تاباندى بولۋ
− پارتيا 20 - قۇرىلتايىنان جۇڭگو كوممۋنيستىك پارتياسىنىڭ تابىسقا جەتۋ قۇپياسىنا نازار (3)
□ شينحۋا اگەنتتىگىنىڭ تىلشىلەرى جۋ جيچاي، حۋاڭ يۋە، گاۋ لەي
پارتيا 20 - قۇرىلتايىنىڭ بايانداماسىندا، ”تاباندى بولۋ“ دەگەن ءسوز 170 نەشە رەت كەزدەستى.
”ماركسيزمگە دەگەن بەرىك سەنىمگە تاباندى بولۋ“، ”جۇڭگوشا سوتسياليزمگە مىزعىماي تاباندى بولۋ“، ”جولدى وزگەرتپەۋگە، مۇراتتى وزگەرتپەۋگە تاباندى بولۋ“، ”بۇكىل ىنتا - پەيىلىمەن حالىق ءۇشىن قىزمەت ىستەۋ تۇپكى ماقساتىنا تاباندى بولۋ“...
ءجيى كورىنىس بەرگەن كىندىك ءسوز 100 جىلدىق ءىرى پارتيانىڭ تابىسقا جەتۋىنىڭ تەرەڭدە جاتقان قۇپياسىن اشىپ كورسەتتى.
”اۋەلگى ماقساتتى ۇمىتپاۋعا، ءوز مۇراتىنان اينىماۋعا تاباندى بولۋ كەرەك“
پارتيانىڭ 20 - قۇرىلتايى جابىلىپ ءبىر اپتاعا جەتپەي، 10 - ايدىڭ 27 - كۇنى، باس شۋجي شي جينپيڭ جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەلەرىن باستاپ بەيجيڭنەن ارنايى شانشيدىڭ يان - انىنا بارىپ، يان - ان توڭكەرىستىك ەسكەرتكىش ورنىن ىزەت - قۇرمەتپەن كورىپ، قىزىل تامىردى ۇلاستىرىپ، كۇرەسكەرلىك رۋحتى جالعاستىردى.
جۇرتتىڭ ەسىندە ءالى كەشەگىدەي جاڭعىرىپ تۇر: پارتيا 18 - قۇرىلتايى جابىلىپ كوپ وتپەي، باس شۋجي شي جينپيڭ ورتالىق كوميتەت ساياسي بيۋروسىنىڭ تۇراقتى مۇشەلەرىن باستاپ مەملەكەتتىك مۇراجايداعى «گۇلدەنۋ جولى» كورمەسىن ەكسكۋرسيالادى؛ پارتيا 19 - قۇرىلتايى جابىلىپ كوپ وتپەي، باس شۋجي شي جينپيڭ ورتالىق كوميتەت ساياسي بيۋروسىنىڭ تۇراقتى مۇشەلەرىن باستاپ، شاڭحايداعى جۇڭگو كوممۋنيستىك پارتياسىنىڭ 1 - قۇرىلتايى وتكەن جەردى جانە جىجياڭ جياشيڭىنىڭ نانحۋ كولىندەگى قىزىل قايىقتى ىزەت - قۇرمەتپەن كوردى.
ءالسىن - ءالسىن، وتكەن كۇن مەن بولاشاقتىڭ توعىسىندا تۇرىپ، ءوز باسىنان ونەگە كورسەتىپ، بارشا جۇڭگو كوممۋنيستەرىن قاشاندا ءبىزدىڭ ”قايدان كەلگەنىمىزدى، قايدا باراتىندىعىمىزدى“ ۇمىتپاۋعا، جۇڭگو كوممۋنيستىك پارتياسىنىڭ ”نە ەكەندىگى، نەلەردى ىستەيتىندىگى“ سىندى ءتۇبىرلى ماسەلەنى ەستە بەرىك ساقتاۋعا جەتەكتەدى.
السىزدەن قۇدىرەتتەنۋگە، سان رەتكى حاۋىپتەن امان قالعاننان ارشىنداپ، وركەندەۋگە دەيىن، جۇڭگو كوممۋنيستىك پارتياسىنىڭ تالاي - تالاي ساتسىزدىكتەردى ارتقا تاستاپ، ەكپىندەي ۇمتىلۋىنىڭ، جەڭىستەن - جەڭىسكە جەتۋىنىڭ سەبەبى، ”تۇپتەپ كەلگەندە، جۇرەكتەگى اسقاق مۇرات پەن توڭكەرىستىك سەنىمگە باستان - اياق تاپجىلماي تاباندى بولىپ، قاشاندا وتتاي ىستىق نۇر - شۇعىلا شاشىپ تۇرۋىندا“.
ماركسيزمگە دەگەن سەنىمنەن تيتتەي دە اۋىتقىماعان، سوتسياليزم مەن كوممۋنيزمگە دەگەن سەنىمدە بولاتتاي بەرىك تۇرعان ءار ۇرپاق جۇڭگو كوممۋنيستەرى ءولىم - ءومىر سىناعىندا مۇراتىن وزگەرتپەي، نەبىر قيىندىق - قاتەرلەر الدىندا العان بەتىنەن قايتپادى.
قانشاما جولدى ارتقا تاستاپ، تالايدى كورسە دە، قىپ - قىزىل ادال جۇرەك سول جۇرىسىنەن جاڭىلعان جوق.
2017 - جىلى 10 - ايدىڭ 18 - كۇنى، ”اۋەلگى ماقساتتى ۇمىتپاي، بورىشتى ەستە بەرىك ساقتاۋ“ دەگەن سوزدەر جۇڭگو كوممۋنيستىك پارتياسىنىڭ مەملەكەتتىك 19 - قۇرىلتايىنىڭ نەگىزگى تاقىرىبىنا جازىلدى.
جۇڭگو حالقىن باقىتقا كەنەلتۋ، جۇڭحۋا ۇلتىن گۇلدەندىرۋ ءۇشىن!
باس شۋجي شي جينپيڭ قايتا - قايتا بىلاي دەپ باسا دارىپتەدى: ”پارتيانىڭ اۋەلگى ماقساتى مەن بورىشى − پارتيانىڭ سيپاتىنىڭ، ءتۇبىرلى ماقساتىنىڭ، مۇرات - سەنىمىنىڭ، كۇرەس نىساناسىنىڭ شوعىرلى بەينەسى، ول پارتيامىزدى ماڭگى اينىماۋعا ىنتالاندىرىپ، پارتيامىزدى قاجىرلىلىقپەن العا باسۋعا جەبەپ كەلەدى“، ”اۋەلگى ماقساتتى ۇمىتپاۋ، بورىشتى ەستە بەرىك ساقتاۋ مەزەتتىك ءىس ەمەس، قايتا ومىرلىك ءىس“... ورنىنان تۇرۋدان، بايۋدان قۇدىرەتتەنۋگە دەيىن، ءبىرىنشى 100 جىلدىق كۇرەس نىساناسىن جۇزەگە اسىرۋدان جۇڭگو ۇلگىسىندەگى وسىزامانداندىرۋ ارقىلى جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋگە دەيىن، جۇڭگو كوممۋنيستىك پارتياسى باستان - اياق وزگەرمەگەن اۋەلگى ماقساتپەن جانە بورىشپەن مەملەكەتتىڭ دامۋىن، ۇلتتىڭ العا باسۋىن، حالىقتىڭ باقىتقا كەنەلۋىن توقتاۋسىز شىت جاڭا بيىكتەرگە شىعارىپ كەلەدى.
”ءبىز جاڭا جورىققا قادام تاستاپ، جاڭا كۇرەس نىساناسىنا قاراي اتتانايىق“! كوممۋنيستەردىڭ اۋەلگى ماقساتى ەشقاشان وزگەرگەن ەمەس، كوممۋنيستەردىڭ كۇرەسى ەشقاشان سايابىرلامايدى.
”بار تىرشىلىك ءمانىن يگەرگەن وسەدى، بارلىق ىستە جونىمەن ىستەگەن جەتەدى“
پارتيا قۇرىلعاندىعىنىڭ 100 جىلدىعى بايلانىسىمەن، 2021 - جىلى 11 - ايدا، جۇڭگو كوممۋنيستىك پارتياسى ءۇشىنشى تاريحي قارارىن جاريالاپ، 10 ”تاباندى بولۋ“ ارقىلى پارتيانىڭ 100 جىلدىق كۇرەسىنىڭ تاريحي تاجىريبەلەرىن جان - جاقتى قورىتىندىلاپ، بۇكىل پارتيانى ”ۇزاق ۋاقىت تاباندى بولۋعا“ شاقىردى.
اقيقاتتى قولىندا ۇستاي بىلگەندىكتەن تاباندى بولدى.
”ءبىر كۇنى، ءبىر جىگىت ۇيىندە بار زەيىنىمەن كىتاپ جازىپ جاتقان ەدى، سىرتتا جۇرگەن شەشەسى وعان ’قياق كۇرىش جەگەندە قىزىل شەكەر سۋىن قۇيىپ جەۋشى ەدىڭ، جەدىڭ بە‘؟ دەپ ايعاي سالادى. ول ’جەدىم، جەدىم، وتە ءتاتتى ەكەن‘ دەيدى. ناتيجەدە، اجەي ەسىكتەن كىرە بەرە بۇل جىگىتتىڭ باس الماي كىتاپ جازىپ وتىرعاندىعىن، اۋزى تولعان قارا سيا ەكەندىگىن كورەدى“.
2012 - جىلى 11 - ايدىڭ 29 - كۇنى، مەملەكەتتىك مۇراجايداعى «گۇلدەنۋ جولى» كورمە زالىندا، باس شۋجي شي جينپيڭ كوپشىلىككە چىن ۋاڭداۋدىڭ «كوممۋنيستىك پارتيانىڭ جارناماسىن» اۋدارىپ جاتقاندا سيانى قىزىل شەكەر سۋى ەكەن دەپ جاڭىلاتىن حيكاياسىن بايانداپ: ”اقيقاتتىڭ ءدامى وتە ءتاتتى عوي“ دەگەن ەدى.
100 جىلدان بەرى، اقيقاتتىڭ مايەگى وسىناۋ بايىرعى دالاعا ءنار بەرىپ، گۇلدەنگەن جۇڭحۋاعا سۇبەلى جەمىس سيلادى.
پارتيا 20 - قۇرىلتايىنىڭ بايانداماسىندا بىلاي دەپ تەرەڭىنەن اتاپ كورسەتىلدى: ”جۇڭگو كوممۋنيستىك پارتياسىنىڭ نەلىكتەن يقۋاتتى بولۋى، جۇڭگوشا سوتسياليزمنىڭ نەلىكتەن جاقسى بولۋى، سايىپ كەلگەندە، ماركسيزمنىڭ جارامدى بولۋىندا، جۇڭگوشالانعان، زامانالانعان ماركسيزمنىڭ جارامدى بولۋىندا“.
جۇڭحۋا ۇلتىنىڭ ۇلى گۇلدەنۋىنىڭ جاڭا جورىعىندا، شي جينپيڭ جاڭا ءداۋىر جۇڭگوشا سوتسياليزم يدەياسىنىڭ تۋى جارقىراي نۇرلانىپ، ميلليارد حالىقتىڭ العا باسۋ بەتالىسىنا جول سىلتەۋدە.
دۇنيەنىڭ دۇرىس جولىنا تابان تىرەگەندىكتەن تاباندى بولدى.
سىچۋاننىڭ مەيشان تاۋى، سانسۋسى عيباداتحاناسىنداعى بايىرعى بايتەرەك كوك تىرەپ تۇر.
2022 - جىلى 6 - ايدىڭ 8 - كۇنى، باس شۋجي شي جينپيڭ وسى جەردە تولعانا بىلاي دەدى: ”جۇڭحۋانىڭ تاڭداۋلى ءداستۇرلى مادەنيەتىنەن ەل باسقارۋ تانىمى مەن وي جەلىسىن قابىلداۋعا شەبەر بولىپ، دۇنيە جۇزىندەگى بارلىق تاڭداۋلى وركەنيەت جەتىستىكتەرىنەن كەڭ كولەمدە ۇلگى الۋ كەرەك، توماعا - تۇيىقتىققا سالىنۋعا، قاتىپ - سەمۋگە بولمايدى، بارىندە شەتەلدىڭ نارسەلەرىن ولشەم ەتۋگە ءتىپتى دە بولمايدى، جۇڭگوشا سوتسياليزم جولىمەن بۇلجىماي ءجۇرۋ كەرەك.
بەتالىس جولدى بەلگىلەيدى، جول تاعدىردى شەشەدى.
جۇڭگوشا سوتسياليزم اسپاننان تۇسە سالعان جوق، پارتيا 100 جىلدىق كۇرەس بارىسىندا قاشاندا ەلىمىزدىڭ مەملەكەت جاعدايىن نەگىزگە الۋعا تاباندى بولا وتىرىپ ىزدەنىس جاساعان جانە قالىپتاستىرعان، جۇڭگونىڭ ءىس جۇزىندىگىنە ۇيلەسەتىن دۇرىس جول.
اماليات بۇل جولمەن دۇرىس، ىركىلىسسىز ءجۇرىپ عانا قويماي، ونىڭ ۇستىنە ورنىقتى، جاقسى ءجۇرىپ كەلە جاتقانىمىزدى دالەلدەدى. بۇل مەملەكەتتى قۇدىرەتتەندىرۋ جولى، حالىقتى بايىتۋ جولى، ونان دا ماڭىزدىسى، جۇڭحۋا ۇلتىنىڭ گۇلدەنۋىندە، ءسوزسىز، باسىپ وتەتىن جول. دۇنيەنىڭ وسىناۋ دۇرىس جولىمەن جۇرسە، پارتيا مەن حالىق العا باسۋدىڭ شەكسىز قۇدىرەتتى تاباندىلىعىنا يە بولادى.
”العان بەتتەن قايتپاي، بوران - شاشىنعا بوگەلمەي، العا ۇمتىلدى“
جۇڭحۋا ۇلتى تاباندىلىقتىڭ قىمباتتىلىعىن ەجەلدەن تەرەڭ ۇعىنعان. ”يۇيگۇڭنىڭ تاۋدى كوشىرۋى“، ”تامشى سۋ تاس تەسەدى“، ”اعىنعا قارسى قايىقتى قارىمىڭمەن جۇرگىزەسىڭ“... ەجەلدەن كەلە جاتقان اقىليا سوزدەر تاريحتىڭ ىس - تۇمانىنان ءوتىپ بۇگىنگە جەتىپ، جۇڭحۋا ۇلتىنىڭ دارا پاراساتىن ايگىلەدى.
بۇگىنگى تاڭدا ”تاباندى بولۋعا“ اناعۇرلىم كوپ جاڭا داۋىرلىك ءمان ۇستەلگەن.
بۇل ”العان بەتىنەن قايتپايتىن“ قايسارلىق.
2022 - جىلى 10 - ايدىڭ 25 - كۇنى، پارتيا 20 - قۇرىلتايى جابىلعانىنا ەندى عانا 3 كۇن بولعاندا، باس شۋجي شي جينپيڭ ورتالىق كوميتەت ساياسي بيۋروسىنىڭ ءماجىلىسىن باسقارىپ اشىپ، «جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ ورتالىقتىڭ 8 ءتۇرلى بەلگىلەمەسىن دايەكتىلەندىرۋدى، تياناقتاندىرۋدى اتقارۋ ەگجەي - تەگجەيلى ەرەجەسىن» قارادى.
وسىدان 5 جىل بۇرىن، پارتيا 19 - قۇرىلتايىنان كەيىنگى ورتالىق كوميتەت ساياسي بيۋروسىنىڭ العاشقى ماجىلىسىندە دە ءبىر ماڭىزدى كەڭەستىك تاقىرىپ ورتالىقتىڭ 8 ءتۇرلى بەلگىلەمەسىن اتقارۋدىڭ ەگجەي - تەگجەيلى ەرەجەسىن قاراۋ بولعان ەدى. ال، بۇل 10 جىلدىڭ الدىندا پارتيا 18 - قۇرىلتايى جابىلىپ كوپ وتپەي اشىلعان ورتالىق كوميتەت ساياسي بيۋروسىنىڭ ماجىلىسىندە نازار شوعىرلاندىرىلعان ماڭىزدى كەڭەستىك تاقىرىپ بولاتىن.
شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ ءار جولعى ماڭىزدى كەزەڭدەردە، بىردەي ءبىر ماسەلەنى باسا دارىپتەۋدەي وزگەشە ورنالاستىرۋى شەگە قاعۋ رۋحىمەن ستيل قۇرىلىسىنىڭ ۇزاققا سوزىلاتىن سوعىسىن ويداعىداي جۇرگىزەتىن باتىل بەكىمىن كورسەتتى.
”پارتيانى جاپپاي قاتاڭ باسقارۋ ماڭگى جالعاسادى“، ”پارتيانىڭ وزىنە - ءوزى توڭكەرىس جاساۋى ماڭگى جالعاسادى“، ”رەفورما تەك توقتاۋسىز جۇرگىزىلە بەرەدى، اياقتامايدى“، ”اشىق اسپاندى، تۇنىق سۋدى، تازا توپىراقتى قورعاۋ شايقاسىن ۇزدىكسىز تەرەڭدەتۋ كەرەك“...
شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ جەتەكشىلىگىندە، قالىڭ پارتيالى كادرلار مەن بۇقارا ”ماڭگى جالعاستىراتىن“ سەرگەكتىكپەن جانە ”كۇن شىعىستان كەلەدى كۇلىپ كوكتەم“ دەيتىن تاباندىلىقپەن ماسەلەلەردى ءدال كوزدەۋدەن تاپجىلماي، نىسانادان كوز جازباي، قايراتتانا ىستەدى.
”قامال المايىنشا شەپتەن استە قايتپايمىن“ دەيتىن جانسەبىلدىك ەدى.
2021 - جىلى 5 - ايدا، جۇڭگو كوممۋنيستىك پارتياسى ورتالىق كوميتەتىنىڭ كەڭسەسى «ءتۇيىندى اۋىل - قىستاقتارعا قىستاقتا تۇراتىن ءبىرىنشى شۋجيلەر مەن قىزمەت اترەتتەرىن ۇزدىكسىز تاڭداپ جىبەرۋ جونىندەگى پىكىردى» باسىپ تاراتىپ، كەدەيلىكتەن ارىلتۋدان قامال الۋ شايقاسىنىڭ جەڭىسىنە قول جەتكىزۋدە قىستاقتا تۇراتىن ءبىرىنشى شۋجيلەر مەن قىزمەت اترەتتەرىن تاڭداپ جىبەرۋدىڭ ماڭىزدى تاجىريبەلەرىن قورىتىندىلاپ، پايدالانىپ، اۋىل - قىستاقتى گۇلدەندىرۋدى جاپپاي ىلگەرىلەتۋدى تالاپ ەتتى.
ءبىر كەزدەرى، قىستاقتا تۇراتىن 250 مىڭنان استام قىزمەت اترەتى، 3 ميلليوننان استام ءبىرىنشى شۋجي جانە قىستاقتا تۇراتىن كادرلار بۇيرىقتى الا سالا اتقا قونىپ، كەدەيلىكتەن ارىلتۋدان قامال الۋدىڭ شايقاس مايدانىنا اتتاندى.
قازىرگى تاڭدا، توپ - توپ جاس پارتيا مۇشەلەرى، كادرلار جورىق كيىمىن شەشپەي جاتىپ تاعى دا اتقا قونىپ، جاڭا بورىش ءۇشىن ۇزدىكسىز ايانباي كۇرەس جۇرگىزۋدە.
قايقايىسقا شىعۋ ءۇشىن تاباندىلىق قاجەت، دۇلەي داۋىل، اساۋ تولقىندى قارسى الۋ ءۇشىن دە تاباندىلىق قاجەت.
پارتيا 20 - قۇرىلتايىنىڭ بايانداماسىندا مىنالار اتاپ كورسەتىلدى: ەلىمىزدىڭ دامۋى ستراتەگيالىق وراي مەن حاۋىپ - قاتەر، سىن - سايىستار قاتار ءومىر سۇرگەن، تۇراقسىز، مەجەلەۋ قيىن فاكتورلار كوبەيگەن داۋىرگە قادام تاستادى، ءتۇرلى ”قاراقۋ“، ”سۇرى ءمۇيىزتۇمسىق“ ۋاقيعالارى كەز كەلگەن ۋاقىتتا تۋىلۋى مۇمكىن.
ۇزدىكسىز كۇرەس جۇرگىزەتىن پەيىلمەن قيىندىقتى ەڭسەرە ورگە ۇمتىلعاندا عانا، جاڭا ”لوۋشانگۋان اسۋلارىنان“، ”لازىكوۋ ساعالارىنان“ اسىپ، جاڭا جەڭىستەرگە قۇشاق اشا الامىز.
(شينحۋا اگەنتتىگىنىڭ 12 - ايدىڭ 22 - كۇنى بەيجيڭنەن بەرگەن حابارى)
