تيانشان تورى - شينجياڭ گازەتىنىڭ ءتىلشىسى ۋي يۇڭگۇي، ەرىكتى ءتىلشى تيان تىڭشان
”بۇگىن ءبىز وسى اراعا تيجارات كۋالىگىن بىتىرۋگە كەلگەن ەدىك، انار مۇقامادەننىڭ ايتۋىمەن، كوپ ۋاقىت جۇمساماي - اق جۇمىسىمىزدى ءبىتىرىپ، تيجارات كۋالىگىن قولىمىزعا الدىق، انارعا العىس ايتامىن“،- دەدى قۇمىل قالاسى باركول قازاق اۆتونوميالى اۋدانى اكىمشىلىك قىزمەت وتەۋ ورتالىعىندا اۋدان قالاشىق تۇرعىنى پەريزات باقىتبەك.
”بۇل قاراپايىم عانا قىزمەت، مەن كۇندە وسىلاي بىتىرەمىن“. انار ءوزى جونىندەگى وسىنداي ماقتاۋلار جايىندا تىلشىگە جوعارى ءونىمدى، ساپالى قىزمەت وتەۋ جونىندە توقتالدى: ”ءار جولى جۇمىس بىتىرۋگە كەلگەن بۇقارانى كورگەنىمدە، ولاردىڭ ورنىنا ءوزىمدى قويىپ كورەمىن، ياعني مەن ءوزىم بىرەر جۇمىس بىتىرۋگە كەلگەن بولسام، قانداي قىزمەت وتەۋدى قاجەت ەتۋىم مۇمكىن؟ قانداي جاۋاپقا يە بولۋدى ءۇمىت ەتەمىن؟ دەگەن ويدىڭ جەتەگىندە بولامىن دا بۇقاراعا ءىس ءبىتىرۋ جولىن كورسەتىپ، قاتىستى ىستەرىن جىلدام ءبىتىرىپ الۋىنا مۇمكىندىك جاسايمىن“.
انار مۇقامادەن ءىس بىتىرە كەلگەن ءبىر تۇرعىننىڭ توردا ماتەريال جولداۋىنا كومەكتەسۋدە. سۋرەتتى ياڭ ياچي تۇسىرگەن
انار اكىمشىلىك قىزمەت ورتالىعىنىڭ تەزەرەلىك ورنىندا جەكەشە ساۋدا - ونەركاسىپشىلەر جانە كاسىپورىنداردىڭ تىركەلۋ، تىزىمگە الۋ قىزمەتىن ىستەيدى. تاياۋ جىلداردان بەرى، اۆتونوميالى رايون ساۋدا ىستەرى ءتۇزىمى رەفورماسىن ءۇرتىس ىلگەرىلەتىپ، شارۋاشىلىق - ساۋدا ورتاسىن ۇزدىكسىز جاقسارتۋ، وتە - موتە، بازار تيجارات نەگىزگى تۇلعاسىن قۇرۋ، اشۋ سياقتى قىزمەت بۋىندارىنا قاراتا، ”ەڭ كوپ بولعاندا ءبىر رەت بارۋ“ تالابىن قويدى. تەرەزەلىك جۇمىستاعى قىزمەتكەر رەتىندە انار تەرەزەلىك ورىندا عانا ەمەس، اۋەلى، ءىس بىتىرۋگە كەلگەن ەگدەلەپ قالعان كىسىلەردىڭ ءىس بىتىرۋدەگى قيىندىقتارىنا كومەكتەسەدى، ءىس بىتىرۋدىڭ بارىستارىن جانە ناقتى تالاپتارىن باپتاپ تۇسىندىرەدى. ”ەڭ كوپ بولعاندا ءبىر رەت بارۋ“ تالابىن ىسكە اسىرۋ ءۇشىن، ءىس بىتىرۋدە قينالىپ تۇرعان جۇرتشىلىققا قاشان دا سابىرلىلىقپەن قىزمەت وتەيدى. قىزمەت قابىلەتىن جوعارىلاتۋ ءۇشىن، ول قىزمەتتەن باسقا ۋاقىتتارىنان پايدالانىپ، كاسىپورىنداردىڭ شارۋاشىلىق جۇرگىزۋىنە قاتىستى زاڭدار مەن ەرەجەلەردى جانە اكىمشىلىك تەكسەرىپ - بەكىتۋ ىستەرىنە قاتىستى بىلىمدەردى مۇقيات ۇيرەندى. ءبىرقانشا جىلدان بەرى، ول كۇنىنە ورتا ەسەپپەن 30 قانشا ءىس بىتىرۋ جۇمىسىن ورىندايدى، قىزمەت ونىمدىلىگى جوعارى بولىپ قالماستان، جۇمىستارىنان تيتتەي دە اعاتتىق جىبەرمەدى.
”انار ادەتتە كاسىپتىك ۇيرەنۋگە ەرەكشە ءمان بەرەدى، ول مەكەمەنىڭ ورگان كەڭسەسىندە، اكىمشىلىك تەكسەرىپ - بەكىتۋ كەڭسەسىندە قىزمەتتەردە بولعان. قانداي قىزمەت بولسا دا قىزمەتىن ءسۇيىپ، كاسىپتەرىن قادىرلەپ كەلەدى“. باركول قازاق اۆتونوميالى اۋداندىق بازار باقىلاۋ - باسقارۋ مەكەمەسىنىڭ اكىمشىلىك تەكسەرىپ - بەكىتۋ كەڭسەسىنىڭ مەڭگەرۋشىسى گو سۇييىڭ اناردىڭ قىزمەتتە ىنتالى ەكەنىن، ”ۇعىسۋ، تيىمدىلىك جاساۋ، توعىستىرۋ“ بويىنشا قىستاقتا تۇرعان كەزىندە دە بۇقارا ءۇشىن ناقتى، جاقسى ءىس ىستەپ، بۇقارانىڭ القاۋىنا بولەنگەنىن ايتتى.
انار 2015 - جىلى قىزمەتكە قاتىناسقاننان كەيىن، كۇيسۋ قالاشىعى كۇيسۋ قىستاعىنا بارۋعا ىرىقتى تىزىمدەلىپ، وسى قىستاقتاعى ”ۇعىسۋ، تيىمدىلىك جاساۋ، توعىستىرۋ “ قىزمەت اترەتىنىڭ ءبىر مۇشەسى بولدى. قىستاقتا تۇرعان كەزدە قىستاق تۇرعىنى جامالقان تۇردىقاننىڭ وتباسىنداعى 2 جاسار قىزىنىڭ مي سالدانۋ اۋرۋىنا شالدىققانىن ۇعىسقاننان كەيىن وعان بەلسەنە كومەكتەستى. ينتەرنەتتەن پايدالانىپ حىنان ولكەسىنىڭ شينجياڭعا باعىتتامالى كومەكتەسەتىن مەديتسينا مامانىمەن حابارلاسىپ، مامانداردىڭ قاشىقتان دياگنوز قويۋىنا، ەمدەۋ جوباسىن بەلگىلەۋىنە مۇمكىندىك جاسادى. ءبىر مەزگىل ەمدەلگەننەن كەيىن، بالانىڭ اۋرۋ جاعدايى ەداۋىر جاقسارعان. قىستاقتا تۇرۋ مىندەتى اقىرلاسقاننان كەيىن دە وسى قىز بالانىڭ دەنساۋلىق جاعدايىن ەسىنەن شىعارمادى، قۋات تولىقتايتىن زاتتار اپارىپ بەرىپ، كوڭىلىن سۇراپ تۇردى. قازىر جامالقان تۇردىقان وتباسى انارمەن تۋعان تۋىسىنداي بولىپ كەتتى.
”بۇقاراعا قىزمەت وتەپ، اۋىلداستاردىڭ ماسەلەسىن شەشۋىنە كومەكتەسە السام ەرەكشە قۋانىشقا بولەنەمىن“،- دەيدى انار.
