پامير ”اۋەدەن كەلگەن قوناقتاردى“ قۋانا قارسى الدى
شينجياڭداعى تۇڭعىش بيىك ءۇستىرت اۋەجايىندا رەسمي ۇشاق قاتىنادى
12 - ايدىڭ 23 - كۇنى جۇڭگو وڭتۇستىك اۆياتسيا توبى شەكتى سەرىكتەستىگىنىڭ CZ5193 كەزەكشى ۇشاعى تاشقورعاننىڭ حونچيراپ اۋەجايىنا ورنىقتى كەلىپ قوندى، بۇل شينجياڭداعى تۇڭعىش بيىك ءۇستىرت اۋەجايىندا رەسمي ۇشاق قاتىناعاندىعىن كورسەتەدى.
□ سۋرەتتى گۋان تاۋ تۇسىرگەن
انار بۇلت \ شينجياڭ گازەتىنىڭ ءتىلشىسى ما ينيڭ 12 - ايدىڭ 23 - كۇنى تاشقورعاننان حابارلايدى. 12 - ايدىڭ 23 - كۇنى ساعات 10نان 59 مينۋت وتكەندە، جۇڭگو وڭتۇستىك اۆياتسيا توبى شەكتى سەرىكتەستىگىنىڭ CZ5193 كەزەكشى ۇشاعى تاشقورعان حونچيراپ اۋەجايىنا ورنىقتى كەلىپ قوندى، سونىمەن شينجياڭداعى تۇڭعىش بيىك ءۇستىرت اۋەجايىندا رەسمي ۇشاق قاتىنادى.
جۇڭگو حالىقتىق اۆياتسياسىنىڭ بەلگىلەمەسىنە نەگىزدەلگەندە، تەڭىز دەڭگەيىنەن 2438 مەتر نەمەسە ودان دا جوعارى بولعان اۋەجايلاردى بيىك ءۇستىرت اۋەجايى دەيدى. تاشقورعان حونچيراپ اۋەجايىنىڭ تەڭىز دەڭگەيىنەن بيىكتىگى 4. 3258 مەتر بولىپ، جۇڭگونىڭ ەڭ باتىس شەتىندەگى اۋەجاي ءارى شينجياڭداعى ءبىرىنشى بيىك ءۇستىرت اۋەجايى سانالادى. سونىمەن بىرگە، نۇسقاۋ مۇناراسىنىڭ نۇسقاۋ تالابىن قاناعاتتاندىرۋ ءۇشىن، اۋەجايدىڭ نۇسقاۋ مۇناراسىنىڭ بيىكتىگى 39.8 مەتر بولىپ، شينجياڭداعى تارماق جەلى اۋەجايلارى نۇسقاۋ مۇناراسىنىڭ ەڭ بيىك دەڭگەيىن جاراتتى.
ۇعىسۋعا قاراعاندا، جۇڭگو حالىقتىق اۆياتسيا مەكەمەسىنىڭ، شينجياڭ ”13 - بەسجىلدىق“ ءتۇيىندى اۋەجاي قۇرىلىسى نىساندارىنىڭ ءبىرى رەتىندە، تاشقورعان حونچيراپ اۋەجايىنىڭ جىلدىق جولاۋشى قابىلداۋ - جونەلتۋ مولشەرى 160 مىڭ ادام - رەتكە، زات، پوچتا جولداماسىن قابىلداۋ - جونەلتۋ مولشەرى 400 تونناعا جەتەدى ەكەن.
”شىرت، شىرت“... چاڭشالىق جولاۋشى يۇي سىتى ەكى دوسىمەن بىرگە تەرەزەنىڭ الدىندا تۇرىپ، اپپارات كنوپكاسىن باسىپ توقتاماي سۋرەتكە الدى، ”وتە كوركەم ەكەن، ءبىز ءبىرىنشى توپتا قارلى تاۋعا ’ۇشىپ‘ كەلگەن قوناقپىز. تاڭ سارىدە بەلەتكە قول جەتكىزگەن سوڭ، قۋانعانىمنان ۇيىقتاي المادىم، شىنىمەن دە ويداعىداي ساپار بولدى“. يۇي سىتى دوستارىمەن بىرگە شينجياڭدى ساياحاتتاپ جۇرگەن كەزىندە تۇڭعىش ۇشاق ۇشۋ حابارىن ەستىپ، بەلەت ساتۋ جۇيەسىنە قاداعالاپ ءجۇرىپ، اقىرى ارمانىنا جەتكەندىگىن ايتتى. يۇي سىتى جىل سايىن شينجياڭعا ساياحاتتاي كەلەدى، بۇرىن 3 رەت ءوز اۆتوكولىگىمەن تاشقورعان تاجىك اۆتونوميالى اۋدانىنا بارعان، بۇرىندارى تەك ينتەرنەتتەگى سۋرەتتەردەن عانا كورەتىن مۇزتاع شىڭىن بۇگىنگى كۇندە ءوز كوزىمەن اۋەدەن كورىپ، وكىنىشىنىڭ ورنىن تولتىردى.
تاشقورعان تاجىك اۆتونوميالى اۋدانىنىڭ باتىس سولتۇستىگى، باتىس وڭتۇستىگى، وڭتۇستىگى جەكە - جەكە تاجىكستان، اۋعانستان، پاكيستان 3 مەملەكەتپەن شەكارالاسادى، مول ساياحات بايلىعىنا يە، ”ۇستىرتتەگى مەرۋەرت“ دەگەن ادەمى اتى بار، ۇشاق قاتىناردىڭ الدىندا ساياحاتشىلار ادەتتە قاشقار قالاسىنان اۆتوكولىككە وتىرىپ 5 − 6 ساعات جۇرگەندە ارەڭ جەتە الاتىن ەدى.
تاشقورعان حونچيراپ اۋەجايىنىڭ سالىنىپ بولىپ ۇشاق قاتىناۋى شينجياڭنىڭ حالىقتىق تاسىمال اۋەجايىنىڭ سانى 25كە كوبەيىپ، بۇكىل مەملەكەتتە اۋەجاي سانىنىڭ الدىڭعى ورىندا تۇرۋدى ءۇرتىس ساقتاعاندىعىن بىلدىرەدى. سونىمەن بىرگە بۇكىل رايوننىڭ تاسىمال اۋەجايىن ورنالاستىرۋىن اناعۇرلىم كەمەلدەندىرىپ، شينجياڭ اۋەجايى اۋە جولى تورىن ساپالىلاندىرىپ، وڭىرلىك قاتىناس - تاسىمالعا قىزمەت وتەۋ دەڭگەيىن كورنەكتى جوعارىلاتتى، ءار ۇلت جولاۋشىلارىنىڭ ۇشاققا وتىرىپ ساپارلاۋىنا ءتيىمدى، قولايلى بولىپ، وڭىرلىك ەكونوميكانىڭ، قوعامنىڭ باياندى دامۋىن جەبەپ قالماستان، اۆتونوميالى رايوننىڭ كەشەندى قاتىناس - تاسىمال جۇيەسىن كەمەلدەندىرۋدە، اۋىل - قىستاقتى گۇلدەندىرۋگە جانە ساياحاتتى دامىتۋعا كۇش قوسۋدا، مەملەكەت قورعانىسىن، شەكارا قورعانىسىن بەكەمدەۋدە، قوعام ورنىقتىلىعىن قورعاۋدا دا ماڭىزدى مانگە يە.
”اۋەجايدىڭ سالىنىپ، ۇشاق قاتىناۋى پامير ءۇستىرتىنىڭ ەل ىشىندەگى ءارقايسى ولكەلەرمەن جانە ورتا ازيامەن، وڭتۇستىك ازيامەن، ەۆروپامەن ارا قاشىقتىعىن قىسقارتتى، جىبەك جولى ەكونوميكالىق بەلدەۋى وزەكتى رايونى قۇرىلىسىن جەدەلدەتۋدە، سىرتقا ەسىك اشۋ دەڭگەيىن جوعارىلاتۋدا، جوعارى ساپالى دامۋدى ىلگەرىلەتۋدە كەلەلى ستراتەگيالىق ءمان الادى“، - دەدى قاشقار ايماقتىق اكىمشىلىك مەكەمەسىنىڭ ورىنباسار ءۋاليى گۇلزار ابدۇراحمان.
