انار بۇلت \ شينجياڭ گازەتىنىڭ ءتىلشىسى جاڭ يۇنمەي 12 - ايدىڭ 21 - كۇنى ۇرىمجىدەن حابارلايدى. 12 - ايدىڭ 21 - كۇنى اۆتونوميالى رايوندىق ۇكىمەت پەن اۆتونوميالى رايوندىق ساياسي كەڭەس بىرگە وتكىزگەن تۇڭعىش رەتكى شينجياڭ كاسىپورىندارى. ءتوراعالار بەتپە - بەت كەڭەسۋ اڭگىمە ءماجىلىسى ۇرىمجىدە اشىلدى. نازاردى”كاسىپورىنداردىڭ دامۋىنا قىزمەت وتەپ، كاسىپورىنداردىڭ سەنىمىن سەرپىلتىپ، ساپالى شارۋاشىلىق - ساۋدا ورتاسىن قالىپتاستىرۋ“ نەگىزگى تاقىرىبىنا شوعىرلاندىرا وتىرىپ شينجياڭداعى كاسىپورىنشىلار ۋاكىلدەرى اۆتونوميالى رايوندىق ۇكىمەتتىڭ باسشىلارىمەن، اۆتونوميالى رايوننىڭ قاتىستى تاراۋلارىنداعى جاۋاپتىلارمەن ىشكەرىلەي كەڭەسىپ، پىكىر اۋىستىرىپ، دامۋ ۇتىمدى شارالارىن بىرگە اقىلداسىپ، دامۋ ورتاق تانىمىن ۇيىستىردى. اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ءتوراعاسى ەركىن تۇنياز ماجىلىسكە قاتىناستى ءارى ءسوز سويلەدى، اۆتونوميالى رايوندىق ساياسي كەڭەستىڭ ءتوراعاسى نۇرلان ءابىلماجىن ءماجىلىستى باسقاردى.
ماجىلىستە ەركىن تۇنياز كاسىپورىنشىلار ۋاكىلدەرىمەن ىشكەرىلەي، ەگجەي - تەگجەيلى كەڭەسىپ، اڭگىمەلەسىپ، ولاردىڭ پىكىر - ۇسىنىستارىن بەتپە - بەت مۇقيات تىڭدادى. كاسىپورىنشىلار ۋاكىلدەرى وزدەرىنىڭ دامۋ ءىس جۇزىندىگىمەن ۇشتاستىرىپ، شارۋاشىلىق - ساۋدا ورتاسىن ساپالىلاندىرۋ، قازىنا - سالىق، فينانس جاعىنان سۇيەمەلدەۋدى كۇشەيتۋ، كاسىپورىنداردىڭ تيبىن جاڭالاپ، دارەجەسىن وسىرۋىنە قىزمەت كورسەتۋ جانە دارىندىلاردى ەنگىزۋ سياقتى جاقتاردى ارقاۋ ەتىپ بەلسەنە سىندارلى اقىل - كەڭەس بەردى. اۆتونوميالى رايوننىڭ قاتىستى تاراۋلارى كاسىپورىنشىلار ۋاكىلدەرى ورتاعا قويعان پىكىر - ۇسىنىستار جونىندە جاۋاپ بەرىپ ءسوز سويلەدى.
ەركىن تۇنياز قالىڭ كاسىپورىننىڭ ۇزاق ۋاقىتتان بەرى شينجياڭنىڭ ەكونوميكالىق، قوعامدىق دامۋىنا ۇلەس قوسقاندىعىنا شىن جۇرەكتەن العىس ايتتى. ول بىلاي دەپ اتاپ كورسەتتى: پارتيا 18 - قۇرىلتايىنان بەرى، باس شۋجي شي جينپيڭ ستراتەگيالىق جانە جالپى جاعداي تۇرعىسىنان شينجياڭ جونىنەن جاعدايدى باعامداپ، باعدار بەلگىلەپ، رول ۇستاپ، جول باستاپ، جاڭا جاعدايداعى شينجياڭ قىزمەتىن ويداعىداي ىستەۋگە قۋاتتى ساياسي قوزعاۋشى كۇش، رۋحاني قوزعاۋشى كۇش جانە قىزمەت قوزعاۋشى كۇشىن ۇستەدى. پارتيا 20 - قۇرىلتايى ورنالاستىرعان ءتۇرلى ستراتەگيالىق مىندەتتەر مەن كەلەلى شارالاردى جاپپاي تياناقتاندىرىپ، ورتالىقتىڭ ەكونوميكالىق قىزمەت ءماجىلىسىنىڭ رۋحىن ىشكەرىلەي دايەكتىلەندىرىپ، اۆتونوميالى رايوندىق پارتكومنىڭ ورنالاستىرۋلارىنا، تالاپتارىنا ساي، ورنىقتىلىق بارىسىندا ىلگەرىلەۋ قىزمەت جالپى ارناسىنان جازباي، جاڭا دامۋ ۇستانىمىن تولىق، دالمە - ءدال، جاپپاي دايەكتىلەندىرىپ، ەكونوميكالىق دامۋدى ىلگەرىلەتۋدە ساپانىڭ ورنىقتى قاداممەن جوعارىلاۋى مەن ساننىڭ ۇيلەسىمدى ارتۋىن جۇزەگە اسىرۋ كەرەك. ءار دارەجەلى ساياسي كەڭەس ۇيىمدارىنان، قالىڭ كاسىپورىنشىلاردان نازاردى جاڭا داۋىردەگى پارتيانىڭ شينجياڭدى باسقارۋ جالپى جوباسىنا شوعىرلاندىرىپ، جاڭالىق اشۋ ارقىلى دەم بەرۋگە تاباندى بولۋ، حالىق تۇرمىسى قۇت - ىرىسىن ارتتىرۋ، شارۋاشىلىق - ساۋدا ورتاسىن ساپالىلاندىرۋ، عىلىم - تەحنيكادا جاڭالىق اشۋدى تەزدەتۋ، ورتاق بايۋدى جۇزەگە اسىرۋ، جوعارى ساپالى دامۋدى ىلگەرىلەتۋ سياقتى جاقتاردا كوبىرەك سىندارلى كەڭەس بەرىپ، دامۋدى بىرگە اقىلداسىپ، قوعام ورنىقتىلىعى مەن باياندى تىنىشتىق باس نىساناسىن جۇزەگە اسىرۋدا اناعۇرلىم زور رول اتقارۋدى ءۇمىت ەتەمىن. اۆتونوميالى رايوندىق ۇكىمەت كاسىپورىنشىلاردىڭ شينجياڭدا الاڭسىز دامۋدى كوزدەۋىنە، بازارلانعان، زاڭمەن باسقارىلاتىن، حالىقارالانعان شارۋاشىلىق - ساۋدا ورتاسىن تۇلعالاۋىنا بۇرىنعىداي قولداۋ كورسەتىپ، زەيىن - زەردەنى، كۇش - قۋاتتى، سۇيىسپەنشىلىكتى ارناي وتىرىپ حالىقتىق كاسىپورىندار ءۇشىن قيىن ماسەلەلەردى شەشىپ، ناقتى ءىس ىستەپ، شينجياڭ ەكونوميكاسىنىڭ جوعارى ساپالى دامۋىنىڭ جاڭا جاعدايىن كاسپورىنشىلارمەن بىرگە اشادى.
نۇرلان ءابىلماجىن اڭگىمە ءماجىلىسىن باسقارعاندا بىلاي دەپ اتاپ كورسەتتى: تۇڭعىش رەتكى شينجياڭ كاسىپورىندارى . ءتوراعالار بەتپە - بەت كەڭەسۋ اڭگىمە ءماجىلىسىنىڭ اشىلۋى − ءارى جالپى بارىستىق حالىق دەموكراتياسىن امالياتتا ايگىلەۋدىڭ، ۇكىمەتتىك كەڭەس پەن ساياسي كەڭەستىك كەڭەستىڭ ورگانيكالى ۇشتاسۋىن ىلگەرىلەتۋدىڭ ءبىر رەتكى ءونىمدى ىزدەنىسى، ءارى ”قوس باعىتتا كۇش سالۋ“ ءتۇزىمىن، ءتارتىبىن، مەحانيزمىن ورناتۋدىڭ، اقاۋسىزداندىرۋدىڭ ءبىر رەتكى جاندى امالياتى. ءارقايسى كاسىپورىنشىلار كاسىپورىنشىلار رۋحىن بار كۇشپەن اسقاقتاتىپ، جاڭا دامۋ ورايىن مىقتاپ يگەرىپ، كاسىپورىنداردىڭ ءوزىن دامىتۋىن جۇزەگە اسىرۋمەن بىرگە، كورىكتى شينجياڭ قۇرۋعا جاڭا دا اناعۇرلىم زور ۇلەس قوسۋى كەرەك. ءار دارەجەلى ساياسي كەڭەستەر سىندارلى اقىل - كەڭەس بەرۋ جانە ورتاق تانىم ۇيىستىرۋ سىندى قوس باعىتتا كۇش سالۋ دەڭگەيىن جوعارىلاتىپ، تۇتاس رايوننىڭ ەكونوميكاسىنىڭ ءۇرتىس جاقسارۋىن دەمەۋگە اقىل - پاراساتتارى مەن كۇش - قۋاتتارىن ارناۋى كەرەك.
ۇعىسۋعا قاراعاندا، مۇنان كەيىن تۇڭعىش رەتكى شينجياڭ كاسىپورىندارى . ءتوراعالار بەتپە - بەت كەڭەسۋ اڭگىمە ءماجىلىسى مەحانيزم رەتىندە تۇراقتانىپ، ءار جىلى تۇرلىشە نەگىزگى تاقىرىپتى ارقاۋ ەتىپ، شينجياڭداعى كاسىپورىنشىلار ۋاكىلدەرىن، كاسىپتىك قوعامنىڭ جاۋاپتىلارىن، ساياسي كەڭەس مۇشەلەرىن، مامان - وقىمىستىلاردى ۇسىنىس ەتىپ، وسى تۇعىردا ىشكەرىلەي كەڭەسىپ، پىكىر اۋىستىرىپ، دامۋ ورتاق تانىمىن ۇيىستىرادى ەكەن.
چىن ۋيجۇن، پىڭ جيارۇي، ليۋ حۇيجۇن قاتارلىلار اڭگىمە ماجىلىسىنە قاتىناستى.
