شينحۋا اگەنتتىگىنىڭ 1 - ايدىڭ 4 - كۇنى بەيجيڭنەن بەرگەن حابارى (ءتىلشى ليۋ حۋا). 1 - ايدىڭ 4 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا مەملەكەتتىك ساپارمەن كەلگەن فيليپپيننىڭ زۇڭتۇڭى ماركوسپەن كەڭەس وتكىزدى.
شي جينپيڭ ماركوستىڭ فيليپپيننىڭ زۇڭتۇڭى بولعاننان كەيىن جۇڭگوعا تۇڭعىش رەت ساپارلاي كەلگەندىگىن قارسى الدى. شي جينپيڭ بىلاي دەپ اتاپ كورسەتتى: بۇل − ءسىزدىڭ شىعىس وڭتۇستىك ازيا ەلدەرى وداعىنان سىرتقى ەلدە تۇڭعىش رەت رەسمي ساپارلاي كەلۋىڭىز، سونداي - اق بيىل جۇڭگو جاق كۇتىپ العان تۇڭعىش شەتەل باسشىسىسىز. بۇل جۇڭگو - فيليپپين قارىم - قاتىناسىنىڭ جاقىندىق دارەجەسىن تولىق ايگىلەيدى، سونداي - اق ەكى جاقتىڭ ءبىر - ءبىرىنىڭ ديپلوماتيالىق جاعدايىندا ماڭىزدى ورىن ۇستايتىندىعىن تۇسىندىرەدى. جۇڭگو مەن فيليپپين اراسىن تەڭىز ءبولىپ جاتقان ىرگەلەس كورشىلەر. ەكى ەلدىڭ مىڭ جىلدىڭ ۇستىندەگى قارىم - قاتىناس تاريحىندا، ادالدىقپەن مامىلە جاساۋ، ءوزارا قارايلاسۋ − باستان - اياق جۇڭگو - فيليپپين قارىم - قاتىناسىنىڭ نەگىزگى اعىمى، سونداي - اق ەكى ەل حالقىنا ورتاق قىمباتتى رۋحاني بايلىعى. 48 جىلدىڭ الدىندا، ءسىزدىڭ اكەڭىز جۇڭگونىڭ اعا بۋىن باسشىلارىمەن بىرگە جاعدايدى باعامداپ، اۋقىمعا سايكەسىپ، جۇڭگو مەن فيليپپيننىڭ ديپلوماتيالىق قارىم - قاتىناس ورناتۋى جونىندە تاريحي سيپاتتى ۇيعارىم جاسادى. وسىدان كەيىنگى جارتى عاسىرعا جۋىق ۋاقىتتا حالىقارالىق جاعداي مەن فيليپپيننىڭ ەل ىشىندەگى ساياسي جاعداي قالاي وزگەرسە دە، ءسىز بەن ءسىزدىڭ اۋلەتتەرىڭىز العاشقى ماقسات بويىنشا جۇڭگو مەن فيليپپيننىڭ دوستىعىن ىلگەرىلەتۋدى مۇرات ەتتى، بۇل دوستىق سۇيىسپەنشىلىك اسا قاستەرلى. ءسىزدىڭ وسى رەتكى جۇڭگوعا ساپارىڭىزدىڭ ”وتكەندى ەسكە الۋ ساپارى“ عانا ەمەس، ونان دا ماڭىزدىسى، ”نەگىز سالۋ ساپارى“ بولۋىن ءۇمىت ەتەمىن. جۇڭگو جاق باستان - اياق فيليپپيندى توڭىرەكتىك ديپلوماتيادا الدىمەن ەسكەرەتىن بەتالىسقا قويىپ، جۇڭگو - فيليپپين قارىم - قاتىناسىنا ستراتەگيالىق جانە جالپى جاعداي تۇرعىسىنان قاراۋعا تاباندى بولادى. مەن سىزبەن ۇنەمىلىك ستراتەگيالىق بايلانىستى ساقتاپ، ەكى جاقتى قارىم - قاتىناستىڭ كەلەسى قادامداعى دامۋىن جان - جاقتى جوسپارلاپ، ءوزارا كومەكتەسەتىن، قارايلاساتىن جاقسى كورشى، سىرلاس، جاقىن جاقسى تۋىس، سەلبەسىپ تەڭ يگىلىككە كەنەلەتىن جاقسى سەرىك بولىپ، ەكى ەل حالقىنا اناعۇرلىم مول قۇت - ىرىس اكەلىپ، ءوڭىردىڭ بەيبىتشىلىگى مەن ورنىقتىلىعىنا اناعۇرلىم كوپ وڭ ەنەرگيا قوسۋدى قالايمىن.
شي جينپيڭ بىلاي دەپ باسا دارىپتەدى: جۇڭگو مەن فيليپپيننىڭ مەملەكەت جاعدايى ۇقساماسا دا، ءتۇزىلىسى ءار ءتۇرلى بولسا دا، دامۋعا تالپىنۋ جولىندا نىساناسى ۇقساس، جولدارى تۇتاسقان، سەلبەستىك كومەسكى كۇشى زور. ەكى جاق ەكى ەل ۇكىمەت تاراۋلارى، زاڭ شىعارۋ قۇرىلىمدارى، ساياسي پارتيالارى اراسىنداعى اۋىس - كۇيىستى، ءوزارا ۇلگى الۋدى كۇشەيتىپ، دامۋ ستراتەگيالارىنىڭ ۇشتاسۋىن تەرەڭدەتىپ، وزدەرىنىڭ وسىزاماندانۋى بارىسىندا توعىسىپ، ءبىرىن - ءبىرى جەبەپ، ەكى ەلدىڭ دامۋىنا، گۇلدەنۋىنە اناعۇرلىم ويداعىداي دەم بەرۋى كەرەك. ەكى جاق اۋىل شارۋاشىلىعى، نەگىزدىك قۇرىلىس، ەنەرگيا، مادەنيەت سىندى 4 ۇلكەن ءتۇيىندى سەلبەستىك سالاسىن تۇراقتاندىردى، بۇل − جۇڭگو مەن فيليپپيننىڭ جان - جاقتى ستراتەگيالىق سەلبەستىك قارىم - قاتىناسىن كوتەرىپ تۇرعان مىقتى تىرەۋ، ارتۋ ءتۇيىنىن كۇش سالا جەتىلدىرىپ، جاڭا جارقىن ءتۇيىن قالىپتاستىرۋ كەرەك. جۇڭگو اۋىل - قىستاقتى گۇلدەندىرۋدى جاپپاي ىلگەرىلەتىپ، اۋىل شارۋاشىلىعىندا قۋاتتى ەل قۇرۋدى جەدەلدەتۋدە، فيليپپيننىڭ اۋىل شارۋاشىلىعىنىڭ، اۋىل - قىستاعىنىڭ دامۋىنا دەم بەرىپ، اۋىل شارۋاشىلىق تەحنيكاسى ورتالىعىنىڭ ايگىلى ماركا نىسانىن تۇلعالاپ، تۇقىم جەتىلدىرۋ، ءوندىرۋ، وڭدەۋ، ساقتاۋ تۇتاس كاسىپ تىزبەگى سەلبەستىگىن ورىستەتىپ، جۇنساۋ سەلبەستىگىن جەدەل ىلگەرىلەتۋدى، نەگىزدىك قۇرىلعى جانە ۇلاستىرۋ، تۇتاستىرۋ سالاسىنداعى سەلبەستىكتى تىڭعىلىقتى ىلگەرىلەتىپ، ءتۇيىندى نىسانداردىڭ ”قاتتى“ نەگىزدىك قۇرىلىس سەلبەستىگىن ويداعىداي تياناقتاندىرىپ، تەلەگراف، ۇلكەن ساندى مالىمەت، ەلەكتروندىق ساۋدا سياقتى ”جۇمساق“ نەگىزدىك قۇرىلىس سەلبەستىگىن كەڭەيتىپ، فيليپپيننىڭ ەكونوميكاسىنىڭ، قوعامىنىڭ جالپى تۇلعالىق دامۋىن جەبەۋدى قالايدى. جۇڭگو مەن فيليپپيننىڭ ءداستۇرلى قازىندى ەنەرگيا جانە تازا ەنەرگيا جاعىندا سەلبەستىك ورىستەتۋىنىڭ ءبىرىن - ءبىرى تولىقتاۋ باسىمدىعى بار. جۇڭگو جاق فيليپپين جاقپەن تەڭىزگە قاتىستى ماسەلەنى ۇزدىكسىز دوستىق كەڭەس تاسىلىمەن ۇيلەسىمدى ءبىر جاقتى ەتىپ، مۇناي - تابيعي گاز اشۋ كەلىسسوزىن قايتا باستاپ، تالاس جوق وڭىرلەردە مۇناي - تابيعي گاز اشۋ سەلبەستىگىن ىلگەرىلەتىپ، فوتوۆولتتىق، جەل ەنەرگياسى، جاڭا ەنەرگيالى اۆتوموبيل سياقتى جاسىل ەنەرگيا سەلبەستىگىن ورىستەتۋدى قالايدى. جۇڭگو فيليپپيننىڭ ساپالى اۋىل شارۋاشىلىعى، بالىق شارۋاشىلىعى ونىمدەرىن يمپورت ەتۋدى ۇزدىكسىز كەڭەيتىپ، جۇڭگو كاسىپورىندارىنىڭ فيليپپينگە بارىپ قارجى قوسىپ، شارۋاشىلىقتى گۇلدەندىرۋىن قولدايدى. ەكى جاق گۋمانيتارلىق اۋىس - كۇيىستى جان - جاقتى تەرەڭدەتىپ، نەگىزدىك وقۋ - اعارتۋ، كاسىپتىك وقۋ - اعارتۋ سەلبەستىگىن كەڭەيتىپ، اۋا رايى، عارىش سياقتى سالالارداعى جاڭالىق اشۋ سەلبەستىگىن قاراستىرۋى كەرەك. جۇڭگو جاق فيليپپين جاقپەن ۆاكسينا زەرتتەۋ - اشۋ سەلبەستىگىن ۇزدىكسىز ورىستەتىپ، وزدەرىنىڭ جەرگىلىكتى كاسىپ سالاسى باسىمدىعىمەن ۇشتاستىرىپ، ەكى ەلدىڭ ولكە، قالا، رايون، اۋداندارىنىڭ سەلبەستىك جاڭا ۇلگىسىن قالىپتاستىرۋدى قالايدى. جۇڭگو ىندەتتەن ساقتانۋ شارالارىن ىرىقتىلىقپەن ساپالىلاندىرىپ، رەتتەپ، ىندەتتەن ساقتانۋ - تىزگىندەۋ مەن ەكونوميكالىق، قوعامدىق دامۋدى اناعۇرلىم عىلمي تۇردە ءبىر تۇتاس جوسپارلاۋدا، كوپ وتپەي ەكى ەل حالقىنىڭ ىندەتتىڭ الدىنداعى تىعىز اۋىس - كۇيىستى، بارىس - كەلىستى قالپىنا كەلتىرەتىندىگىنە سەنەمىن.
شي جينپيڭ بىلاي دەپ باسا دارىپتەدى: جۇڭگو مەن فيليپپين ەكەۋى دە ازياداعى وركەندەپ كەلە جاتقان ەلدەر، ءبىزدىڭ دامۋىمىز تاتۋ كورشىلىك، دوستىققا تولى توڭىرەكتىك ورتادان تامىر العان، سەلبەسىپ تەڭ يگىلىككە كەنەلەتىن ازيا ۇلى شاڭىراعىنان تامىر العان. جۇڭگو جاق فيليپپينمەن، سونداي - اق باسقا دا شىعىس وڭتۇستىك ازيا وداعىنداعى ەلدەرمەن نازاردى سەلبەستىك پەن دامۋعا شوعىرلاندىرىپ، شىعىس وڭتۇستىك ازيا ەلدەرى وداعىنىڭ وڭىرلىك سەلبەستىكتەگى وزەكتى ورنىن ويداعىداي قورعاپ، ”بەس ۇلكەن مەكەن“ قۇرىلىسىن ىلگەرىلەتىپ، وسى ءوڭىردىڭ قىرعي قاباقتىق سوعىستىڭ كەسىرىنەن قۇتىلۋىن ىلگەرىلەتىپ، توپقا ءبولىنىپ قارسىلاسۋدان ساقتانىپ، دامۋدىڭ، گۇلدەنۋدىڭ بيىك بەلەسىنە ۇزدىكسىز اينالۋىن ىلگەرىلەتۋدى قالايدى. جۇڭگو جاق فيليپپين جاقتىڭ الەمدىك دامۋ باستاماسى مەن الەمدىك حاۋىپسىزدىك باستاماسىن قولداعاندىعىن القايدى، فيليپپين جاقپەن بىرگە ءوزارا قولداۋدى كۇشەيتىپ، ەكى ەلدىڭ جانە وركەندەپ كەلە جاتقان ەلدەردىڭ ورتاق مۇددەسىن قورعاپ، بۇكىل ادامزاتتىڭ ورتاق قۇندىلىقتارىن اسقاقتاتىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتىپ، وڭىرلىك جانە الەمدىك باسقارۋدى كەمەلدەندىرۋگە بەلسەندى ۇلەس قوسۋدى قالايدى.
ماركوس مىنالاردى ءبىلدىردى: جۇڭگودا تالايدان اڭساپ كەلگەن ساپاردا بولعانىما وتە قۋانىشتىمىن، بۇل − مەنىڭ شىعىس وڭتۇستىك ازيا ەلدەرى وداعىنان باسقا ەلدەردەگى تۇڭعىش مەملەكەتتىك ساپارىم، مەن وسى رەتكى ساپارىم ارقىلى دۇنيە جۇزىنە فيليپپين مەن جۇڭگونىڭ قارىم - قاتىناسىنىڭ وتە جاقسى، سونداي - اق توتەنشە ماڭىزدى ەكەندىگىن، ەكى جاقتىڭ ءوزارا قارىم - قاتىناسقا ايرىقشا ءمان بەرەتىندىگىن، تۇگەلدەي فيليپپين - جۇڭگو قارىم - قاتىناسىن تىڭ دەڭگەيگە كوتەرۋگە كۇش سالاتىندىعىن دالەلدەۋدى ءۇمىت ەتەمىن، فيليپپين مەن جۇڭگونىڭ ديپلوماتيالىق قارىم - قاتىناس ورناتقانىنا 48 جىل عانا بولعانىمەن، ەكى ەل حالقىنىڭ دوستىعىنا مىڭ جىلدان استى. كەزىندە فيليپپين مەن جۇڭگونىڭ ديپلوماتيالىق قارىم - قاتىناس ورناتۋ تاريحىنا ات سالىسقانىمدى وتە داڭق سانايمىن، بۇگىنگى تاڭدا، مەن فيليپپين مەن جۇڭگونىڭ ءداستۇرلى دوستىعىن ۇزدىكسىز ىلگەرىلەتۋ سىندى ماڭىزدى جاۋاپكەرشىلىكتى ارقالايمىن. مەن ءتوراعا شي جينپيڭمەن تىعىز بايلانىستى ساقتاپ، سەلبەستىكتى جان - جاقتى كۇشەيتىپ، فيليپپين مەن جۇڭگونىڭ جان - جاقتى ستراتەگيالىق سەلبەستىك قارىم - قاتىناسىنىڭ جاڭا تاراۋىن باستاپ، ەكى ەل بىرگە ءدوپ كەلىپ وتىرعان سىن - سايىستار مەن ماسەلەلەردى اناعۇرلىم ويداعىداي سەلبەسىپ شەشىپ، ەكى ەل حالقىن اناعۇرلىم ويداعىداي باقىتقا كەنەلتۋدى ءارى وسى ءوڭىردىڭ قايتادان دۇنيە ءجۇزى ەكونوميكاسىنىڭ ماڭىزدى قوزعالتقىشىنا اينالۋىن ىلگەرىلەتۋگە تىڭ ۇلەس قوسۋدى ءۇمىت ەتەمىن. فيليپپين جاق جۇڭگو جاقپەن كومەسكى كۇشتەردى اشىپ، ەكى ەل قارىم - قاتىناسىنىڭ مازمۇنىن ۇزدىكسىز بايىتىپ، اۋىل شارۋاشىلىعى، نەگىزدىك قۇرىلىس، ەنەرگيا، مادەنيەت، ساۋدا، قارجى قوسۋ، عىلىم - تەحنيكا، سيفرلى ەكونوميكا سياقتى سالالارداعى سەلبەستىكتى تەرەڭدەتۋدى قالايدى. بۇگىن ءبىزدىڭ قول قويۋعا بىرگە كۋا بولعان كوپتەگەن سەلبەستىك حۇجاتتارىمىزدىڭ فيليپپين مەملەكەتىنىڭ ەكونوميكالىق دامۋىنا بارىنشا دەم بەرەتىندىگىنە سەنەمىن. جۇڭگو - فيليپپيننىڭ ەڭ قۋاتتى سەلبەستىك سەرىگى، فيليپپين مەن جۇڭگو دوستىعىنىڭ جالعاسۋى مەن دامۋىنا ەشقانداي نارسە بوگەت بولا المايدى. فيليپپين جاق ءبىر جۇڭگو ساياساتىنا تاباندى بولادى. فيليپپين جاق تەڭىزگە قاتىستى ماسەلەنى دوستىق كەڭەس ارقىلى ۇزدىكسىز ۇيلەسىمدى ءبىر جاقتى ەتىپ، جۇڭگو جاقپەن مۇناي - تابيعي گاز اشۋ كەڭەسىن قايتا باستاۋدى قالايدى. جۇڭگو جاقتىڭ فيليپپيننىڭ ىندەتكە قارسى اتتانۋىنا كورسەتكەن قىمباتتى كومەگىنە العىس ايتامىن. ىندەت اياقتاعاننان كەيىن ءتىپتى دە كوپ جۇڭگو بۇقاراسىنىڭ فيليپپينگە بارىپ ساياحاتتاۋىن جانە ۇيرەنۋىن، ەكى ەل حالقىنىڭ بارىس - كەلىسىنىڭ اناعۇرلىم جيىلەپ، ەكى ەل قارىم - قاتىناسىنىڭ ۇزاق بولاشاقتىق دامۋىنا اناعۇرلىم بەرىك نەگىز قالاۋىن ءۇمىت ەتەمىن. مەن فيليپپين - جۇڭگو قارىم - قاتىناسىنىڭ دامۋ بولاشاعىنا كامىل سەنەمىن.
كەڭەستەن كەيىن، ەكى ەلدىڭ مەملەكەت باسشىلارى ”ءبىر بەلدەۋ، ءبىر جول“، اۋىل شارۋاشىلىعى، بالىق شارۋاشىلىعى، نەگىزدىك قۇرىلعى، فينانس، كەدەن، ەلەكتروندىق ساۋدا، ساياحات سياقتى قاتىستى سەلبەستىك حۇجاتتارىنا قول قويۋعا بىرگە كۋا بولدى.
كەڭەستىڭ الدىندا، شي جينپيڭ حالىق سارايىنىڭ سولتۇستىك زالىندا ماركوستى قارسى الۋ سالتىن وتكىزدى.
تيان - انمىن الاڭىندا 21 رەت قۇرمەت ساليۋتى اتىلدى، قۇرمەت قاراۋىلى قاتار تۇزەپ قۇرمەت ءبىلدىردى، قوناق قابىلدايتىن كىشى كەرنايشىلار قۇرمەت اۋەنىن ورىندادى. ەكى ەلدىڭ مەملەكەت باسشىلارى پارات مىنبەسىنە شىعىپ، اسكەري وركەستر جۇڭگو مەن فيليپپين ەكى ەلدىڭ مەملەكەت ءانىن ورىندادى. ماركوس شي جينپيڭنىڭ سەرىك بولۋىمەن جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن تاماشالادى.
شي جينپيڭنىڭ حانىمى پىڭ لييۋان مەن ماركوستىڭ حانىمى ليسا قارسى الۋ سالتىنا بىرگە قاتىناستى.
سول كۇنى كەشتە شي جينپيڭ مەن حانىمى پىڭ لييۋان حالىق سارايىنىڭ جينسى زالىندا ماركوس پەن حانىمى ليساعا ارناپ قارسى الۋ قوناعاسىن وتكىزدى.
ۋاڭ ي، حى ليفىڭ قاتارلىلار قاتىستى قيمىلدارعا قاتىناستى.
ماركوستىڭ جۇڭگوداعى ساپارى كەزىندە ەكى جاق تاعى «جۇڭحۋا حالىق رەسپۋبليكاسى مەن فيليپپين رەسپۋبليكاسىنىڭ بىرلەسكەن مالىمدەمەسىن» جاريالايدى.
