انار بۇلت \ شينجياڭ گازەتىنىڭ ءتىلشىسى لۋ فىڭباۋ 12 - ايدىڭ 23 - كۇنى ۇرىمجىدەن حابارلايدى. جۇڭگو تەمىر جولى ءۇرىمجى مەكەمەسى توبى شەكتى سەرىكتەستىگىنەن ۇعىسۋىمىزشا، 12 - ايدىڭ 23 - كۇنىنە دەيىن شينجياڭ تەمىر جولىنىڭ زات تاسىمال مولشەرى 201 ميلليون 700 مىڭ تونناعا جەتىپ، 201 ميلليون 300 مىڭ توننا زات تاسىمالداۋ جىلدىق نىسانا مىندەتىن مەرزىمىنەن 8 كۇن بۇرىن ورىنداعان، بۇل ءارى شينجياڭ تەمىر جولىنىڭ جىلدىق زات تاسىمالىنىڭ تاريحتا تۇڭعىش رەت 200 ميلليون توننالىق ءىرى وتكەلدەن ءوتۋى ەكەن.
”شينجياڭ تەمىر جولىنىڭ جىلدىق زات تاسىمال مولشەرى 2018 - جىلى تۇڭعىش رەت 100 ميلليون توننالىق ءىرى وتكەلدەن ءوتتى، سونان كەيىن زات تاسىمال مولشەرى 100 ميلليون توننا نەگىزىندە جىل سايىن ارتىپ، بيىل، اۋەلى، 200 ميلليون توننادان اسىپ، 4 جىلدا زات تاسىمال مولشەرى ەسەلەپ ارتتى، بۇل، بازار قاجەتىنىڭ بارىنشا ارتۋى، جول تورابى قۇرىلىمىنىڭ كەمەلدەنۋى، تەمىر جول تاراۋلارىنىڭ تاسىمال كومەسكى كۇشتەرىن بارىنشا اشۋى سياقتىلاردىڭ ناتيجەسى“، - دەدى جۇڭگو تەمىر جولى ءۇرىمجى مەكەمەسى توبى شەكتى سەرىكتەستگى زات تاسىمالى ءبولىمىنىڭ ورىنباسار مەڭگەرۋشىسى لي شيڭ.
كومىر − تەمىر جول زات تاسىمالىنىڭ ”ورنىقتىرعىشى“. بيىل جىل باسىنان بەرى، شينجياڭ تەمىر جول تاراۋلارى مەملەكەتتىڭ ۇندەۋىنە بەلسەنە ءۇن قوسىپ، تاسىمال قۋاتىنا ۇسىنىلىمدى ارتتىرىپ، يقۋاتىن كەڭەيتىپ جاڭالاۋ جۇرگىزىپ، قامداۋدى كۇشەيتۋ ارقىلى كاسىپ سالاسى تىزبەگىنىڭ، قامداۋ تىزبەگىنىڭ ورنىقتىلىعىنا بار امالمەن كەپىلدىك ەتىپ، حالىق تۇرمىسىنىڭ قاجەتىن قاناعاتتاندىردى.
شينجياڭنىڭ تەمىر جول تاراۋلارى جەرگىلىكتى ۇكىمەتپەن، جوعارى - تومەنگى بۋىنداعى كاسىپورىندارمەن ۇشتاسۋدى، بايلانىستى كۇشەيتىپ، قامداۋدى قامتاماسىز ەتۋ شارالارىن يكەمدى كەمەلدەندىرىپ، شينجياڭنان سىرتقا شىعارىلاتىن كومىرگە الدىمەن بوس ۆاگون دايىنداپ، الدىمەن تيەپ، شينجياڭ ىشىندەگى كومىردى تاسىمالداۋدا جانە شينجياڭنىڭ كومىرىن سىرتقا تاسىمالداۋدا ورنىقتى ارتۋ كۇيىن ساقتادى. 200 ميلليون توننادان استام زات تاسىمال مولشەرىندە شينجياڭ تەمىر جولىنىڭ كومىر تاسىمالى 120 ميلليون توننا بولىپ، سايكەس مەزگىلدەگىدەن ％29 ارتتى؛ مۇنىڭ ىشىندە شينجياڭنىڭ كومىرىن سىرتقا تاسىمالداۋ مولشەرى 52 ميلليون 330 مىڭ توننا بولىپ، سايكەس مەزگىلدەگىدەن ％45.7 ارتتى.
زات قاينارى جىل سايىن مولايدى، شينجياڭنىڭ تەمىر جول تاراۋلارى سوڭعى جىلدارى ءبىر جاعىنان، گولمۋد - كورلا، حوتان - چارقىلىق، اقسۋ - الار سياقتى جاڭا لەنيالار قۇرىلىسىن ورنىقتى قاداممەن ىلگەرىلەتتى؛ ەندى ءبىر جاعىنان، ءۇرىمجى - جياڭجۇنمياۋ تەمىر جولى، وڭتۇستىك شينجياڭ تەمىر جولى، ءۇرىمجى باتىس ۆوگزال الاڭى سياقتى نەگىزگى تاسىمال ارنالارى مەن بەكەت تۇيىندەرىنىڭ يقۋاتىن كەڭەيتىپ جاڭالاۋدى جەدەل اتقارىپ، ءتۇيىندى جەلىلەردىڭ قۋاتى كەمەلسىز بولۋداي ولقىلىقتاردى شەشىپ، زاتتاردى مول تاسۋدى، تەز جۇرگىزۋدى جۇزەگە اسىردى.
شينجياڭنىڭ تەمىر جول تاراۋلارى تاعى تاسىمال قۋاتى كومەسكى كۇشىن ىشكەرىلەي اشىپ، ءبىر ءبولىم جولاۋشىلار پويەزى شوفەرلارىن دەر كەزىندە شىعارىپ، زات تاسىمالى پويەزىنىڭ شوفەرلار قوسىنىن تولىقتادى، پاراۆوز قاراستى ستانسيالاردىڭ سانىن ارتتىرىپ، پاراۆوزدىڭ، كەزەكشى پويەزدىڭ پايدالانىلۋ ونىمدىلىگىن جوعارىلاتىپ، پويەزداردىڭ اينالىم جولدارىن كەمەلدەندىرىپ، زات تاسىمالى مولشەرىن ارتتىرۋعا تۇساۋ بولىپ وتىرعان ولقىلىقتاردى تولىقتاپ كۇشەيتىپ، زات تاسىمالى مولشەرىنىڭ ارتۋىن اناعۇرلىم كوپ تاسىمال كۇشى تىرەگىمەن قامدادى.
