شينحۋا اگەنتتىگىنىڭ 12 - ايدىڭ 7 - كۇنى بەيجيڭنەن حابارى. جۋىقتا مەملەكەت ءتوراعاسى شي جينپيڭ ساۋد ارابيالىق جۇڭگو ءتىلىن ۇيرەنۋشىلەردىڭ ۋاكىلدەرىنە جاۋاپ حات جازىپ، ساۋد ارابيالىق جاستاردى جۇڭگو ءتىلىن جاقسى ۇيرەنىپ، جۇڭگو - ساۋد ارابياسى، جۇڭگو - اراب ەلدەرى دوستىعىن نىعايتۋعا تىڭ ۇلەس قوسۋعا شابىتتاندىردى.
شي جينپيڭ بىلاي دەپ اتاپ كورسەتتى: ءتىل − ءبىر مەملەكەتتى ءتۇسىنۋدىڭ ەڭ تاماشا كىلتى. سىزدەر جۇڭگو ءتىلىن ۇيرەنۋ جانە ”حانزۋ ءتىلى كوپىرى“ اۋىس - كۇيىس نىسانىنا قاتىناسۋ ارقىلى باي مازمۇندى، الۋان رەڭدى، ستەرەۆولدى، جان - جاقتى جۇڭگونى بىلدىڭىزدەر، مەن بۇعان شىن جۇرەكتەن قۋانىپ وتىرمىن. قازىر جۇڭگو حالقى مەن ساۋد ارابياسى حالقى وزدەرىنىڭ ۇلى ارمانىن جۇزەگە اسىرۋ جولىندا قۇلشىنا كۇرەس جۇرگىزۋدە. ءبىر - ءبىرىنىڭ ءتىلىن ۇيرەنىپ، قارسى تارابىنىڭ تاريحىن، مادەنيەتىن ءبىلۋ ەكى ەل حالقىنىڭ ءتۇسىنىسۋىن، ءبىلىسۋىن جەبەۋگە ءتيىمدى ءارى ادامزاتتىڭ تاعدىرلاس ورتاق تۇلعاسىن قۇرۋعا كۇش - قۋات ۇستەيدى.
شي جينپيڭ بىلاي دەپ باسا دارىپتەدى: جاستىق كوكتەم شەكسىز ءۇمىت تۋىنداتادى، جاستار − جۇڭگو - ساۋد ارابياسى، جۇڭگو - اراب ەلدەرى دوستىعىنىڭ بولاشاعى. وقۋشىلاردىڭ ەسىل شاقتى زايا جىبەرمەي، قۇلشىنا ۇيرەنىپ، جۇڭگو - ساۋد ارابياسى، جۇڭگو - اراب ەلدەرى حالقى دوستىعىن نىعايتۋعا تىڭ ۇلەس قوسۋىن ءۇمىت ەتەمىن. وقۋشىلاردىڭ جۇڭگونى ارالاپ، كورىپ، جۇڭگو جاستارىمەن ءوزارا ءتۇسىنىسۋدى نىعايتىپ، باياندى دوستىقتى دامىتىپ، جۇڭگو - ساۋد ارابياسى، جۇڭگو - اراب ەلدەرى قارىم - قاتىناسىنىڭ اناعۇرلىم كوركەم بولاشاعىن بىرگە جاراتۋىن قارسى الامىن.
جۋىقتا ساۋد ارابياسىنان كەلگەن 100دەن استام جۇڭگو ءتىلىن ۇيرەنۋشى جانە اۋەسكەر جاستار ءتوراعا شي جينپيڭگە حات جازىپ، جۇڭگو ءتىلىن ۇيرەنۋدەن العان تابىستارى مەن اسەرلەرىن ورتاقتاسىپ، جۇڭگونى ىشكەرىلەي ءتۇسىنۋدى ءۇمىت ەتەتىندىكتەرىن، ساۋد ارابياسى - جۇڭگو دوستىعىن جەبەيتىن جاس ەلشى بولۋعا بەل بايلاعاندىقتارىن ءبىلدىردى.
قازىرگە دەيىن جۇڭگو ءتىلى ساۋد ارابياسىنىڭ حالىق وقۋ - اعارتۋى جۇيەسىنە رەسمي ەنگىزىلدى، جيىنى 9 جوعارى مەكتەپ جۇڭگو تىلىنە قاتىستى كاسىپتەر اشىپ، جەرگىلىكتى ورىننان جالپى 300دەن استام وقىتۋشى باۋلىدى، 1100دەن استام داشۋە وقۋشىسىن ينتەرنەت جەلىسىندەگى ”حانزۋ ءتىلى كوپىرى“ قىسقى لاگەرىنە قاتىناسۋعا ۇيىمداستىردى، 1000نان استام داشۋە وقۋشىسىنىڭ حالىقارالىق جۇڭگو ءتىلى وقىتۋشىلارى وقۋ سيلىق اقشاسى بويىنشا ينتەرنەت جەلىسىندە ءبىلىم اسىرۋ كۋرسىنا قاتىناسۋىنا قولداۋ كورسەتتى.
