدەنۋىن جەبەۋگە اناعۇرلىم كەسەك ۇلەس قوسادى.
ماقالادا بىلاي دەلىندى: بيىل 10 - ايدا جۇڭگو كوممۋنيستىك پارتياسى مەملەكەتتىك 20 - قۇرىلتايىن تابىسپەن اشتى، قازىر جۇڭگو حالقىن ىنتىماقتاستىرىپ جانە باستاپ، جاپپاي سوتسياليستىك وسىزاماندانعان مەملەكەت قۇرۋ بەتالىسىنا قاراي ىلگەرىلەۋدە. جۇڭگو − دۇنيە ءجۇزىنىڭ بەيبىتشىلىگىن قورعايتىن، بىرگە دامۋدى جەبەيتىن پارمەندى كۇش، قاشاندا جۇڭگونىڭ تىڭ دامۋى ارقىلى اراب ەلدەرىن قامتىعان دۇنيە جۇزىندەگى ءار ەلگە تىڭ وراي سيلاۋدان، اراب اعايىندارمەن بىرگە تاريحي دوستىقتى جالعاپ، جارقىن بولاشاققا بىرگە جول اشۋدان اينىمايدى.
