تيانشان تورى
تيانشان تورى   ›   جاڭالىقتار   ›   شينجياڭ حابارلارى

9 ۋاكىلدەر ۇيىرمەسىنىڭ قورجىنىنا التىن مەدال ءتۇستى

  شينجياڭ تۇڭعىش كەزەكتى قىسقى سپورت جارىسىنىڭ ءبىرىنشى كەزەڭدىك جارىستارى اياقتالدى

  9 ۋاكىلدەر ۇيىرمەسىنىڭ قورجىنىنا التىن مەدال ءتۇستى

  انار بۇلت \ شينجياڭ گازەتىنىڭ ءتىلشىسى دۇڭ لياڭ 1 - ايدىڭ 3 - كۇنى التايدان حابارلايدى. 1 - ايدىڭ 3 - كۇنى مۇزدا تەز سىرعاناۋ ءتۇرىنىڭ ەڭ سوڭعى 4 شاعىن تۇردەگى جارىسىنىڭ اياقتالۋىنا ىلەسە، شينجياڭ 1 - كەزەكتى قىسقى سپورت جارىسىنىڭ ءبىرىنشى كەزەڭدىك جارىستارى اياقتالدى.

  قازىرگە دەيىن وتكىزىلگەن بيىك تاۋ شاڭعى، سىڭار تاقتايمەن سىرعاناۋ، مۇزدا تەز سىرعاناۋ سىندى 3 ۇلكەن جارىس تۇرىنەن جيىنى 43 التىن مەدالعا شەشىم جاسالىپ، 9 ايماق، وبلىس، قالانىڭ ۋاكىلدەر ۇيىرمەسىنىڭ قورجىنىنا التىن مەدال ءتۇسىپ ۇلگىردى. مۇنىڭ ىشىندە وتاعاسى جاق التاي ايماعىنىڭ ۋاكىلدەر ۇيىرمەسى 15 التىن مەدالعا يە بولىپ، جۇلدەگەرلەر قاتارىنىڭ باسىنان ورىن الدى؛ تارباعاتاي ايماعى مەن سانجى حۇيزۋ اۆتونوميالى وبلىسىنىڭ ۋاكىلدەر ۇيىرمەلەرى مۇزدا تەز سىرعاناۋ تۇرىندە باسىمدىق تانىتىپ، 7دەن التىن مەدالدى قانجىعالادى؛ ءۇرىمجى قالاسىنىڭ ۋاكىلدەر ۇيىرمەسى بيىك تاۋ شاڭعى ءتۇرى مەن مۇزدا تەز سىرعاناۋ تۇرىندە 6 التىن مەدالعا يە بولدى.

  بيىك تاۋ شاڭعى ءتۇرى بويىنشا جارىس باستالعاننان 1 - ايدىڭ 1 - كۇنىنە دەيىن جيىنى 10 شاعىن جارىس وتكىزىلدى. وتاعاسى جاقتىڭ ۋاكىلدەر ۇيىرمەسى وسى تۇردە ءوز كۇشىن ايگىلەپ، جالپى جارىستىڭ 7 التىن مەدالىن جەڭىپ الدى. شا شا ايەلدەر A گرۋپپاسىنىڭ اسا ۇلكەن يرەك، ۇلكەن يرەك جانە جاي يرەك سىندى 3 ءتۇرىنىڭ التىن مەدالىن جالعىز ءوزى قورجىنعا باسىپ، ەڭ تابىستى جەڭىمپاز اتاندى.

  ءۇرىمجى قالاسىنىڭ ۋاكىلدەر ۇيىرمەسىندەگى 14 جاستاعى كىشكەنتاي شاباندوز جاۋ مينشي ايەلدەر B گرۋپپاسىنىڭ ۇلكەن يرەك جانە جاي يرەك تۇرىندە 2 التىن مەدال الىپ، وتاعاسى جاقتىڭ وسى تۇردەگى باسىمدىعىن بۇزدى. ەرلەر B گرۋپپاسىنىڭ ۇلكەن يرەك تۇرىندە، اقسۋ ايماعىنىڭ ۋاكىلدەر ۇيىرمەسىنە وسى كەزەكتى قىسقى سپورت جارىسىنىڭ العاشقى التىن مەدالىن ءامىر الىپ بەردى.

  سىڭار تاقتايلى شاڭعىمەن سىرعاناۋ تۇرىندە 2022 - جىلى 12 - ايدىڭ 31 - كۇنىنەن 2023 - جىلى 1 - ايدىڭ 2 - كۇنىنە دەيىن 10 شاعىن تۇردە جارىس بولىپ ءوتتى. بۇل تۇردە اۆتونوميالى رايونىمىز ەندى عانا قاز - قاز باسىپ كەلە جاتقاندىقتان، باسىمدىعىن بايقاتا الماعان وتاعاسى جاق جيىنى 4 التىن مەدالدى مىسە تۇتتى.

  اقسۋ ايماعىنىڭ ۋاكىلدەر ۇيىرمەسىندەگى دۋان شياۋفان ەرەن شەبەرلىگىنىڭ ارقاسىندا ايەلدەر B گرۋپپاسىنىڭ كەدەرگىدەن ءوتىپ قۋالاي سىرعاناۋ جانە پاراللەل ۇلكەن يرەك تۇرلەرىنىڭ التىن مەدالىن قانجىعاسىنا بايلاۋمەن بىرگە، ساپتاسى دانا سەرىكپەن بىرگە B گرۋپپانىڭ ەر - ايەل كەدەرگىدەن ءوتىپ قۋالاي سىرعاناۋ ءتۇرىنىڭ التىن مەدالىن دا جەڭىپ الدى.

  قاشقار ايماعى، تۇرپان قالاسى جانە ىلە قازاق اۆتونوميالى وبلىسى قاتارلى 3 ۋاكىلدەر ۇيىرمەسىندەگى سپورتشىلار دا جەكە - جەكە ەرلەر A گرۋپپاسىنىڭ، ايەلدەر A گرۋپپاسىنىڭ كەدەرگىدەن ءوتىپ قۋالاي سىرعاناۋ جانە A گرۋپپا ەر - ايەل كەدەرگىدەن ءوتىپ قۋالاي سىرعاناۋ تۇرلەرىنەن التىن مەدال ەنشىلەپ، ءوز ۋاكىلدەر ۇيىرمەلەرىنە العاشقى التىن مەدالدى الىپ بەردى.

  مۇزدا تەز سىرعاناۋ − ءبىرىنشى كەزەڭدىك جارىستاعى كۇن ءتارتىبى ەڭ ۇزاق، التىن مەدال سانى ەڭ كوپ ۇلكەن ءتۇر بولاتىن، مۇندا جيىنى 5 جارىس كۇنىمەن سايىس ءوتتى. ايەلدەر توپتىق قۋالاي سىرعاناۋ تۇرىندە، جارىسقا قاتىناسۋعا تىركەلگەن كوماندا سانى از بولعاندىقتان كۇشىنەن قالدىرىلۋدان سىرت، باسقا 23 شاعىن ءتۇردىڭ التىن مەدالدارى 5 ۋاكىلدەر ۇيىرمەسىنىڭ ەنشىسىنە بۇيىردى.

  تارباعاتاي ايماعىنىڭ ۋاكىلدەر ۇيىرمەسىندەگى دىڭ تيانشين مۇزدا تەز سىرعاناۋ ايەلدەر A گرۋپپاسىنىڭ 500 مەترلىك جارىسىندا وسى كەزەكتى قىسقى سپورت جارىسىنىڭ العاشقى التىن مەدالىن ولجالاۋمەن قوسا، 1000 مەترلىك، 3000 مەترلىك، 5000 مەترلىك جانە كوللەكتيۆ اتتانۋ تۇرلەرىندە ىركەس - تىركەس اعا جۇلدەگەرلىكتى يەلەپ، جەكە ءوزى 5 التىن مەدالدى ەنشىلەدى. ونىڭ ساپتاسى ۋاڭ زىبين ەرلەر A گرۋپپاسىنىڭ 5000 مەترلىك جانە 10 مىڭ مەترلىك ءتۇرىنىڭ اعا جۇلدەگەرى اتاندى.

  سانجى حۇيزۋ اۆتونوميالى وبلىسىنىڭ ۋاكىلدەر ۇيىرمەسىندەگى ما شياۋچۇن ەرلەر A گرۋپپاسىنىڭ 3 تۇردەگى قىسقا ارالىقتا سىرعاناۋ جارىسىنىڭ اعا جۇلدەگەرلىگىن ەنشىلەسە، چىن چىن ەرلەر B گرۋپپاسىنىڭ جارىسىندا 4 التىن مەدالدى قاتارىنان جەڭىپ الدى.

  باسقا ۋاكىلدەر ۇيىرمەلەرىندە، ءۇرىمجى قالاسى مەن التاي ايماعى جەكە - جەكە 4 التىن مەدال الدى. قۇمىل قالاسى ەڭ سوڭعى كۇنى ەرلەر A گرۋپپاسىنىڭ كوللەكتيۆ اتتانۋىندا قايرات بولاتبەكتىڭ ارقاسىندا ۋاكىلدەر ۇيىرمەسىنىڭ العاشقى التىن مەدالىنا قول جەتكىزدى.

  سونىمەن، وسى كەزەكتى قىسقى سىپورت جارىسىنىڭ باسەكەلىك تۇرلەرى قازىرشە مارەسىنە جەتتى، 2 - ايدىڭ 8 - كۇنى، ەكىنشى كەزەڭدەگى قالعان 7 باسەكەلىك ۇلكەن ءتۇردىڭ دوداسى باستالادى. جارىستىڭ جابىق كەزىندە، قىسقى سپورت جارىسىنىڭ بۇقارالىق دەنە تاربيە تۇرلەرى وتكىزىلە بەرەدى.

جاۋاپتى رەداكتور : نۇربولات قابىل

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.