مەملەكەت ءتوراعاسى شي جينپيڭ 2023 - جىلعى جاڭا جىلدى قۇتتىقتاۋ ءسوزىن سويلەدى
جاڭا جىل قارساڭىندا، مەملەكەت ءتوراعاسى شي جينپيڭ ورتالىق راديو - تەلەۆيزيا باس ستانسياسى جانە ينتەرنەت ارقىلى 2023 - جىلعى جاڭا جىلدى قۇتتىقتاۋ ءسوزىن سويلەدى.
□ سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن
شينحۋا اگەنتتىگىنىڭ 12 - ايدىڭ 31 - كۇنى بەيجيڭنەن بەرگەن حابارى. جاڭا جىل قارساڭىندا، مەملەكەت ءتوراعاسى شي جينپيڭ ورتالىق راديو - تەلەۆيزيا باس ستانسياسى جانە ينتەرنەت ارقىلى 2023 - جىلعى جاڭا جىلدى قۇتتىقتاۋ ءسوزىن سويلەدى. ءسوزدىڭ تولىعى تومەندەگىدەي:
كوپشىلىك، سالەمەتسىزدەر مە! 2023 - جىلى كەلۋ الدىندا تۇر، مەن بەيجيڭدە كوپشىلىككە جاڭا جىلدىق ىزگى تىلەك بىلدىرەمىن!
2022 - جىلى ءبىز پارتيا 20 - قۇرىلتايىن جەڭىسپەن اشىپ، جاپپاي سوتسياليستىك وسىزاماندانعان مەملەكەت قۇرۋدىڭ، جۇڭگو ۇلگىسىندەگى وسىزامانداندىرۋ ارقىلى جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋدىڭ ايبىندى جوباسىن جاساپ، جاڭا جورىقتا ەكپىندەي ىلگەرىلەۋدىڭ ءداۋىر دابىلىن قاقتىق.
ەلىمىز دۇنيە جۇزىندەگى ەكىنشى ءىرى ەكونوميكالىق تۇلعا ورنىن ۇزدىكسىز ساقتادى، ەكونوميكا ورنىقتى، اقاۋسىز دامىپ، تۇتاس جىلدا ىشكى ءوندىرىستىڭ جالپى ءونىم قۇنى مەجەمەن 120 تريلليون يۋاننان استى. دۇنيە جۇزىلىك استىق داعدارىسى الدىندا، ەلىمىزدىڭ استىق وندىرىسىندە ۇزدىكسىز 19 جىل مول ءونىم الىنىپ، جۇڭگولىقتار ءوز اس كەسەسىن اناعۇرلىم مىقتى ۇستادى. ءبىز كەدەيلىكتەن ارىلتۋدان قامال الۋدىڭ جەتىستىكتەرىن بەكەمدەپ، اۋىل - قىستاقتى گۇلدەندىرۋدى جاپپاي ىلگەرىلەتتىك، سالىقتى ازايتىپ، اقىنى تومەندەتۋ سياقتى جەلىلەس شارالار قولدانىپ، كاسىپورىنداردى قيىنشىلىق قىسپاعىنان شىعاردىق، حالىق بۇقاراسىنىڭ شۇعىل، قيىن، ۋايىمداعان، ءزارۋ ماسەلەلەرىن كۇش سالا شەشتىك.
ىندەت تۋىلعاننان بەرى ءبىز باستان - اياق حالىقتى بارىنەن جوعارى قويۋعا، ءومىردى بارىنەن جوعارى قويۋعا تاباندى بولىپ، عىلمي، دالمە - ءدال ساقتانۋ - تىزگىندەۋگە تاباندى بولىپ، اۋقىمعا، جاعدايعا قاراي ساقتانۋ - تىزگىندەۋ شارالارىن ساپالىلاندىرىپ، رەتتەپ، حالىقتىڭ ءومىرىنىڭ حاۋىپسىزدىگى مەن دەنساۋلىعىن ەڭ جوعارى شەكتە قورعادىق. قالىڭ كادرلار مەن بۇقارا، اسىرەسە، مەديتسينا قىزمەتكەرلەرى، نەگىزگى ساتى قىزمەتكەرلەرى جاپا - ماشاقاتتان قورىقپاي، مويىماس قايسارلىق كورسەتتى، جۇمىس ورىندارىنان تاپجىلمادى. توتەنشە قاجىرلى قۇلشىنىس ارقىلى ءبىز بۇرىن بولماعان قيىنشىلىقتار مەن سىن - سايىستاردى جەڭدىك، كىم - كىمگە دە وڭاي بولعان جوق. قازىر ىندەتتەن ساقتانۋ - تىزگىندەۋ جاڭا كەزەڭگە ءوتتى، دەسە دە ءالى دە قيىن كەزدە تۇرمىز، كوپشىلىكتىڭ بارلىعى مىزعىماس ەرىك - جىگەرمەن قۇلشىنۋدا، ءۇمىت شۇعىلاسى كوز الدىمىزدا تۇر. ءبارىمىز ونان ارى قۇلشىنۋىمىز قاجەت، تاباندىلىق − جەڭىس، ىنتىماق − جەڭىس.
2022 - جىلى جياڭ زىمين جولداس ارامىزدان اتتاندى. ءبىز ونىڭ ۇشان - تەڭىز ۇلى ەڭبەگى مەن اسقاق قاسيەتىن ساعىنا ەسكە الامىز، ول قالدىرعان قىمباتتى رۋحاني بايلىقتى قاستەرلەيمىز. ءبىز ونىڭ مۇراتىنا مۇراگەرلىك ەتىپ، جاڭا داۋىردەگى جۇڭگوشا سوتسياليزم ىستەرىن ۇزدىكسىز العا ىلگەرىلەتۋىمىز كەرەك.
تاريحتىڭ قۇلاشىن كەڭ جايعان سالقار كوشىندە، ءبىرىنىڭ ءىزىن ءبىرى جالعاعان سان ۇرپاقتىڭ تولاسسىز جۇرگىزگەن كۇرەسى بۇگىنگى جۇڭگونى جاراتتى.
بۇگىنگى جۇڭگو − ارماندار ىركەس - تىركەس جۇزەگە اسقان جۇڭگو. بەيجيڭ قىسقى وليمپيادا سپورت جارىسى، مۇگەدەكتەر قىسقى وليمپيادا سپورت جارىسى ءساتتى وتكىزىلىپ، قار - مۇز ساڭلاقتارى جارىس الاڭىندا قۇيىنداي جۇيتكىپ، ماقتانارلىق ناتيجەگە قول جەتكىزدى. شىنجوۋ 13 - ءنومىرلى، شىنجوۋ 14 - ءنومىرلى، شىنجوۋ 15 - ءنومىرلى الەم كەمەلەرى بىرىنەن سوڭ ءبىرى كوككە سامعاپ، جۇڭگو كەڭىستىك بەكەتى جالپى بەتتىك سالىنىپ بولىپ، ءبىزدىڭ ”عارىش كەڭىستىگىندەگى ءۇيىمىز“ زەڭگىر اسپاندا شارلاپ ءجۇر. حالىق ارمياسى 95 جاسقا تولعان تۋعان كۇنىن قارسى الىپ، قالىڭ وفيتسەر - اسكەرلەر ارميانى قۇدىرەتتەندىرۋ ۇلى ءىسى جورىعىندا اسقاق جىگەرمەن ەكپىندەي العا تارتتى. ”فۋجيان“ اتتى ءۇشىنشى اۆياماتكا سۋعا ءتۇسىرىلدى، تۇڭعىش C919 ءىرى ۇشاعى رەسمي پايدالانۋعا بەرىلدى، بايحىتان سۋ ەلەكتر ستانسياسى جاپپاي وندىرىسكە قوسىلدى... وسىلاردىڭ بارلىعىنا سان - ساناقسىز ادامداردىڭ قاجىرلى ەڭبەگى مەن ماڭداي تەرى سىڭگەن. ۇساق ۇشقىندار الاۋلى وت بولىپ قۇرالدى، مىنە بۇل جۇڭگو كۇشى!
بۇگىنگى جۇڭگو − تىرشىلىك تىنىسىنا، ومىرشەڭدىككە تولى جۇڭگو. ءارقايسى ەركىن ساۋدا سىناق رايوندارى، حاينان ەركىن ساۋدا پورتى قارىشتاي وركەندەپ، تەڭىز جاعالاۋىنداعى وڭىرلەر بەلسەنە جاڭالىق اشىپ، ورتا، باتىس بولىكتەگى وڭىرلەر جەدەل دامىپ، شىعىس سولتۇستىكتىڭ گۇلدەنۋى ارىنداي ىلگەرىلەۋ الدىندا تۇر، شەكارا وڭىرلەر كوركەيىپ، حالىق بايىپ كەلەدى. جۇڭگو ەكونوميكاسىنىڭ سەرپىمدىلىگى كۇشتى، كومەسكى كۇشى زور، ومىرشەڭدىك كۇشى جەتكىلىكتى، ۇزاق ۋاقىت جاقساراتىن نەگىزگى اۋقىم ءالى دە وزگەرمەيدى. سەنىمدى بەكەمدەپ، ورنىقتىلىق بارىسىندا ىلگەرىلەسەك بولعانى، بەلگىلەنگەن نىسانانى، ءسوز جوق، جۇزەگە اسىرا الامىز. بيىل مەن شياڭگاڭعا باردىم، شياڭگاڭنىڭ تىنىشتالۋدان گۇلدەنۋگە وتكەنىن كورىپ توتەنشە ريزا بولدىم. ”ءبىر ەل، ەكى ءتۇزىمدى“ مىزعىماس تاباندىلىقپەن ويداعىداي تياناقتاندىرساق، شياڭگاڭ، اۋمىن، ءسوز جوق، ۇزاق ۋاقىت گۇلدەنىپ - كوركەيەدى، ورنىقتى بولادى.
بۇگىنگى جۇڭگو − ۇلتتىق رۋحتى جالعاستىرعان جۇڭگو. وسى ءبىر جىلدا تۋىلعان جەر سىلكىنىسى، تاسقىن، قۋاڭشىلىق، تاۋ ءورتى سياقتى جاراتىلىستىق اپاتتار مەن كەيبىر حاۋىپسىزدىك شىرعالاڭدارى جۇرتتى الاڭداتتى، قامىقتىردى، دەسەدە ادىلەت جولىندا باسىن ءباي تىككەن، ءبىر - بىرىنە قارايلاسىپ، ءوزارا كومەك قولىن سوزعان كورىنىستەر جۇرتتى تەرەڭ اسەرلەندىردى، قاھارمانداردىڭ ىزگى ىستەرى ءبىزدىڭ جۇرەگىمىزدە ماڭگى ساقتالادى. ءار رەت كونە جىلدى اتتاندىرىپ، جاڭا جىلدى قارسى العانىمىزدا، ءبىز ىلعي دا جۇڭحۋا ۇلتىنىڭ مىڭ جىلدان جالعاسقان اسقاق جىگەرىن ەسكە الىپ، العا باسۋ سەنىمىمىز ەسەلەپ ارتادى.
بۇگىنگى جۇڭگو − دۇنيە جۇزىمەن تىعىز بايلانىسقان جۇڭگو. وسى جىلدا مەن بەيجيڭدە كوپتەگەن جاڭا، كونە دوستاردى قارسى الدىم، سونداي - اق شەتەلگە دە شىعىپ جۇڭگونىڭ قۋاتتامالارىن باياندادىم. عاسىرلىق وزگەرىس جەدەل قۇبىلۋدا، دۇنيە ءجۇزى تىنىش ەمەس. ءبىز باستان - اياق بەيبىتشىلىك پەن دامۋدى قاستەرلەيمىز، باستان - اياق دوستارىمىز بەن سەرىكتەرىمىزدى قادىرلەيمىز، باتىلدىقپەن تاريحتىڭ دۇرىس جاعىندا تۇرىپ، ادامزات وركەنيەتىنىڭ العا باسۋى جاعىندا تۇرىپ، ادامزاتتىڭ بەيبىتشىلىگى مەن دامۋ ىستەرىنە جۇڭگونىڭ اقىل - پاراساتىن، جۇڭگو جوباسىن قۇلشىنا ارنايمىز.
پارتيا 20 - قۇرىلتايىنان كەيىن، مەن قىزمەتتەستەرىممەن بىرگە يان - انعا بارىپ، پارتيا ورتالىق كوميتەتىنىڭ يان - انداعى كەزىندە دۇنيەدە سيرەك كەزدەسەتىن قيىندىقتى جەڭگەن شۇعىلالى جىلدارىن قايتالاي ەسكە الىپ، اعا بۋىن كوممۋنيستەردىڭ رۋحاني كۇشىن ۇعىندىم. مەن قيىنشىلىق پەن جاپا - ماشاقات ادامدى شىڭداپ تابىسقا جەتەلەيدى دەپ ۇنەمى ايتىپ كەلەمىن. جۇڭگو كوممۋنيستىك پارتياسى 100 جىلدا قانشاما بوران - شاشىندى باستان كەشىرىپ، كەدەرگى - بوگەتتەردى الاستادى، بۇل − ەرەكشە ماشاقاتتى ءارى توتەنشە ۇلى بارىس. ءبىز العان بەتتەن قايتپاي، قايسارلىقپەن ايانباي قۇلشىنىپ، ەرتەڭگى جۇڭگونى اناعۇرلىم كوركەم ەتۋىمىز كەرەك.
ەرتەڭگى جۇڭگودا كۇرەس كەرەمەتتەر جاراتادى. سۋ شىنىڭ: ”ەڭ قيىن ىستەردى ىستەگەندە عانا، ەڭ بيىك مۇراتقا تالپىنۋعا بولادى“ دەگەن ءبىر ءسوزى بار، ”ەڭ قيىن تۇستان قامال الىپ، ەڭ اسقاق نىساناعا ۇمتىلۋ“ دەگەن ءماندى بىلدىرەدى. جول الىس بولعانىمەن، جۇرە بەرسەك كوزدەگەن جەرىمىزگە جەتەمىز؛ ءىس قيىن بولعانىمەن، ىستەي بەرسەك قالايدا ورىندالادى. يۇيگۇڭنىڭ تاۋدى كوشىرۋىندەي جىگەر، تامشى سۋ تاس تەسەتىن قايسارلىق بولسا، تاباندى دا تياناقتى بولىپ، باس الماي قاجىرلىلىقپەن ىستەپ، جارتى قادامداردى جالعاي - جالعاي مىڭ شاقىرىمعا جەتكىزسەك، ۇلى نىسانانى، ءسوز جوق، تاماشا رەالدىققا اينالدىرا الامىز.
ەرتەڭگى جۇڭگودا كۇش - قۋات ىنتىماقتان كەلەدى. جۇڭگو وسىنشاما ۇلكەن، تۇرلىشە ادامداردا تۇرلىشە تالاپ - تىلەك بولادى، بىردەي ءبىر ءىس جونىندە دە تۇرلىشە كوزقاراس بولادى، بۇل − وتە قالىپتى جاعداي، پىكىرلەسۋ، كەڭەسۋ ارقىلى ورتاق تانىم ۇيىستىرۋىمىز كەرەك. ءبىر ميلليارد 400 ميلليوننان استام جۇڭگو حالقى ويدى ءبىر اراعا شوعىرلاندىرىپ، كۇشتى ءبىر اراعا جۇمساپ، قيىندىقتى بىلەك بىرىكتىرە جەڭىپ، ەل بىرلىگىنەن بەرىك قامال تۇرعىزسا، قولدان كەلمەيتىن ءىس، اتتاپ وتە المايتىن بوگەت بولمايدى. بۇعازدىڭ ەكى جاعالاۋىنداعىلار − ءبىر وتباسىنىڭ ادامى. ەكى جاعالاۋداعى باۋىرلاستاردىڭ ورتاق بەتالىسپەن ءجۇرىپ، قول ۇستاسا قاتار ىلگەرىلەپ، جۇڭحۋا ۇلتىنىڭ ۇزاقتان - ۇزاققا جالعاساتىن قۇت - ىرىسىن بىرگە جاراتۋىن شىن جۇرەكتەن ءۇمىت ەتەمىن.
ەرتەڭگى جۇڭگو جاستارعا ءۇمىت ارتادى. جاستار كوركەيسە، مەملەكەت گۇلدەنەدى، جۇڭگونىڭ دامۋى قالىڭ جاستاردىڭ العا شىعىپ جاۋاپكەرشىلىك ارقالاۋىنا سۇيەنەدى. جاستىق جالىنعا تولى، جاستىق كوكتەم ۇمىتكە جۇكتى. قالىڭ جاستار وتباسى - وتان سۇيىسپەنشىلىگىن تەرەڭ ورناتىپ، العا ۇمتىلعىش قاسيەت جەتىلدىرىپ، كۇرەسكەرلىك بەينەمەن جاستىق كوكتەمنىڭ جىگەرىن تاسقىنداتىپ، ءداۋىردىڭ تىلەگىنەن شىعۋى، جاستىق داۋرەننىڭ ءۇمىتىن اقتاۋى كەرەك.
ءدال وسى ساتتە، كوپتەگەن ادام ءالى جاپالى دا قاربالاس جۇمىس ىستەۋدە، كوپشىلىك جاپا شەكتىڭىزدەر! جاڭا جىل قوڭىراۋى قاعىلۋ الدىندا تۇر، ءبىز بولاشاققا دەگەن تاماشا تالپىنىسپەن 2023 - جىلدىڭ العاشقى ساۋلەسىن بىرگە قارسى الايىق.
وتاننىڭ گۇلدەنىپ - كوركەيە بەرۋىن، ەل امان، جۇرت تىنىش بولۋىن تىلەيمىن! دۇنيە ءجۇزىنىڭ بەيبىت، تاماشا، باقىتتى، تىنىش بولۋىن تىلەيمىن! جاڭا جىلدارىڭىز قۇتتى بولسىن، تىلەگەن تىلەكتەرىڭىزگە جەتىڭىزدەر!
راقىمەت!
